Bai Yu Wokabaut Wantaim God?
“Bihainim pasin daun long wokabaut wantaim God bilong yu.”—MAIKA 6:8, NW.
1, 2. Olsem wanem tingting bilong Jehova long yumi i kain olsem tingting bilong wanpela papa o mama i lainim pikinini long wokabaut?
LIKLIK pikinini i sanap na lek bilong em i guria, na em i putim han i go bilong holim han bilong papa o mama, na em i traim long wokabaut liklik—em namba wan taim bilong em long wokabaut. Tru, dispela i olsem liklik samting, tasol long papa na mama em i wanpela bikpela samting i olsem piksa bilong ol samting pikinini bai mekim long bihain. Papamama i wetim taim ol inap holim han bilong pikinini na wokabaut wantaim em long ol mun na yia bihain. Long planti samting, ol i laik stiaim na soim rot long pikinini na helpim em i go inap long bihain bihain.
2 God Jehova i gat wankain tingting long ol pikinini bilong em long graun. Bipo em i bin tok long ol Israel olsem: “Mi yet mi bin lainim ol Israel, olsem papa i lainim pikinini long wokabaut. . . . Mi sori long ol na mi laikim ol tumas, na mi kisim ol i kam long mi.” (Hosea 11:3, 4) Long ol dispela ves Jehova i stori long em yet olsem wanpela gutpela papa i skulim liklik pikinini long wokabaut, na taim pikinini i pundaun, em i kisim pikinini na holimpas em. Jehova, em nambawan Papa tru, em i amamas long skulim yumi long wokabaut. Na em i amamas long wokabaut wantaim yumi taim yumi lain long mekim. Olsem as skripsa bilong dispela stadi i kamapim, yumi inap wokabaut wantaim God! (Maika 6:8) Tasol wanem mining bilong dispela tok, wokabaut wantaim God? Bilong wanem yumi mas wokabaut wantaim em? Olsem wanem yumi inap wokabaut wantaim em? Na yumi bai kisim wanem ol gutpela blesing taim yumi wokabaut wantaim em? Orait nau yumi bai skelim dispela 4-pela askim.
Mining Bilong Dispela Tok Wokabaut Wantaim God
3, 4. (a) Wanem gutpela samting tru long dispela tok piksa long wokabaut wantaim God? (b) Wanem mining bilong dispela tok, wokabaut wantaim God?
3 Jehova em i wanpela spirit, olsem na yumi ol man bilong graun i no inap wokabaut tru tru wantaim em. (Kisim Bek 33:20; Jon 4:24) Olsem na taim Baibel i tok long ol man i wokabaut wantaim God, em i mekim tok piksa. Em i wanpela gutpela piksa ol man inap lukim klia long tingting, maski ol i bilong wanem kantri o wanem lain, na maski ol i stap long wanem wanem taim. Dispela i olsem, long wanem, olgeta man inap kliagut long dispela tok piksa bilong tupela man i wokabaut wantaim. Em i makim olsem dispela tupela man i stap gutpela poroman, na em i helpim yumi long pilim gut mining bilong dispela tok long wokabaut wantaim God. Tasol nau yumi ken skelim gut mining tru bilong dispela tok.
4 Tingim dispela tupela gutpela man, em Enok na Noa. Tupela i mekim wanem na Baibel i tok ol i bin wokabaut wantaim God? (Stat 5:23, 24; 6:9) Long Baibel, dispela tok “wokabaut” i makim olsem man i bihainim wanpela rot, o pasin. Enok na Noa i bin bihainim wanpela pasin i stret wantaim laik bilong God Jehova. Tupela i no olsem ol lain i stap long taim bilong ol—tupela i lukluk i go long Jehova bilong soim rot long ol na ol i bihainim rot em i makim. Ol i bilip tru long em. Tasol yu ting Jehova yet i tingim na makim ol samting ol i mas mekim? Nogat. Jehova i bin wokim ol man i stap fri long bihainim wanem rot ol i laikim, na em i laik bai yumi mekim olsem, na yumi ken mekim wok long “stretpela tingting” bilong yumi. (Rom 12:1, NW ) Tasol taim yumi skelim ol samting yumi mas mekim, yumi bihainim pasin daun na larim Jehova i stiaim tingting bilong yumi, long wanem, tingting bilong em i winim tru tingting bilong yumi. (Sindaun 3:5, 6; Aisaia 55:8, 9) Laip bilong yumi i olsem wanpela rot, na yumi wokabaut wantaim Jehova long dispela rot.
5. Bilong wanem Jisas i tok long skruim wanpela kubit i go long laip bilong yumi?
5 Planti taim Baibel i tok laip bilong yumi i kain olsem wanpela rot yumi wokabaut long en. Sampela taim Baibel i kolim stret dispela tok piksa, tasol sampela taim em i mekim ol tok bilong makim dispela tok piksa, tasol dispela tok piksa yet i no stap ples klia. Olsem long wanpela tok Jisas i bin mekim, em i tok: “Sapos wanpela bilong yupela i wok long tingting planti long rot bilong i stap gut, ating dispela . . . bai i skruim liklik hap taim moa [inap wanpela kubit] long laip bilong en? I no inap tru.” (Matyu 6:27) Ating yu no kliagut long dispela tok “wanpela kubit,” a? Bilong wanem Jisas i tok long skruim wanpela kubit (45 sentimita samting), i go long “laip” bilong man?a Ol yia bilong laip bilong man, yumi no inap metaim long mita samting, a? Tasol ating Jisas i bin tingim laip i olsem wanpela wokabaut. Em i laik skulim yumi olsem pasin bilong tingting planti i no inap helpim yu long skruim liklik hap wokabaut moa i go long laip bilong yu. Tasol olsem wanem? Yumi mas ting olsem yumi no inap mekim wanpela samting bilong yumi ken wokabaut i go yet long dispela rot? Nogat tru, yumi no ken ting olsem! Orait nau yumi ken skelim namba 2 askim, Bilong wanem yumi mas wokabaut wantaim God?
Bilong Wanem Yumi Mas Wokabaut Wantaim God?
6, 7. Yumi ol man bilong graun i mas i gat wanem samting? Bilong wanem yumi mas larim Jehova i mekim olsem?
6 Jeremaia 10:23 i kamapim wanpela as na yumi mas wokabaut wantaim God, na em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” Olsem na yumi ol man bilong graun i no gat save long bosim wokabaut bilong yumi yet, na tu, em i no wok bilong yumi long mekim olsem. Yumi mas i gat man bilong soim rot long yumi. Ol man i strong long bosim wokabaut bilong ol yet na i no larim God i soim rot long ol, ol i mekim wankain popaia olsem Adam na Iv i bin mekim. Tupela i ting em wok bilong ol yet long makim wanem samting i gutpela na wanem samting i nogut. (Stat 3:1-6) Em nau, em i no wok bilong yumi long bosim wokabaut bilong yumi yet.
7 Olsem wanem? Yu pilim olsem i mas i gat man bilong soim rot long yu? Long olgeta de i gat sampela samting yumi mas wokim tingting long en, em ol liklik samting na ol bikpela samting. Sampela bilong ol dispela samting i hatwok long wokim tingting long en na ol inap helpim o nogutim i stap bilong yumi long bihain—na i stap bilong famili tu. Tasol tingim dispela: I gat wanpela Man em i gat bikpela krismas na savetingting bilong em i winim bilong yumi, na em i amamas long stiaim yumi long wokim gut tingting long ol dispela samting! Tasol sori tru, planti man long nau ol i ting ol yet inap skelim ol samting ol i mas mekim na stiaim wokabaut bilong ol yet. Ol i sakim tok i stap long Sindaun 28:26: “Sapos man i ting, save bilong em yet inap helpim em long mekim olgeta samting, orait em i no gat gutpela tingting. Tasol sapos man i bihainim pasin bilong gutpela tingting, em bai i stap gut.” Jehova i laik bai yumi abrusim ol hevi i save kamap long man i bilip tumas long save bilong em yet. (Jeremaia 17:9) Em i laik bai yumi bihainim gutpela tingting na wokabaut, na bilip long em olsem Man Bilong Soim Rot long yumi na Man Bilong Skulim yumi. Taim yumi mekim olsem, orait wokabaut bilong yumi long dispela laip nau em bai i gutpela na yumi stap belgut.
8. Sin i save bringim ol man i go long wanem ples? Tasol Jehova i gat wanem laik long yumi?
8 Yumi laik wokabaut i go inap long wanem mak em i namba 2 as na yumi mas wokabaut wantaim God. Baibel i mekim wanpela strongpela tok i tru. Olgeta man bilong graun i wokabaut long rot i bringim ol i go long wanpela ples tasol. Saveman 12:5 (NW ) i stori long ol hevi i save painim man taim em i kamap lapun, olsem: “Man i wokabaut i go long haus em bai stap longtaim tru long en, na ol lain bilong krai sori ol i wokabaut long rot.” Wanem dispela “haus em bai stap longtaim tru”? Em matmat, em sin i bringim yumi i go long en. (Rom 6:23) Tasol Jehova i no laik bai yumi wokabaut inap sotpela taim tasol na painim planti hevi kirap long taim mama i karim yumi na i go inap long taim yumi go long matmat. (Jop 14:1) Yumi mas wokabaut wantaim God sapos yumi laik wokabaut inap long mak em Jehova i bin laikim long pastaim tru—inap oltaim oltaim. Ating yu gat dispela laik, a? Olsem na yu mas wokabaut wantaim Papa bilong yu.
Olsem Wanem Yumi Inap Wokabaut Wantaim God?
9. Bilong wanem sampela taim Jehova i hait long lain bilong em? Tasol em i givim wanem gutpela tok long ol olsem Aisaia 30:20 i tok?
9 Namba 3 askim yumi laik skelim, em samting yumi mas tingim gut. Olsem wanem yumi inap wokabaut wantaim God? Bekim i stap long Aisaia 30:20, 21: “[Nambawan Bikpela Tisa] bai i stap wantaim yupela na skulim yupela. Na bai yupela i no inap painim em moa. Nogat. Bai yupela i lukim em long ai bilong yupela yet. Na taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” Ating dispela tok bilong Jehova long ves 20 i kirapim lain bilong em long tingim taim ol i bin bikhet long em na i olsem em i hait long ol. (Aisaia 1:15; 59:2) Tasol ol ves hia i soim olsem Jehova i no hait long lain bilong em i stap gut long em—em i sanap ples klia, olsem long ai bilong ol. I olsem wanpela tisa i sanap long ai bilong ol sumatin na i soim ol long samting em i laik lainim ol long en.
10. Olsem wanem yu inap harim nek bilong Nambawan Bikpela Tisa ‘i stap baksait long yu’?
10 Long ves 21 yumi lukim narapela tok piksa. I olsem Jehova i wokabaut baksait long lain bilong em na i tokim ol long rot i stret long bihainim. Sampela saveman bilong Baibel i ting dispela tok i makim pasin bilong wasman bilong sipsip, sampela taim em i save wokabaut baksait long ol sipsip na singaut bilong stiaim ol i go stret, nogut ol i paul na bihainim narapela rot. Orait olsem wanem dispela tok piksa i makim yumi? Taim yumi go long Baibel bilong soim rot long yumi, yumi ritim ol tok ol i bin raitim sampela tausen yia i go pinis. I olsem dispela tok i kamap baksait long yumi, long wanem, ol i bin raitim long bipo yet. Tasol ol dispela tok i stret yet long yumi ol man bilong nau tu, wankain olsem long taim ol i bin raitim. Ol tok bilong Baibel inap soim rot long yumi long olgeta samting yumi mas skelim long olgeta wan wan de, na em inap helpim yumi long tingim na makim rot bai yumi bihainim i go inap long ol yia bihain. (Song 119:105) Taim yumi wok strong long painim na ritim ol dispela gutpela tok kaunsel na yumi bihainim, orait Jehova i stap olsem Man Bilong Soim Rot long yumi. Long dispela pasin yumi wokabaut wantaim God.
11. Olsem Jeremaia 6:16 i tok, Jehova i givim wanem gutpela tok piksa long lain bilong em? Tasol ol i tok wanem?
11 Olsem wanem? Yumi save larim Tok Bilong God i soim rot long yumi olsem? Sampela taim i gutpela sapos yumi skelim gut pasin bilong yumi yet. Tingim wanpela ves em bai helpim yumi long mekim olsem: “Bikpela i tokim ol manmeri bilong en olsem, ‘Yupela i mas tingting gut long wanem rot yupela i laik bihainim. Yupela i mas painim dispela gutpela rot ol tumbuna i bin bihainim. Na yupela tu i mas bihainim dispela rot, na bai ol samting i no ken givim hevi long yupela na bai bel bilong yupela i painim malolo.’ ” (Jeremaia 6:16) Dispela ves inap kirapim yumi long tingim man i laik go long wanpela hap na em i sanap long rot bung bilong askim ol man long soim rot long em. Long ol samting bilong spirit, ol bikhetlain bilong Jehova long Israel i mas mekim kain samting olsem. Ol i mas painim rot i go bek long “dispela gutpela rot ol tumbuna i bin bihainim,” tasol ol i bin mekim pasin kranki na lusim dispela rot. Sori tru, ol Israel i bikhet long dispela gutpela toksave bilong Jehova. Dispela ves i tok moa: “Tasol ol Israel i tok olsem, ‘Mipela i no ken bihainim dispela rot.’ ” Tasol long taim bilong yumi, lain bilong Jehova i no bin sakim dispela kain tok kaunsel.
12, 13. (a) Lain bilong Krais em God i bin makim ol, ol i mekim wanem long tok bilong Jeremaia 6:16? (b) Olsem wanem yumi ken skelim pasin bilong yumi long wokabaut?
12 Kirap long 1890 samting, lain bilong Krais em God i bin makim long holi spirit ol i bihainim ol tok i stap long Jeremaia 6:16. Dispela lain i bin go pas na givim bel olgeta long kam bek long “dispela gutpela rot ol tumbuna i bin bihainim.” Ol i no olsem lain Kristendom i bin tromoi bilip i tru, nogat; ol i stap gut long bihainim “ol dispela gutpela tok” em Jisas Krais i bin kamapim na ol gutpela disaipel bilong em i bin bihainim long taim bilong ol aposel. (2 Timoti 1:13) I kam inap long nau, dispela lain em God i bin makim ol i wok long helpim narapela narapela long lain bilong ol wantaim ol poroman bilong ol bilong lain “arapela sipsip,” long bihainim rot bilong i stap gut na stap amamas, em ol Kristendom i lusim pinis.—Jon 10:16.
13 Gutpela lain wokboi i save givim kaikai bilong spirit long taim stret, na long dispela rot ol i bin helpim planti milion manmeri long painim “dispela gutpela rot ol tumbuna i bin bihainim” na long wokabaut wantaim God. (Matyu 24:45-47) Olsem wanem long yu? Yu wanpela bilong ol dispela planti milion manmeri? Sapos olsem, orait yu ken mekim wanem na bai yu no ken lusim dispela rot na bihainim rot yu yet i makim? I gutpela sapos sampela taim yu skelim wokabaut yu bihainim long i stap bilong yu. Sapos oltaim yu ritim Baibel na ol buk samting i kamapim ol tok bilong Baibel na yu go long ol miting em dispela lain God i bin makim ol i save putim bilong skulim yumi, em nau, yu kisim trening long wokabaut wantaim God. Na taim yu mekim pasin daun na bihainim ol tok ol i givim long yu, em nau, yu wokabaut wantaim God na yu bihainim “dispela gutpela rot ol tumbuna i bin bihainim.”
Wokabaut Olsem “Man i Bin Lukim God”
14. Sapos yumi tingim Jehova i stap tru tru, olsem wanem dispela bai kamap ples klia long ol samting yumi tingting long mekim?
14 Bilong wokabaut wantaim Jehova, yumi mas tingim olsem em i stap tru tru. Bipo Jehova i bin tokim ol Israel i stap gut long em olsem em i no stap hait long ol. Long nau tu em i kamapim em yet long lain bilong em olsem Nambawan Bikpela Tisa. Olsem wanem? Yu tingim Jehova olsem em i stap tru tru, i olsem em i sanap long ai bilong yu bilong skulim yu? Yumi mas i gat kain bilip olsem sapos yumi laik wokabaut wantaim God. Moses i gat dispela kain bilip, long wanem, em “i mekim wankain pasin olsem man i bin lukim God, na em i stap strong tru.” (Hibru 11:27) Sapos yumi tingim Jehova olsem em i stap tru tru, yumi bai tingim em taim yumi skelim ol samting yumi bai mekim. Olsem: Bai yumi no tingting long mekim sampela rong na yumi wok long haitim ol rong bilong yumi long ol elda Kristen o famili bilong yumi. Bai yumi wok strong long wokabaut wantaim God maski i no gat man inap lukim yumi. Olsem King Devit bilong bipo, yumi pasim tok long bel olsem: “Mi bai mekim stretpela pasin tasol long haus bilong mi.”—Song 101:2.
15. Olsem wanem pasin bilong bung wantaim ol bratasista Kristen i helpim yumi long tingim olsem Jehova i stap tru tru?
15 Jehova i save olsem yumi ol man bilong graun tasol na yumi gat sin, na sampela taim yumi hatwok long bilip long samting yumi no inap lukim. (Song 103:14) Em i save helpim yumi gut long daunim kain tingting kranki olsem. Em i bin bungim “wanpela lain i holim nem bilong em” na em i kisim ol namel long olgeta lain bilong graun. (Aposel 15:14, NW ) Yumi stap wanbel long mekim wok bilong Jehova, na narapela i save strongim narapela. Taim yumi harim olsem Jehova i bin helpim wanpela brata o sista bilong spirit long daunim sampela pasin kranki o winim wanpela bikpela traim, yumi tingim moa yet olsem God bilong yumi i stap tru tru.—1 Pita 5:9.
16. Taim yumi kisim save long Jisas, olsem wanem dispela bai helpim yumi long wokabaut wantaim God?
16 Na nambawan samting tru, Jehova i bin givim Pikinini bilong em olsem gutpela piksa yumi ken bihainim. Jisas i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6) Taim yumi stadi na kisim save long pasin Jisas i bihainim long i stap bilong em long graun, dispela i helpim yumi long tingim olsem Jehova i stap tru tru. Olgeta tok na olgeta samting Jisas i bin mekim i olsem nambawan piksa tru i kamapim stret pasin bilong Papa bilong em long heven. (Jon 14:9) Taim yumi wokim ol disisen long ol samting yumi laik mekim, yumi mas tingting gut olsem Jisas yet bai mekim olsem wanem. Sapos ol disisen bilong yumi i kamapim olsem yumi bin tingting gut na beten long ol dispela samting, orait dispela i makim olsem yumi bihainim pasin bilong Krais. (1 Pita 2:21) Em nau, yumi wokabaut wantaim God.
Wanem Gutpela Samting Bai Kamap?
17. Sapos yumi wokabaut long rot bilong Jehova, bai yumi painim wanem kain “malolo”?
17 Taim yumi wokabaut wantaim God Jehova, yumi kisim gutpela samting long en. Tingim tok promis Jehova i bin mekim long lain bilong em sapos ol i wok long painim dispela “gutpela rot.” Em i tok: “Bihainim dispela rot . . . na bai bel bilong yupela i painim malolo.” (Jeremaia 6:16) Wanem mining bilong dispela tok, “malolo”? Yu ting em i makim olsem yumi bai malolo na sindaun tasol na kisim ol amamas na planti gutpela samting bilong skin? Nogat. Samting em Jehova i givim i gutpela moa na i winim tru ol dispela samting, na planti maniman bilong graun i no save painim dispela samting. Bilong painim malolo i olsem yumi painim bel isi, bel i amamas, yumi belgut, na yumi inap tru long ol samting bilong spirit. Sapos yu painim dispela kain malolo, yu ken bilip tru olsem yu bin makim nambawan gutpela rot long bihainim long laip bilong yu. Dispela gutpela bel isi i hatwok tru long painim long dispela graun i gat planti hevi tru long en!
18. Jehova i laik givim wanem gutpela blesing long yu? Bai yu pasim wanem tok long bel?
18 Tru, laip yet em i wanpela gutpela samting tru yumi bin kisim! Maski yumi wokabaut inap sotpela hap tasol, em i gutpela—sapos yumi no bin wokabaut liklik, dispela i no gutpela. Tasol long pastaim tru Jehova i no bin tingting long yu mas wokabaut inap sotpela taim tasol, kirap long taim yu yangpela na yu gat strong na i go inap long taim yu lapun pinis na yu karim planti pen. Jehova i laik bai yu kisim nambawan gutpela blesing tru. Em i laik bai yu ken wokabaut wantaim em i go inap oltaim oltaim! Maika 4:5 i tok: “Maski olgeta arapela lain pipel i lotu long ol giaman god bilong ol yet na bihainim ol, bai yumi Israel i lotu long God, Bikpela bilong yumi oltaim oltaim, na bihainim em wanpela tasol.” Yu laik kisim tru dispela blesing? Yu laik kisim “dispela laip em i laip tru,” em Jehova i singautim yumi long kisim? (1 Timoti 6:19) Sapos olsem, orait yu mas pasim tok long bel olsem yu bai wokabaut wantaim Jehova long nau na tumora na long olgeta de bihain, i go inap oltaim oltaim!
[Futnot]
a Sampela Baibel i senisim dispela tok “kubit” long dispela ves na tanim olsem “liklik hap taim moa” (Buk Baibel, na The Emphatic Diaglott) o “wanpela minit tasol” (A Translation in the Language of the People, bilong Charles B. Williams). Tasol tok ol i bin raitim long pastaim tru, mining bilong en i olsem kubit, em inap olsem 45 sentimita.
Bai Yu Bekim Olsem Wanem?
• Wanem mining bilong dispela tok, wokabaut wantaim God?
• Bilong wanem yu pilim olsem yu mas wokabaut wantaim God?
• Wanem samting bai helpim yu long wokabaut wantaim God?
• Ol man i wokabaut wantaim God ol i save kisim wanem ol gutpela blesing?
[Ol Piksa long pes 23]
Long rot bilong Baibel yumi save harim nek bilong Jehova i stap baksait long yumi na i tok, dispela em i “rot”
[Piksa long pes 25]
Long ol miting yumi save kisim kaikai bilong spirit long taim stret