Karim Hevi Bilong ‘Nil i Sutim Skin’

“Marimari bilong mi em inap long yu.”​—⁠2 KORIN 12:⁠9.

1, 2. (a) Bilong wanem yumi no ken kirap nogut long ol traim na hevi i painim yumi? (b) I gat wanem as na yumi inap bilip olsem yumi inap winim ol traim i painim yumi?

“OLGETA man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Bilong wanem i olsem? Long wanem, Satan i tok ol man i lotuim God bilong helpim ol yet tasol, na em i wok strong long kamapim klia olsem tok bilong em i tru. Wanpela taim Jisas i tokim ol gutpela aposel olsem: “Satan i tok pinis long em bai i traim bilip bilong yupela, olsem ol man i save sakim wit bilong rausim ol pipia long en.” (Luk 22:31) Jisas i save olsem God i larim Satan i traim yumi long rot bilong ol bikpela hevi. Dispela i no makim olsem olgeta hevi i painim yumi i kam long Satan o ol spirit nogut bilong em. (Saveman 9:11) Tasol Satan i amamas long yusim olgeta samting em inap mekim wok long en bilong kirapim yumi long lusim pasin bilong stap gut long God.

² Baibel i tok yumi no ken kirap nogut long ol traim i painim yumi. Maski wanem samting i kamap long yumi, em i no narakain samting olgeta o samting yumi ting i no inap kamap long yumi. (1 Pita 4:12) Na “ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.” (1 Pita 5:⁠9) Long nau, Satan i wok strong moa yet long daunim olgeta wokman bilong God. Satan i amamas long lukim yumi karim planti hevi i olsem nil. Bilong mekim olsem, em i yusim ol samting bilong graun bilong em bilong mekim ol hevi i olsem ‘nil i sutim skin’ i go bikpela o i go nogut moa. (2 Korin 12:⁠7) Tasol i no olsem ol samting Satan i mekim i mas daunim yumi na bai yumi no stap gut long God. Jehova “bai i wokim rot bilong helpim” yumi na bai yumi inap winim ol traim, na em bai mekim wankain samting taim ol hevi i olsem nil i sutim skin i painim yumi.​—⁠1 Korin 10:13.

Rot Bilong Karim Hevi Bilong Wanpela Nil

 3. Jehova i tok wanem taim Pol i askim em long rausim wanpela nil i stap long skin bilong em?

³ Aposel Pol i askim God long rausim nil i stap long skin bilong em. “Tripela taim mi beten strong long Bikpela, long em i ken rausim dispela samting long mi.” Jehova i tok wanem long Pol? “Marimari bilong mi em inap long yu. Long wanem, strong bilong mi em i save kamap strong tru long man i no gat strong.” (2 Korin 12:​8, 9) Nau yumi ken skelim gut dispela tok bilong Jehova na bai yumi ken save olsem wanem em inap helpim yumi long karim ol hevi i olsem nil i givim pen long yumi.

 4. Pasin marimari bilong Jehova i helpim Pol long wanem ol rot?

⁴ God i kirapim Pol long amamas long ol gutpela samting em i kisim pinis long rot bilong Krais. Tru tumas, Pol i bin kisim planti blesing. Long pasin sori Jehova i opim rot long em i ken kamap disaipel, maski em i bin birua tru long ol man i laik bihainim Jisas. (Aposel 7:58; 8:3; 9:​1-4) Bihain Jehova i mekim gut long Pol na givim planti gutpela wok long em. Samting dispela stori i skulim yumi long en i stap ples klia. Em olsem: Maski ol hevi i painim yumi i bikpela tru, yumi gat planti gutpela blesing yumi ken amamas long en. Ol hevi i no ken mekim na yumi lusim tingting long ol gutpela samting Jehova i givim long yumi.​—⁠Song 31:⁠19.

5, 6. (a) Olsem wanem Jehova i helpim Pol long save olsem strong bilong Em “i save kamap strong tru long man i no gat strong”? (b) Olsem wanem pasin bilong Pol i kamapim klia olsem Satan em i man bilong giaman?

⁵ Pasin marimari bilong Jehova inap helpim yumi long narapela rot tu. Strong i kam long God inap tru long helpim yumi long karim ol hevi. (Efesus 3:20) Jehova i helpim Pol long save olsem strong bilong Em “i save kamap strong tru long man i no gat strong.” Olsem wanem strong bilong Jehova i save mekim olsem? Long pasin sori Jehova i givim strong long Pol bilong inapim em long karim hevi bilong samting i traim em. Na tu, pasin bilong Pol long sanap strong na bilip tru long Jehova i kamapim klia olsem strong bilong God i win, maski Pol yet i wanpela sinman i no gat strong. Tingim tu samting dispela i mekim long Satan, em i tok ol man i lotuim God taim laip bilong ol i gutpela na ol i no gat hevi. Pasin bilong Pol long holimpas bilip i daunim tru dispela man bilong bagarapim gutnem bilong narapela!

⁶ Pastaim Pol i olsem helpim bilong Satan long birua long God, Pol i hambak na mekim nogut tru long ol Kristen, em i wanpela Farisi i givim bel long lotu na em i gat planti gutpela samting bilong skin, long wanem, em i bilong wanpela lain i gat namba. Tasol nau Pol i mekim wok bilong Jehova na Krais olsem man i “liklik tumas namel long ol aposel.” (1 Korin 15:⁠9) Em i mekim wok aposel na i stap daun long lain bilong bosim ol Kristen bilong pastaim. Na em i sanap strong, maski wanpela nil i sutim skin bilong em. Satan i no amamas, long wanem, ol traim i no bin daunim pasin bilong Pol long givim bel long God. I no gat wanpela taim Pol i lusim tingting long em bai mekim wok insait long Kingdom bilong Krais long heven. (2 Timoti 2:12; 4:18) I no gat wanpela nil inap daunim pasin bilong em long givim bel long God, maski nil i kamapim bikpela pen tru. Pasin bilong yumi long givim bel long God i mas wok long i stap strong olsem! Jehova i strongim yumi long karim ol hevi, na long dispela rot em i givim biknem na gutpela wok long yumi long kamapim klia olsem Satan em i man bilong giaman.​—⁠Sindaun 27:11.

Ol Helpim Jehova i Givim i Bikpela Samting Tru

7, 8. (a) Long wanem ol rot Jehova i save givim strong long ol wokboi bilong em long nau? (b) Bilong wanem pasin bilong ritim na stadi long Baibel long olgeta de i bikpela samting bilong helpim yumi karim ol hevi i olsem nil i sutim skin?

⁷ Long nau, Jehova i givim strong long ol gutpela Kristen long rot bilong spirit holi bilong em, Baibel, na lain brata Kristen. Olsem aposel Pol i bin mekim, yumi ken beten na putim olgeta hevi bilong yumi long han bilong Jehova. (Song 55:22) Maski God i no rausim ol traim bilong yumi, em i ken givim yumi gutpela tingting i helpim yumi long karim hevi bilong ol traim, maski ol i bikpela tru. Na tu, long rot bilong “bikpela strong” bilong em, Jehova inap helpim yumi long sanap strong na karim hevi.​—⁠2 Korin 4:⁠7.

⁸ Yumi inap kisim dispela helpim olsem wanem? Yumi mas strong long stadi long Baibel, long wanem, insait long dispela buk Jehova i kamapim ol tok bilong mekim gut bel bilong yumi. (Song 94:19) Long Baibel yumi inap ritim ol tok ol wokboi bilong God i mekim taim ol i krai long em bilong em i ken helpim ol. Planti tok Jehova i mekim long ol dispela man i mekim gut bel bilong ol, na i gutpela long yumi tingim tingim ol dispela tok. Pasin bilong stadi bai helpim yumi na bai yumi save ‘strong yumi lukim em i strong bilong God. Em i no strong bilong yumi yet.’ Olgeta de yumi mas kisim kaikai na bai skin i ken stap gut na kisim strong, na olsem tasol oltaim yumi mas kisim ol kaikai bilong spirit long rot bilong Baibel. Olsem wanem? Yumi save mekim olsem? Sapos yumi save mekim, orait bai yumi luksave olsem “bikpela strong” bilong God i helpim yumi long karim hevi bilong olgeta samting i olsem nil i sutim skin bilong yumi long nau.

 9. Ol elda i ken mekim wanem bilong helpim ol man i karim ol hevi?

⁹ Ol elda Kristen i pret long God, ol inap “stap olsem ol ples hait ol manmeri i ken i go na hait long en long taim bilong bikpela win na ren,” olsem ol i stap bilong helpim ol man em bikpela hevi i painim ol. Ol elda husat i laik bai dispela tok i makim pasin bilong ol yet, ol bai bihainim pasin daun na askim Jehova long “skulim [ol] long gutpela pasin bilong toktok” na bai ol inap mekim ol tok i helpim ol man i karim ol pen na hevi. Tok ol elda i mekim inap stap olsem liklik ren i pundaun isi isi, em bai mekim gut bel bilong yumi long taim bilong ol bikpela hevi. Taim ol i “strongim bel bilong ol man,” ol elda i helpim tru ol brata sista bilong spirit em strong bilong ol i wok long pinis o ol i bel hevi long ol samting i stap olsem nil i sutim skin bilong ol.​—⁠Aisaia 32:2; 50:4; 1 Tesalonaika 5:⁠14.

10, 11. Ol wokboi bilong God i ken mekim wanem bilong strongim bel bilong ol man em bikpela traim i painim ol?

¹⁰ Olgeta wokboi bilong Jehova i insait long famili Kristen bilong em i stap wanbel. Yes, “yumi olgeta wan wan yumi stap olsem poroman bilong ol arapela,” olsem na “yumi wan wan i mas laikim tru ol arapela.” (Rom 12:5; 1 Jon 4:11) Olsem wanem yumi ken bihainim dispela tok? Olsem 1 Pita 3:8 i kamapim, yumi mas ‘sori na laikim tru na marimari long’ olgeta wanbilip bilong yumi. Na ol wanbilip i wok long karim hevi i olsem nil na i givim bikpela pen long ol, maski ol i yangpela o lapun, yumi olgeta inap mekim sampela samting bilong tingim ol. Yumi ken mekim wanem?

¹¹ Yumi mas traim long pilim pen na hevi ol i karim. Sapos yumi no pilim hevi bilong ol, o yumi ting em i samting nating, yumi inap mekim na hevi bilong ol i go bikpela moa, maski yumi no gat tingting long mekim olsem. Taim yumi save long ol hevi ol i karim, dispela i mas kirapim yumi long tingim gut ol tok yumi mekim long ol, na pasin bilong mekim tok, na pasin bilong yumi yet. Pasin bilong yumi long kamapim ol gutpela tok na strongim bel bilong ol inap daunim bikpela pen bilong nil i givim hevi long ol. Long dispela rot yumi inap stap olsem gutpela helpim bilong ol.​—⁠Kolosi 4:⁠11.

Rot Bilong Sampela Long Karim Ol Hevi

12-14. (a) Wanpela Kristen i bin mekim wanem bilong helpim em yet long karim hevi bilong sik kensa? (b) Ol brata na sista bilong em long spirit i bin mekim wanem bilong helpim em?

¹² Yumi wok long go klostu moa long pinis bilong taim bilong las de, na “ol samting em i olsem pen i save kamap pastaim long meri i laik karim pikinini” i go bikpela long olgeta de. (Matyu 24:⁠8) Olsem na ating ol traim bai painim olgeta man long graun, na ol traim bai painim moa yet ol gutpela wokboi bilong Jehova i laik bihainim laik bilong em. Olsem: Tingim wanpela Kristen i mekim wok painia. Em i kisim toksave long ol dokta olsem em i gat sik kensa na ol i mas rausim ol glan i save kamapim spet na sampela narapela glan tu. Taim sista ya wantaim man bilong em i kisim save olsem em i gat dispela sik, wantu ol i tingim Jehova na mekim longpela beten na kamapim bikpela wari bilong ol. Bihain sista i tok olsem ol i bin kisim bikpela bel isi tru. Tasol em i mas karim yet ol hevi, na ol i bikpela moa taim marasin yet i kamapim sampela hevi.

¹³ Bilong karim hevi bilong samting i painim em, dispela sista i wok strong long kisim save long sik kensa. Em i toktok wantaim ol dokta. Insait long Wastaua, na Kirap! na sampela narapela buk Kristen, sista i painim ol gutpela tok bilong helpim em, na sampela stori bilong ol man i soim olsem wanem ol i bin stap bel isi, maski ol i karim hevi bilong dispela sik. Em i ritim tu ol tok bilong Baibel i kamapim klia olsem Jehova inap tru long helpim ol manmeri bilong em long sanap strong long taim bilong hevi.

¹⁴ Wanpela stori i skelim ol samting yumi ken mekim taim bel hevi i laik daunim yumi olgeta, i kamapim dispela gutpela savetok: “Man i save stap wanpis, em i save tingting long em yet tasol.” (Sindaun 18:⁠1) Olsem na stori ya i mekim dispela tok: “Sakim pasin bilong i stap yu yet.”a Sista hia i tok: “Planti ol i tok olsem ol i beten long God i ken helpim mi, na sampela ol i ringim mi long telefon. Tupela elda i ringim mi planti taim bilong save mi stap olsem wanem. Mi kisim ol plaua na planti pas bilong strongim mi. Sampela i redim kaikai bilong mipela. Na tu, planti ol i amamas long kisim mi i go long haus sik bilong kisim marasin samting.”

15-17. (a) Wanpela Kristen i bin mekim wanem bilong karim ol hevi em i kisim long ka i bam? (b) Ol brata sista long kongrigesen i bin mekim wanem bilong helpim em?

¹⁵ Wanpela meri long New Mexico, Yunaitet Stets, i bin mekim wok bilong Jehova inap longtaim pinis, na long tupela taim em i bin stap insait long ka taim ka i bam. Em i kisim bagarap long nek na sol bilong em, na dispela i mekim na hevi em i bin karim long sik atraitis inap 25 yia i go nogut moa. Sista i tok: “Mi hatwok tru long apim het, na karim ol samting i winim 2-pela kilo. Tasol pasin bilong beten strong long Jehova i strongim mi tru. Na tu, mi kisim strong long ol stori bilong Wastaua mipela i bin stadi long en. Wanpela i stori long Maika 6:​8, na em i tok pasin bilong daunim tingting na stap wanbel wantaim God i makim olsem man i save gut long skel bilong em yet. Dispela i helpim mi long save olsem maski skin bilong mi i no strong, mi no ken bel hevi long mi no inap mekim bikpela wok bilong autim tok olsem mi gat laik long mekim. Nambawan bikpela samting em yumi mas i gat bikpela laik long lotuim Jehova.”

¹⁶ Em i tok tu olsem: “Oltaim ol elda i tok amamas long hatwok bilong mi long go long ol miting na wok autim tok. Ol yangpela i kam na holimpas mi taim ol i tok gude. Ol painia i save isi long mi na planti taim ol i senisim sediul bilong ol taim sik bilong mi i bikpela tumas. Long taim bilong ren samting, ol i mekim gut long mi na kisim mi i go long ol gobek bilong ol o singautim mi long go long ol Baibel-stadi bilong ol. Mi no inap karim wanpela bek, olsem na ol narapela pablisa i putim ol nius bilong mi i go insait long bek bilong ol taim mi autim tok.”

¹⁷ Tingim pasin bilong ol dispela elda bilong kongrigesen na ol wanbilip long helpim dispela tupela sista long karim ol hevi bilong skin i olsem nil i sutim ol. Ol i mekim ol gutpela samting i helpim tru tupela sista long ol samting bilong spirit, na bilong skin, na bilong bel. Olsem wanem? Dispela i kirapim yu long mekim ol samting bilong helpim ol narapela brata sista i gat sampela hevi? Yupela ol yangpela tu inap helpim ol brata sista long kongrigesen bilong yupela em ol i karim ol hevi i olsem nil i sutim skin bilong ol.​—⁠Sindaun 20:⁠29.

18. Ol stori bilong ol brata sista i stap insait long nius Wastaua na Kirap! i strongim yumi olsem wanem?

¹⁸ Nius Wastaua na Kirap! i bin kamapim planti stori bilong ol Witnes i bin winim ol hevi, na i wok long karim yet ol hevi bilong ol samting i save painim yumi ol man. Taim yu ritim ol kain stori olsem, bai yu luksave olsem planti brata sista bilong yu long olgeta hap ol i karim hevi bilong mani, o wanpela long famili i dai long bikpela bagarap, o ol samting nogut bilong woa i painim ol. Sampela narapela i karim hevi bilong ol sik i bagarapim tru skin bilong ol. Planti ol i no inap mekim ol liklik samting em ol man i gat gutpela helt ol i ting em i samting nating. Sik bilong ol i traim ol tru, na i traim ol moa yet taim ol i no inap insait long ol wok Kristen em ol i gat laik long mekim. Ol i amamas tru long ol samting ol brata sista, ol yangpela na ol lapun, i mekim bilong helpim na strongim ol!

Pasin Bilong Sanap Strong i Kamapim Amamas

19. I gat wanem as na Pol inap stap amamas, maski ol traim i olsem nil i sutim em na em i gat sampela pasin kranki?

¹⁹ Pol i amamas long pasin bilong God long strongim em. Em i tok: “Mi save amamas moa yet long stap olsem man i no gat strong. Olsem bai strong bilong Krais i ken i stap long mi. Olsem na sapos long dispela wok bilong Krais mi no gat strong, na ol man i mekim nogut long mi, na ol kain kain hevi na trabel i kisim mi, na ol man i wok long bagarapim mi, orait bel bilong mi i save stap gutpela tasol. Long wanem, taim mi no gat strong, long dispela taim tasol mi gat strong tru.” (2 Korin 12:​9, 10) Ol samting i bin painim Pol i kirapim em long tok: “Mi no sot long ol samting na mi mekim dispela tok. Nogat. Mi save pinis long pasin bilong i stap isi, maski wanem kain samting i kamap long mi. Maski mi stap rabis tru o mi gat planti samting, mi save stap isi tasol. Mi save pinis long pasin bilong i stap isi, maski mi gat planti kaikai o mi stap hangre, na maski mi gat planti samting o mi sot long ol samting. Olgeta kain samting i ken kamap long mi, na mi save stap isi yet na belgut tasol. Krais i save strongim mi, na long strong bilong em mi inap mekim olgeta samting.”​—⁠Filipai 4:​11-13.

20, 21. (a) Bilong wanem pasin bilong tingim ol samting em “yumi no inap lukim long ai” inap givim amamas long yumi? (b) Wanem ol samting “yumi no inap lukim long ai” em yu gat laik long lukim long Paradais?

²⁰ Olsem na taim yumi sanap strong na karim ol hevi i olsem nil i sutim skin bilong yumi, yumi inap amamas long soim olgeta man olsem strong bilong Jehova i wok strong tru long yumi. Pol i tok: “Mipela i no save slek long mekim wok bilong God. . . . Bel bilong mipela i save kamap nupela gen long olgeta de, long wanem, mipela i save, ol dispela hevi na pen mipela i save karim, ol i no bikpela tumas, na ol bai i stap sotpela taim tasol . . . Na mipela i save, ol dispela gutpela samting mipela bai i kisim, ol i winim tru olgeta arapela samting. . . . Yumi save lukluk strong long ol samting yumi no inap lukim long ai, long wanem, . . . ol dispela gutpela samting yumi no inap lukim long ai, ol bai i stap oltaim oltaim.”​—⁠2 Korin 4:​16-18.

²¹ Planti wokboi bilong Jehova long nau ol i wet long kisim laip long Paradais long graun na kisim amamas long ol blesing em i bin tok promis long kamapim. Ol blesing i olsem ol samting “yumi no inap lukim long ai” long nau. Tasol klostu nau bai yumi lukim ol dispela blesing long ai bilong yumi yet, na bai yumi amamas oltaim long ol. Wanpela blesing i olsem: Bai yumi no karim moa ol hevi i olsem nil i sutim skin! Pikinini bilong God bai “bagarapim na rausim wok bilong Satan” na em bai “bagarapim Satan, em dispela man i gat strong bilong mekim ol manmeri i dai.”​—⁠1 Jon 3:8; Hibru 2:⁠14.

22. Yumi inap bilip tru long wanem samting na yumi mas tingting strong long mekim wanem?

²² Olsem na maski wanem nil i sutim skin na givim pen long yumi long nau, i gutpela long yumi wok yet long karim hevi bilong en. Olsem Pol, bai yumi gat strong long mekim olsem long rot bilong strong i kam long Jehova na em i amamas long givim long yumi. Taim yumi stap long Paradais long graun, long olgeta de bai yumi litimapim nem bilong God bilong yumi, Jehova, long ol gutpela samting em i mekim bilong helpim yumi.​—⁠Song 103:⁠2.

[Futnot]

Bai Yu Bekim Olsem Wanem?

• I gat wanem as na Satan i traim long mekim ol trupela Kristen i lusim bilip bilong ol? Na em i mekim olsem wanem?

• Olsem wanem strong bilong Jehova “i save kamap strong tru long man i no gat strong”?

• Ol elda na ol narapela i ken mekim wanem bilong strongim ol man i karim ol hevi i givim pen long ol?

[Piksa long pes 18]

Inap tripela taim Pol i beten askim God long rausim nil i sutim skin bilong em