Yu Stap Bilong Mekim Wanem?

“Mi laik painimaut wanem samting i gutpela bilong ol manmeri i ken mekim long dispela liklik taim ol i stap long graun.”​—⁠SAVEMAN 2:⁠3.

YU SAVE tingim ol samting bilong yu yet, a? Em pasin bilong yumi man. Olsem na yumi save kaikai long olgeta de, na taim skin bilong yumi i les, yumi save slip, na yumi laik i stap wantaim ol pren na famili bilong yumi. Sampela taim yumi save mekim ol pilai, o waswas long solwara samting, o mekim ol narapela samting yumi amamas long mekim, na dispela i kamapim klia olsem yumi save tingim ol samting bilong yumi yet, tasol yumi mekim inap long skel tasol.

² Dispela pasin bilong tingim ol samting bilong yumi yet, em i stret wantaim tok em God i bin kirapim Solomon long raitim, olsem: “Yumi save kaikai na dring, na amamas long wok bilong yumi.” Na Solomon i tok moa olsem: “Dispela i no samting bilong yumi man tasol. Nogat. God yet i as bilong en. Sapos God i no larim yumi i kaikai na amamas, olsem wanem na yumi inap mekim dispela pasin?”​—⁠Saveman 2:​24, 25.

³ Tasol yu save, yumi no kaikai, dring, slip, na mekim sampela gutpela samting na em tasol, nogat. Yumi save kisim pen, na bel hevi, na yumi save tingting planti long ol samting. Na i olsem yumi gat planti wok tumas na yumi no gat taim bilong tingting olsem yumi stap bilong mekim wanem. Ating dispela samting i bin painim yu tu, a? Vermont Royster, bipo em i edita bilong wanpela nius (The Wall Street Journal) em i lukim save bilong ol man i go bikpela na em i tok: “Mi lukim wanpela samting i narapela kain, olsem: Taim yumi tingim yumi man, na ol samting yumi tingting planti long en, na i stap bilong yumi long dispela graun, yumi lukim olsem save bilong yumi i no go bikpela tumas​—⁠em i olsem wankain long taim ol man i bin kamap nupela. Long bipo yet na i kam inap nau, ol dispela askim i stap: ‘Yumi stap bilong mekim wanem? Na wanem samting bai painim yumi long bihain?’ ”

⁴ Bai yu tok wanem bilong bekim ol dispela askim: Yumi stap bilong mekim wanem? Na wanem samting bai painim yumi long bihain? Long mun Julai i go pinis, Mista Royster i dai. Yu ting em i bin painim gutpela bekim bilong ol dispela askim? Na bikpela samting moa i olsem: Yu inap painim gutpela bekim bilong ol dispela askim? Na sapos yu painim pinis ol gutpela bekim, orait olsem wanem dispela bai helpim yu long i stap amamas na bai yu pilim olsem i stap bilong yu i gat as bilong en? Orait nau yumi ken stori long dispela samting.

As Bilong Kisim Gutpela Tingting

⁵ Sapos yumi wan wan i wok long painim as bilong i stap bilong yumi, olsem yumi stap bilong mekim wanem, ating bai yumi no inap painim​—⁠na i wankain tu long klostu olgeta man na meri, maski ol i gat bikpela save long ol samting. Tasol i no olsem yumi wan wan i mas painim na i no gat wanpela bilong helpim yumi, nogat. Man bilong wokim yumi em i bin wokim rot bilong helpim yumi. Tingim dispela samting: Em i As tru bilong olgeta gutpela tingting na save, na em i stap “oltaim oltaim . . . long bipo na long bihain tu,” na em i gat bikpela save long olgeta samting bilong ples antap na bilong graun, na em i gat save long olgeta samting i bin kamap bipo. (Song 90:​1, 2) Em i bin wokim ol man na em i lukim olgeta samting i bin painim ol, olsem na yumi mas go long em bilong kisim gutpela tingting na save. Yumi no ken i go long ol man bilong dispela graun, em ol i no gat bikpela save tumas o gutpela tingting tru.​—⁠Song 14:​1-3; Rom 3:​10-​12.

⁶ Tru, yumi no ken ting Man bilong wokim yumi bai toktok wantaim yumi na kamapim long ples klia olsem i gat wanem as na yumi i stap, tasol em i bin givim wanpela samting long yumi em inap givim gutpela tingting na save long yumi​—⁠em Baibel. (Song 32:8; 111:10) Buk Saveman inap helpim yumi tru long dispela samting. God i bin givim tingting long man bilong raitim Buk Saveman, olsem na “gutpela tingting na save bilong [Solomon] i winim save bilong ol saveman bilong hap sankamap.” (1 King 3:​6-​12; 4:​30-​34) Wanpela kwin i bin kam lukim Solomon na kwin i kirap nogut long “gutpela tingting na save” bilong em, olsem na kwin i tok, ol samting nau em i lukim i winim tru ol samting em i bin harim tok long en, na ol man i save harim ol gutpela tingting bilong Solomon, ol bai amamas tru.a (1 King 10:​4-8) Yumi tu inap kisim gutpela tingting na amamas em Man bilong wokim yumi i givim long yumi long rot bilong Solomon.

⁷ Buk Saveman i kamapim klia gutpela tingting na save bilong God, na dispela i mekim wok insait long bel na tingting bilong Solomon. Solomon i gat taim, na mani samting, na gutpela tingting na save, olsem na em i skelim “olgeta samting i [bin] kamap long dispela graun.” Em i lukim olsem planti samting bilong dispela graun “i no gat as bilong en. I olsem wanpela man i ran i go bilong holimpas win.” God yet i bin stiaim tingting bilong Solomon na em i mekim dispela tok, olsem na yumi mas tingim gut tok bilong em taim yumi laik skelim i stap bilong yumi, yumi stap bilong mekim wanem. (Saveman 1:​13, 14, 16) Solomon i tokaut stret na klia. Tingim tok bilong em i stap long Saveman 1:​15, 18. Yu save pinis, insait long planti tausen yia ol man i bin traim kain kain gavman, na sampela taim ol i givim bel tru long painim rot bilong stretim ol hevi na helpim ol man long kisim gutpela sindaun. Tasol olsem wanem? I gat wanpela gavman i bin stretim olgeta samting i “krungut” pinis long dispela graun? Na ating yu lukim pinis olsem taim ol man i wok long kisim bikpela save moa, ol i save moa olsem insait long dispela sotpela taim ol i stap laip, ol i no inap tru long stretim olgeta hevi bilong graun. Tru, planti man i bel hevi taim ol i save long dispela samting, tasol i no olsem yumi mas bel hevi long dispela samting.

⁸ Narapela samting yumi mas tingim, em ol samting i save kamap long olgeta taim na i mekim sampela samting long yumi, olsem san i save kam antap na i go daun gen, na win i save wokabaut na wara i save ran i go. Ol dispela samting i bin i stap long taim bilong Moses, Solomon, Napoleon, na ol tumbuna bilong yumi. Na ol dispela samting i wok yet i stap. Na olsem tu, “ol manmeri i save dai na nupela lain i save kamap na senisim ol.” (Saveman 1:​4-7) Long tingting bilong yumi man, ol samting i no senis​—⁠ol i stap olsem tasol. Ol man bilong bipo na bilong nau tu ol i mekim ol wankain wok samting, na ol tu i wetim gutpela samting i kamap bihain, na ol i gat wankain laik long mekim ol samting, na sampela wok bilong ol tu i bin kamap gutpela. Na sapos namel long ol manmeri bilong graun wanpela i bin kisim biknem long samting em i bin mekim, o skin bilong em i naispela tru, winim ol narapela, o em i gat save tru long mekim wanpela samting, orait dispela man o meri i stap we long nau? Em i go pinis, na ating ol man i lusim tingting pinis long em. Dispela tok i no bilong mekim man i bel hevi tasol, nogat. Planti man i no save long nem bilong papamama bilong lapun bubu bilong ol, o save long ples mama i bin karim ol, o ples ol i bin planim ol. Em nau, yu save bilong wanem Solomon i tok, ol wok bilong ol man i no gat as bilong en.​—⁠Saveman 1:​9-​11.

⁹ Dispela gutpela tingting na save bilong God i kamapim stret ol hevi long i stap bilong yumi man, tasol dispela i no bilong mekim yumi i bel hevi, nogat; em inap givim stretpela tingting long yumi na bai yumi no tingim tumas ol wok samting yumi laik mekim em liklik taim ol bai pinis na ol man bai lusim tingting olgeta long en​—⁠bai yumi no ting ol dispela samting i bikpela samting tumas. Dispela tingting na save bilong God i mas helpim yumi long skelim ol samting long i stap bilong yumi na wanem samting yumi laik mekim. Olsem: Yumi no laik bihainim pasin bilong ol man i save daunim olgeta laik bilong skin; yumi inap kisim amamas long kaikai na dring long skel tasol. (Saveman 2:​24) Na laspela tok bilong Solomon long i stap bilong yumi man, em i gat stretpela tingting tru long en na yumi inap tingim gutpela samting bai kamap bihain. Yumi ken sotim dispela tok bilong em olsem: Yumi mas tenkyu tru long yumi pas gut wantaim Man bilong wokim yumi, em inap helpim yumi long i stap amamas inap oltaim oltaim long bihain, na bai i gat as bilong i stap bilong yumi. Solomon i tok olsem: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”​—⁠Saveman 12:⁠13.

Tingim Ol Samting i Save Kamap Long i Stap Bilong Yumi Man

¹⁰ Gutpela tingting na save bilong God i stap long Buk Saveman em inap helpim yumi tu long skelim olsem yumi stap bilong mekim wanem. Olsem wanem em inap helpim yumi olsem? Long wanem, Solomon i kamapim sampela tok i tru moa em yumi no save tingim tumas. Wanpela tok i tru i soim yumi olsem, i gat sampela samting bilong ol man na ol animal i wankain liklik. Jisas i tok lain bilong em i olsem sipsip, tasol ol man i no save amamas sapos yumi tok ol i kain olsem ol animal. (Jon 10:​11-​16) Tasol Solomon i tokaut long sampela samting i stret tru, olsem: “God i traim yumi [ol man bilong graun] bilong soim yumi olsem, yumi man i wankain olsem ol abus tasol. Long wanem, pinis bilong yumi man i wankain olsem ol abus. Ol abus i save dai, na yumi man tu i save dai. . . . Olsem na laip bilong man i no winim laip bilong abus. Nogat. Laip bilong tupela wantaim i olsem samting nating. God i bin kisim graun na wokim tupela, olsem na taim tupela i dai bai tupela i kamap olsem graun gen.”​—⁠Saveman 3:​18-​20.

¹¹ Tingim wanpela animal yu save amamas long lukim, olsem wanpela mumut i save stap long ples ston, o wanpela rabit. (Lo 14:7; Song 104:18; Sindaun 30:26) O yu ken tingim wanpela kain liklik animal ol i kolim skwirel, i gat olsem 300 kain i stap long graun. Wanem samting i save painim em taim em i kamap nupela i go inap long taim em i dai? Taim mama i karim em pinis, mama i save holim na givim susu long en inap sampela wik. I no longtaim na gras bilong en i kamap na em inap lusim haus bilong en na go ausait. Yu inap lukim em i ran i go nabaut na lain long painim kaikai. Tasol planti taim i olsem em i pilai tasol, olsem em i amamas long i stap pikinini yet. Taim em i gat wanpela krismas samting, em i painim poroman. Orait nau em i mas wokim haus na lukautim ol pikinini bilong en. Sapos em i painim planti kaikai, olsem pikinini bilong ol rop samting bilong bus na galip na olkain pikinini bilong diwai, famili bilong en bai kamap patpela na ol i gat taim bilong skruim haus bilong ol i go bikpela. Tasol i no longtaim​—⁠inap sampela yia tasol​—⁠em i save go lapun na olkain bagarap na sik i save painim em. Taim em i gat 10-pela krismas samting em i save dai. Dispela em i pasin bilong olgeta kain liklik animal olsem skwirel em yumi stori long en, maski sampela liklik samting bilong ol i narapela narapela kain liklik.

¹² Tru, planti man bai ting, dispela samting i painim ol animal i orait, na ol i no ting olsem ol dispela liklik animal olsem skwirel bai skelim gut olsem ol i stap bilong mekim wanem. Tasol i stap bilong planti manmeri i no narapela kain tumas long i stap bilong ol dispela liklik animal, a? Mama i save karim ol na lukautim ol taim ol i liklik. Ol i save kaikai, na ol i wok long go bikpela, na taim ol i pikinini yet ol i save pilai. Orait i no longtaim na ol i bikpela pinis, na ol i painim poroman, na painim haus na wanpela rot bilong painim kaikai. Sapos ol i painim pinis ol dispela samting, ol inap kamap patpela na skruim haus bilong ol i go bikpela na bai ol i ken kamapim ol pikinini. Tasol ol yia i save pinis kwiktaim, na ol i wok long go lapun. Sapos ol i no dai paslain long dispela taim, ating ol bai i stap inap 70 o 80 yia samting na ol i dai, tasol insait long ol dispela yia ol i gat “hatwok na painim hevi tasol.” (Song 90:​9, 10, 12) Yu ken tingim ol dispela samting taim yu lukim dispela liklik skwirel (o narapela animal yu tingim).

¹³ Em nau, yu inap save i gat wanem as na Solomon i tok, i stap bilong ol man i wankain olsem bilong ol animal. Em i tok: “Olgeta samting . . . i save kamap long taim bilong em yet. God i makim taim bilong yumi man i kamap long graun na taim bilong yumi i dai.” Dispela laspela samting i painim yumi, olsem indai, em i wankain olsem indai bilong ol animal​—⁠“ol abus i save dai, na yumi man tu i save dai.” Na em i tok moa olsem: “God i bin kisim graun na wokim tupela, olsem na taim tupela i dai bai tupela i kamap olsem graun gen.”​—⁠Saveman 3:​1, 2, 19, 20.

¹⁴ Tasol dispela kain tingting i no samting bilong bel hevi. Tru, sampela manmeri ol i laik senisim sampela samting long i stap bilong ol, olsem ol i skruim sampela aua moa long wok mani bilong ol bambai ol inap kisim planti mani kago, winim bilong papamama bilong ol. Ol i skruim sampela yia moa long skul bilong ol bambai ol i ken kisim wanpela gutpela wok mani na kisim gutpela sindaun, na ol i wok tu long kisim sampela save moa long i stap bilong yumi man. O ol i strong long mekim eksasais na tambuim sampela kain kaikai bambai ol i no ken sik tumas na ol i ken i stap laip inap liklik hap taim moa. Ating dispela wok ol i mekim i helpim ol liklik, tasol husat inap save olsem ol dispela wok bai kamap gutpela? Na sapos ol i kamap gutpela, orait ol dispela samting bai helpim ol inap hamas yia?

¹⁵ Solomon i tok: “Maski yumi toktok longpela taim, yumi no inap win. Yumi toktok nating tasol, na dispela i no helpim yumi liklik. Yumi save stap sotpela taim tasol long graun, olsem tewel bilong diwai i save pinis kwik long taim klaut i haitim san. Na laip bilong yumi i no gat as bilong en. Olsem na husat inap save wanem pasin i gutpela bilong yumi bihainim? Na husat inap save wanem samting bai i kamap long graun long taim yumi dai pinis?” (Saveman 6:​11, 12) Indai i save kamap kwiktaim na pinisim ol wok bilong yumi, olsem na sapos yumi wok strong tru long kisim planti mani kago samting o yumi skul i go inap planti yia bambai yumi ken kisim planti samting bilong skin, yu ting dispela inap helpim gut yumi? Na yumi save stap sotpela taim tasol olsem tewel bilong diwai samting i save kamap na i go pinis hariap, olsem na planti man i pilim olsem taim wanpela wok bilong ol i no kamap gutpela, ol i no gat taim bilong kirap na putim strong bilong ol i go bilong mekim narapela kain wok; na man i no inap save, wanem samting bai painim ol pikinini bilong em taim em i “dai pinis.”

Wok Strong Long Kisim Gutpela Nem

¹⁶ Yumi man i no olsem ol animal​—⁠yumi inap tingting olsem: ‘Mi stap bilong mekim wanem? I gat taim bilong olgeta samting i mas painim mi, olsem taim bilong mama i karim mi, na taim bilong mi mas i dai?’ Orait, tingim gen dispela tok i tru em Solomon i bin mekim long ol man na animal: “Taim tupela i dai, bai tupela i kamap olsem graun gen.” Tasol olsem wanem? Dispela tok i makim olsem taim man i dai em i pinis olgeta na em i no ken i stap moa? Tru, Baibel i no tok yumi man i gat wanpela tewel i stap laip taim yumi dai, nogat. Baibel i tok tasol olsem, sapos man i mekim sin, em i mas i dai. (Esekiel 18:​4, 20) Na Solomon i tok moa long dispela samting olsem: “Ol [man] i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol. Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”​—⁠Saveman 9:​5, 10.

¹⁷ Yumi man i no inap abrusim dispela samting, olsem na yumi mas tingim gut dispela tok: “Sapos ol man i ting yu gutpela man, orait dispela i gutpela tru, na i winim sanda i gat bikpela pe bilong en. Na de yu dai i winim de mama i bin karim yu. Sapos yumi go long haus we ol man i krai long man i dai pinis, em i gutpela pasin na i winim pasin bilong go long haus we ol i mekim bikpela kaikai. Long wanem, yumi olgeta i mas i dai. Olsem na long taim yumi stap long graun, yumi mas tingting gut.” (Saveman 7:​1, 2) Yumi mas wanbel long dispela tok olsem “yumi olgeta i mas i dai.” I no gat wanpela man i bin painim wanpela kain marasin em i ken dring, o kaikai planti vaitamin, o tambuim ol kaikai i no gutpela long skin, o mekim sampela eksasais, na long dispela rot ol inap i stap oltaim oltaim, nogat. Na taim ol i dai pinis, i no longtaim na “ol man i lusim tingting pinis long ol.” Olsem na yu ting i gat wanem as na gutpela nem i ‘winim sanda i gat bikpela pe bilong en, na de yu dai i winim de mama i bin karim yu’?

¹⁸ Olsem yumi lukim pinis, Solomon i tokaut stret long samting i save painim yumi man. Em i save long ol tumbuna bilong em, olsem Abraham, Aisak, Jekop, em ol i bin kisim gutpela nem long ai bilong God. God Jehova i save gut long Abraham, olsem na em i tok promis long mekim gut long em wantaim ol lain tumbuna pikinini bilong em. (Stat 18:​18, 19; 22:17) Yes, Abraham i gat gutpela nem long ai bilong God, na em i kamap pren bilong God. (2 Stori 20:7; Aisaia 41:8; Jems 2:​23) Abraham i save pinis, em wantaim pikinini bilong em i no stap bilong mekim ol samting tasol olsem mama i karim ol na ol i stap inap sampela yia na bihain ol i dai. Ol i no stap bilong mekim ol dispela samting tasol. I gat narapela as na ol i stap, winim dispela. Ol i bilip tru olsem bihain ol bai stap laip gen​—⁠i no long rot bilong wanpela tewel i no save dai, nogat​—⁠ol bai kirap bek long matmat. Abraham i bilip tru olsem “sapos Aisak i dai, maski, God em inap long kirapim em bek.”​—⁠Hibru 11:​17-​19.

¹⁹ Dispela i helpim yumi long save, olsem wanem gutpela nem ‘i winim sanda i gat bikpela pe bilong en, na de yu dai i winim de mama i bin karim yu.’ Olsem Jop i bin bilip long en, Solomon tu i bilip tru olsem dispela Man i bin wokim ol man na givim laip long ol, em inap givim dispela laip gen long ol. Em inap kirapim bek ol man i dai pinis na ol i stap laip gen. (Jop 14:​7-​14) Gutpela man Jop i tok: “Bai yu [Jehova] ting long yu yet yu bin wokim mi, na bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples.” (Jop 14:15) Tingim dispela samting: Man bilong wokim yumi em i “laikim tumas” bai ol wokman bilong em i dai pinis ol i ken i stap laip gen. (“Yu laik lukim gen wok bilong han bilong yu.”​—⁠The Jerusalem Bible.) Taim God i mekim wok long ofa bilong Krais Jisas, em inap kirapim bek ol man i dai pinis. (Jon 3:​16; Aposel 24:15) Olsem na yumi save, yumi man inap i stap narapela kain long ol animal nating i save dai.

²⁰ Olsem na de yumi dai em inap winim de mama i bin karim yumi, sapos yumi bin kisim gutpela nem long ai bilong Jehova, em inap kirapim bek ol man i stap gut long em na ol i dai. Krais Jisas, em Man Solomon i makim, em i kamapim klia dispela samting. Olsem: Em i bin kirapim bek gutpela man Lasarus. (Luk 11:31; Jon 11:​1-44) Planti manmeri i bin lukim Lasarus i kirap bek long matmat, bel bilong ol i pilim tru dispela samting, na ol i bilip long Pikinini bilong God. (Jon 11:45) Yu ting ol i pilim olsem i no gat as na ol i stap, na ol i no save ol i stap bilong mekim wanem, o wanem samting ol inap wetim i kamap bihain? Nogat tru! Ol i save pinis, i no olsem ol i mas i stap olsem ol animal, em mama i karim ol, na ol i stap laip inap sampela yia, na bihain ol i dai. Ol i save, ol i mas kisim save long Papa bilong Jisas na mekim laik bilong Em, na dispela i as na ol i stap. Orait, olsem wanem long yu? Ol dispela tok nau yumi bin kamapim, em i helpim yu long save, o save klia moa, long ol samting yu ken mekim na i stret yu mas mekim, na bai i gat as tru bilong i stap bilong yu?

²¹ Tasol i no olsem yumi mas tingting tasol long i dai na kisim bek laip long bihain, na nau i gat as tru bilong i stap bilong yumi, nogat. Yumi mas tingim ol wok samting yumi mekim long i stap bilong yumi long olgeta wan wan de. Solomon tu i kamapim klia dispela samting long Buk Saveman, na long stori i kamap bihain long dispela bai yumi toktok long dispela samting.

[Futnot]

Yu Inap Tingim?

◻ I gat wanem ol samting bilong ol animal na ol man i wankain?

◻ Olsem wanem indai i kamapim klia olsem planti wok bilong ol man i no gat as bilong en?

◻ Olsem wanem de yumi dai inap winim de mama i bin karim yumi?

◻ Yumi mas pas gut wantaim husat na bai i gat as bilong i stap bilong yumi?

[Askim Bilong Stadi]

 1, 2. Bilong wanem i no gat rong long tingim sampela samting bilong yumi yet?

 3. I gat wanem sampela askim em planti man i no inap bekim?

 4. Bilong wanem yumi wan wan i laik bai yumi inap bekim ol askim em yumi yet i insait long en?

 5. Bilong wanem yumi mas tingim God taim yumi laik painim gutpela tingting long ol askim bilong i stap bilong yumi?

 6. (a) Olsem wanem Man bilong wokim yumi i bin givim gutpela tingting long yumi bambai yumi inap save long bekim bilong ol dispela askim? (b) Olsem wanem Solomon i insait long dispela samting?

 7. (a) Solomon i tok wanem long planti wok ol man i save mekim long dispela graun? (b) Wanem tok bilong Solomon i kamapim klia stretpela tingting bilong em?

 8. Wanem samting i save kamap long olgeta taim, kirap long bipo yet na i kam inap nau?

 9. Sapos yumi kisim stretpela tingting long i stap bilong yumi man, dispela inap helpim yumi olsem wanem?

10. Solomon i skelim wanem samting bilong ol animal na man i wankain?

11. (a) Yumi ken stori olsem wanem long i stap bilong ol animal? (b) Yu ting olsem wanem long dispela tok?

12. (a) Olsem wanem na ol samting long i stap bilong planti man i wankain olsem bilong ol animal? (b) Bihain, taim yumi lukim dispela animal yumi bin tingim, yumi ken tingting long wanem samting?

13. Wanem samting i save painim ol animal na ol man wantaim?

14. Sampela man i save mekim wanem bilong traim senisim ol samting long i stap bilong ol? Tasol olsem wanem long dispela wok?

15. Yumi ken tok wanem long i stap bilong planti man na dispela tok i stret tru?

16. (a) Yumi mas mekim wanem samting ol animal i no inap mekim? (b) Wanem narapela tok i tru i mas givim sampela tingting long yumi?

17. Saveman 7:​1, 2 i mas kirapim yumi long tingim wanem samting?

18. Olsem wanem yumi inap save, Solomon i bilip olsem ol man i dai pinis bai kirap bek?

19. Jop i helpim yumi long kisim wanem save long insait bilong Saveman 7:​1?

20. (a) Wanem taim de yumi dai i winim de mama i bin karim yumi? (b) Taim Lasarus i kirap bek, ating dispela i mekim wanem long planti man?

21. Yumi laik skelim wanem narapela samting long as bilong i stap bilong yumi?

[Ol Piksa long pes 10]

Olsem wanem i stap bilong yu i narapela kain tru long i stap bilong ol animal?