Jehova i Gat Kot Long Ol Lain Man
“Nois bilong singaut bilong en bai inapim olgeta hap bilong graun. As bilong dispela singaut i olsem. Bikpela i laik kotim olgeta manmeri bilong graun.”—JEREMAIA 25:31.
PLANTI hevi nogut tru i kamap long kantri Juda. Tasol wanpela gutpela king bilong ol i kamap, em Josaia, olsem na inap liklik taim Jehova i pasim belhat bilong em. Tasol taim ol birua i kilim i dai Josaia long yia 629 paslain long Krais, wanem samting i bin kamap? Ol king i kamap bihain long Josaia i bagarapim nem bilong Jehova.
2 Namba 4 pikinini bilong Josaia, em Sedekaia, em i laspela king bilong Juda, na 2 King 24:19 i tok: “Sedekaia i bihainim pasin bilong King Jehoiakim [em bikbrata bilong em], na em i mekim pasin nogut long ai bilong Bikpela.” Na wanem samting i bin kamap? Nebukatnesar i kam pait long Jerusalem na holimpas Sedekaia; em i kilim i dai ol pikinini bilong Sedekaia long ai bilong em, na kamautim ai bilong em, na kisim em i go long Babilon. Na ol Babilon i kisim ol kap samting bilong mekim lotu bilong Jehova, na bihain ol i kukim haus lotu na taun. Ol man i no bin bagarap long pait, ol i go kalabus long Babilon.
3 Long dispela yia, em yia 607 paslain long Krais, Jerusalem i bagarap olgeta, na “taim God i bin makim bilong ol arapela lain,” em Luk 21:24 i stori long en, em i kirap. Dispela hap taim em inap 2,520 yia na i pinis long yia 1914 long taim bilong yumi. Long dispela yia taim i kamap pinis bilong Jehova i skelim long kot ol man nogut bilong dispela graun na givim strafe long ol. Em i mekim olsem long rot bilong Pikinini bilong em, Krais Jisas, em King i winim Nebukatnesar. Em i kirapim kot long dispela lain em lain Juda bilong bipo i makim, em ol i tok ol i stap maus bilong God na Krais long graun.
4 Taim wok bilong ol king long bosim Juda i laik pinis, i gat planti pait na hevi i bin kamap. Olsem wanem? Dispela i wankain olsem ol pait na hevi i kamap long nau long ol lain i gat nem Kristen—na long ol narapela lain tu? Tru tumas, i wankain! Na olsem wanem? Ol tok profet bilong Jeremaia i tok Jehova bai mekim wanem samting long taim bilong yumi? Orait, nau bai yumi ken stori long dispela.
5 Foti yia i go pinis wanpela saveman bilong Briten, em Bertrand Russell i bin tok olsem: ‘Kirap long 1914 olgeta man i save was long ol samting i kamap long graun ol i tingting planti, long wanem, i olsem yumi ol man bilong graun i wokabaut i go i go bilong painim bikpela bagarap long bihain.’ Na Konrad Adenauer wanpela bikman bilong gavman bilong Jemani i bin tok: ‘Bihain long 1914 ol man i no stap bel isi moa.’
6 Yumi stap long taim bilong pinis olsem long taim bilong Jeremaia na ol man i mekim wankain pasin—ol i kapsaitim blut bilong planti man i no gat asua, olsem long tupela bikpela pait bilong olgeta hap. Planti lain insait long dispela tupela pait ol i gat nem Kristen na ol i tok ol i lotuim God bilong Baibel. Tasol ol i giaman tru! Olsem na Jehova i salim ol Witnes bilong em i go long ol na ol i autim tok olsem i stap long Jeremaia 25:5, 6: “Yupela olgeta wan wan i mas tanim bel na lusim rot nogut yupela i bihainim na lusim ol pasin nogut yupela i save mekim. . . . Yupela i no ken bihainim ol arapela god na lotuim ol na mekim wok bilong ol. Na yupela i no ken wokim ol piksa bilong ol dispela giaman god na mekim mi belhat long yupela. Sapos yupela i bihainim tok bilong mi, bai mi no ken mekim nogut long yupela.”
7 Tasol ol dispela lain i holim nating nem Kristen ol i no tanim bel na lusim pasin nogut ol i save mekim. Ol i insait long ol narapela pait, olsem bilong Korea na Vietnam, na kilim i dai planti moa olsem ofa bilong god bilong pait. Na ol i wok yet long helpim ol kampani i wok bisnis long kilim ol man i dai—ol i baim ol gan samting ol dispela kampani i wokim. Long olgeta yia namel long 1980 na 1989, ol kantri i holim nating nem Kristen i bin tromoi bikpela mani moa yet, klostu 3 milion milion kina, long baim ol samting bilong pait. Namel long 1951 na 1991, Amerika i bin tromoi bikpela mani tru long baim ol samting bilong ami, i winim tru olgeta winmani em olgeta bisnis long Amerika i bin kisim insait long ol dispela yia. Nau ol i tok, pasin birua namel long ol bikpela kantri i dai, na ol i rausim sampela olpela bom nuklia, tasol planti narapela bom nogut i stap yet, na ol i wokim ol nupela gen. Ating bihain bai ol i mekim wok long ol dispela samting nogut bilong pait.
Ol Misin i Orait Long Pasin Nogut—Ol i Gat Kot
8 Olsem na tok bilong Jehova long Jeremaia 25:8, 9 i sutim stret ol dispela lain i holim nating nem Kristen na i no bihainim ol stretpela pasin Kristen. Jehova i tok: “Yupela i no bin bihainim tok bilong mi. Olsem na harim. Mi Bikpela, bai mi singautim olgeta lain bilong hap not. Na tu, bai mi singautim wokman bilong mi, em King Nebukatnesar bilong Babilon. Na bai mi bringim ol dispela lain i kam bilong bagarapim dispela graun na bilong bagarapim ol arapela lain manmeri i stap klostu long dispela graun. Mi bai larim ol lain bilong hap not i bagarapim ol olgeta, na bai ol i bagarap i stap oltaim. Na taim ol arapela lain manmeri i lukim, ol bai i kirap nogut tru na i pret moa yet.” Olsem na taim bilong bikpela hevi tru bai kirap pastaim long ol lain i holim nating nem Kristen, na bihain em bai i go kamap long ‘olgeta arapela lain’ long olgeta hap bilong graun.
9 Bipo, long ol kantri i holim nating nem Kristen, ol man i save laikim Baibel, na ol i ting marit na famili i as bilong i stap amamas, na ol i save kirap kwik long moningtaim na mekim ol wok bilong ol na i stap belgut. Na bilong malolo na kisim strong gen, planti ol i save kaunim Baibel na stadi long en long apinun long lait bilong lam. Tasol long nau ol manmeri i save pamuk nabaut, na katim marit, na kisim drak, na spak, na bikhet, na mangalim planti samting, na les long wok, na kalabus long lukim televisen, ol dispela pasin nogut i bagarapim tru i stap bilong ol. Dispela pasin i mas kamap pastaim, na bihain bai God Jehova i bagarapim ol dispela lain i holim nating nem Kristen, em ol i orait long kain kain pasin nogut.
10 Long Jeremaia sapta 25, ves 10 na 11, Jehova i tok: “Bai mi pinisim tru pasin bilong belgut na amamas na pasin bilong ol man i kisim meri. Na bai i no gat man bilong mekim wok bilong wilwilim wit, olsem na ol ston bilong wilwilim wit i no ken pairap moa. Na bai i no gat lam i lait moa long ol dispela ples. Dispela graun olgeta bai i bagarap na i kamap ples nating tasol.” Taim ol traipela haus lotu na ol gutpela gutpela haus bilong ol hetman bilong ol misin i bagarap, bai ol man i kirap nogut tru. Dispela bagarap em bikpela bagarap o olsem wanem? Long taim bilong Jeremaia, Juda na ol ples i stap klostu, ol i bagarap i stap inap 70 yia, na Song 90:10 i tok, yumi save stap 70 yia na yumi pinis. Olsem na taim strafe bilong Jehova i painim ol dispela lain, bai ol i bagarap i stap oltaim; bai ol i pinis olgeta.
Bikpela Babilon i Gat Kot
11 Olsem Kamapim Tok Hait 17:12-17 i tok, bilong kirapim dispela narapela kain wok, Jehova yet bai givim tingting long “dispela 10-pela kom”—em ol lain bilong Yunaitet Nesen i gat ami—na bai ol i “mekim ol dispela samting i kamap”—bai ol i bagarapim olgeta lotu giaman. Dispela bai kamap olsem wanem? I gat planti rot “dispela 10-pela kom” inap bihainim. Kamapim Tok Hait sapta 17, ves 16 i tok, “ol bai i birua long pamukmeri” na “kukim em olgeta long paia.” Tru, i gat planti bom nuklia i stap long ol hap em pait inap kirap long en. Tasol yumi mas wet, na bai yumi save olsem wanem Jehova bai givim tingting long ol hetman politik na kirapim ol long givim strafe bilong em long ol lotu giaman.
12 Taim i bin kamap long bipo bilong belhat bilong Jehova i mas painim Babilon. Jehova i bin makim King Nebukatnesar bilong givim strafe long lain bilong Jehova, tasol kirap long Jeremaia 25:12, Jeremaia i tokaut olsem strafe bilong Jehova i mas painim tu Nebukatnesar yet na Babilon na olgeta narapela lain bilong graun. Wankain samting i kamap long nau. Kamapim Tok Hait sapta 17 i tok, “dispela 10-pela kom” bai bagarapim olgeta lotu giaman, na sapta 19 i tok, bihain “dispela 10-pela kom” yet na ol narapela “king bilong graun” bai bagarap. Jehova i givim strafe long Babilon wantaim “olgeta kantri” i bin mekim nogut long lain bilong em? Jeremaia 25:13, 14 i stori long Jehova i bin makim Nebukatnesar bilong givim strafe long ol Juda. Tasol Nebukatnesar na ol king bilong Babilon i kamap bihain long em i hambak; ol i litimapim nem bilong ol yet na ol i daunim nem bilong Jehova. Ol i kisim ol samting holi bilong haus lotu bilong Jehova na mekim wok nogut long en. (Daniel 5:22, 23) Na taim ol Babilon i bagarapim Jerusalem, ol lain i stap klostu ol i amamas, em lain bilong Moap na Amon na Tair na Idom na ol narapela lain, na ol i tok bilas long lain bilong God. Ol tu i mas kisim strafe long Jehova.
“Planti Lain Manmeri” i Gat Kot
13 Olsem na long Jer. sapta 25, ves 15 na 16, Jeremaia i tok: “God, Bikpela bilong Israel, i tokim mi olsem, ‘Jeremaia, dispela kap wain mi holim, em i makim belhat bilong mi. Kisim dispela kap na bai mi salim yu i go long ol planti lain manmeri na yu mas mekim ol i dring long dispela kap. Ol i dring pinis, orait ol bai i kamap olsem ol longlong man na wokabaut kranki tru. Long wanem, mi bai salim ol birua i kam pait long ol na bagarapim ol.’ ” Bilong wanem Jehova i tok long “kap wain”? Long Matyu 26:39, 42 na Jon 18:11, Jisas i tok long wanpela “kap” bilong makim laik bilong God, olsem ol samting God i laik mekim long Jisas. Olsem na dispela “kap wain” i makim laik bilong Jehova—em i laik bai ol dispela lain i dring long belhat bilong em. Jeremaia 25:17-26, i kolim nem bilong ol dispela lain i makim ol lain bilong graun long nau.
14 Ol misin i holim nating nem Kristen ol bai bagarap pastaim, na olsem Juda long bipo, bai ol i “bagarap nogut tru.” Taim ol narapela lain i lukim ol i bagarap, bai ol i “kirap nogut tru na i pret moa yet.” Na bihain olgeta narapela lotu giaman i mas bagarap. Na bihain long dispela, olgeta lain bilong graun, em Isip i piksa bilong ol, ol i mas dring long kap wain i makim belhat bilong Jehova! Tru tumas, “olgeta king bilong olgeta kantri i stap long hap not, maski ol i stap longwe o ol i stap klostu,” na “olgeta king bilong olgeta kantri bilong graun” ol i mas dring. “Na bihain, king bilong Babilon bai i dring tu.” Husat dispela king bilong Babilon? Maski ol man i no inap lukim Satan, em i stap king bilong Babilon long bipo, na olsem tasol em i stap “hetman i save bosim dispela graun” long nau, olsem Jisas i bin tok. (Jon 14:30) Olsem na tok bilong Jeremaia 25:17-26, i wankain olsem tok bilong Kamapim Tok Hait sapta 18 i go 20, na i helpim yumi long save gut wanem samting i mas kamap pastaim, na wanem samting i mas kamap bihain, long taim ol lain manmeri i dring long kap wain i makim belhat bilong Jehova. Pastaim olgeta lotu giaman i mas bagarap, na bihain bai olgeta gavman i bagarap, na las tru bai Satan i kalabus long hul i no gat as.—KTH 18:8; 19:19-21; 20:1-3.
15 Nau ol man i ting pasin birua namel long ol bikpela kantri i dai na i gat wanpela strongpela gavman tasol i stap. Olsem na planti man i kirap long tok, gutpela taim i laik kamap. Dispela strongpela gavman o “king” em i namba 7 het bilong wel abus, na olsem Kamapim Tok Hait 17:10 i tok, em i mas i stap “liklik taim tasol.” Nau dispela “liklik taim” i laik pinis. Klostu nau bai ol lain politik i no ken tok moa olsem, “gutpela taim tru” i laik kamap long rot bilong wok politik, long wanem, olsem aposel Pol i tok, “wantu tasol samting bilong bagarapim ol bai i kamap long ol.”—1 Tesalonaika 5:2, 3.
16 Olgeta lain bilong Satan i mas dring long kap wain i makim belhat bilong Jehova, na ol misin i holim nating nem Kristen i mas dring pastaim. Long Jeremaia sapta 25, ves 27 i go 29, Jehova i tok moa olsem: “Jeremaia, yu mas givim dispela tok long ol dispela lain manmeri. Mi God bilong Israel, mi Bikpela I Gat Olgeta Strong, mi tokim yupela olsem, ‘Yupela dring. Dring planti moa inap yupela i spak na traut na pundaun long graun, na yupela i no inap kirap gen. Long wanem, mi bai salim ol birua i kam pait long yupela na bagarapim yupela.’ Tasol Jeremaia, sapos ol i no laik kisim dispela kap long han bilong yu, orait yu mas tokim ol olsem, ‘Mi Bikpela I Gat Olgeta Strong, mi tok, yupela i mas kisim na dring. Mi bai mekim nogut long olgeta manmeri bilong graun. Na bai mi statim dispela wok long Jerusalem, dispela taun bilong mi yet. Na yupela i ting bai mi abrusim yupela, a? Nogat tru. Mi Bikpela I Gat Olgeta Strong, mi tok, bai mi salim ol birua i go pait long olgeta lain manmeri bilong graun.’ ”
17 Em strongpela tok bilong mekim ol man i pret. Em tok bilong Nambawan Bikpela King em i bosim heven na graun, em God Jehova. Inap sampela tausen yia pinis em i bin karim hevi na em i isi long ol man i tok bilas na tok nogut na birua long nem holi bilong em. Tasol nau taim i kamap pinis bilong em i mekim ol samting olsem Pikinini bilong em Krais Jisas i bin beten askim em long en. Taim Jisas i stap long graun em i lainim ol disaipel olsem: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’ ” (Matyu 6:9, 10) Em laik bilong Jehova long Jisas i mas mekim wok olsem bainat bilong Jehova long bekim nogut long olgeta manmeri i save bagarapim nem bilong em.
18 Kamapim Tok Hait sapta 6 i tok Jisas i sindaun long wanpela waitpela hos bilong ‘winim pait na em i winim planti pait moa.’ (Re 6 Ves 2) Kirap long 1914 taim em i kamap King long heven em i mekim olsem. Ol narapela hos na ol man i sindaun long ol i bihainim em, ol i makim ol bikpela pait na bikpela hangre na ol bikpela sik i painim ol man kirap long dispela taim. Tasol wanem taim ol dispela hevi bai pinis? Kamapim Tok Hait sapta 7 i stori long 4-pela ensel i holimpas “ol 4-pela win bilong graun” i go inap long taim ol i bungim ol Israel bilong spirit na ol bikpela lain manmeri na bai ol i no ken bagarap. (Re 7 Ves 1) Wanem samting bai kamap bihain?
19 Jeremaia sapta 25:30,31 , ves 30 na 31, i tok moa olsem: “Bikpela i stap long ples bilong em yet long heven, na em bai i bikmaus moa yet long ol manmeri bilong en. Em bai i singaut strong long olgeta manmeri bilong graun, olsem man i singaut taim em i wok long krungutim ol pikinini wain. Nois bilong singaut bilong en bai inapim olgeta hap bilong graun. As bilong dispela singaut i olsem. Bikpela i laik kotim olgeta manmeri bilong graun. Na em bai i salim ol birua i go kilim i dai ol manmeri i save mekim pasin nogut.” No gat wanpela lain bai abrusim belhat bilong Jehova; olgeta i mas dring long dispela kap. Olsem na olgeta man i gat stretpela bel ol i mas hariap na klia long pasin nogut bilong ol dispela lain taim ol 4-pela ensel i holimpas yet traipela win i makim belhat bilong Jehova. Klostu nau bai belhat bilong Jehova i painim ol dispela lain olsem traipela win na ren i kamap long ol. Profet Jeremaia i stori long dispela long Jer 25 ves 32 na 33. Em i tok:
20 “Bikpela I Gat Olgeta Strong i tok moa olsem, ‘Harim, olgeta kantri bai i bagarap. Dispela bai i stat long wanpela kantri na bai i go i go na inapim olgeta kantri. Dispela bagarap i olsem traipela win na ren i kirap long ol longwe ples na i raun long olgeta hap bilong graun.’ Na long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun. Na bai i no gat man i stap bilong krai sori long ol na bilong bungim ol bodi bilong ol na planim ol. Nogat. Ol bodi bai i stap nabaut long graun olsem pekpek bilong dok.” Em samting nogut tru, a? Tasol dispela samting i mas kamap bambai olgeta pasin nogut i ken pinis long graun, na Paradais i ken kamap olsem God i tok promis pinis.
Ol Wasman i Mas Krai
21 Jer 25 Ves 34 i go 36 i stori moa long strafe bilong Jehova, olsem: “Yupela ol hetman na ol wasman bilong ol manmeri, yupela mas krai na sori nogut tru. Na yupela i mas pundaun long graun na tanim tanim nabaut. Long wanem, nau em i taim bilong ol birua i kam na kilim yupela i dai na rausim nabaut ol manmeri i stap yet. Bai yupela i pundaun na bagarap olsem gutpela sospen graun i pundaun na bagarap. Na yupela wasman bai i no gat ples yupela i ken ranawe i go na hait long en, bilong abrusim dispela bagarap. Nau ol wasman bilong sipsip i krai na sori nogut tru. Long wanem, Bikpela i wok long bagarapim ol ples ol sipsip bilong ol i save kaikai gras long en.”
22 Ol dispela wasman bilong sipsip i husat? I no ol hetman bilong lotu, em ol i dring pinis long belhat bilong Jehova. Ol dispela wasman bilong sipsip em ol hetman politik, em Jeremaia 6:3 tu i stori long ol. Ol i bikhet long Jehova na bungim ol ami bilong ol bilong pait long em. Ol i bin pulim planti samting long ol man ol i bosim na ol yet i kamap maniman. Ol i save moa yet long pasin bilong giaman. Ol i no bin pinisim kwik hangre i bin kilim i dai sampela lain olgeta long ol kantri i stap rabis. Na ol i helpim “ol hetman,” em ol man i baim i go ol samting bilong pait na ol man i bagarapim graun bilong kisim planti mani. Na ol i no givim marasin o kaikai bilong helpim planti milion pikinini ol i wok long i dai.
23 Ol dispela man i painim rot bilong ol yet i ken sindaun isi, olsem na laspela tok bilong Jeremaia sapta 25, em Jer 25 ves 37 na 38, i tok long ol olsem: “Bikpela i belhat moa yet na i bagarapim ol dispela gutpela ples kunai ol sipsip i bin sindaun isi long en. Bikpela i kirap na i kam olsem laion i lusim ples hait bilong en. Bikpela i belhat nogut tru na em i salim ol birua i kam pait long ol.” Bai ol i kirap nogut tru! Tasol belhat bilong Jehova i no inap abrusim ol. Long rot bilong “ol birua,” em Krais Jisas wantaim ami bilong heven, bai belhat bilong Jehova i painim ol. Kamapim Tok Hait sapta 19, ves 15 na 16 i tok, Krais Jisas em i “King bilong olgeta king, na Bikpela bilong olgeta bikman,” na em i holim stik ain bilong bosim strong ol lain manmeri. Olsem na wanem samting bai kamap?
24 Olsem wanem? Yu bin stap long taim bilong traipela win na ren? Ating yu pret nogut tru. Bihain yu lukim ol samting i bagarap na i stap nabaut, tasol yu amamas, long wanem, win i dai na gutpela taim i kamap, na yu inap tenkyu long Jehova long dispela, a? Olsem tasol, taim traipela win na ren bilong taim bilong bikpela hevi tru i pinis, bai yu lukluk raun long graun na bai yu tenkyu long Jehova long yu bin abrusim bagarap na i stap yet, na yu inap insait long wok Jehova i laik bai yumi mekim long dispela taim, em wok bilong stretim graun na kamapim gutpela ples paradais. Long dispela taim bai kot bilong Jehova long olgeta lain bilong graun i pinis, na nem bilong em i stap holi, na rot i op bilong kamapim laik bilong em long graun aninit long Kingdom bilong Krais em bai bosim graun inap 1,000 yia. Tru tumas, Kingdom i mas i kam!
Rivyu bilong paragraf 5-24
◻ Nau wanem ol pasin giaman bilong ol lotu i holim nating nem Kristen i gat kot?
◻ Olsem Jeremaia 25:12-38 i soim yumi, husat i gat kot long nau?
◻ Olgeta lain manmeri i mas dring long wanem kap?
◻ Husat em ol wasman i krai, na bilong wanem ol i gat hevi?
[Askim Bilong Stadi]
1, 2. (a) Taim King Josaia i dai pinis, wanem samting i bin kamap long Juda? (b) Husat em i laspela king bilong Juda na em i kisim wanem pe bilong ol pasin nogut bilong em?
3. Wanem taim i bin kirap long yia 607 paslain long Krais, na wanem samting i mas kamap long pinis bilong dispela taim?
4. Yumi gat wanem ol askim long tok profet bilong Jeremaia?
5, 6. (a) Kirap long 1914, olsem wanem ol lotu i holim nating nem Kristen i mekim wankain pasin olsem ol Juda bilong bipo? (b) Ol lain i mekim wok olsem Jeremaia i bin autim wanem tok long ol?
7. Wanem samting i soim yumi klia olsem ol lotu i holim nating nem Kristen i no bihainim tok bilong Jehova?
8. Olsem wanem tok bilong Jeremaia 25:8, 9 bai kamap tru long ol misin?
9. Olsem wanem pasin bilong ol lain i holim nating nem Kristen i go nogut tru long taim bilong yumi?
10. Taim Jehova i bagarapim pinis ol lotu i holim nating nem Kristen bai ol i stap olsem wanem?
11. Husat bai mekim wok bilong bagarapim ol misin, na bilong wanem ol i mekim?
12. (a) Wanem samting i bin painim Babilon taim ol i bagarapim pinis Jerusalem? (b) Taim ol misin i bagarap, wanem samting bai painim ol kantri?
13. Dispela “kap wain” i makim wanem samting? Na wanem samting bai painim ol lain manmeri i dring long en?
14. Olsem Jeremaia i tok, husat i dring long dispela kap wain i makim belhat bilong God? Na dispela i makim wanem samting long taim bilong yumi?
15. Wanem samting bai kamap taim ol i tok “gutpela taim tru” i laik kamap?
16, 17. (a) Sapos sampela i laik abrusim kot bilong God, wanem samting bai painim ol? (b) Long wanem rot laik bilong Jehova bai kamap long graun?
18, 19. (a) Husat i sindaun long hos bilong winim pait long nem bilong Jehova, na em i wetim wanem samting pastaim? (b) Taim ol ensel i lusim ol strongpela win i makim belhat bilong Jehova, wanem samting bai kamap long graun?
20. Wanem samting i soim yumi kot bilong Jehova em i no liklik samting? Tasol bilong wanem em i mas mekim olsem?
21, 22. (a) Husat em ol “wasman” Jeremaia 25:34-36 i tok long en, na bilong wanem ol i krai? (b) Jehova i belhat long wanem ol wasman long nau, na bilong wanem i stret em i belhat long ol?
23. Taim Jehova i bagarapim pinis dispela graun Satan i bosim, ol samting bai stap olsem wanem?
24. Ol stretpela manmeri bai kisim wanem ol blesing taim ol lotu giaman na dispela graun bilong Satan i pinis?
[Piksa long pes 18]
Jehova i makim pinis rot bilong bagarapim ol lotu i holim nating nem Kristen
[Piksa long pes 23]
Taim traipela win bilong bikpela hevi tru i pinis, gutpela graun bai kamap