Ol Pasin Bilong Jehova i Stretpela Tasol

“Ol pasin bilong Bikpela i stretpela tasol, na ol stretpela man i save bihainim.”​—⁠HOSEA 14:⁠9.

1, 2. Jehova i bin stretim rot na bai ol Israel i ken mekim wanem? Tasol ol i mekim wanem?

LONG taim bilong profet Moses, Jehova i stretim rot na bai ol Israel i ken bihainim stretpela pasin tasol. Tasol 700 yia samting bihain, God i lukim olsem ol i gat asua long bikpela rong. Dispela samting i kamap ples klia long Hosea sapta 10 i go 14.

² Ol Israel i bin kamap lain bilong giaman. Ol manmeri bilong dispela 10-pela lain bilong Israel ol i bin bihainim “pasin nogut” na samting nogut i bin kamap long dispela. (Hosea 10:​1, 13) Jehova i tok: “Taim ol Israel i olsem liklik pikinini yet mi laikim ol tru, na mi singautim dispela pikinini long lusim Isip na i kam, na i stap pikinini bilong mi.” (Hosea 11:⁠1) Maski God i bin kisim bek ol Israel long wok kalabus long Isip, ol i no bekim gutpela pasin long em​—⁠ol i kirap mekim pasin giaman tasol. (Hosea 11:12) Olsem na Jehova i mekim dispela tok long ol: ‘Yupela i mas kam bek long God bilong yupela. Na yupela i mas bihainim em tru na mekim stretpela pasin.’​—⁠Hosea 12:⁠6.

 3. Wanem samting bai painim bikhetlain Samaria? Ol Israel i mas mekim wanem bambai God i ken marimari long ol?

³ Ol bikhetlain Samaria na king bilong ol bai kisim bagarap. (Hosea 13:​11, 16) Tasol ves 1 bilong laspela sapta bilong Hosea i tok: “Ol Israel, yupela i mas kam bek long God, Bikpela bilong yupela.” Sapos ol Israel i tanim bel tru na askim God long lusim ol sin bilong ol, orait God bai marimari long ol. Na tu, ol i mas save olsem “ol pasin bilong Bikpela i stretpela tasol,” na ol i mas bihainim ol dispela pasin.​—⁠Hosea 14:​1-6, 9.

 4. Bai yumi skelim wanem ol stiatok long tok profet bilong Hosea?

⁴ Long sapta 10 i go 14 bilong tok profet bilong Hosea i gat planti stiatok em ol inap helpim yumi long wokabaut wantaim God. Bai yumi skelim ol dispela samting: (1) Jehova i laik bai yumi lotuim em long pasin i klin na i no long pasin giaman, (2) God i mekim gutpela-pasin-sori long lain bilong em, (3) Oltaim yumi mas bilip na wetim God i helpim yumi, (4) Ol pasin bilong Jehova i stretpela tasol, na (5) ol man i bin mekim sin ol inap kam bek long Jehova.

Jehova i Laik Bai Yumi Lotuim Em Long Pasin i Klin

 5. God i laik bai yumi lotuim em long wanem kain pasin?

⁵ Jehova i laik bai yumi mas lotuim em long pasin i klin na i no long pasin giaman. Tasol ol Israel i bin kamap olsem wanpela “diwai wain” i karim kaikai nogut. Ol i bin wokim planti ‘alta moa yet’ bilong lotuim ol giaman god. Ol dispela lain i tromoi lotu i tru, ol i wokim tu ol pos tambaran. Jehova bai brukim ol dispela alta na bagarapim ol dispela pos.​—⁠Hosea 10:​1, 2.

 6. Bilong wokabaut wantaim God yumi no ken mekim wanem?

⁶ Pasin bilong giaman i no ken stap namel long ol man i lotuim Jehova. Tasol olsem wanem long ol Israel? Ol i bin kamap “man bilong giaman”! Maski ol i bin mekim kontrak wantaim Jehova olsem wanpela lain i dediket long em, em i tokaut olsem ol i lain bilong giaman. Yumi inap lainim wanem samting long dispela? Sapos yumi dediket pinis long God, yumi no ken stap olsem man bilong giaman. Sindaun 3:32 i tok: “Bikpela yet i no laik tru long kain man olsem. Tasol Bikpela i stap wanbel tru wantaim ol man i save wokabaut stret.” Yumi mas ‘bilip tru na stap klin tru long ai bilong God na i no gat asua long ai bilong em’ na bai yumi inap wokabaut wantaim em.​—⁠1 Timoti 1:⁠5.

God i Mekim Gutpela-Pasin-Sori Long Lain Bilong Em

7, 8. (a) Yumi mas mekim wanem ol samting na bai Jehova i ken mekim gutpela-pasin-sori long yumi? (b) Yumi mas mekim wanem sapos yumi bin mekim bikpela rong?

⁷ Sapos yumi lotuim Jehova long pasin i klin na long stretpela pasin, em bai mekim gutpela-pasin-sori long yumi. Jehova i mekim dispela tok long ol bikhetlain Israel: “Yupela i mas lusim dispela pasin nogut na bihainim stretpela pasin na lotu tru long mi, olsem man i brukim graun long nupela gaden na i planim kaikai na kaikai i kamap gut na karim planti. Nau em i taim bilong yupela i kam bek long mi God, Bikpela bilong yupela. Sapos yupela i kam bek long mi, bai mi mekim gut long yupela moa yet.”​—⁠Hosea 10:⁠12.

⁸ Sapos ol Israel i bin tanim bel na kam bek long Jehova, em bai amamas long ‘mekim gut long ol.’ Sapos yumi bin mekim bikpela rong, yumi mas beten askim Jehova long lusim dispela rong, na askim ol elda Kristen long helpim yumi long ol samting bilong spirit. (Jems 5:​13-16) Na tu, yumi mas larim holi spirit i stiaim yumi, long wanem, “sapos wanpela man i bihainim ol laik bilong olpela bel bilong em yet, orait dispela pasin bilong olpela bel bai i kamapim kaikai nogut na em bai i bagarap olgeta. Tasol sapos em i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim.” (Galesia 6:⁠8) Sapos yumi “bihainim pasin bilong Holi spirit,” Jehova bai laikim yumi.

9, 10. Olsem wanem tok bilong Hosea 11:​1-4 i stret long ol Israel?

⁹ Yumi ken bilip tru olsem long olgeta samting Jehova i mekim long lain bilong em, em i save mekim long gutpela pasin. Hosea 11:​1-4 i kamapim klia dispela samting, em i tok: “Taim ol Israel i olsem liklik pikinini yet mi laikim ol tru, na mi singautim dispela pikinini long lusim Isip na i kam, na i stap pikinini bilong mi. . . . Ol manmeri bilong mi i bin mekim ofa long giaman god Bal. Ol i mekim ofa bilong kamapim smok i gat gutpela smel long ol giaman god. Mi yet mi bin lainim ol Israel, olsem papa i lainim pikinini long wokabaut. Na mi karim ol long han bilong mi. Mi bin lukautim ol gut, tasol ol i no ting mi yet mi mekim dispela wok. Mi sori long ol na mi laikim ol tumas, na mi kisim ol i kam long mi. Mi kisim ol na mekim gut long ol, na givim kaikai long ol.”

¹⁰ Long dispela ves, Jehova i tok lain Israel i olsem wanpela liklik pikinini. Em i bin lainim ol Israel long wokabaut, na em i bin karim ol long han bilong em. Em i “laikim ol tumas” na kisim ol i kam long em. Em i mekim gut tru long ol, a? Tingim olsem yu wanpela papa o mama i helpim liklik pikinini bilong yu long wokabaut long namba wan taim. Ating han bilong yu i stap redi bilong holim em na bai em i no ken pundaun. Pasin bilong Jehova long laikim yu i wankain. Em i ‘laikim yu tumas’ na em i amamas tru long kisim yu i kam long em.

11. Olsem wanem God i olsem “man i rausim plang long nek” bilong ol Israel?

¹¹ Long ol samting Jehova i mekim long ol Israel, Hosea 11:4 (NW ) i tok em i olsem “man i rausim plang long nek bilong ol na givim kaikai long olgeta wan wan bilong ol.” God i olsem man i rausim o slekim plang long nek bilong animal na bai animal inap kaikai gut. Tasol taim ol Israel i no bihainim moa tok bilong God na stap aninit long em, long dispela taim tasol God i larim ol birua i kamap olsem man i putim plang long nek bilong ol. (Lo 28:​45, 48; Jeremaia 28:14) Yumi no ken larim nambawan birua bilong yumi, Satan, i kirap bosim yumi na putim hevi long yumi. Mobeta yumi wok yet long wokabaut wantaim God.

Oltaim Bilip na Wetim Jehova

12. Olsem Hosea 12:6 i tok, yumi mas mekim wanem na bai yumi inap wokabaut yet wantaim God?

¹² Oltaim yumi mas bilip na wetim God i helpim yumi na bai yumi ken wokabaut wantaim em. Hosea i tokim ol Israel: “Yupela i mas bilip long God bilong yupela na kam bek long em. Na yupela i mas bihainim em tru na mekim stretpela pasin, na wetim em i helpim yupela.” (Hosea 12:⁠6) Ol Israel inap soim olsem ol i tanim bel na kam bek long Jehova long rot bilong bihainim em tru, na mekim stretpela pasin, na ‘wetim em i helpim ol.’ Maski yumi bin wokabaut wantaim God inap longpela taim pinis, yumi mas wok yet long mekim gutpela-pasin-sori, mekim stretpela pasin, na oltaim wetim God i helpim yumi.​—⁠Song 27:⁠14.

13, 14. Pol i stori olsem wanem long Hosea 13:14? Wanem wanpela as na yumi bilip na wetim Jehova?

¹³ Tok profet bilong Hosea long ol Israel i kirapim yumi long bilip na wetim God i helpim yumi. Jehova i tok: “Mi bai kisim bek ol long ples bilong ol man i dai pinis. Dai, mi bai kamap olsem samting nogut tru na pinisim yu olgeta. Ples bilong ol man i dai pinis, mi bai kamap olsem sik nogut tru bilong bagarapim yu olgeta.” (Hosea 13:14) Long dispela taim Jehova i no gat tingting long kisim bek ol bikhetlain Israel long indai. Tasol bihain Jehova bai pinisim dai na bai dai i no gat strong moa long daunim ol man.

¹⁴ Pol i raitim pas long ol wanbilip Kristen God i bin makim ol long holi spirit, na em i kamapim tok bilong Hosea olsem: “Dispela bodi i save bagarap, em bai i senis na i stap gut oltaim. Na dispela bodi i save dai, em bai i senis na i stap laip oltaim. Long dispela taim tok i stap long buk bilong God, em bai i kamap tru. Buk bilong God i tok olsem, ‘God i winim pait na em i pinisim dai tru. Dai, we stap strong bilong yu long daunim ol man? Dai, we stap spia bilong yu bilong bagarapim ol man?’ Spia bilong dai em sin tasol, na sin em i kisim strong bilong en long lo. Tasol yumi tenkyu long God. Long strong bilong Bikpela bilong yumi Jisas Krais, God i save strongim yumi na yumi winim pait.” (1 Korin 15:​54-57) Jehova i kirapim bek Jisas long indai, olsem na yumi save tru olsem ol daiman husat i stap long tingting bilong God, em bai kirapim bek ol. (Jon 5:​28, 29) Em wanpela gutpela as na yumi mas bilip na wetim Jehova i helpim yumi! Tasol i gat narapela samting tu i mekim na yumi mas wokabaut wantaim God.

Ol Pasin Bilong Jehova i Stretpela Tasol

15, 16. Hosea i tok profet long wanem samting bai painim Samaria? Dispela tok profet i kamap tru olsem wanem?

¹⁵ Yumi bilip tru olsem ‘ol pasin bilong Jehova i stretpela tasol’ na dispela i helpim yumi long wokabaut yet wantaim God. Ol Samaria i no bin bihainim ol stretpela pasin bilong God. Olsem na ol bai kisim pe nogut long ol rong ol i bin mekim na long ol i no bilip long Jehova. Hosea i tok: “Ol Samaria i bikhet tru long mi, olsem na ol i mas kisim pe nogut. Ol birua bai i kam pait na kilim ol i dai, na tromoi olgeta liklik pikinini long graun na bai ol tu i dai. Na bai ol i brukim bel bilong ol meri i gat bel.” (Hosea 13:16) Ol stori bilong bipo i kamapim olsem ol Asiria​—⁠ol i bin daunim Samaria⁠—​ol inap long mekim kain pasin nogut olsem.

¹⁶ Samaria i biktaun bilong 10-pela lain bilong Israel. Tasol sampela taim nem Samaria i makim olgeta hap em dispela kingdom i bosim. King Salmaneser Namba 5 bilong Asiria i bin kam banisim taun Samaria long 742 B.C.E. Long 740 B.C.E ol Asiria i daunim Samaria, na ol i kisim planti manmeri i gat nem i go kalabus long Mesopotemia na Midia. Yumi no save long husat tru i bin daunim Samaria, em Salmaneser Namba 5 o Sargon Namba 2, em man i kisim ples bilong Salmaneser. (2 King 17:​1-6, 22, 23; 18:​9-12) Tasol ol buk bilong Sargon i stori long 27,290 Israel em ol Asiria i salim ol i go stap long hap bilong Yufretis na Midia.

17. Yumi no ken ting ol stretpela lo bilong God i samting nating, olsem na yumi mas mekim wanem?

¹⁷ Ol manmeri bilong Samaria i bin kisim nogut tru, long wanem, ol i no bin bihainim tok bilong Jehova na wokabaut long rot em i makim. Yumi ol Kristen i dediket pinis, yumi tu inap kisim nogut sapos yumi kamap man bilong mekim sin, olsem long laik bilong yumi yet yumi brukim ol lo bilong God na ting ol stretpela lo bilong em i olsem samting nating. Yumi no ken mekim kain pasin nogut olsem! Nogat. Yumi olgeta wan wan i mas bihainim tok bilong aposel Pita, em i tok: “Yupela i mas lukaut, nogut ol i givim pen long yupela, long wanem, yupela i bin kilim man i dai o stilim ol samting o mekim ol arapela kain pasin nogut o yupela i bin paulim wok bilong ol arapela. Tasol sapos man em i Kristen, na long dispela as em i karim pen, orait em i no ken sem. Nogat. Em i mas amamas long dispela nem Kristen, na litimapim nem bilong God.”​—⁠1 Pita 4:​15, 16.

18. Olsem wanem yumi inap “litimapim nem bilong God”?

¹⁸ Yumi “litimapim nem bilong God” taim yumi wokabaut long stretpela rot em i makim na yumi no mekim ol samting long pasin yumi yet i laikim. Kein i kilim i dai Abel, long wanem, Kein i bihainim laik bilong em yet na em i no bihainim tok lukaut Jehova i givim long em olsem sin i redi long bagarapim em. (Stat 4:​1-8) Balam i kisim mani long king bilong Moap bilong tokaut olsem ol Israel i mas bagarap, tasol taim em i traim long mekim olsem, em i no inap. (Namba 24:10) Na God i kilim i dai Kora, em wanpela Livai, na ol arapela, long wanem, ol i bikhet long wok bos bilong Moses na Aron. (Namba 16:​1-3, 31-33) Em nau, yumi no laik “wokabaut long pasin bilong Kein” o “redi long mekim olgeta kain samting bilong kisim mani” olsem Balam o “bikhet long God” olsem Kora na kisim bagarap na i dai. (Jut 11) Tasol sapos yumi mekim sin, orait tok bilong profet Hosea bai mekim gut bel bilong yumi.

Ol Man i Mekim Sin Ol Inap Kam Bek Long Jehova

19, 20. Ol Israel i tanim bel ol inap mekim wanem kain ofa?

¹⁹ Ol man i bin pundaun na mekim bikpela sin ol inap kam bek long Jehova. Hosea 14:​1, 2 i tok: “Ol Israel, yupela i mas kam bek long God, Bikpela bilong yupela, long wanem, sin bilong yupela i mekim yupela i pundaun. Yupela i mas kam bek long Bikpela, na yupela i ken mekim dispela prea long God olsem ofa. Yupela i mas beten olsem, “God, yu ken lusim olgeta sin bilong mipela, na kisim ol gutpela samting mipela i laik givim yu. Nau bai mipela i no inap kilim ol bulmakau na mekim ofa long yu. Nogat. Mipela bai i mekim ol gutpela pasin bipo mipela i bin promis long mekim.”

²⁰ Ol Israel i tanim bel ol inap “mekim ol gutpela pasin.” Dispela ol gutpela pasin i makim ol tok ol i mekim bilong litimapim nem bilong God na dispela bai i stap olsem ofa. Pol i toktok long dispela tok profet taim em i tokim ol Kristen olsem ‘maus bilong yupela i mas litimapim nem bilong God na dispela pasin i mas i stap olsem ofa yupela i givim long em.’ (Hibru 13:15) Yumi amamas tru long wokabaut wantaim God na mekim kain ofa olsem long nau.

21, 22. Wanem samting bai painim ol Israel i tanim bel?

²¹ Ol Israel husat i bin lusim pasin nogut bilong ol na i kam bek long God, maus bilong ol i litimapim nem bilong em na dispela i olsem ofa ol i givim long em. Olsem na Jehova i kisim bek ol, olsem em i bin tok promis long mekim. Hosea 14:​4-7 i tok: “Orait bai mi kisim bek ol dispela manmeri i bin lusim mi. Bai mi laikim ol long bel bilong mi olgeta, na mi no moa kros long ol. Bai mi mekim gut long ol Israel, olsem ren i kam daun na i wasim ples drai. Na bai ol i kamap olsem naispela plaua na olsem ol bikpela diwai bilong kantri Lebanon. Rop bilong ol dispela diwai i save go daun insait tru long graun. Bai ol i kamap gutpela moa olsem diwai i gat nupela lip na olsem gutpela diwai oliv. Na bai ol manmeri i amamas long ol, olsem ol i save amamas long gutpela smel bilong ol diwai sida bilong Lebanon. Bai ol i kam i stap wantaim mi gen na bai mi lukautim ol. Na bai ol gaden bilong ol i karim planti kaikai. Na bai ol i karim planti pikinini, olsem ol gutpela diwai wain long gaden. Na bai ol i gat biknem olsem nambawan wain bilong Lebanon.”

²² God bai kisim bek ol Israel i tanim bel na em bai laikim ol gen. Olsem ren i kam daun na i wasim ples drai, Jehova bai mekim gut tru long ol. Dispela lain em i kisim bek ol bai ‘kamap gutpela moa olsem gutpela diwai oliv’ na ol bai bihainim ol rot God i makim. Yumi gat strongpela laik long wokabaut wantaim God Jehova, olsem na yumi mas mekim wanem?

Wok Yet Long Bihainim Stretpela Pasin Bilong God

23, 24. Laspela ves bilong Buk Hosea i kamapim wanem gutpela tok? Dispela i mekim wanem long yumi?

²³ Sapos yumi laik wokabaut yet wantaim God, yumi mas “kisim kain gutpela tingting na save i kam long God” na oltaim bihainim ol stretpela lo bilong em. (Jems 3:​17, 18) Laspela ves bilong tok profet bilong Hosea i tok: “Ol man i gat gutpela tingting ol i ken kisim save long tok i stap long dispela buk. Na mi laik bai ol i ken tingim na bihainim dispela tok. Ol pasin bilong Bikpela i stretpela tasol, na ol stretpela man i save bihainim. Tasol ol man bilong mekim sin, ol i no save bihainim. Olsem na ol i save pundaun.”​—⁠Hosea 14:⁠9.

²⁴ Yumi no ken larim tingting na save bilong dispela graun i stiaim yumi, nogat. Yumi mas tingting strong long bihainim ol stretpela pasin bilong God. (Lo 32:⁠4) Hosea i bin mekim olsem inap 59 yia samting. Em i stap gut long wok bilong autim tok bilong God, em i bilip olsem ol man i gat gutpela tingting ol bai kisimgut ol dispela tok. Olsem wanem long yumi? I go inap long taim Jehova yet i makim, yumi bai wok yet long painim ol man i gat gutpela tingting em ol i laik bai Jehova i ken marimari long ol. Na yumi amamas tru long mekim dispela wok wantaim “wokboi i gat gutpela tingting.”​—⁠Matyu 24:​45-47.

25. Ol tok profet bilong Hosea em yumi bin skelim i mas helpim yumi long mekim wanem?

²⁵ Dispela tok profet bilong Hosea yumi bin skelim bai helpim yumi long wokabaut yet wantaim God na wet long kisim laip oltaim long nupela taim em bai kamapim. (2 Pita 3:13; Jut 20, 21) Dispela em i wanpela gutpela samting tru yumi ken bilip na wet long en, a? Na yumi yet inap kisim dispela gutpela samting sapos ol tok na pasin bilong yumi i kamapim long ples klia olsem yumi bilip tru long dispela tok yumi autim: ‘Ol pasin bilong Jehova i stretpela tasol.’

Bai Yu Bekim Olsem Wanem?

• Sapos yumi lotuim God long pasin i klin, em bai mekim wanem long yumi?

• Bilong wanem yumi mas bilip na wetim Jehova i helpim yumi?

• Bilong wanem yu bilip olsem ol pasin bilong Jehova i stretpela tasol?

• Olsem wanem yumi ken wokabaut yet long stretpela rot bilong Jehova?

[Piksa long pes 28]

Kisim helpim long ol elda Kristen

[Piksa long pes 29]

Tok profet bilong Hosea i helpim yumi long bilip long ol tok promis bilong Jehova long kirap bek

[Ol Piksa long pes 31]

Yumi mas wokabaut yet wantaim God na wet long kisim laip oltaim long nupela taim