Yumi Mas Tingim Wok Bilong Lotuim Jehova i Nambawan Bikpela Samting
“Olgeta de bai mi tenkyu long yu. Na oltaim oltaim bai mi litimapim nem bilong yu.”—SONG 145:2.
“MI BIKPELA, mi God bilong yupela, na mi no inap larim wanpela giaman god i senisim mi.” (Kisim Bek 20:5) Moses i bin harim dispela tok long Jehova, na bihain Moses i kamapim gen taim em i givim tok long ol Israel. (Lo 5:9) Em i no gat tupela tingting—em i save tru olsem Jehova i laik bai ol wokboi bilong em i mas lotuim em wanpela tasol.
2 Ol Israel na dispela “planti arapela lain” i bin lusim Isip wantaim ol, ol i kem klostu long maunten Sainai na ol i lukim samting i narapela kain tru. (Kisim Bek 12:38) Em i no olsem ol samting ol man i mekim bilong lotuim ol god bilong Isip, em tenpela hevi i bin daunim ol tru, nogat. Taim Jehova i kamapim klia long Moses olsem em i stap, ol narapela kain samting i kamap bilong mekim man i pret, olsem klaut i pairap, na lait bilong klaut i sut i go nabaut, na biugel i krai bikpela moa na olgeta manmeri long kem i pret nogut tru na ol i guria. Nau paia na smok i kamap na maunten olgeta i guria. (Kisim Bek 19:16-20; Hibru 12:18-21) Sapos wanpela Israel i no bilip yet olsem samting i kamap i narapela kain, orait liklik taim bai em i bilip. Moses i kisim pinis ol lo bilong God namba tu taim na em i kam daun long maunten. Baibel i tok: “Pes bilong Moses i lait na ol [manmeri] i pret na ol i no laik i go klostu long em.” Tru tumas, ol i no inap lusim tingting long dispela narapela kain samting i kamap!—Kisim Bek 34:30.
3 Em nau, lain bilong God inap save tru, wok bilong lotuim Jehova i mas i stap olsem nambawan bikpela samting bilong ol. Em i Man bilong kisim bek ol. Em yet i lukautim ol na ol i stap laip. Na em i Man bilong givim lo long ol. Tasol olsem wanem? Ol i tingim wok bilong lotuim Jehova em i nambawan bikpela samting? Na ol wokboi bilong God long nau, ol i putim wok bilong lotuim Jehova olsem nambawan bikpela samting long i stap bilong ol?—Rom 15:4.
Ol Israel i Lotuim Jehova
4 Sapos yu bin lukim ol Israel i kem long dispela ples nating, bai yu lukim planti planti haus sel i lain gut, em bilong planti manmeri, ating 3 milion samting. Tripela lain i bung long hap bilong not, na tripela long hap bilong saut, na tripela long hap bilong is, na tripela long hap bilong wes. Na klostu long namel bilong kem i gat 4-pela liklik lain haus sel bilong ol famili bilong lain Livai. Long namel tru bilong kem, long hap ol i banisim long laplap, i gat wanpela haus sel i narapela kain. Dispela em i haus sel bilong God, em ol Israel i gat “save pinis” ol i bin wokim olsem Jehova i bin tokim ol.—Namba 1:52, 53; 2:3, 10, 17, 18, 25; Kisim Bek 35:10.
5 Long ol dispela yia ol Israel i bin raun long ples nating, ol i bin wokim kem inap 40 taim samting, na long olgeta taim ol i sanapim haus sel bilong God. Dispela em i bikpela samting tru insait long kem bilong ol. (Namba, sapta 33) Baibel i tok, Jehova i stap namel long lain bilong em, long namel tru bilong kem bilong ol. Lait bilong em i pulap long haus sel bilong em. (Kisim Bek 29:43-46; 40:34; Namba 5:3; 11:20; 16:3) Wanpela buk (Our Living Bible) i tok, ‘Dispela haus sel bilong lotu em i bikpela samting tru bilong ol, long wanem, olgeta lain bilong ol inap lukim dispela i olsem ples lotu bilong ol. Dispela i helpim ol long pas gut wantaim long ol dispela planti yia ol i wokabaut long ples wesan nating, na ol inap wok gut wantaim.’ Na tu, haus sel bilong God i bilong kirapim tingting bilong ol Israel olsem ol i mas lotuim dispela Man bilong wokim ol, na ol i mas putim olsem nambawan samting long i stap bilong ol.
6 Taim ol Israel i kamap pinis long Graun Bilong Promis, dispela haus sel bilong God em i nambawan samting yet long lotu bilong ol. (Josua 18:1; 1 Samuel 1:3) Bihain King Devit i tingting long wokim wanpela haus tru bilong God. Em dispela haus lotu bihain pikinini bilong Devit, em Solomon, i wokim. (2 Samuel 7:1-10) Taim ol i mekim bung bilong opim dispela haus, wanpela klaut i kam daun long en na i makim olsem Jehova i amamas long dispela haus. Solomon i beten olsem: “Nau mi wokim wanpela gutpela haus tru bilong yu na yu ken i stap long en oltaim oltaim.” (1 King 8:12, 13; 2 Stori 6:2) Nau dispela nupela haus i olsem ples bilong ol Israel long bung na lotuim Jehova.
7 Tripela taim long olgeta yia, olgeta man Israel ol i go long Jerusalem bilong amamas na mekim bung long haus lotu bilong makim olsem ol i tenkyu long Jehova i bin mekim gut long ol. Ol i kolim ol dispela bung olsem “ol bikpela de bilong lotu,” na ol i ken tingting tasol long lotuim God. (Wok Pris 23:2, 4) Ol bilipmeri i save kam wantaim ol narapela bilong famili.—1 Samuel 1:3-7; Luk 2:41-44.
8 Ol man bilong raitim Song i tokaut klia olsem lotu i bikpela samting tru long ol. Ol lain bilong Kora i singsing olsem: “Bikpela I Gat Olgeta Strong, mi laikim tumas haus bilong yu.” Ol i no litimapim wanpela piksa. Ol i litimapim nem bilong God Jehova, na ol i tok: “Long bodi na tingting olgeta mi mekim song bilong amamas long yu, God i gat laip.” Lain Livai i kisim bikpela amamas long wok lotu ol i mekim. Ol i tokaut olsem: “Ol manmeri i save stap long haus bilong yu, ol i save belgut tru, na oltaim ol i save singim song bilong litimapim nem bilong yu.” Na olgeta Israel inap singsing olsem: “Ol manmeri i save kisim strong long yu na i laikim tumas long i go long maunten Saion, ol i ken amamas oltaim . . . na i kamap strong. Bai ol i go kamap long Saion, na lukim God i stap.” Maski wanpela Israel i mas wokabaut longwe bilong kamap long Jerusalem na skin bilong em i les, em i kisim strong gen taim em i kamap pinis long Jerusalem. Bel bilong em i amamas moa yet long em inap lotuim Jehova, na em i tokaut olsem: “Sapos mi stap wanpela de tasol long haus bilong yu, em i winim tru 1000 de long narapela ples. Mi laikim tumas long sanap long dua bilong haus bilong God bilong mi. Tasol mi no laik i stap long haus bilong ol man nogut. . . . Ol manmeri i save bilip long yu, ol i ken amamas oltaim.” Em nau, wok bilong lotuim Jehova i bikpela samting tru long ol dispela Israel.—Song 84:1-12.
9 Tasol sori tumas, bihain lotu i tru i no stap olsem bikpela samting moa long ol Israel. Ol i kirap lotuim ol god giaman na dispela i mekim na ol i no givim bel moa long Jehova. Olsem na Jehova i lusim ol na em i larim ol birua i kam na kisim ol i go kalabus long Babilon. Ol i stap 70 yia na Jehova i kisim ol i go bek long ples bilong ol, na em i givim ol gutpela profet long ol, olsem Hagai, Sekaraia, Malakai, bilong givim strongpela tok long ol na kirapim ol. Pris Esra na namba wan gavman Nehemia i kirapim lain bilong God long sanapim gen haus bilong Jehova na kirapim gen lotu i tru. Tasol sampela handet yia bihain ol Israel i slek gen na lotu i tru i no bikpela samting moa long ol.
Lotu i Tru Long Taim Bilong Ol Aposel
10 Orait, long taim stret olsem Jehova i bin makim, Mesaia i kamap. Ol bilipman i wetim Jehova i kisim bek ol. (Luk 2:25; 3:15) Gutnius Luk i raitim i stori long Ana, em man bilong em i dai pinis; Ana i gat 84 krismas, tasol em “i no save lusim tempel. Em i save . . . holim wok bilong God long san na long nait.”—Luk 2:37.
11 Jisas i tok: “Kaikai bilong mi, em long bihainim laik bilong [God] na long pinisim wok em i bin givim mi.” (Jon 4:34) Taim Jisas i lukim ol man bilong senisim mani long tempel, em i kapsaitim tebol bilong ol wantaim sia bilong ol man i wok bisnis long ol pisin. Mak i tok: “[Jisas] i tambuim ol [man] long ol i no ken karim ol samting na wokabaut i go i kam insait long banis bilong tempel. Na em i tokim ol olsem, ‘Buk bilong God i gat tok olsem, “Haus bilong mi bai i stap haus bilong ol manmeri bilong olgeta kantri i ken i kam long en na beten long mi.” Tasol yupela i mekim em i kamap olsem ples hait bilong ol stilman.’ ” (Mak 11:15-17) Em nau, sapos man i laik i go long narapela hap bilong Jerusalem, Jisas i no larim em i sotim rot na wokabaut insait long banis bilong tempel. Ol samting Jisas i mekim i strongim wanpela tok bilong em, olsem: “Yupela i mas wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen bilong 1988) Tru tumas, Jisas i stap gutpela piksa tru bilong lotuim Jehova wanpela tasol. Ol tok em i autim, em i bihainim.—1 Pita 2:21.
12 Jisas i makim pasin ol disaipel i ken bihainim—em inapim tru wok bilong em long helpim ol taranguman bilong Juda i stap gut long God, na bai ol i ken lusim ol hevi em lotu giaman i putim long ol. (Luk 4:18) Ol Kristen bilong pastaim i bihainim tok bilong Jisas long kamapim ol disaipel na baptaisim ol, na ol i strong long autim tok long ol samting Jehova i laik mekim long rot bilong Bikpela bilong ol i kirap bek pinis. Jehova i amamas tru long ol i tingim wok bilong lotuim em i bikpela samting. Olsem na ensel bilong God yet i helpim Pita na Jon long lusim kalabus, na em i tokim tupela: “Yupela go sanap insait long banis bilong tempel na autim tok long ol manmeri long olgeta pasin bilong dispela nupela laip.” Ol i bihainim tok bilong em, na long olgeta de, long tempel bilong Jerusalem na long haus bilong ol man, ol i “skulim ol manmeri. Ol i no lusim wok bilong autim gutnius.”—Aposel 1:8; 4:29, 30; 5:20, 42; Matyu 28:19, 20.
13 Planti man i birua long wok bilong ol long autim tok, olsem na God i kirapim ol gutpela wokboi bilong em long raitim tok bilong strongim ol Kristen. Bihain liklik long yia 60, Pita i raitim tok olsem: “God i save wari long yupela. Olsem na olgeta hevi yupela i karim, yupela i mas putim long han bilong en. Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai. Tasol yupela i mas i stap strong long bilip na sakim em. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.” Yumi save, dispela tok i bin strongim tru ol Kristen. Ol i save, taim ol i karim pen inap sotpela taim tasol, God bai i mekim ol i orait gen. (1 Pita 5:7-10) Long taim bilong las de bilong ol Juda, ol Kristen tru i givim bel moa yet long wok bilong lotuim Jehova.—Kolosi 1:23.
14 Olsem aposel Pol i tok profet long en, sampela man i lusim lotu i tru na givim baksait long God. (Aposel 20:29, 30; 2 Tesalonaika 2:3) Ol tok ol i bin raitim klostu wan handet yia bihain long Krais, em i kamapim klia dispela samting. (1 Jon 2:18, 19) Satan i kamapim ol Kristen giaman namel long ol Kristen tru, na i hatwok long save, husat i olsem “gras nogut” na husat i Kristen tru, olsem “wit.” Tasol insait long planti handet yia bihain, sampela manmeri i strong long lotuim God, maski ol inap kisim bagarap long en. Orait, klostu long pinis bilong “taim God i bin makim bilong ol arapela lain,” God i kirap bungim gen ol wokboi bilong em bambai ol i ken litimapim lotu i tru.—Matyu 13:24-30, 36-43; Luk 21:24.
Wok Bilong Lotuim Jehova Long Nau
15 Long 1919 Jehova i strongim liklik hap lain bilong i go long heven em ol i stap yet long graun, na ol i kirap mekim wanpela bikpela wok tru bilong autim tok long olgeta hap, na dispela i litimapim lotu bilong trupela God. Kirap long 1935 planti “arapela sipsip” i kam insait long lain bilong Jehova, olsem na dispela lain i “go long maunten Saion” em “haus bilong God” i stap long en, ol i wok long kamap planti tru. Long 1993, inap 4,709,889 Witnes Bilong Jehova i litimapim nem bilong em—ol i singautim ol narapela i kam bung wantaim ol long lotuim Jehova long “maunten” bilong em. Tasol ol lain i stap long ol ‘liklik maunten’ bilong ol lotu giaman bilong dispela graun, ol i stap nogut long ol samting bilong spirit, na ol lotu bilong graun i gat nem Kristen ol i stap nogut moa yet!—Jon 10:16; Aisaia 2:2-4; Maika 4:1-4.
16 Lain bilong ol lotu giaman i ting ol bikpela haus lotu bilong ol, na ol pris pasto bilong ol tu, ol i stap “antap tru,” na ol i givim ol bikpela nem long ol na litimapim nem bilong ol. Tasol harim tok profet bilong Aisaia: “Bikpela . . . bai i daunim olgeta hambakpasin bilong ol man i save litimapim nem bilong ol yet . . . na Bikpela tasol bai i kisim biknem long dispela taim.” Dispela bai kamap long wanem taim? Long taim bilong ‘bikpela hevi tru’ klostu nau bai kamap. Na long dispela taim “ol giaman god bai i pinis olgeta.” Dispela taim i klostu pinis, olsem na olgeta wokboi bilong Jehova i mas skelim gut bel bilong ol—wok bilong lotuim Jehova em i nambawan bikpela samting long i stap bilong ol, o em i stap nambatu tasol?—Aisaia 2:10-22.
17 Ol Witnes Bilong Jehova i olsem wanpela bikpela lain brata i stap long olgeta hap, na ol i strong long autim tok bilong Kingdom. Lotu bilong ol i no samting ol i tingim wanpela o tupela aua tasol long olgeta wik, nogat. Em i bikpela samting tru long ol na em i stiaim olgeta samting ol i mekim long olgeta de. (Song 145:2) Olsem na long yia i go pinis, winim 620,000 Witnes ol i stretim rot bambai ol i ken mekim wok autim tok long olgeta de. Na ol narapela tu i no save slek long mekim wok bilong lotuim Jehova. Ol i strong long mekim taim ol i toktok wantaim man na long taim ol i autim tok, maski ol i mas mekim wok mani bilong lukautim famili.
18 Stori bilong sampela Witnes i kamap long Wastaua i soim yumi long olsem wanem wok bilong lotuim Jehova i bin i stap olsem nambawan bikpela samting long ol. Wanpela yangpela sista, taim em i gat 6-pela krismas em i dediket long Jehova, na em i putim wok misineri olsem mak em i laik winim bihain. Yupela ol yangpela brata sista, yupela ken tingim wanem mak yupela laik winim bilong helpim yupela long putim wok bilong lotuim Jehova olsem nambawan bikpela samting long i stap bilong yupela?—Lukim stori “Mi Winim Mak Mi Putim Taim Mi Gat Sikspela Krismas,” long Wastaua Mas 1, 1992, pes 26-30.
19 Wanpela lapun sista em man bilong em i dai pinis, em tu i tingim lotu bilong Jehova i bikpela samting. Ol manmeri em i bin lainim ol long tok i tru ol i olsem “famili bilong em” na ol i save strongim em. (Mak 3:31-35) Sapos yu olsem em, bai yu larim sampela yangpela long kongrigesen i helpim yu? (Lukim tok bilong Sista Winifred Remmie long stori “Mi Mekim Wok Long Taim Bilong Kisim Kaikai Long Gaden,” long Wastaua Julai 1, 1992, pes 21-23.) Yupela ol brata sista i mekim wok bilong Jehova long olgeta de, larim Jehova i stiaim yupela, na long pasin daun mekim wok long hap ol i makim bilong yupela; olsem bai yupela i kamapim klia olsem wok bilong lotuim Jehova em i nambawan bikpela samting long i stap bilong yupela. (Lukim stori bilong Brata Roy Ryan, “Pas Gut Long Oganaisesen Bilong God,” long Wastaua Disemba 1, 1991, pes 24-27.) Sapos yumi putim wok bilong lotuim Jehova i go pas long ol narapela samting, yumi ken save, Jehova bai lukautim yumi. Yumi no ken tingting planti long olsem wanem bai yumi painim ol samting bilong skin yumi mas kisim. Stori bilong tupela sista, em Olive na Sonia Springate, i kamapim klia dispela samting.—Lukim stori “Mipela Wok Long Painim Kingdom Pastaim,” long Wastaua Februeri 1, 1994, pes 20-25.
20 Olsem na yumi olgeta wan wan i mas askim yumi yet: Wok bilong lotuim Jehova em i nambawan bikpela samting long i stap bilong mi? Mi wok long truim dediket bilong mi long mekim laik bilong God? Mi mas stretim wanem sampela samting long i stap bilong mi? Taim yumi skelim na tingim gut stori i kamap bihain long dispela, bai yumi save, olsem wanem yumi ken mekim wok long ol samting bilong yumi na bai i stret wantaim nambawan laik bilong yumi—yumi laik mekim wok bilong lotuim Bikpela King Jehova, em gutpela Papa bilong yumi.—Saveman 12:13; 2 Korin 13:5.
Rivyu
◻ Long ol samting bilong lotu, Jehova i laik bai yumi mekim wanem?
◻ Haus sel bilong God i bilong kirapim tingting bilong ol Israel long wanem samting?
◻ Long taim bilong ol aposel, husat ol i givim bel moa yet long lotu i tru? Ol i mekim wanem?
◻ Kirap long 1919, olsem wanem Jehova i bin litimapim lotu bilong em?
[Askim Bilong Stadi]
1. Jehova i laik bai man i mas mekim wanem long lotuim em?
2, 3. (a) Wanem samting i mekim na ol Israel i save tru, ol samting i kamap long maunten Sainai i narapela kain? (b) Bai yumi skelim wanem ol askim long wok bilong ol Israel na ol wokboi bilong God long nau long lotuim God?
4. Ol haus sel i stap olsem wanem long kem bilong lain Israel taim ol i wokabaut long ples nating? Wanem samting i stap long namel tru bilong kem?
5. Haus sel bilong God i gat wanem wok long lain Israel?
6, 7. Wanem samting i senisim haus sel bilong lotuim Jehova long en? Em i bin helpim ol Israel olsem wanem?
8. Olsem wanem Song 84:1-12 i kamapim klia olsem wok bilong lotuim Jehova i bikpela samting tru?
9. Wanem samting i painim lain Israel taim ol i no putim wok bilong lotuim Jehova i go pas long ol narapela wok bilong ol?
10, 11. Taim Jisas i stap long graun, ol bilipman i ting olsem wanem long lotuim Jehova?
12. Olsem wanem ol disaipel bilong Jisas i kamapim klia olsem wok bilong lotuim Jehova i bikpela samting tru long ol?
13, 14. (a) Kirap long taim bilong ol Kristen bilong pastaim na i kam inap nau, Satan i laik mekim wanem long ol wokboi bilong God? (b) Ol wokboi bilong God i stap gut long em ol i wok yet long mekim wanem?
15. Kirap long 1919, olsem wanem tok profet bilong Aisaia 2:2-4 na Maika 4:1-4 i kamap tru?
16. Tok profet bilong Aisaia 2:10-22 i mas kirapim ol wokboi bilong God long mekim wanem?
17. Ol wokboi bilong Jehova long nau i mekim wanem na ol i kamapim klia olsem wok bilong lotuim Jehova i bikpela samting tru long ol?
18, 19. Kolim sampela stori bilong ol Witnes yu bin kaunim na em i bin strongim bel bilong yu.
20. Nau yumi mas givim wanem ol askim long skin bilong yumi yet?