Laik Tru Bilong Em i Kamap

YU LAIK tru long lukim Kingdom bilong Krais i bosim olgeta hap bilong graun? Sapos olsem, yu laik tru na yu beten bai ol gutpela samting i ken kamap long graun olsem God i tok promis pinis. Yu no ken les long wetim, na taim samting yu laik tru long en i kamap, ‘bai laip bilong yu i gutpela tru.’​—⁠Sindaun 13:12; Jems 5:​7, 8.

Klostu 2,000 yia bipo, wanpela ‘stretpela man bilong lotu long God,’ nem bilong em Simeon, em i stap long Jerusalem. Em i bilip long ol tok profet long Mesaia bai kam, em man God i makim, na em bai “mekim gut bel bilong ol Israel.”​—⁠Luk 2:25.

Ol Tok Profet Long Mesaia

Jehova i mekim namba wan tok profet long Mesaia, na dispela i as na ol man i gat sin na ol i dai ol inap wetim gutpela samting i kamap. God i tok Pikinini bilong “meri” bilong em, em oganaisesen bilong em long heven, bai kam.​—⁠Stat 3:15.

Em bai kamap long lain bilong Abraham, na Jekop i tok profet em bai kam. (Stat 22:​17, 18; 49:10) Buk Song i stori long ol gutpela samting Kingdom bilong em bai mekim. (Song 72:​1-20) Profet Aisaia i tok, wanpela yangpela meri bai karim em, na profet Maika i tok, em bai kamap long Betlehem. (Aisaia 7:14; Maika 5:⁠2) Em sampela bilong ol planti tok profet long Mesaia bai kam.

Mesaia i No Kam Yet!

Tingting i go bek klostu long taim bilong ol aposel. God i bin mekim namba wan tok profet long Mesaia inap 4,000 yia bipo. Kain kain hevi i bin painim ol Juda​—⁠haus bilong Jehova na ples bilong ol i bagarap; ol i bin kalabus long Babilon inap 70 yia; ol man bilong ol narapela lain i bin bosim ol inap 500 yia pinis. Na Mesaia i no kam yet!

Ol Juda i aninit long God ol i laik tru bai Mesaia i kam! Long rot bilong em, bai ol yet na ol narapela lain i kisim blesing.

Man Bilong Lotu Long God

Wanpela gutpela Juda i lotu long God na em i laik tru bai Mesaia i kam na em i beten olsem, em lapun Simeon. Em i stap long nambawan biktaun bilong Judia. Narapela kain samting i painim em.

God i givim spirit holi long Simeon na tokim em, em bai i no inap i dai kwik. Pastaim em i mas lukim Mesaia, em dispela man God i bin promis long salim i kam. Tasol planti de na mun i kamap i go pinis na Simeon i go lapun. Ating i no longtaim na bai em i dai. Olsem wanem? God bai truim tok promis em i bin mekim long Simeon?

Wanpela taim (long yia 2 paslain long taim bilong Krais), tupela yangpela marit i lusim Betlehem na kisim pikinini bilong tupela i go long tempel. Spirit holi i kirapim Simeon long i go long tempel na bai em i lukim dispela pikinini ol profet i bin tok long em. Lapun hia i go hariap na em i lukim Josep na Maria wantaim pikinini.

Simeon i amamas tru na em i holim pikinini Jisas! Dispela pikinini bai kamap Mesaia, olsem Krais​—⁠em i “dispela man God i bin makim.” Simeon i lapun na em i save, em i no inap lukim Jisas i pinisim wok bilong em long graun, tasol Simeon i amamas long lukim em taim em i pikinini. Ol tok profet long Mesaia i wok long kamap tru. Simeon i amamas tru! Nau bel bilong em i stap isi maski em i mas dai na slip long matmat na wet long kirap bek.​—⁠Luk 2:​25-28.

Ol Tok Profet Bilong Simeon

Simeon i litimapim nem bilong God na em i tok: “Bikpela, . . . [nau] bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela. . . . Em i wanpela lait, na em bai i givim lait long ol man bilong ol arapela lain, na em bai i givim biknem long ol Israel, em ol lain manmeri bilong yu.” Waspapa Josep na mama bilong em, Maria, tupela i kirap nogut long dispela tok.​—⁠Luk 2:​29-33.

Pes bilong Simeon i lait na em i givim blesing long tupela, bai Jehova i ken helpim tupela long mekim gut wok bilong ol long lukautim pikinini. Bihain pes i tudak liklik na em i tokim Maria: “Harim. God i makim dispela pikinini bilong mekim planti Israel i pundaun, na bilong mekim planti i kirap gen. Em bai i stap olsem wanpela mak, na planti man bai i tok nogut long em. Olsem na tingting hait bilong planti man bai i kamap ples klia. Na yu bai i stap olsem wanpela bainat i sutim lewa bilong yu tu.”​—⁠Luk 2:​34, 35.

Tok Simeon i Mekim Long Maria

Maria i tingting planti. Wanem insait bilong dispela tok? Olsem: Sampela i olsem ol i pundaun pinis, bai ol i bilip long Krais na kirap gen. Sampela bai sakim em na pundaun. Jisas i olsem ston i pundaunim planti Juda, olsem Baibel i tok. (Aisaia 8:14; 28:16) Simeon i no tok, ol wan wan Israel bai pundaun na sakim Jisas pastaim, na bihain bai ol i bilip na kirap gen. Nogat. Tasol sampela bai sakim em na sampela bai bilip long em, na dispela bai kamapim long ples klia tingting i stap hait long bel bilong planti Israel, na bai God i mekim gut long ol o givim strafe long ol. Long ol man i no bilip, Jisas i olsem wanpela mak, olsem samting ol i tok nogut long en. Sampela, bipo ol i mekim kain kain rong na i olsem dispela i kilim ol i dai, tasol taim ol i bilip long Jisas, ol i kirap gen na i stap gutpela long ai bilong God. Pasin ol man i mekim long Mesaia i kamapim tingting i stap long bel bilong ol.

Na olsem wanem long tok bilong Simeon: “Yu bai i stap olsem wanpela bainat i sutim lewa bilong yu”? Baibel i no makim olsem ol i bin kilim i dai Maria long bainat. Tasol taim planti man i sakim Jisas, bai Maria i bel hevi tru. Na taim em i lukim ol i nilim Jisas long diwai, i olsem bainat i sutim lewa bilong em!

Simeon i Makim Truim Bilong Ol Tok Profet Long Mesaia

Spirit bilong God i kirapim Simeon long tokaut olsem Jisas em i Mesaia ol profet i bin tok long em. Nau Simeon inap i stap bel isi na em i dai, long wanem, em i lukim pinis ‘samting God i mekim bilong kisim bek ol man. God i redim long ai bilong olgeta manmeri. Dispela man bai givim lait long ol arapela lain na givim biknem long ol Israel, em lain bilong God.’ (Luk 2:​30-32) Simeon i kamapim klia truim bilong tok profet bilong Aisaia!

Aisaia i bin tok: “Bikpela lait na strong bilong Bikpela bai i kamap ples klia, na olgeta manmeri bilong graun bai i lukim.” “Bai mi [Jehova] mekim yu [Mesaia] i kamap olsem lait bilong olgeta kantri, na bai yu helpim ol manmeri long olgeta hap bilong graun na bai mi kisim bek ol.” (Aisaia 40:5; 42:6; 49:6; 52:10) Nupela Testamen na ol samting tru i bin kamap i makim olsem Mesaia, Krais Jisas, em i lait tru bilong ol lain man; em i givim lait na ol i no stap tudak moa long spirit, na em i rot bilong kisim bek ol.

Baibel i no stori moa long lapun Simeon, tasol yumi ken save, em i dai taim Krais i no opim yet rot bilong kisim laip long heven. Olsem na i no longtaim na bai Simeon i kirap bek na stap laip gen long graun. Na bai em yet​—⁠na yu tu​—⁠inap amamas tru long i stap long nupela taim aninit long Kingdom bilong God na Krais!