‘Yupela i No Ken Les’

“Yupela i no ken seksek nating [olsem no ken les]. God, Bikpela bilong yupela i stap wantaim yupela. Strong bilong en [bai] i helpim yupela na yupela i winim pait.”​—⁠SEFANAIA 3:​16, 17.

NAMBA WAN truim bilong tok profet bilong Sefanaia i bin kamap olsem 600 yia samting paslain long Krais, tasol bikpela truim bilong en i bilong kamap bihain bihain. Profesa C. F. Keil i stori long ol tok bilong Sefanaia na em i tok: ‘Namba wan tok long tok profet bilong Sefanaia i tokaut long wanpela bikpela kot bai painim olgeta lain bilong graun, na long dispela kot, strafe bai painim Juda long ol rong em i bin mekim, na strafe bai kisim olgeta narapela lain bilong graun, long wanem, ol i bin mekim nogut long lain bilong Jehova; tasol long olgeta hap bilong dispela tok profet em i toktok long bikpela de bilong Jehova.’

² Long nau Jehova i tingting pinis long bungim olgeta lain man bilong bagarapim ol, na dispela bagarap bai bikpela tru, winim moa yet bagarap i bin painim ol lain long taim bilong Sefanaia. (Sefanaia 3:⁠8) Ol lain  bilong nau i tok ol i Kristen ol i gat bikpela asua moa long ai bilong God. Lain bilong Jerusalem i no stap gut long Jehova na ol i kisim bikpela strafe tru long en, na olsem tasol God bai mekim save long ol lain bilong nau i tok ol i Kristen, long wanem, ol i save mekim ol pasin nogut tru. Ol strongpela toksave long taim bilong Sefanaia long kot bilong God bai painim Juda na Jerusalem, em i mas painim moa yet ol bikpela na liklik lotu ol i holim nating nem Kristen. Ol tu i kisim ol bilip i bagarapim nem bilong God, na planti bilong ol dispela bilip, em ol haiden i as bilong en, na long dispela rot ol i bagarapim stretpela lotu bilong Jehova. Na ol i givim ol strongpela pikinini man bilong ol bilong kamap soldia, olsem ol ofa, na planti ol i bin i dai insait long ol pait. Na lain bilong ol dispela lotu bilong nau, em Jerusalem i makim ol, ol i bungim lotu ol i kolim Kristen wantaim pasin bilong lukluk long ol sta bilong kisim save long samting bai kamap bihain, na olkain wok bilong ol spirit nogut olsem marila samting, na pasin pamuk na ol narapela kain pasin sem nogut tru, wankain olsem ol man i bin mekim taim ol i lotuim Bal.​—⁠Sefanaia 1:​4, 5.

³ Planti hetman politik bilong ol lain ol i gat nem Kristen ol i amamas long ol man i lukim ol insait long haus lotu. Tasol planti bilong ol i wankain olsem ol bikman bilong Juda​—⁠ol i save mekim nogut long ol man olsem “ol laion i hangre na i singaut strong,” na “ol weldok” i hangre tumas. (Sefanaia 3:​1-3) Ol man i stap aninit long ol, ol i save “kilim ol man, na pulimapim haus bilong bikman bilong ol long ol samting ol i bin stilim.” (Sefanaia 1:⁠9) Planti ol i save kisim grismani long ol man, na ol i save paulim mani samting. Na planti gavman politik long ol kantri i gat nem Kristen na ol narapela kantri tu ol i save “hambak” na mekim nogut long lain bilong Jehova, em ol Witnes bilong em, olsem ol i wanpela pipia lain tasol. (Sefanaia 2:⁠8; Aposel 24:​5, 14) Sefanaia i tok profet long ol dispela hetman politik wantaim lain bilong ol olsem: “Long dispela De belhat bilong Bikpela bai i kamap ples klia, na olgeta silva na gol bilong ol i no inap helpim ol. Nogat tru. Belhat bilong en bai i kamap olsem paia na kukim olgeta hap bilong graun. Na wantu bai em i pinisim tru olgeta manmeri bilong graun.”​—⁠Sefanaia 1:⁠18.

“Yupela Bai i No Inap Bagarap”

⁴ Tasol i no olgeta Juda i bin bagarap long dispela taim olsem 600 yia samting paslain long Krais; sampela i winim bagarap. Na long nau tu, sampela man bai i abrusim bagarap long De bilong Jehova. Long rot bilong profet Sefanaia, Jehova i tokim ol dispela man: “Nogut belhat bilong Bikpela i kamap na kukim yupela olsem paia. Yupela ol manmeri i no save sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap  bagarap.”​—⁠Sefanaia 2:​2, 3.

⁵ Nau long taim bilong las de, namba wan lain i bihainim dispela tok profet em liklik hap lain bilong Israel bilong spirit, em ol Kristen God i bin makim ol. (Rom 2:​28, 29; 9:6; Galesia 6:​16) Ol i laik bihainim stretpela pasin na pasin daun, na ol i daun long tok bilong Jehova, olsem na long 1919 Jehova i kisim bek ol long Bikpela Babilon, em olgeta lotu giaman bilong graun, na em i orait gen long ol. Kirap long dispela taim​—⁠na moa yet bihain long 1922​—⁠dispela liklik hap lain olsem remnan i stap gut long Jehova, ol i autim strong ol tok bilong Jehova long kot bai painim ol bikpela na liklik lotu ol i holim nating nem Kristen na ol lain politik bilong dispela graun.

⁶ Sefanaia i tok profet long dispela liklik hap lain olsem: “Ol manmeri bai mi larim ol i stap long Jerusalem, ol bai i no gat planti samting na bai ol i daunim ol yet. Na bai ol i kam long mi na askim mi long helpim ol [olsem ol bai painim ples hait long nem bilong em]. Ol liklik lain Israel i stap yet, ol bai i no inap mekim pasin nogut long ol arapela man, na ol bai i no inap mekim tok giaman na trikim ol wantok. Bai ol i gat gutpela sindaun tasol, na i no gat man inap mekim ol i pret.” (Sefanaia 3:​12, 13) Ol dispela Kristen God i bin makim ol, long olgeta taim ol i kamapim nem bilong Jehova, na kirap long 1931 ol i mekim moa yet, taim ol i kisim nem olsem Witnes Bilong Jehova. (Aisaia 43:​10-​12) Ol i kamapim long ples klia dispela bikpela tok i bin kamap long wok king bilong Jehova, na long dispela rot ol i litimapim nem bilong God, na dispela i bin i stap olsem ples hait bilong ol na ol i stap gut. (Sindaun 18:10) Jehova i bin givim planti kaikai bilong spirit long ol, na ol i stap insait long wanpela paradais bilong spirit na ol i no pret long wanpela samting.​—⁠Sefanaia 3:​16, 17.

“Bai Mi Givim Biknem Long Yupela”

⁷ Dispela liklik hap lain olsem remnan ol i givim bel tru long nem bilong Jehova na long ol stretpela lo bilong em i stap long Baibel, na ol man i lukim dispela samting. Ol man i gat gutpela bel ol i lukim pasin bilong dispela liklik lain i narapela kain long pasin bilong ol hetman politik na ol hetman bilong lotu, em ol i save paulim mani samting bilong helpim ol yet, na ol i gat tupela maus. Jehova i bin mekim gut tru long “liklik lain Israel [bilong spirit] i stap yet.” Na em i givim gutpela wok tru long ol bilong holim nem bilong em, na em yet i mekim na ol i gat gutpela nem namel long ol manmeri bilong graun. Dispela i wankain olsem tok profet bilong Sefanaia, em i tok: “Bai mi kisim yupela long olgeta hap yupela i stap long en, na bai mi bringim yupela i kam bek long as ples. Na bai mi givim biknem long yupela na bai olgeta lain manmeri bilong graun i litimapim nem bilong yupela. Na long dispela taim bai mi mekim wok bilong yupela i kamap gutpela tru na bai yupela i gat gutpela sindaun. Mi Bikpela, mi tok pinis.”​—⁠Sefanaia 3:⁠20.

⁸ Kirap long 1935 na i kam inap nau, planti milion manmeri ol i lukim olsem Jehova i mekim gut long lain remnan. Ol i amamas long bihainim ol dispela Juda, olsem Israel, bilong spirit, na ol i tok: “Mipela i harim olsem God i stap wantaim yupela . . . olsem na mipela i laik kamap wanlain wantaim yupela.” (Sekaraia 8:​23) Dispela “ol arapela sipsip” i luksave olsem lain remnan em dispela “wokboi i gat gutpela tingting,” em Krais i bin makim ol bilong “bosim olgeta arapela wokboi bilong en.” Ol i amamas long kisim ol kaikai bilong spirit dispela lain “wokboi” i redim bilong ol “long taim bikman i makim.”​—⁠Jon 10:16; Matyu 24:​45-​47.

⁹ Ol dispela planti milion arapela sipsip ol i wok wantaim lain remnan na ol i lain long sindaun na long mekim tok i stret wantaim dispela “gutpela tok ples.”a Long rot bilong Sefanaia, Jehova i tok profet olsem: “Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova na wok gut wantaim long mekim wok bilong em.” (Sefanaia 3:⁠9, NW) Tru tumas, long pasin wanbel ol arapela sipsip i “wok gut wantaim” dispela “liklik lain” long bikpela wok bilong autim “gutnius bilong kingdom . . . bai olgeta lain manmeri i ken harim.”​—⁠Luk 12:32; Matyu 24:⁠14.

‘De Bilong Jehova Bai i Kamap’

¹⁰ Long olgeta taim dispela liklik lain God i bin makim ol i tingim tok bilong aposel Pita, em i tok: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet. Tasol De bilong Bikpela bai i kamap wantu tasol olsem ol stilman i save kam.” (2 Pita 3:​9, 10) Long olgeta taim lain wokboi i gat gutpela tingting ol i bilip strong long De bilong Jehova bai kamap long taim bilong yumi, na i no gat wanpela taim ol i gat tupela bel long dispela samting, nogat. Dispela bikpela De bai kirap taim God i givim strafe long ol lotu i holim nating nem Kristen, em Jerusalem i olsem piksa bilong ol, na ol narapela lotu bilong Bikpela Babilon.​—⁠Sefanaia 1:​2-4; KTH 17:​1, 5; 19:​1, 2.

¹¹ Dispela lain remnan i stap gut long Jehova ol i amamas long em i bin kisim bek ol long 1919 long kalabus bilong spirit ol i bin i stap long en insait long Bikpela Babilon, em olgeta lotu giaman bilong dispela graun. Tok profet bilong Sefanaia i kamap tru long ol, em i tok: “Yupela Israel, yupela singaut na mekim song bilong amamas. Yupela Jerusalem, yupela belgut na amamas moa yet. Bikpela i bin tok long em bai i mekim save long yupela, tasol nau em i lusim dispela tok. Em i bin rausim olgeta birua bilong yupela. Bikpela, em i king bilong Israel, na em i stap wantaim yupela. Olsem na yupela i no ken pret long wanpela samting. Bihain . . . ol bai i tokim Jerusalem olsem, ‘Yupela . . . i no ken pret long wanpela samting. Na yupela i no ken seksek nating [olsem no ken les]. God, Bikpela bilong yupela i stap wantaim yupela. Strong bilong en [bai] i helpim yupela.’ ”​—⁠Sefanaia 3:​14-​17.

¹² Lain remnan i bilip strong olsem Jehova i stap wantaim ol, na i gat planti samting i kamapim klia olsem Jehova i bin mekim olsem. Olsem na ol i wok strong long mekim wok em i bin givim long ol na ol i no pret. Ol i bin autim gutnius bilong Kingdom na ol i bin tokaut long ol man long strafe bilong Jehova bai painim ol lotu i holim nating nem Kristen, na ol narapela lotu bilong Bikpela Babilon, na olgeta narapela lain nogut bilong Satan long graun. Maski planti hevi i painim ol bihain long 1919, ol i bihainim tok bilong God olsem: “Yupela i no ken pret long wanpela samting. Na yupela i no ken seksek nating [olsem no ken les].” Ol i wok strong long tilim planti bilion liklik nius, magasin, buk, buklet, i tokaut long Kingdom bilong Jehova. Ol i stap olsem gutpela piksa bilong strongim bilip bilong ol arapela sipsip, ol i kam bung wantaim ol kirap long 1935.

‘Yu No Ken Les’

¹³ Nau yumi wetim dispela bikpela De bilong Jehova, olsem na yumi ken mekim wanem bambai tok profet bilong Sefanaia i ken helpim yumi? Namba wan samting, em yumi mas was gut, nogut yumi kamap wankain olsem ol Juda long taim bilong Sefanaia, em ol i surik long bihainim tok bilong Jehova, long wanem, ol i gat tupela bel na ol i no bilip tumas olsem De bilong Jehova i klostu. Tru, ating ol i no bin kamapim tingting bilong ol long ol man, tasol pasin ol i mekim i kamapim klia ol i no bilip tru olsem De bilong Jehova i klostu. Ol i wok strong long bungim bikpela mani na ol i no wok long wetim De bilong Jehova i kamap.​—⁠Sefanaia 1:​12, 13; 3:⁠8.

¹⁴ Nau em i no taim bilong kisim tupela bel olsem man i no bilip tru. Bai yumi kranki tru sapos long tingting o bel yumi wok long ting olsem De bilong Jehova i stap longwe yet. (2 Pita 3:​1-4, 10) Yumi mas abrusim pasin bilong surik long bihainim tok bilong Jehova o les long mekim wok bilong em. Yumi mas wok strong long wok bilong autim “gutnius.”​—⁠Sindaun 10:4; Mak 13:⁠10.

Taim Ol i Les Long Harim

¹⁵ Namba 2 samting, em planti man i save les long harim tok bilong God, olsem na yumi mas was gut, nogut yumi bel hevi na lusim strong. Long planti kantri long hap bilong Wes, planti man ol i no tingim ol samting bilong spirit, na dispela inap givim bel hevi long sampela man bilong autim gutnius na ol i slek long mekim dispela wok. Long taim bilong Sefanaia tu ol man i no tingim ol samting bilong God. Long maus bilong profet bilong em, Jehova i tok: “Bai mi . . . painim ol man . . . i tok, ‘God i sindaun nating. Em i no helpim ol gutpela man na em i no bekim pe long ol man nogut.’ ” (Sefanaia 1:​12) Long wanpela buk (Cambridge Bible for Schools and Colleges) A. B. Davidson i tok, dispela tok i makim ol man “em bel bilong ol i strong pinis na ol i les long harim tok, o ol i no bilip olsem God bai kirap na bagarapim wok bilong ol man.”

¹⁶ Long planti kantri long nau ol man i les long harim tok bilong God, na dispela pasin i kamap moa yet long ol kantri i gat planti mani samting. Na ol manmeri insait long ol lotu i gat nem Kristen ol tu i no bilip olsem God Jehova bai kirap na bagarapim wok bilong ol man long taim bilong yumi. Taim yumi go autim gutnius bilong Kingdom long ol, ol bai lap liklik olsem man i no bilip, o ol bai tok, “Mi no laik harim!” Long kain taim olsem, i hatwok long yumi sanap strong na mekim yet wok bilong autim tok. Em i traim pasin bilong yumi long sanap strong na no ken les. Tasol long rot bilong tok profet bilong Sefanaia, Jehova i givim wanpela tok long lain bilong em bilong strongim ol, em i tok: “Yupela i no ken seksek nating [olsem no ken les]. God, Bikpela bilong yupela i stap wantaim yupela. Strong bilong en [bai] i helpim yupela . . . Bikpela bai i amamas long yupela na mekim song . . . Em i laikim yupela tumas, na em i no mekim wanpela tok.”​—⁠Sefanaia 3:​16, 17.

¹⁷ Stori bilong lain bilong Jehova long nau i kamapim klia tru olsem lain remnan wantaim ol lapun namel long ol arapela sipsip, ol i bin mekim bikpela wok tru bilong bungim ol kaikai bilong gaden nau long taim bilong las de. Inap planti yia pinis, ol dispela Kristen i stap gut long wok bilong God ol i bin sanap strong na i no les. Maski planti man insait long ol lotu i gat nem Kristen ol i les long harim tok bilong Kingdom, ol i no bel hevi na lusim wok. Olsem na ol nupela manmeri namel long ol arapela sipsip ol i no ken bel hevi taim ol i lukim ol man i les long tingim ol samting bilong spirit, olsem ol man bilong planti kantri i mekim long nau. Ol i ‘no ken les’ o lusim strong. Oltaim ol i ken wok long painim rot bilong tilim Wastaua na Kirap! na ol buk samting, em bilong helpim ol man i kain olsem sipsip na bai ol inap kisim save long tok i tru bilong dispela De bilong Jehova na ol gutpela samting bai kamap bihain long en.

Wok i Go Yet Taim Yu Wetim Dispela De!

¹⁸ Jisas i tok: “Ol manmeri i stap strong inap long las de, God bai i kisim bek ol.” (Matyu 24:13) Olsem na han lek bilong yumi i no ken “seksek” o “guria” na lusim strong taim yumi wetim bikpela De bilong Jehova i kamap! (Aisaia 35:​3, 4) Tok profet bilong Sefanaia i tok long Jehova olsem: “Strong bilong en [bai] i helpim yupela.” (Sefanaia 3:​17) Tru tumas, Jehova bai lukautim bikpela lain na bai ol i no ken bagarap long laspela hap bilong taim bilong “bikpela hevi,” taim em i tokim Pikinini bilong em long bagarapim olgeta lain politik em ol i wok long mekim tok “hambak” long lain bilong em.​—⁠KTH 7:​9, 14; Sefanaia 2:​10, 11; Song 2:​7-9.

¹⁹ Bikpela De bilong Jehova i wok long kam klostu, olsem na yumi mas wok strong yet i go, na wok gut wantaim long mekim wok bilong em! (Sefanaia 3:⁠9) Sapos yumi mekim olsem, yumi yet na planti ol narapela inap long abrusim bagarap long “taim Bikpela i belhat na bekim pe nogut long ol manmeri.” Bai yumi stap na lukim Jehova i mekim nem bilong em i stap holi.​—⁠Sefanaia 2:⁠3.

[Futnot]

Stori Gen

◻ Wanem pasin i stap insait long ol lotu bilong nau ol i gat nem Kristen na i wankain olsem pasin i bin i stap long taim bilong Sefanaia?

◻ Olsem wanem planti hetman politik long nau i wankain olsem ol hetman bilong Juda long taim bilong Sefanaia?

◻ Wanem ol tok promis i bin kamap tru long lain remnan?

◻ Planti milion manmeri long nau ol i luksave long wanem samting?

◻ Bilong wanem yumi no ken les long mekim wok bilong Jehova?

[Askim Bilong Stadi]

 1. Wanpela saveman bilong Baibel i tok wanem long tok profet bilong Sefanaia?

 2. Wanem ol pasin i stap long taim bilong Sefanaia na i stap tu namel long ol lain i holim nating nem Kristen?

 3. Olsem wanem long pasin bilong ol hetman na gavman politik bilong nau? Sefanaia i mekim wanem tok profet?

 4. Olsem wanem yumi ken save, i gat sampela manmeri ol bai abrusim bagarap long De bilong Jehova? Tasol ol i mas mekim wanem?

 5. Nau long taim bilong las de, husat ol i paslain long putim yau long toksave bilong Sefanaia? Jehova i givim wanem wok long ol?

 6. (a) Sefanaia i mekim wanem tok profet long lain remnan? (b) Dispela tok profet i kamap tru olsem wanem?

7, 8. (a) Wanem narapela tok profet i kamap tru long hap lain bilong Israel bilong spirit ol i stap yet? (b) Long nau planti milion manmeri ol i luksave long wanem samting? Wanem tingting bilong yu yet long dispela samting?

 9. Planti milion manmeri ol i lain long mekim wanem “tok ples”? Ol arapela sipsip i “wok gut wantaim” lain remnan long mekim wanem bikpela wok?

10. Oltaim lain remnan i bilip strong long wanem samting? Dispela lain ol bai i stap na lukim wanem samting?

11, 12. (a) Wanem narapela hap bilong tok profet bilong Sefanaia i kamap tru long lain remnan? (b) Lain remnan i bin mekim wanem bilong bihainim dispela singaut olsem ‘no ken les’?

13, 14. (a) Bilong wanem sampela Juda i bin surik long mekim wok bilong Jehova? Dispela i kamap ples klia olsem wanem? (b) Yumi no ken mekim wanem pasin kranki? Yumi no ken les long mekim wanem wok?

15. Wanem samting inap mekim na bai yumi slek long mekim wok bilong Jehova? Sefanaia i mekim wanem tok profet long dispela samting?

16. Planti manmeri insait long ol lotu i gat nem Kristen, ol i gat wanem tingting? Tasol Jehova i givim wanem tok long yumi bilong strongim bel bilong yumi?

17. Ol nupela manmeri insait long lain arapela sipsip ol i mas bihainim pasin bilong husat? Ol i mas mekim wanem?

18, 19. (a) Wanem gutpela tok i stap long Matyu 24:13 na Aisaia 35:​3, 4 bilong helpim yumi long sanap strong? (b) Bai yumi kisim wanem blesing sapos yumi wok gut wantaim long mekim wok bilong Jehova?

[Ol Piksa long pes 15]

Olsem Sefanaia i bin mekim, liklik hap lain Kristen God i bin makim ol na ol i stap yet long graun, ol i no pret long autim tok bilong Jehova long kot bai painim ol man

[Ol Piksa long pes 18]

Maski planti man i les long harim tok, ol “arapela sipsip” i no bel hevi na surik long autim tok