Ol Yangpela, Tingim God Taim Yupela i Yangpela Yet

‘Taim yupela i yangpela yet, yupela i mas tingim God i bin wokim yupela.’​​—SAV. 12:1.

 1. Olsem wanem Jehova i kamapim olsem em i bilip long ol yangpela i lotuim em?

JEHOVA i tingim ol yangpela Kristen olsem gutpela samting tru na olsem wara bilong nait i save givim nupela strong. Tru tumas, Jehova i tok profet olsem taim Pikinini bilong em i laik “pait long ol birua,” ol yangpela man na meri bai amamas long ‘go na helpim’ wok bilong Krais. (Sng. 110:3) Dispela tok profet bai kamap tru long taim we planti manmeri i no tingim God, na ol i tingim ol yet na mani tasol, na ol i no gat pasin bilong bihainim tok. Tasol Jehova i bin save olsem ol yangpela i lotuim em, ol i narapela kain. Man! Jehova i bilip tru long yupela ol yangpela brata na sista!

 2. Wanem samting i insait long pasin bilong tingim Jehova?

² Tingim bikpela amamas bilong God taim em i lukim ol yangpela i tingim em olsem Bikpela Man Bilong Wokim ol. (Sav. 12:1) Yumi ken save olsem pasin bilong tingim Jehova i no olsem yumi tingting tasol long em. Nogat. Em i makim olsem yumi mekim sampela samting​—yumi mekim ol samting em i laikim, na larim ol lo na stiatok bilong em i stiaim yumi long ol wan wan de. Na em i makim tu olsem yumi bilip tru long Jehova, na yumi save olsem em i laik helpim gut yumi. (Sng. 37:3; Ais. 48:​17, 18) Olsem wanem? Yu gat dispela kain tingting long Bikpela Man Bilong Wokim yu?

“Bilip Strong Long Bikpela”

3, 4. Olsem wanem Jisas i kamapim olsem em i bilip tru long Jehova? Bilong wanem em i bikpela samting long bilip strong long Jehova long nau?

³ Nambawan gutpela piksa bilong wanpela man i bilip tru long God em Jisas Krais. Em i bihainim tru tok bilong Sindaun 3:​5, 6: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Bihain liklik long taim Jisas i kisim baptais, Satan i kam long em na i laik traim em long kisim strong na biknem bilong dispela graun. (Lu. 4:​3-​13) Jisas i no larim Satan i giamanim em. Em i save olsem ‘sapos yumi daunim yumi yet na stap aninit long Bikpela,’ bai yumi kisim ‘planti samting na biknem, na bai yumi stap gut.’​—Snd. 22:4.

⁴ Long nau planti man i gat pasin mangal na pasin bilong tingim ol yet tasol. Taim yumi stap namel long ol kain man olsem, em i gutpela long yumi bihainim pasin bilong Jisas. Na tu, tingim olsem Satan i wok strong tru long pulim ol wokman bilong Jehova long lusim liklik rot i go long laip. Em i laik bai olgeta man i kam long bikpela rot i go long lus. No ken larim em i giamanim yu! Yu mas pasim tok long bel long tingim Bikpela Man Bilong Wokim yu. Bilip strong long em, na kisim dispela laip em i “laip tru,” em samting bai kamap tru na kamap kwiktaim.​—1 Ti. 6:19.

Ol Yangpela, Bihainim Savetingting!

 5. Yu ting olsem wanem long samting bai kamap long dispela graun long bihain?

⁵ Ol yangpela em ol i save tingim Bikpela Man Bilong Wokim ol, ol i gat gutpela tingting tru winim ol wankrismas bilong ol. (Ritim Song 119:​99, 100.) Ol i kisim tingting bilong God, olsem na ol i save i no longtaim na pasin bilong dispela graun bai pinis. Maski yupela i stap inap sampela yia tasol, yupela ol yangpela i lukim pinis olsem pasin bilong pret na tingting planti i wok long i go bikpela. Sapos yupela i stap yet long skul, ating yupela i harim olsem ol samting i save bagarapim win na wara, graun i wok long kamap hat, ol i katim ol diwai na pinisim bus, na ol kain hevi olsem. Ol man i tingting planti long ol dispela samting, tasol ol Witnes Bilong Jehova tasol i kliagut olsem ol dispela samting em i hap bilong mak i soim olsem yumi stap long taim bilong pinis bilong dispela graun bilong Satan.​—KTH 11:18.

 6. Olsem wanem sampela yangpela i larim ol samting i giamanim ol?

⁶ Sori tru, sampela yangpela wokman bilong God i bin lusim pasin bilong was i stap na ol i no tingim olsem pasin bilong dispela graun bai i stap inap sotpela taim tasol. (2 Pi. 3:​3, 4) Sampela i larim ol poroman nogut na ponografi i pulim ol long mekim bikpela rong. (Snd. 13:20) Yumi stap klostu long pinis bilong pasin bilong dispela graun, olsem na em bai i nogut tru sapos nau yumi mekim wanpela samting na God i no ken orait long yumi! Mobeta yumi kisim skul long samting i painim ol Israel long 1473 B.C.E. taim ol i stap long Ples Stret Bilong Moap, klostu tru long Graun Bilong Promis. Wanem samting i kamap long dispela hap?

Ol i Pundaun

7, 8. (a) Satan i mekim wok long wanem rot bilong pundaunim ol Israel long Ples Stret Bilong Moap? (b) Satan i mekim wok long wanem rot long nau?

⁷ Long dispela taim bipo, Satan i no laik ol Israel i kisim ol gutpela samting Jehova i bin promis long givim long ol. Satan i no inap mekim na profet Balam i toknogutim ol Israel, olsem na Satan i mekim wok long wanpela rot i hatwok long luksave long en; em i bin wok long pulim ol Israel long mekim pasin i no stret na bai Jehova i no ken orait moa long ol. Ol meri Moap i grisim ol, na long dispela taim Satan inap pundaunim planti. Ol man i kirap long pamuk wantaim ol meri Moap na ol i brukim skru long giaman god Bal bilong Peor! Maski gutpela samting God i bin promis long givim long ol, em Graun Bilong Promis, i stap klostu tru, inap 24,000 Israel i dai. Man! Em samting nogut tru i bin kamap, a?​​—Nam. 25:​1-3, 8, 9.

⁸ Long nau, kwiktaim tru yumi wok long i go klostu long wanpela graun bilong promis i gutpela moa​—em nupela taim. Long nau tu, Satan i mekim gen wok long pasin pamuk samting bilong bagarapim lain bilong God. Pasin bilong dispela graun i go nogut tru, olsem na planti man i ting i orait long mekim pasin pamuk na em laik bilong ol man yet long mekim pasin sodom o nogat. Wanpela sista Kristen i tok: “Long haus na long Haus Kingdom tasol ol pikinini bilong mi i lain olsem pasin sodom na pasin bilong slip wantaim wanpela i no poroman marit, em pasin nogut long ai bilong God.”

 9. Wanem samting inap kamap taim yupela i yangpela? Ol yangpela inap mekim wanem?

⁹ Ol yangpela em ol i tingim Bikpela Man Bilong Wokim ol, ol i save olsem maritpasin em wanpela samting holi em God i givim olsem presen na i bilong kamapim nupela laip. Olsem na ol i save ol man i mas mekim maritpasin long rot God i bin makim​—em insait long marit. (Hi. 13:4) Tasol taim ol i yangpela​—taim laik bilong mekim maritpasin i strong na em inap paulim tingting bilong ol​—ating em i hatwok long i stap klin. (1 Ko. 7:36) Yu inap mekim wanem samting sapos yu kisim sampela tingting kranki? Beten strong long Jehova long helpim yu long tingting strong long ol gutpela samting. Long olgeta taim Jehova i save harim ol beten bilong ol man i givim bel long beten long em. (Ritim Luk 11:​9-​13.) Pasin bilong toktok long ol gutpela samting wantaim narapela tu inap helpim yumi long stretim bek tingting.

Putim Ol Gutpela Mak Bilong Winim!

10. Yumi no laik kisim wanem tingting? Yumi ken givim wanem ol askim long yumi yet?

¹⁰ Wanpela as na planti yangpela i mekim nabaut na ol i strong long inapim laik bilong skin bilong ol, em long wanem ol i no larim God i stiaim ol o ol i no wetim gutpela samting i kamap bihain. (Snd. 29:18) Ol i olsem ol Israel long taim bilong Aisaia em ol i bin lusim God na ol i bihainim tasol pasin bilong ‘lap na amamas na wokim ol bikpela pati na dring wain.’ (Ais. 22:13) Yumi no ken mangal long ol samting bilong ol dispela manmeri, nogat, mobeta yumi tingim ol gutpela samting Jehova i laik givim long ol man i stap gut long em. Olsem wanem? Sapos yu wanpela yangpela wokman bilong God, yu save wetim tru nupela taim? Yu save wok strong tru long “tingting gut na wokabaut stret . . . na bilip strong na wetim dispela gutpela samting yumi bai amamas tru long lukim,” em ol samting Jehova i bin tok promis long en? (Ta. 2:​12, 13) Bekim bilong yu long ol dispela askim bai stiaim yu long wanem ol mak yu putim na wanem samting i olsem bikpela samting long yu.

11. Bilong wanem ol yangpela Kristen em ol i stap yet long skul, ol i mas wok strong?

¹¹ Ol manmeri bilong dispela graun i laik ol yangpela i tingim ol samting bilong dispela graun olsem nambawan bikpela samting. Tru, yupela ol yangpela i stap yet long skul, yupela i mas wok strong long skul gut. Long wanem, yupela i laik painim wok mani, na tu, yupela i laik helpim na strongim kongrigesen na autim gut tok bilong Kingdom. Bilong mekim olsem, em i bikpela samting long yupela inap kamapim klia tingting bilong yupela, wokim gut tingting, na toktok gut wantaim ol narapela long pasin rispek. Tasol ol yangpela, em ol i stadi long Baibel na ol i wok strong long bihainim ol stiatok bilong en long laip bilong ol, ol i kisim nambawan gutpela skul bambai ol i ken kisim gutpela samting bilong oltaim oltaim.​​—Ritim Song 1:​1-3.a

12. Ol famili Kristen i mas bihainim pasin bilong husat?

¹² Long Israel bilong bipo, pasin bilong ol papamama long skulim gut ol pikinini em i bikpela samting tru. Ol papamama i bin skulim ol pikinini long olgeta samting bilong laip, na moa yet long pasin bilong lotuim God na bihainim ol lo bilong em. (Lo 6:​6, 7) Olsem na ol yangpela Israel em ol i bin putim gut yau long ol papamama bilong ol na ol narapela lapun man i daun long God, ol i no kisim save tasol, nogat, ol i kisim tu savetingting, gutpela tingting, na pasin bilong wokim gut tingting​—em sampela pasin ol inap kisim long rot bilong lain long God na ol lo bilong em. (Snd. 1:​2-4; 2:​1-5, 11-​15) Ol famili Kristen long nau i mas bihainim wankain tingting long pasin bilong skulim ol pikinini.

Bihainim Tok Bilong Ol Man i Laikim Yupela

13. Sampela yangpela i kisim wanem ol tok bilong stiaim ol? Bilong wanem ol i mas was gut?

¹³ Ol yangpela i save kisim ol tok long ol kain kain man​—long ol tisa long skul tu, tasol planti taim ol dispela lain i save tingting tasol long pasin bilong kisim gutpela wok mani na namba. Plis beten na skelim gut ol dispela tok wantaim Tok Bilong God na ol buk na nius i kam long wokboi i gat gutpela tingting. Long stadi bilong yu long Baibel yu kisim pinis save olsem ol yangpela na ol manmeri i no gat bikpela save ol i olsem nambawan lain em Satan i laik pulim. Olsem: Long gaden Iden, Iv​—em i no gat bikpela save tumas​—em i harim tok bilong Satan, em wanpela man Iv i no save long em na i no bin mekim wanpela samting i soim olsem em i laikim Iv. Man! Sapos Iv i bin bihainim tok bilong Jehova, em Man i kamapim long planti rot olsem em i laikim tru Iv, ol samting bai kamap narapela kain, a?​—Stt. 3:​1-6.

14. Bilong wanem yumi mas harim tok bilong Jehova na papamama bilong yumi i bilip?

¹⁴ Bikpela Man Bilong Wokim yupela em i laikim yupela tu, na em i no gat sampela tingting nogut. Em i laik bai yupela i stap amamas inap oltaim, na i no long nau tasol! Olsem wanpela papa i tingim gut pikinini bilong em, em i tokim yupela na ol manmeri i lotuim em olsem: ‘Em rot yupela i mas bihainim.’ (Ais. 30:21) Sapos yupela i gat papamama i bilip na i laikim tru Jehova, yupela i gat gutpela helpim moa. Harim gut tok kaunsel bilong ol long ol samting yupela i mas putim olsem nambawan samting na ol mak yupela i laik winim. (Snd. 1:​8, 9) Ol i laik yupela i mas kisim laip oltaim, samting i gutpela moa winim ol mani kago na namba bilong dispela graun.​​—Mt. 16:26.

15, 16. (a) Yumi ken bilip tru olsem Jehova bai helpim yumi olsem wanem? (b) Yumi ken lain long wanem bikpela samting long samting i painim Baruk?

¹⁵ Ol manmeri i tingim Bikpela Man Bilong Wokim ol, ol i no kisim planti samting bilong skin, na ol i bilip tru olsem Jehova bai i “no lusim” ol na i “no larim [ol] i stap nating. Nogat tru.” (Ritim Hibru 13:5.) Dispela gutpela tingting i narapela kain long tingting bilong ol manmeri bilong dispela graun, olsem na yumi mas was gut na bai tingting bilong dispela graun i no ken stiaim yumi. (Ef. 2:2) Long dispela samting, tingim kuskus bilong Jeremaia, em Baruk, em i stap long taim nogut bilong las de paslain long taun Jerusalem i bagarap long 607 B.C.E.

¹⁶ Ating Baruk i laik kisim planti samting bilong skin bilong kisim gutpela sindaun moa. Jehova i luksave long dispela samting na long gutpela pasin em i givim tok lukaut long Baruk olsem Baruk i no ken wok long painim “ol gutpela samting” bilong em yet. Baruk i gat pasin daun na savetingting, long wanem, em i harim tok bilong Jehova na abrusim bagarap bilong Jerusalem. (Jer. 45:​2-5) Tasol ol wanlain bilong Baruk em ol i kisim “ol gutpela samting” bilong skin, na putim Jehova olsem nambatu, i no longtaim na ol i bin lusim olgeta samting bilong ol taim ol Kaldia (Babilon) i bagarapim Jerusalem. Na tu, planti i lusim laip bilong ol. (2 Sto. 36:​15-​18) Samting i painim Baruk i helpim yumi long save olsem pasin bilong pas gut wantaim God em i bikpela samting moa long mani kago na namba bilong dispela graun.

Tingim Ol Nambawan Gutpela Piksa

17. Bilong wanem Jisas, Pol, na Timoti ol i olsem gutpela piksa ol wokman bilong Jehova long nau i ken bihainim?

¹⁷ Bilong helpim yumi long wokabaut long rot bilong laip, Tok Bilong God i stori long planti manmeri em ol i stap olsem gutpela piksa yumi ken bihainim. Olsem: Jisas i gat gutpela save tru long wokim ol samting, i no gat narapela man i bin stap long graun i gat gutpela save olsem, tasol em i tingting strong long ol samting i helpim ol man inap oltaim​—em “gutnius bilong kingdom.” (Lu. 4:43) Bilong givim Jehova ol nambawan gutpela samting, aposel Pol i lusim gutpela wok mani na em i mekim wok long taim na strong bilong em bilong autim gutnius. Timoti i “save bilip long Krais Jisas,” na em i bihainim gutpela pasin bilong Paul. (1 Ti. 1:2) Olsem wanem? Jisas, Pol, na Timoti ol i bel hevi long samting ol i mekim long laip bilong ol? Nogat tru! Pol i tok em i save tingim ol samting bilong dispela graun olsem “pipia nating” taim em i skelim dispela samting wantaim gutpela wok bilong lotuim God.​​—Fl. 3:​8-​11.

18. Wanpela yangpela brata i mekim wanem ol bikpela senis? Bilong wanem em i no bel hevi long dispela?

¹⁸ Planti yangpela Kristen long nau i bihainim bilip bilong Jisas, Pol, na Timoti. Olsem: Wanpela yangpela brata, bipo em i gat wanpela gutpela wok mani, em i tok: “Mi bihainim ol stiatok bilong Baibel, olsem na i no longtaim na ol i laik givim gutpela wok mani moa long mi. Tru, mi kisim planti mani, tasol mi pilim olsem mi wok long ran i go bilong holimpas win. Taim mi toktok wantaim ol bos bilong kampani na tokim ol olsem mi laik mekim wok autim tok fultaim, kwiktaim ol i laik givim planti mani moa long mi, na ol i laik mi mas i stap. Tasol mi pasim tok pinis long bel. Planti manmeri i no inap kliagut long as na mi lusim gutpela wok mani na kirap mekim wok autim tok fultaim. Bekim bilong dispela em olsem: Mi laik truim dediket bilong mi long God. Nau bikpela samting long laip bilong mi em wok bilong God, olsem na mi kisim wanpela kain amamas em mani o namba i no inap givim long mi.”

19. Ol yangpela i mas wokim wanem gutpela disisen?

¹⁹ Long olgeta hap, planti tausen yangpela i bin wokim ol kain gutpela disisen olsem. Olsem na yupela ol yangpela, taim yupela i tingting long ol samting yupela i laik mekim long bihain, tingim olsem de bilong Jehova i klostu. (2 Pi. 3:​11, 12) No ken mangal long ol samting bilong ol man i wok long kisim planti samting bilong dispela graun. Mobeta yupela i bihainim tok bilong ol manmeri i laikim tru yupela. Sapos yupela i bungim “ol gutpela gutpela samting” long heven, dispela i nambawan gutpela samting yupela inap mekim na i no inap bagarap, na dispela tasol bai helpim yupela inap oltaim oltaim. (Mt. 6:​19, 20; ritim 1 Jon 2:​15-​17.) Tru tumas, tingim Bikpela Man Bilong Wokim yupela. Taim yupela i mekim olsem, Jehova bai blesim yupela.

[Futnot]

Yu Inap Tingim?

• Olsem wanem yumi ken kamapim olsem yumi bilip long God?

• Wanem skul em i nambawan gutpela skul?

• Pasin bilong Baruk inap skulim yumi long wanem samting?

• Husat i stap olsem gutpela piksa long bihainim? Bilong wanem ol i olsem gutpela piksa?

[Ol Piksa long pes 13]

Jehova i save givim nambawan gutpela skul

[Piksa long pes 15]

Baruk i harim tok bilong Jehova na abrusim bagarap bilong Jerusalem. Yu inap kisim wanem skul long dispela?