Sapta 6
Kamapim Klia Tok Hait Bilong Bikpela Diwai
1. Wanem samting i painim King Nebukatnesar? Dispela i kamapim wanem ol askim?
JEHOVA i larim King Nebukatnesar i kamap bosman bilong graun. Em i king bilong Babilon, olsem na em i gat planti mani samting, na ol gutpela gutpela kaikai, na wanpela naispela haus king—em i gat olgeta samting bilong graun em i gat laik long en. Tasol wantu samting i kamap bilong daunim em tru. Nebukatnesar i kamap longlong na em i kirap bihainim pasin bilong wanpela animal! Ol i rausim em long haus king, na em i stap ausait na kaikai gras olsem bulmakau. Dispela samting i kamap olsem wanem? Bilong wanem yumi mas save long dispela samting?—Skelim wantaim Jop 12:17-19; Saveman 6:1, 2.
KING I LITIMAPIM GOD ANTAP TRU
2, 3. King bilong Babilon i gat wanem laik long ol manmeri i stap aninit long em? Em i gat wanem tingting long God Antap Tru?
2 Taim sik longlong bilong Nebukatnesar i pinis na em i kamap orait, bihain liklik em i salim wanpela tok i go long olgeta hap em i bosim na em i stori long samting i bin painim em. Jehova i kirapim profet Daniel long raitim stret dispela stori. Dispela tok i kirap olsem: “Yupela olgeta i ken i stap gut. Nau mi laik tokim yupela long ol bikpela samting God Antap Tru i bin soim mi. God i save soim yumi olkain bikpela samting tru. Na em yet i strongpela tru. Em bai i stap king oltaim oltaim.”—Daniel 4:1-3.
3 Nebukatnesar i bosim ol manmeri “bilong olgeta kantri”—gavman bilong em i bosim klostu olgeta hap graun em Baibel i stori long en. King i stori long God bilong Daniel, na em i tok: “Em bai i stap king oltaim oltaim.” Dispela tok i litimapim tru nem bilong Jehova long olgeta hap em gavman bilong Babilon i bosim! Na tu, dispela em i namba tu taim Nebukatnesar i bin kisim save olsem Kingdom bilong God tasol “bai i stap oltaim.”—Daniel 2:44.
4. “Olkain bikpela samting tru” i kirap painim Nebukatnesar olsem wanem?
4 “God Antap Tru” i bin mekim wanem “olkain bikpela samting tru”? Namba wan samting, em ol samting i bin painim king yet, na em i stori olsem: “Mi Nebukatnesar, mi sindaun isi long haus bilong mi na mi lukim ol wok bilong mi i kamap gutpela tumas na mi gat planti samting, na mi amamas i stap. Tasol wanpela nait mi driman na mi pret nogut tru.” (Daniel 4:4, 5) King bilong Babilon i mekim wanem long dispela driman i pretim em?
5. Nebukatnesar i gat wanem tingting long Daniel? Bilong wanem em i ting olsem?
5 Nebukatnesar i singautim ol saveman bilong Babilon i kam na em i tokim ol long dispela driman. Tasol ol i no inap tru long kamapim insait bilong en! Nebukatnesar i tok: “Bihain Daniel i kam. Mi bin givim nem Beltesasar long en, dispela em nem bilong god bilong mi. Ol strongpela god i bin givim tingting long Daniel, olsem na mi tokim em long driman bilong mi.” (Daniel 4:6-8) Nem bilong Daniel insait long haus king em Beltesasar, na dispela god giaman king i kolim “god bilong mi,” ating em Bal o Nebo o Marduk. Nebukatnesar i save lotuim planti god, olsem na em i ting “ol strongpela god i bin givim tingting long Daniel.” Na tu, Daniel i stap bos bilong olgeta saveman bilong Babilon, olsem na king i kolim em “hetman bilong ol glasman i save yusim marila posin samting.” (Daniel 2:48; 4:9, NW; skelim wantaim 1:20.) Tasol yumi save, gutpela man Daniel i no bin lusim lotu bilong Jehova na mekim marila posin samting.—Wok Pris 19:26; Lo 18:10-12.
WANPELA BIKPELA DIWAI
6, 7. Bai yu stori olsem wanem long samting Nebukatnesar i lukim long driman bilong em?
6 Wanem samting i kamap insait long dispela driman i pretim king bilong Babilon? Nebukatnesar i tok: “Taim mi slip, mi bin driman olsem. Mi lukim wanpela longpela diwai i sanap namel long olgeta hap graun. Em i kamap bikpela na het bilong en i go antap tru long skai, inap long olgeta man bilong olgeta hap graun i ken lukim. Dispela diwai i gat planti gutpela lip na i save karim planti pikinini, inap olgeta man na animal i ken kaikai. Ol wel animal i save kam malolo long as bilong en, na ol pisin i save wokim haus long han bilong en, na olgeta kain samting i save kaikai pikinini bilong en.” (Daniel 4:10-12) Sampela i tok Nebukatnesar i laikim tru ol traipela diwai sida bilong Lebanon, na em i bin go lukim ol, na kisim sampela olsem plang samting i kam long Babilon. Tasol em i no bin lukim kain diwai olsem em i lukim long driman bilong em. I olsem dispela diwai i gat namba na “i sanap namel long olgeta hap graun,” na olgeta man long olgeta hap graun inap lukim, na em i save karim planti kaikai inap long olgeta man na animal i ken kaikai.
7 I gat planti samting moa bilong dispela driman, long wanem, Nebukatnesar i tok moa olsem: “Mi tingting yet long dispela driman, na mi lukim wanpela ensel i kam daun long heven, em wanpela bilong ol ensel i save was long ol samting. Em i singaut strong olsem, ‘Katim dispela diwai bai i pundaun. Na katim ol han bilong en, na rausim ol lip, na tromoi ol pikinini bilong en i go nabaut. Rausim ol animal i stap aninit long dispela diwai na ol pisin i stap long ol han bilong en. Tasol larim as bilong en i stap long graun namel long ol gras, na kisim wanpela bikpela ring ain na bras na putim long as bilong en. Larim wara bilong nait i pundaun antap long en na larim em i painim gras olsem ol animal.’ ”—Daniel 4:13-15.
8. Dispela “ensel i save was long ol samting” em i husat?
8 Ol Babilon i gat tingting bilong lotu bilong ol yet long ol gutpela spirit na ol spirit nogut. Tasol dispela “ensel” i kam daun long heven na “i save was long ol samting,” em i husat? Em i wanpela gutpela ensel i olsem maus bilong God. (Skelim wantaim Song 103:20, 21.) Ating i gat planti askim i kamap long tingting bilong Nebukatnesar! Bilong wanem ol i katim dispela diwai? Dispela as bilong diwai ol i pasim long ring ain na bras bambai em i no inap kru, em inap mekim wanem gutpela wok? Tru tumas, i gat wanem wok bilong wanpela as bilong diwai ol i katim pinis?
9. Ensel i tok wanem? Dispela i kamapim wanem ol askim?
9 Ating Nebukatnesar i paul stret taim em i harim tok bilong ensel, em i tok: “Em i no inap tingting moa olsem ol man, tasol em bai i tingting olsem ol animal inap long 7-pela yia [olsem “7-pela hap taim,” NW ]. Ol ensel i save was long ol samting, ol i bin tok long ol dispela samting i mas kamap, bilong olgeta man i ken save, God Antap Tru i bosim olgeta manmeri. Long laik bilong em yet, em i save makim ol man i kamap king, maski ol i gat biknem o ol i man nating.” (Daniel 4:16, 17) As bilong wanpela diwai i no gat tingting olsem bilong wanpela man i stap insait long en. Na tu, olsem wanem as bilong wanpela diwai i ken kisim tingting bilong wanpela animal? Wanem dispela “7-pela hap taim”? Na olsem wanem wok king bilong “bosim olgeta manmeri” i insait long ol dispela samting? Ating Nebukatnesar i gat bikpela laik long save long bekim bilong ol dispela askim.
SAMTING NOGUT BAI PAINIM KING
10. (a) Long Baibel, ol diwai i ken makim wanem samting? (b) Dispela bikpela diwai i makim wanem samting?
10 Taim Daniel i harim stori bilong driman, pastaim em i kirap nogut, na bihain em i pret. Nebukatnesar i tokim em long kamapim as bilong driman, olsem na profet i tok: “King, mi no laik bai ol samting dispela driman i tok long en i ken kamap long yu. Mi laik bai ol i ken kamap long ol birua bilong yu tasol. Yu bin lukim wanpela bikpela diwai. Het bilong en i go antap tru long skai, . . . King, dispela diwai i makim yu tasol. Yu gat biknem tru long ai bilong olgeta manmeri, na long strong bilong yu, yu save bosim ol manmeri bilong olgeta hap bilong graun.” (Daniel 4:18-22) Long Baibel, sampela taim ol diwai i save makim ol man, ol king, na ol gavman. (Song 1:3; Jeremaia 17:7, 8; Esekiel, sapta 31) Olsem het bilong bikpela diwai long driman, Nebukatnesar tu i kamap strong olsem het bilong wanpela gavman i bosim graun. Tasol dispela bikpela diwai i makim wok bilong “bosim ol manmeri bilong olgeta hap bilong graun.” Olsem na dispela bikpela diwai i makim wok king bilong God long bosim olgeta samting long heven na long graun, na i makim moa yet wok king em i mekim bilong bosim graun.—Daniel 4:17.
11. Olsem wanem driman bilong king i soim olsem senis bai kamap long em na dispela senis bai daunim em tru?
11 Senis bai kamap long Nebukatnesar na dispela senis bai daunim em tru. Daniel i stori long dispela, na em i tok: “Yu bin lukim wanpela bilong ol ensel i save was long ol samting i kam daun long heven na i tok, ‘Katim dispela diwai na bagarapim, tasol larim as bilong en i stap long graun namel long ol gras. Na kisim wanpela bikpela ring ain na bras na putim long as bilong en. Larim wara bilong nait i pundaun antap long en na larim em i stap wantaim ol animal inap long 7-pela yia [olsem “7-pela hap taim,” NW ].’ King, as bilong dispela driman i olsem. God Antap Tru i tok long samting bai i kamap long yu.” (Daniel 4:23, 24) Daniel i mas strongim bel long autim dispela tok long strongpela king!
12. Wanem samting bai painim Nebukatnesar?
12 Wanem samting bai painim Nebukatnesar? Tingim samting king i mekim taim Daniel i tok moa olsem: “Yu bai lusim ples bilong ol manmeri, na bai yu go i stap wantaim ol wel animal. Bai yu kaikai gras olsem ol bulmakau, na bai yu slip ausait, na wara bilong nait bai i pundaun antap long yu inap long 7-pela yia [olsem “7-pela hap taim,” NW ]. Yu bai i stap olsem, inap yu save olsem God Antap Tru i bosim olgeta manmeri. Long laik bilong em yet, em i save makim ol man i kamap king.” (Daniel 4:25) I luk olsem ol ofisa bilong Nebukatnesar yet bai rausim em long “ples bilong ol manmeri.” Tasol olsem wanem? Ol wasman bilong ol bulmakau na sipsip em ol i gat pasin sori, bai ol i lukautim em? Nogat. Long wanem, God i tok pinis olsem em bai “go i stap wantaim ol wel animal” na kaikai gras.
13. Driman bilong diwai i makim wanem samting bai kamap long wok king bilong Nebukatnesar?
13 Olsem ol i katim dispela diwai na i pundaun, Nebukatnesar tu i pundaun na lusim wok bilong bosim graun—tasol em i lusim inap sotpela taim tasol. Daniel i tok: “Yu harim ensel i tok long larim as bilong diwai i stap yet long graun. As bilong dispela i olsem. Taim yu save gut olsem, God wanpela tasol i save bosim olgeta samting bilong graun, orait bai yu kamap king gen.” (Daniel 4:26) Long driman bilong Nebukatnesar, as bilong diwai ol i larim i stap, tasol ol i pasim bambai em i no ken kru. Olsem na “as” bilong wok king bilong king bilong Babilon bai i stap, tasol em i no inap kamap bikpela inap long “7-pela hap taim” i pinis pastaim. Namba bilong em olsem king bilong bosim graun bai i stap wankain olsem as bilong diwai ol i pasim ring ain na bras long en. Wok king bilong em bai stap na wetim 7-pela hap taim i pinis pastaim. Jehova bai lukautim wok king bilong Nebukatnesar bambai i no gat narapela man i senisim em na kamap king bilong Babilon, tasol ating pikinini bilong em Evil Merodak i mekim wok king olsem helpim bilong em long dispela taim.
14. Daniel i tokim Nebukatnesar long mekim wanem?
14 Samting nogut bai painim Nebukatnesar olsem tok profet i kamapim, olsem na Daniel i strongim bel na tokim king olsem: “Mi laik bai yu mekim olsem nau mi tokim yu. Yu no ken mekim sin moa. Yu mas mekim stretpela pasin tasol, na yu mas marimari long ol manmeri i sot long ol samting. Sapos yu mekim olsem, orait bai yu ken i stap gut na olgeta samting yu mekim bai i kamap gutpela tasol.” (Daniel 4:27, lukim sta daunbilo bilong ves 27.) Sapos Nebukatnesar i lusim pasin bilong mekim nogut long ol man na hambak, ating dispela inap senisim samting i laik painim em. Long wanem, winim 200 yia paslain long dispela taim, Jehova i tokaut pinis long bagarapim ol manmeri bilong biktaun bilong Asiria, em Nineve, tasol em i no mekim, long wanem, king wantaim olgeta lain i stap aninit long em ol i tanim bel. (Jona 3:4, 10; Luk 11:32) Olsem wanem long hambakman Nebukatnesar? Em bai senisim pasin bilong em?
NAMBA WAN TRUIM BILONG DRIMAN
15. (a) Nebukatnesar i bihainim yet wanem kain pasin? (b) Ol rait i stori olsem wanem long ol samting Nebukatnesar i mekim?
15 Nebukatnesar i hambak i stap. Twelpela mun bihain long driman bilong diwai, em i wokabaut long veranda bilong haus king, na em i hambak na tok: “Man, Babilon em i bikpela taun na i nambawan tru. Long strong bilong mi yet, mi bin kirapim dispela taun, bilong soim bikpela strong na biknem bilong mi long olgeta lain manmeri.” (Daniel 4:28-30) Nimrot i bin kamapim Babilon (Babel), tasol Nebukatnesar i mekim taun i kamap naispela tru. (Stat 10:8-10) Long wanpela rait em i bin raitim long ston, em i tok: “Mi Nebukatnesar, King bilong Babilon, man i kamapim gen Esagila na Esida, mi pikinini bilong Nabopolasar. . . . Mi bin strongim banis bilong Esagila na Babilon na nem bilong wok king bilong mi bai i stap oltaim.” (Archaeology and the Bible, em George A. Barton i raitim long 1949, pes 478-479) Narapela rait i stori long em i bin stretim o wokim gen 20 tempel. Buk The World Book Encyclopedia, i tok: “Taim Nebukatnesar i stap king, Babilon i kamap wanpela gutpela taun tru. Long ol stori Nebukatnesar yet i raitim, em i no stori tumas long ol pait em i bin mekim, nogat; em i stori long ol haus samting em i wokim na pasin bilong em long lotuim ol god bilong Babilon. Ating Nebukatnesar i bin wokim ol naispela gaden bilong Babilon, em ol gaden i gat biknem tru.”
16. Wanem samting i laik kamap long Nebukatnesar bilong daunim em tru?
16 Maski Nebukatnesar i hambak long ol samting em i mekim, samting bilong daunim tru dispela hambakman klostu bai painim em. Baibel i tok: “Em i toktok yet na em i harim wanpela tok i kam long heven. Dispela tok i olsem, ‘King Nebukatnesar, yu harim tok bilong mi. Dispela kantri yu save bosim, nau bai mi rausim long han bilong yu. Na bai ol i rausim yu na yu no ken i stap moa wantaim ol manmeri. Bai yu go i stap wantaim ol wel animal tasol. Yu bai kaikai gras olsem ol bulmakau, inap long 7-pela yia [olsem “7-pela hap taim,” NW ]. Bai yu stap olsem inap yu save olsem God Antap Tru i bosim olgeta manmeri. Long laik bilong em yet, em i save mekim ol man i kamap king.’ ”—Daniel 4:31, 32.
17. Wanem samting i kamap long hambakman Nebukatnesar? Na kwiktaim em i stap olsem wanem?
17 Kwiktaim gutpela tingting bilong Nebukatnesar i lus na em i kamap longlong. Ol i rausim em na em i no ken stap moa wantaim ol manmeri, na em i kaikai gras “olsem ol bulmakau.” Taim em i stap wantaim ol wel animal em i no sindaun isi long gras long wanpela paradais na amamas long kisim gutpela win. Long Irak bilong nau, em ol pipia ston bilong Babilon i stap long en, long taim bilong san em i hat nogut tru, na long taim bilong kol em i kol nogut tru. I no gat man i lukautim em na em i stap ausait long taim bilong san, kol, na ren, olsem na longpela gras bilong em i luk olsem gras bilong tarangau na kapa bilong pinga bilong en i kamap longpela olsem bilong pisin. (Daniel 4:33) Man, dispela i daunim tru dispela hambakman i bosim graun!
18. Long dispela 7-pela hap taim, wanem samting i kamap long wok king bilong Babilon?
18 Long driman bilong Nebukatnesar, ol i katim dispela bikpela diwai na putim ring long as bilong en bambai em i no ken kru inap 7-pela hap taim. Na olsem tasol “God i bin rausim [Nebukatnesar] na em i no moa i stap king” taim Jehova i mekim em i kamap longlong. (Daniel 5:20) Dispela i mekim na king i no inap tingting olsem wanpela man, em bai tingting olsem wanpela animal. Tasol God i larim Nebukatnesar i kisim bek wok king bilong em taim 7-pela hap taim i pinis. Ating Evil Merodak i stap het bilong gavman long dispela taim, tasol Daniel ‘i stap namba wan kiap bilong provins Babilon na em i stap bos bilong olgeta saveman bilong Babilon.’ Na 3-pela poroman Hibru bilong em ol i gat wok bilong bosim provins Babilon. (Daniel 1:11-19; 2:48, 49; 3:30) Dispela 4-pela man i wetim Nebukatnesar i kisim bek wok king na tingting bilong em i kamap gutpela gen na em i kisim save pinis olsem “God Antap Tru i bosim olgeta manmeri. Long laik bilong em yet, em i save makim ol man i kamap king.”
NEBUKATNESAR I KAMAP GUTPELA GEN
19. Taim Jehova i givim bek gutpela tingting long Nebukatnesar, king bilong Babilon i kisim wanem save?
19 Long pinis bilong 7-pela hap taim Jehova i givim bek gutpela tingting long Nebukatnesar. Long dispela taim king i litimapim nem bilong God Antap Tru olsem: “Taim . . . i pinis, orait mi Nebukatnesar, mi lukluk i go antap long skai na tingting bilong mi i kamap gutpela gen. Na mi amamas long God Antap Tru. God i stap oltaim oltaim, olsem na mi litimapim nem bilong em moa yet. Na mi tok olsem, God bai i stap king oltaim oltaim. Em i lukim ol man bilong graun i olsem samting nating. Ol ensel long heven na ol man long graun i stap aninit long en, na em i bosim ol. Taim em i laik mekim wanpela samting, i no gat wanpela man inap long pasim em. Na i no gat wanpela man inap long askim em olsem, ‘Yu laik mekim wanem samting?’ ” (Daniel 4:34, 35) Em nau, Nebukatnesar i kisim save olsem God Antap Tru em i King bilong bosim olgeta manmeri.
20, 21. (a) Samting i kamap long diwai taim ol i rausim ring ain na ring bras long as bilong en, olsem wanem dispela i gat truim bilong en long samting i painim Nebukatnesar? (b) Nebukatnesar i tokaut long wanem samting? Dispela i mekim na em i kamap wanpela man bilong lotuim Jehova?
20 Taim Nebukatnesar i kamap king gen i olsem ol i rausim ring ain na bras long as bilong diwai bilong driman. Em i stori long em i kamap gutpela gen, na em i tok: “Long taim mi mekim dispela tok, orait wantu tingting bilong mi i kamap gutpela gen, na mi kisim biknem bilong mi gen, na mi kisim strong bilong lukautim dispela kantri bipo mi bin bosim. Ol man i save givim gutpela tingting long mi na ol bikman bilong mi, ol i kam i stap wantaim mi gen. Na mi stap king gen na mi gat biknem tru, i winim dispela biknem mi bin i gat bipo.” (Daniel 4:36) Sapos sampela bikman bilong king i bin givim baksait long king taim em i stap longlong, nau “ol i kam i stap wantaim [em] gen” na ol i redi long bihainim olgeta tok bilong em.
21 God Antap Tru i bin mekim “ol bikpela samting” tru! Yumi no kirap nogut long tok king bilong Babilon i mekim, olsem: “Nau mi Nebukatnesar, mi amamas long king bilong heven na mi litimapim nem bilong en na givim biknem long em. Olgeta samting em i save mekim ol i gutpela na stretpela tasol, na em i save daunim ol man i laik litimapim nem bilong ol yet.” (Daniel 4:2, 37) Tasol ol samting i kamap long Nebukatnesar na em i tokaut long en i no kirapim em long kamap wanpela man bilong narapela kantri i lotuim Jehova.
SAVE OL I KISIM I TRUIM DISPELA STORI?
22. Sampela i tok sik longlong bilong Nebukatnesar em i wanem kain sik? Tasol yumi mas tingim wanem as bilong sik longlong bilong em?
22 Sampela i tok sik longlong bilong Nebukatnesar i olsem sik laikantropi. Wanpela dikseneri bilong marasin i tok: “LAIKANTROPI . . . i kam long tok [lyʹkos], lupus, wel dok; [anʹthro·pos], homo, man. Em nem bilong sik bilong man i ting em i senis na kamap wanpela animal, na em bai makim nek na pasin bilong dispela animal. Em i ting em i kamap olsem wanpela wel dok, o dok, o pusi; na sampela taim wanpela bulmakau, olsem Nebukatnesar i mekim.” (Buk Dictionnaire des sciences médicales, par une société de médicins et de chirurgiens, Paris, 1818, Volium 29, pes 246) Ol samting i makim olsem man i gat sik laikantropi i wankain olsem ol samting i bin painim Nebukatnesar. Tasol God i bin givim dispela sik longlong long Nebukatnesar, olsem na yumi no ken kolim stret wanpela nem bilong dispela sik.
23. Wanem rait bilong ol man i truim stori bilong Nebukatnesar olsem em i bin kamap longlong?
23 Wanpela saveman bilong Baibel, em John E. Goldingay, em tu i stori long Nebukatnesar i kamap longlong na bihain em i orait gen. Em i tok: “Ol i painim liklik hap bilong wanpela rait ol i ting em i stori long wanpela sik longlong bilong Nebukatnesar, na ating stori bilong rait i makim taim em i bin lusim taun na i no lukautim Babilon.” Goldingay i stori long wanpela rait ol i kolim “Jop bilong Babilon” na em i tok “dispela rait i stori long God i stretim em, sik i kisim em, God i daunim em, em i wok long painim as bilong wanpela driman i pretim em, em i pundaun olsem wanpela diwai, ol i rausim em i go i stap ausait, em i kaikai gras, kamap longlong, kamap olsem bulmakau, Marduk i salim ren i kam wasim em, ol kapa bilong pinga i stap nogut, gras i go longpela, ol i pasim em long baklain, na bihain em i kamap gutpela gen na givim biknem long God.”
SEVENPELA HAP TAIM I BIKPELA SAMTING LONG YUMI
24. (a) Bikpela diwai bilong driman i makim wanem samting? (b) Wanem samting i pas inap 7-pela hap taim? Dispela samting i kamap olsem wanem?
24 Olsem dispela bikpela diwai i makim, Nebukatnesar i makim pasin bilong bosim dispela graun. Tasol tingim: Diwai i makim wok bos na wok king i bikpela moa na i winim bilong king bilong Babilon. Em i makim wok bilong Jehova, “king bilong heven,” long bosim olgeta hap, na i makim moa yet wok king em i mekim bilong bosim graun. Taim Babilon i no bagarapim yet Jerusalem, gavman i bin stap long dispela taun na Devit wantaim ol tumbuna pikinini bilong em ol i sindaun long “sia king bilong Jehova,” na dispela gavman i makim wok king bilong God long bosim graun. (1 Stori 29:23, NW ) God yet i katim na pasim dispela wok king long 607 B.C.E. taim em i yusim Nebukatnesar long bagarapim Jerusalem. Wok king bilong God hia long graun long rot bilong wanpela kingdom long lain bilong Devit i pinis inap long “7-pela hap taim,” olsem Baibel Hibru bilong pastaim i tok. Dispela 7-pela hap taim i gat hamas yia bilong en? Wanem taim dispela 7-pela hap taim i bin kirap, na wanem samting i kamap bilong makim pinis bilong en?
25, 26. (a) Long ol samting i painim Nebukatnesar, dispela “7-pela hap taim” i makim hamas yia? I gat wanem as na yu bekim olsem? (b) Long bikpela truim, wanem taim dispela “7-pela hap taim” i kirap? Em i kirap olsem wanem?
25 Taim Nebukatnesar i longlong i stap, “gras bilong en i kamap longpela olsem tarangau, na kapa bilong pinga bilong en i kamap longpela olsem pinga bilong pisin.” (Daniel 4:33) Dispela samting i no kamap insait long 7-pela de o 7-pela wik. Sampela Baibel i tanim dispela tok olsem “7-pela hap taim,” na sampela pasin moa bilong tanim i olsem “ol taim ol i makim pinis” o “ol hap taim.” (Daniel 4:16, 23, 25, 32) Baibel Septuagint i tanim dispela hap tok long narapela narapela kain pasin, na wanpela i tok “7-pela yia.” Saveman Josifas, em i stap long taim bilong ol aposel, em i ting dispela “7-pela hap taim” i olsem “7-pela yia.” (Antiquities of the Jews, Buk 10, Sapta 10, paragraf 6) Na tu, sampela saveman bilong ol Hibru i ting dispela ol hap “taim” i olsem ol “yia.” Ol Baibel bilong tok Hiri Motu na tok Pisin, na Baibel An American Translation, na Today’s English Version, na Baibel James Moffatt i tanim, ol i tanim dispela tok olsem “7-pela yia.”
26 Yumi ken ting driman bilong Nebukatnesar i stori long 7-pela yia. Long ol tok profet, wanpela yia i gat 360 de, o 12-pela mun i gat 30 de long olgeta wan wan mun. (Skelim wantaim KTH 12:6, 14.) Olsem na “7-pela hap taim,” o 7-pela yia, bilong king i olsem 360 de taims 7, o 2,520 de. Tasol olsem wanem long bikpela truim bilong driman bilong em? Long tok profet dispela “7-pela hap taim” i longpela taim moa, winim 2,520 de. Tok bilong Jisas i helpim yumi long save long dispela samting, em i tok: “Lek bilong ol man bilong ol arapela lain bai i krungutim Jerusalem, inap long taim God i bin makim bilong ol arapela lain man i bosim Jerusalem, em i pinis.” (Luk 21:24) Dispela wok bilong “krungutim” Jerusalem i bin kirap long 607 B.C.E. taim Jerusalem i bagarap, na dispela kingdom, em piksa bilong kingdom bilong God, i no stap moa long Juda. Wanem taim bai dispela wok bilong krungutim Jerusalem i pinis? Long “taim God i makim bilong mekim olgeta samting i kamap nupela gen,” em taim God i bosim graun long rot bilong Kingdom bilong em, em Jerusalem i stap piksa bilong en.—Aposel 3:21.
27. Wanem as na yu ken tok dispela “7-pela hap taim” i bin kirap long 607 B.C.E. em i no pinis 2,520 de bihain?
27 Sapos yumi kaunim 2,520 de kirap long taim Jerusalem i bagarap long 607 B.C.E., bai yumi kamap long yia 600 B.C.E. tasol, na long Baibel dispela i no wanpela bikpela yia. Long 537 B.C.E. tu, taim ol Juda i lusim kalabus na ol i go bek long ples, wok king bilong Jehova i no kamap bek long graun. As bilong dispela i olsem, ol i no makim Serubabel, em bilong lain bilong Devit, long kamap king, nogat; ol i makim em long kamap gavena tasol bilong Juda, em wanpela provins bilong Persia.
28. (a) Yumi mas bihainim wanem lo taim yumi kaunim 2,520 de bilong dispela tok profet bilong “7-pela hap taim”? (b) Dispela “7-pela hap taim” long tok profet i makim hamas yia? Ol i kirap na pinis long wanem ol yia?
28 Dispela “7-pela hap taim” i wanpela tok profet, olsem na yumi mas bihainim wanpela lo bilong Baibel long kaunim dispela 2,520 de, olsem wanpela wanpela de i makim wanpela wanpela yia. Dispela lo i stap long wanpela tok profet i stori long taim ami bilong Babilon i banisim Jerusalem. (Esekiel 4:6, 7; skelim wantaim Namba 14:34.) Olsem na dispela “7-pela hap taim” em ol gavman bilong ol arapela lain tasol bai bosim graun na Kingdom bilong God i no pasim ol, em i go inap 2,520 yia. Dispela 7-pela hap taim i kirap taim Juda na Jerusalem i bagarap long mun namba 7 (Tisri 15) bilong 607 B.C.E. (2 King 25:8, 9, 25, 26) Kirap long dispela taim na i go inap long 1 B.C.E. em i olsem 606 yia. I gat 1,914 yia moa i stap, na ol dispela yia i kirap long 1 B.C.E. na i go inap long yia 1914 C.E. Olsem na dispela “7-pela hap taim,” o 2,520 yia, i pinis long Tisri 15, olsem Oktoba 4/5, 1914 C.E.
29. Dispela “man nating” i makim husat? Jehova i bin mekim wanem bilong mekim em i kamap king?
29 Long dispela yia ‘taim bilong ol arapela lain man’ i pinis, na God i givim wok king long wanpela “man nating”—em Jisas Krais—em man ol birua i ting em i man nogut tru, olsem na ol i hangamapim em long wanpela diwai. (Daniel 4:17) Bilong givim wok king long King Mesaia, i olsem Jehova i lusim ring ain na bras i stap long ‘as bilong diwai’ i makim wok king bilong em yet. Olsem na God Antap Tru i larim wanpela “nupela kru” i kamap, i makim wok God i mekim long bosim graun long rot bilong Kingdom i stap long heven long han bilong nambawan Man bilong kisim wok king bilong Devit, em Jisas Krais. (Aisaia 11:1, 2; Jop 14:7-9; Esekiel 21:27) Yumi tok tenkyu tru long Jehova long ol dispela gutpela samting i bin kamap na em i kamapim long ples klia dispela tok hait bilong bikpela diwai!
YU BIN KISIM WANEM SAVE?
• Bikpela diwai long driman bilong Nebukatnesar i makim wanem samting?
• Wanem samting i kamap long Nebukatnesar long namba wan truim bilong driman bilong diwai?
• Truim bilong driman i kamap pinis long Nebukatnesar na bihain em i tokaut long wanem samting?
• Long bikpela truim bilong driman bilong diwai, “7-pela hap taim” i makim hamas yia, na ol dispela yia i kirap na pinis long wanem taim?
[Piksa i karamapim pes olgeta long pes 83]
[Piksa i karamapim pes olgeta long pes 91]