I Gat As na Yumi Ken Amamas na Singaut
“Bai ol i . . . amamas moa yet, na dispela amamas bilong ol bai i no inap pinis. Na pen na bel hevi bai i no inap i stap wantaim ol moa.”—AISAIA 35:10.
ATING yu luksave olsem long nau i no gat planti man i stap amamas tru. Tasol olsem ol Kristen tru, ol Witnes Bilong Jehova i stap amamas. Na planti milion man i no baptais yet, maski ol i yangpela o lapun, em ol i bung wantaim ol Witnes, ol tu inap kisim dispela amamas. Yu kaunim ol tok bilong dispela nius, na dispela i makim olsem yu kisim pinis dispela amamas o yu inap long kisim dispela amamas.
2 Planti man i pilim olsem ol i lus long sampela samting. Olsem wanem long yu? Tru, ating yu no gat olgeta samting yu gat laik long mekim wok long en, em ol samting ol maniman na ol bikman long nau i holim. Na ating skin bilong yu i no gutpela tumas o i no gat strong. Tasol sapos mipela i skelim amamas bilong yu, ating mipela inap tok olsem yu gat planti samting moa, na skin i gutpela moa, winim planti bilong ol bilion man long graun. Olsem wanem mipela inap tok olsem?
3 Tingim tok bilong Jisas: “Mi laik bai amamas bilong mi i ken i stap long yupela, na bai dispela amamas i ken pulap tru long bel bilong yupela. Olsem na mi mekim dispela tok long yupela.” (Jon 15:11) “Amamas i ken pulap tru long bel bilong yupela.” Em gutpela tok tru, a? Sapos yu stadi gut na kisim save long pasin ol Kristen i mas bihainim, dispela bai kamapim long ples klia planti as bilong yumi ken i stap amamas tru. Tasol nau yumi ken tingim wanpela bikpela tok long Aisaia 35:10. Em i bikpela samting long yumi, long wanem, yumi insait long truim bilong en. Em i tok: “Ol manmeri Bikpela i kisim bek pinis, ol bai i amamas na kam bek long Jerusalem, na ol bai i singim song na bikmaus i kam long dispela rot. Na bai ol i gat gutpela sindaun tru na ol i amamas moa yet, na dispela amamas bilong ol bai i no inap pinis. Na pen na bel hevi bai i no inap i stap wantaim ol moa.”
4 “Amamas bilong ol bai i no inap pinis.” Dispela tok, “i no inap pinis,” i kolim stret tok Aisaia i raitim long tok Hibru. Tasol olsem sampela narapela skripsa i kamapim, insait tru bilong dispela tok i olsem “oltaim oltaim.” (Song 45:6; 90:2; Aisaia 40:28) Olsem na amamas bai i stap oltaim oltaim, long wanem, bai yumi gat gutpela sindaun na em inap tru long kamapim amamas bilong i stap oltaim oltaim. Em gutpela tok tru, a? Yu ting man i raitim dispela tok em i stori long samting i stap tasol long tingting bilong em na i no inap kamap tru? Na yu ting olsem: ‘Dispela tok em i no wanpela samting mi mas tingim gut—mi mas tingim ol hevi i save painim mi long olgeta de.’ Tasol nogat. Dispela tok profet bilong Aisaia 35:10 i bikpela samting long yumi long nau. Bilong kisim save long dispela, yumi ken skelim ol gutpela tok bilong Aisaia sapta 35. Taim yumi mekim olsem bai yumi tingim ol tok i stap klostu. Yu bai amamas tru long save yumi kisim.
Ol Manmeri i Mas i Stap Amamas
5 Bilong helpim yumi, pastaim yumi ken tingim ol samting i bin kamap long dispela taim, na as bilong raitim dispela gutpela tok profet. Profet Hibru Aisaia i bin raitim long yia 732 samting paslain long Krais. Em planti yia paslain long taim ol ami bilong Babilon i bagarapim Jerusalem. Olsem Aisaia 34:1, 2 i makim, God i tok profet long em i laik mekim save long ol lain man, na em i laik bagarapim ol Idom, olsem Aisaia 34:6 i tok. Em i givim dispela wok long ol Babilon. Na em i larim ol Babilon i bagarapim lain Juda tu, long wanem, ol Juda i no stap gut long em. Olsem na ol Juda i go kalabus na ples bilong ol i stap nating inap 70 yia.—2 Stori 36:15-21.
6 Tasol strafe God i givim long ol Idom i narapela kain long strafe bilong ol Juda. Ol Idom i bagarap inap oltaim oltaim; bihain ol i pinis olgeta long graun. Long nau yu ken raun yet na lukim ol pipia ston bilong ol ples em bipo ol Idom i sindaun long en, olsem ol pipia ston bilong taun Petra. Long nau i no gat wanpela kantri o lain i gat nem ‘Idom.’ Tasol taim ol Babilon i bagarapim ol Juda na graun bilong ol i stap nating, yu ting em bilong oltaim oltaim, na bai amamas i no ken kamap gen long graun bilong ol?
7 Gutpela tok profet bilong Aisaia sapta 35 i makim bikpela samting bai kamap. Yumi ken tok, dispela em i tok profet bilong ol samting i mas kamap gutpela gen, long wanem, namba wan truim bilong en i kamap taim ol Juda i go bek long ples bilong ol long yia 537 paslain long Krais. Ol Israel i bin stap kalabus long Babilon, God i larim ol i kamap fri, na ol i ken go bek long ples bilong ol. (Esra 1:1-11) Tasol inap long taim ol i go bek, ol Juda i kalabus long Babilon na ol i tingim dispela tok profet bilong God, ating ol i tingting planti long ples bilong ol, em Juda, bai stap olsem wanem. Na ol yet bai stap olsem wanem? Bekim bilong en i kamapim klia olsem i gat as tru na yumi ken amamas na singaut. Orait, nau yumi ken stori long dispela.
8 Maski ol Juda i kisim save olsem ol bai go bek long ples bilong ol, ol i save ples bilong ol i stap nogut. Ples bilong ol i bin stap nating inap 70 yia, em taim bilong laip bilong wanpela man. Olsem wanem long graun bilong ol? Olgeta gaden, o gaden wain, o gaden prut i kamap bus pinis. Graun bipo i gat wara em i kamap olsem ples drai. (Aisaia 24:1, 4; 33:9; Esekiel 6:14) Tingim tu ol planti animal nogut bilong bus i pulap i stap. Olsem ol laion na weldok, em ol i save kaikai ol narapela animal na ol man. (1 King 13:24-28; 2 King 17:25, 26; Solomon 4:8) Na ol bea tu i stap, ol inap long kilim i dai man, meri, pikinini. (1 Samuel 17:34-37; 2 King 2:24; Sindaun 17:12) Na ol snek nogut na skopion tu i stap. (Stat 49:17; Lo 32:33; Jop 20:16; Song 58:4; 140:3; Luk 10:19) Sapos yu stap wantaim ol Juda i kam bek long Babilon long 537 paslain long Krais, ating bai yu pret long raun long kain ples olsem, a? Tru tumas, taim ol i kam bek ples i no wanpela paradais.
9 Tasol Jehova yet i bringim ol man i lotu long em i kam bek long ples, na em inap mekim ples nogut i kamap gutpela ples gen. Yu bilip olsem Man bilong wokim olgeta samting inap mekim olsem, a? (Jop 42:2; Jeremaia 32:17, 21, 27, 37, 41) Orait, em bai mekim wanem bilong helpim ol dispela Juda na graun bilong ol? Dispela i mekim wanem long lain bilong God long nau? Na em bai mekim wanem long i stap bilong yu long nau na long bihain? Orait, pastaim yumi ken stori long ol samting i bin kamap long dispela taim bipo.
Amamas Long Senis i Kamap
10 Wanem samting bai kamap taim Sairus i larim ol Juda i go bek long ples i bagarap? Yumi ken kaunim gutpela tok profet i stap long Aisaia 35:1, 2: “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap. Na ples drai bai i luk nais tru, na em bai i singaut wantaim bikpela amamas. Planti naispela samting tru bai i kamap, na ples bai i luk nais moa yet olsem bikbus bilong Lebanon na olsem ples daun bilong Saron. Na ol manmeri bai i lukim strong na biknem na gutpela bilas bilong God, Bikpela bilong yumi.”
11 Long taim bilong ol man i bin raitim Baibel, i gat planti diwai na plaua long Lebanon na Saron. (1 Stori 5:16; 27:29; 2 Stori 26:10; Solomon 2:1; 4:15; Hosea 14:5-7) Aisaia i stori long ol dispela ples bilong makim olsem graun bilong ol Israel bai kamap gutpela gen long strong bilong God. Tasol dispela i no makim senis bai kamap long graun tasol. Nogat tru!
12 Aisaia 35:2 i tok, dispela ples bai “singaut wantaim bikpela amamas.” Yumi save, graun tru na ol diwai samting i no inap “singaut wantaim bikpela amamas.” Tasol taim graun i kamap gutpela na i kamapim gutpela kaikai, dispela inap mekim na ol manmeri i amamas. (Wok Pris 23:37-40; Lo 16:15; Song 126:5, 6; Aisaia 16:10; Jeremaia 25:30; 48:33) Ol senis i kamap long graun tru i makim olsem ol senis i kamap long ol manmeri tu, long wanem, ol manmeri i bikpela samting long dispela tok profet. Olsem na i gat as na yumi ken bilip olsem ol tok bilong Aisaia i makim ol senis i kamap long ol Juda i go bek long ples bilong ol—em i makim amamas bilong ol.
13 Olsem na gutpela yumi skelim sampela tok moa bilong dispela gutpela tok profet na yumi ken save olsem wanem truim bilong en i kamap long taim ol Juda i lusim pinis kalabus long Babilon na go bek long ples bilong ol. Long Ais 35 ves 3 na 4, Aisaia i stori long sampela senis moa i kamap long ol manmeri i go bek long ples, em i tok: “Strongim ol man i no gat strong na strongim tu bel bilong ol man i pret na guria. Tokim ol man bel na tingting bilong ol i no strong olsem, ‘Yupela i mas sanap strong na i no ken pret. God bai i kam na kisim bek yupela na mekim save tru long ol birua bilong yupela.’ ”
14 God bilong yumi, em i gat strong bilong mekim ples nogut i kamap olsem paradais, em i save tingim ol wokman bilong em, na dispela i strongim tru yumi, a? Em i no laik ol Juda i kalabus ol i pilim olsem ol i no gat strong, na ol i bel hevi, na ol i tingting planti long i stap bilong ol long bihain. (Hibru 12:12) Tingim ol samting i painim ol dispela Juda i kalabus. Tru ol tok profet bilong God i mekim na ol i bilip olsem ol gutpela samting bai kamap bihain, tasol i hatwok long ol long bilip olsem bihain bai ol i stap gutpela gen. I olsem ol i stap kalabus long ples tudak insait tru long graun; ol i no inap raun na mekim wok bilong Jehova, na i olsem ol i no inap lukim liklik hap lait.—Skelim wantaim Lo 28:29; Aisaia 59:10.
15 Tasol wantu senis i kamap! Jehova i mekim na Sairus i larim ol i lusim kalabus na go bek long ples. I no gat wanpela tok long Baibel i makim olsem God i wokim mirakel na ol aipas long lain Juda i go bek ol inap lukluk gen, na ol yaupas inap harim toktok, na ol lek nogut inap wokabaut. Nogat. Em i mekim gutpela samting moa yet bilong helpim ol. Em i helpim ol long go bek long ples ol i laikim tumas; ol i lusim tudak na i stap gen long lait, na ol i stap fri.
16 I no gat wanpela samting i makim olsem ol manmeri i go bek long ples bilong ol i ting Jehova bai wokim ol mirakel na oraitim ol kain sik bilong skin olsem. Ol i bin save God i no bin mekim olsem long Aisak, o Samson, o Eli. (Stat 27:1; Hetman 16:21, 26-30; 1 Samuel 3:2-8; 4:15) Tasol sapos ol i ting dispela i makim olsem long tok piksa God bai oraitim ol, ol bai no bel hevi. Long dispela rot tok bilong Aia 35 ves 5 na 6 i kamap tru. Aisaia i tok profet olsem: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”
Mekim Graun i Kamap Olsem Paradais
17 I gat as tru na ol dispela manmeri i kam bek long ples ol i singaut amamas long ol gutpela samting olsem Aisaia i tok: “Ol wara bai i kamap long ples wesan nating na ran i go long olgeta hap. Na ples wesan nating bai i kamap olsem raunwara. Na wara bai i kamap tu long aninit bilong graun i drai pinis. Na planti gras na ol pitpit samting bai i kamap long ol ples bipo i drai tru na ol weldok tasol i bin i stap long ol.” (Aisaia 35:6b, 7) Tru long nau yumi no inap lukim olgeta hap bipo ol i kolim Israel i olsem paradais, tasol i gat sampela samting i kamapim long ples klia olsem dispela hap graun bipo i bin i stap olsem “gutpela graun tru bilong ol bulmakau samting i ken kaikai gras, olsem wanpela paradais.”a
18 Tingim bikpela amamas bilong hap lain Juda ol i go bek na sindaun gen long Graun Bilong Promis! Ol inap stretim bek dispela ples i stap nating na i gat ol weldok samting i pulap long en. Na sapos yu save olsem God i blesim wok bilong yu, bai yu amamas long stretim bek kain ples olsem, a?
19 Tasol i no samting bilong olgeta wan wan Juda i kalabus long Babilon long makim olsem em i laik go bek long graun bilong em na em i laik insait long dispela gutpela wok. God i putim lo long dispela. Man i bihainim lotu haiden bilong ol Babilon na kamap doti, i no stret em i go bek. (Daniel 5:1, 4, 22, 23; Aisaia 52:11) Na ol man i bihainim pasin longlong, ol tu i no inap go bek. Tasol ol man i mekim stretpela pasin na i stap klin long ai bilong God, ol inap go bek long Juda; bai i olsem ol i wokabaut long Bikrot Bilong God Yet. Long Aia 35 ves 8 Aisaia i tok: “Na bai i gat wanpela bikrot long dispela hap. Bai ol i kolim dispela bikrot olsem, ‘Bikrot Bilong God Yet.’ Na ol man i no klin long ai bilong God, ol bai i no inap wokabaut long dispela rot. Nogat tru. Em bai i stap rot bilong ol manmeri bilong God tasol. Na ol longlong man bilong mekim pasin nogut, ol bai i no inap i go klostu long en.”
20 Ol Juda i go bek long ples i no ken pret long bagarap bai painim ol long han bilong ol man i olsem animal nogut, o ol lain olsem raskol. Bilong wanem ol i no ken pret? Long wanem, Jehova i no ken larim ol kain man olsem i wokabaut long dispela Rot wantaim lain em i kisim bek pinis. Ol inap amamas na wokabaut i go, na ol i ken ting olsem gutpela samting tasol bai kamap. Tingim laspela hap tok bilong dispela tok profet bilong Aisaia sapta 35, em i tok: “Bai i no gat ol laion na ol animal nogut i bihainim dispela rot na wokabaut. Nogat. Ol manmeri God i kisim bek pinis, ol tasol bai i wokabaut long dispela rot. Na ol manmeri Bikpela i kisim bek pinis, ol bai i amamas na kam bek long Jerusalem, na ol bai i singim song na bikmaus i kam long dispela rot. Na bai ol i gat gutpela sindaun tru na ol i amamas moa yet, na dispela amamas bilong ol bai i no inap pinis. Na pen na bel hevi bai i no inap i stap wantaim ol moa.”—Aisaia 35:9, 10.
21 Dispela tok profet i makim stret ol samting bai kamap! Yumi no ken ting em samting bilong bipo tasol, na em i olsem wanpela naispela stori nating na i no bikpela samting long yumi long nau na long bihain. Dispela tok profet i gat bikpela truim long lain bilong God long nau, olsem na yumi olgeta wan wan i insait long en. Dispela tok profet i mekim na i gat as tru na yumi ken singaut na amamas. Long stori i kamap bihain long dispela bai yumi stori long ol samting yu insait long en long nau na long bihain.
[Ol Futnot]
a Saveman Walter C. Lowdermilk (em bilong lain U.N. Food and Agriculture Organization) i skelim hap graun bilong dispela ples na em i tok: “Bipo dispela ples i gat gutpela graun tru bilong ol bulmakau samting i kaikai gras, olsem wanpela paradais.” Na em i tok tu, “kirap long taim bilong ol Rom i kam inap nau,” taim bilong san na ren i no bin senis tumas. Na “em i asua bilong ol samting ol man i mekim na dispela gutpela graun bilong bipo i kamap olsem ples wesan nating—bipo em i no bin stap olsem.”
Yu Inap Tingim?
◻ Namba wan truim bilong Aisaia sapta 35 i kamap long wanem taim?
◻ Namba wan truim bilong dispela tok profet i kamapim wanem samting?
◻ Jehova i truim Aisaia 35:5, 6 olsem wanem?
◻ Ol Juda i go bek long ples i lukim wanem senis i kamap long graun na sindaun bilong ol?
[Askim Bilong Stadi]
1. Husat i gat as tru long i stap amamas long nau?
2. Olsem wanem pasin bilong ol Kristen long i stap amamas i narapela kain long i stap bilong planti man?
3. Yumi mas tingim wanem bikpela tok? Bilong wanem yumi mas tingim?
4. Aisaia 35:10 i stori long wanem kain amamas? Bilong wanem yumi mas tingim dispela tok?
5. Stori long ol samting bilong taim Aisaia i raitim tok profet bilong Aisaia sapta 35?
6. Olsem wanem ol samting i painim ol Idom i narapela kain long ol samting i painim ol Juda?
7. Ol Juda i kalabus long Babilon ol inap ting olsem wanem long tok bilong Aisaia sapta 35?
8. Taim ol Juda i lusim Babilon na kam bek long ples bilong ol, ples bai stap olsem wanem? (Skelim wantaim Esekiel 19:3-6; Hosea 13:8.)
9. I gat wanem as na ol man i kam bek long ples i ken bilip olsem gutpela samting bai kamap?
10. Aisaia 35:1, 2 i tok profet long wanem senis bai kamap?
11. Aisaia i save long wanem samting bilong dispela hap graun na em i stori long en?
12. Bilong wanem yumi ken tok ol manmeri i bikpela samting long tok profet bilong Aisaia sapta 35?
13, 14. Aisaia 35:3, 4 i tok profet long wanem senis bai kamap long ol man?
15, 16. (a) Yumi ken ting Jehova i mekim wanem long ol manmeri i go bek long ples bilong ol? (b) Bilong wanem ol manmeri i go bek long ples i no ting Jehova bai wokim ol mirakel na oraitim ol sik bilong skin? Tasol God i mekim wanem olsem Aisaia 35:5, 6 i tok?
17. Jehova i kamapim wanem senis long graun?
18. Lain Juda i go bek long ples bilong ol i pilim olsem wanem long ol blesing bilong God?
19. Olsem wanem na i no olgeta wan wan Juda i stap kalabus long Babilon inap go bek long ples bilong ol?
20. Ol Juda i go bek long ples i no ken pret long wanem samting? Olsem na wanem samting i kamap?
21. Yumi long nau i mas ting olsem wanem long truim i kamap pinis long tok profet bilong Aisaia sapta 35?
[Piksa long pes 9]
Ol haus bilong taun Petra i bruk pinis, long hap bipo ol Idom i sindaun long en
[Kredit Lain]
Garo Nalbandian
[Ol Piksa long pes 10]
Taim ol Juda i stap long kalabus, bikpela hap graun bilong Juda i kamap olsem ples nating, na planti animal nogut olsem ol bea na laion i pulap long en
[Ol Kredit Lain]
Garo Nalbandian
Bear and Lion: Safari-Zoo of Ramat-Gan, Tel Aviv