Yu Gat Wanem Tingting Long Indai?
INDAI i olsem wanpela blakpela klaut samting i karamapim yumi na i save stap wantaim yumi long olgeta taim, maski yumi gat strongpela skin o yumi maniman. Em inap painim yumi long narapela taim yumi brukim rot o long narapela taim yumi go slip. Ol bagarap kain olsem ol teroris i bin kamapim long New York City na Washington, D.C., long Septemba 11, 2001, i soim olsem dispela laspela “birua,” em indai, em i save painim ol man i gat kain kain sindaun na kain kain krismas, na em inap painim planti tausen man insait long sampela minit tasol.—1 Korin 15:26.
Tasol maski i olsem, indai i save pulim tru tingting bilong planti man. Ol ripot long sampela man i dai, na moa yet sapos planti manmeri tru i dai long ol bikpela bagarap samting, dispela i save kirapim planti man moa long baim ol niuspepa samting na lukim nius long televisen. I luk olsem ol man i no save les long harim stori bilong indai i painim ol man, maski ol i dai long pait, bikpela bagarap bilong win ren samting, pasin raskol, o sik samting. Olsem na yumi kirap nogut long pasin ol man i save mekim long taim wanpela man o meri i gat nem i dai, olsem ol i save mekim bikpela krai sori i go i go.
Tru tumas, maski ol i mekim olsem, ol man i save laik yet long harim stori bilong indai—em stori bilong indai bilong ol narapela man. Tasol ol i save pret long tingim indai bilong ol yet. Indai bilong yumi yet em i wanpela samting planti bilong yumi i no laik tingim.
Tingting Planti Long Indai?
Taim yumi tingim indai bilong yumi yet, dispela em i wanpela samting nogut. Bilong wanem i olsem? Long wanem, God i bin putim tingting bilong i stap oltaim long bel bilong yumi. Saveman 3:11 long Baibel New World Translation i tok: “Em i putim tingting bilong laip i stap oltaim long bel bilong ol man.” Olsem na dispela pasin olsem yumi no inap abrusim indai, em i kirapim kain kain tingting long bel bilong yumi, em narapela i save pait wantaim narapela. Bilong daunim dispela pait i stap long bel na inapim laik bilong i stap oltaim, ol man i bin kamapim kain kain bilip, olsem yumi gat wanpela spirit i no save dai, na taim yumi dai yumi save kamap nupela gen long narapela bodi, na ol kain bilip olsem.
Indai em samting i save givim hevi long ol man na i pretim ol, na pasin bilong pret long indai i stap long olgeta hap. Olsem na ol man i save tingim indai olsem wanpela samting nogut bai painim ol. Olsem: Sapos man i givim bel long painim mani kago samting na kisim namba, orait taim em i dai dispela olgeta samting i olsem samting nating.
Ol i Stap Wanpis Taim Ol i Laik Dai?
Long bipo, taim man i kisim bikpela sik o bagarap bilong i dai, ol i save bringim em i go long haus bilong em na bai em i dai long dispela hap em i save laikim tumas. Ol i bin mekim olsem long taim bilong ol man i bin raitim Baibel, na nau tu long sampela hap ol man i save bihainim yet dispela pasin. (Stat 49:1, 2, 33) Taim wanpela man i dai olsem, famili olgeta i save bung wantaim na ol pikinini tu i insait long ol toktok ol i mekim. Dispela pasin i helpim olgeta wan wan long famili long pilim olsem ol i no stap wanpis long pilim dispela bel hevi, na ol i save olsem ol narapela bai helpim ol long mekim ol wok samting na long krai sori wantaim.
Tasol long sampela hap ol man i gat narapela kain tingting tru. Ol i save tingim indai i olsem wanpela samting i tambu long toktok long en na toktok bilong indai i save bagarapim bel bilong man. Ol i no larim ol pikinini i harim ol toktok ol i mekim, long wanem, ol i ting dispela bai mekim ol i “bel hevi moa yet.” Long nau, long planti samting, indai i narapela kain, na planti man i save stap wanpis taim ol i dai. Tru, planti man i laik bai ol i stap long haus bilong ol yet na famili i mekim gut long ol i go inap long taim ol i dai, tasol sori tru, long planti man i no olsem. Planti ol i dai long haus sik taim ol i stap wanpis, na pilim pen, na stap namel long ol kain kain masin. Na samting i nogut moa yet i olsem: Planti milion man ol i dai long ol pait i kamap bilong pinisim wanpela lain olgeta, long ol bikpela hangre, sik AIDS, ol pait i kamap insait long kantri, o ol i stap rabis olgeta na ol i dai.
Samting Bilong Tingim Gut
Baibel i no tok yumi no ken tingim indai. Saveman 7:2 i tok: “Sapos yumi go long haus we ol man i krai long man i dai pinis, em i gutpela pasin na i winim pasin bilong go long haus we ol i mekim bikpela kaikai. Long wanem, yumi olgeta i mas i dai.” Taim yumi tingim indai em samting i save painim yumi olgeta, ating bai yumi no strong tumas long tingim ol wok samting yumi mekim long olgeta de—bai yumi tingting olsem yumi save stap sotpela taim tasol. Dispela inap helpim yumi long tingim gut ol samting yumi mekim na bai i stap bilong yumi i gat as bilong en, na bai yumi no mekim nating tasol.
Yu gat wanem tingting long indai? Yu bin skelim pinis ol tingting na bilip bilong yu, na ol samting yu wet long en, na pret bilong yu long indai?
Olsem i stap bilong yumi man, indai tu em wanpela samting ol man i no inap klia gut long en. Wanpela man tasol em inap tokaut klia long dispela samting, em Man bilong wokim yumi. Em i “as tru bilong laip” na em i save “helpim yumi na yumi no i dai.” (Song 36:9; 68:20) Ating yumi bai kirap nogut olsem taim yumi skelim sampela bilip bilong ol man long indai wantaim ol tok bilong Baibel, dispela bai mekim gut bel bilong yumi na strongim yumi. Bai yumi lukim olsem indai i no pinis tru tru bilong yumi man.
[Rait long pes 4]
Yumi save indai inap painim yumi, olsem na dispela i helpim yumi long mekim ol samting na bai i stap bilong yumi i gat as bilong en