“Laikim Tok i Tru na Pasin Bilong Sindaun Gut Wantaim”!
“Bikpela I Gat Olgeta Strong i givim narapela tok long Sekaraia. Em i tok olsem, ‘. . . Yupela i mas laikim tok i tru na pasin bilong sindaun gut wantaim.’ ”—SEKARAIA 8:18, 19.
“GUTAIM i no bin i stap long graun. Long wanpela hap—na sampela taim long planti hap wantaim—i gat pait i stap.” Profesa Milton Mayer bilong Yunivesiti Bilong Masasusets, Amerika, i bin tok olsem. Sori tru long ol man bilong graun! Tru, ol man i laik i stap bel isi na no gat pait. Ol man bilong politik i bin traim kain kain rot na bai pait i no ken kamap, kirap long taim gavman bilong Rom i wokim lo ol i kolim Pax Romana i kam inap long taim bilong yumi, em ol gavman wan wan i ting, sapos ol i wokim planti bom nuklia samting, dispela bai mekim na ol kantri bai pret long kirapim pait. Tasol olgeta wok bilong ol long pasim pait i lus nating. Olsem Aisaia i bin tok long bipo yet, “ol man i bin hatwok long mekim gutpela taim i kamap, ol i krai strong moa.” (Aisaia 33:7) Olsem wanem na ol i no inap?
2 Long wanem, bilong kamapim gutaim na bel isi bilong i stap oltaim, pasin birua na pasin mangal i no ken i stap; na tu, tok i tru i mas i stap olsem as bilong en. Sapos tok giaman i as bilong ol samting ol i mekim bilong kamapim gutaim, orait dispela gutaim i no ken i stap. Olsem na taim Jehova i tok promis long kisim bek lain Israel bilong bipo na ol bai stap bel isi, em i tok: “Bai mi mekim Jerusalem i stap gut tru, na oltaim bai em i kisim planti gutpela samting bilong ol arapela kantri. Em bai i no inap sot long wanpela samting, olsem wara i ran oltaim na i no save pinis.” (Aisaia 66:12) God bilong dispela graun, em Satan, em i “man bilong kilim ol man i dai,” na em i “man bilong tok giaman, na em i papa bilong pasin bilong tok giaman.” (Jon 8:44; 2 Korin 4:4) Taim dispela kain god i bosim graun, olsem wanem ol man inap i stap bel isi? Ol i no inap, a?
3 Tasol Jehova i save givim bel isi long lain bilong em, maski ol i sindaun long dispela graun bilong Satan long taim nogut bilong pait. (Jon 17:16) Inap 500 yia samting paslain long Krais, Jehova i truim tok promis em i bin mekim long maus bilong Jeremaia, na em i givim bel isi na tok i tru long lain bilong em taim em i bringim ol i go bek long kantri bilong ol. (Jeremaia 33:6) Na nau long taim bilong las de, Jehova i bin givim bel isi na tok i tru long lain bilong em i stap long “kantri” bilong ol, olsem kantri bilong spirit long graun, maski ol i stap long taim nogut tru, winim olgeta taim nogut i bin kamap long graun long bipo. (Aisaia 66:8; Matyu 24:7-13; KTH 6:1-8) Orait, taim yumi stori long ol narapela tok bilong Sekaraia sapta 8, bai yumi pilim tru dispela bel isi na tok i tru God i givim long yumi, na bai yumi save long ol samting yumi mas mekim na bai dispela bel isi i ken i stap strong namel long yumi.
“Taitim Bun na Wok Strong”
4 Em namba 6 taim insait long Sekaraia sapta 8 yumi harim wanpela gutpela toksave bilong Jehova, em i tok: “Yupela i mas taitim bun na wok strong. Tingim dispela tok yupela i bin harim long maus bilong ol profet taim wok bilong haus bilong mi i kirap. Orait nau yupela i harim wankain tok tasol. Taim ol dispela profet i no autim tok yet, ol man i no inap baim ol wokman o baim ol animal bilong mekim wok. Na tu mi mekim ol wantok i birua long ol yet na ol manmeri i no inap i stap gut.”—Sekaraia 8:9, 10.
5 Sekaraia i autim dispela tok taim ol i wokim gen haus bilong God long Jerusalem. Ol Israel i bin lusim Babilon na kam bek long ples, pastaim ol i bel hevi na ol i lusim dispela wok bilong wokim gen haus bilong God. Ol i kirap tingim sindaun bilong ol yet, olsem na ol i no kisim ol blesing na bel isi long Jehova. Ol i brukim graun na planim kaikai, na ol i lukautim gut ol gaden wain bilong ol, tasol ol i no kisim planti samting long wok bilong ol. (Hagai 1:3-6) I olsem ol i wok nating na bos ‘i no baim ol.’
6 Tasol nau ol i wok long wokim gen haus bilong God, olsem na Sekaraia i wok long kirapim ol Juda long “taitim bun na wok strong,” na putim wok bilong lotuim Jehova i go pas long ol narapela samting na ol i no ken pret. Sapos ol i mekim olsem, wanem samting bai kamap? Jehova i tok: “Nau mi mekim narapela kain pasin long dispela liklik lain manmeri i stap yet. Bai mi larim ol i stap bel isi na bai ol i ken planim ol gaden bilong ol. Na planti ren bai i kam daun na ol diwai wain bilong ol bai i karim, na ol kaikai samting tu bai i kamap gutpela. Bai mi mekim dispela olgeta gutpela samting long dispela liklik hap lain bilong mi. Yupela ol Juda na ol Israel, harim. Bipo ol arapela lain i bin lukim yupela i bagarap na ol i bin tokim ol birua bilong ol olsem. ‘Mipela i laik bai yupela i mas bagarap tru olsem ol Juda na ol Israel i bin bagarap.’ Tasol nau bai mi kisim bek yupela Juda na Israel na mekim gut long yupela. . . . Olsem na yupela i no ken pret, yupela i mas sanap strong tasol.” (Sekaraia 8:11-13) Sapos ol Israel i strong long mekim olsem, ol bai i gat gutpela sindaun. Bipo, taim ol narapela lain i laik stori long wanpela lain God i bin demim ol na ol i stap nogut, ol inap kamapim nem bilong lain Israel. Tasol nau ol Israel i ken i stap olsem gutpela piksa bilong wanpela lain God i mekim gut long ol. Em gutpela as tru na ol i ken “taitim bun na wok strong”!
7 Orait olsem wanem long nau? Long ol yia paslain long 1919, lain bilong Jehova i no strong tumas long i stap gut long Jehova. Long taim bilong Namba Wan Pait ol i no klia olgeta long ol samting bilong dispela pait, na i olsem ol i bihainim wanpela man tasol na ol i no bihainim tumas King bilong ol, em Krais Jisas. Olsem na taim sampela insait na ausait long oganaisesen i kirap na birua long ol, sampela i bel hevi na i no wok strong moa. Tasol long 1919 Jehova i helpim ol na ol i taitim bun na wok strong. (Sekaraia 4:6) Jehova i givim bel isi long ol na ol i kamap strong tru. Dispela i kamap ples klia long wok ol i bin mekim kirap long 75 yia bipo na i kam inap long yia bilong wok bilong 1995. Lain Witnes Bilong Jehova i save givim baksait long pasin bilong litimapim kantri, na birua long ol narapela lain, na tingting nogut long ol man bilong narapela skin, na ol narapela kain pasin birua. (1 Jon 3:14-18) Ol i givim bel tru long mekim wok bilong Jehova insait long haus spirit bilong em. (Hibru 13:15; KTH 7:15) Long yia i go pinis, ol i lusim planti aua moa, winim 1 bilion aua, long tokim ol man long Papa bilong ol long heven! Long olgeta wan wan mun, ol i mekim olsem 4,865,060 Baibel-stadi. Na long olgeta wan wan mun i gat olsem 663,521 ol i mekim wok painia. Taim ol pris pasto i laik stori long wanpela lain i stap olsem gutpela piksa bilong ol man i givim bel tru long lotu bilong ol, sampela taim ol i kamapim nem bilong ol Witnes Bilong Jehova.
8 Lain bilong Jehova i strong long mekim wok bilong em, olsem na em i givim “bel isi” long ol, olsem pikinini bilong planim. Olgeta wan wan man na meri i planim na lukautim gut dispela “pikinini bilong planim,” orait bel isi bai kru na kamap bikpela insait long bel bilong em na long i stap bilong em. Olgeta Kristen i bilip na ol i wok long i stap bel isi wantaim Jehova na ol narapela Kristen, ol inap kisim tok i tru na bel isi bilong lain bilong Jehova, em ol i holim nem bilong em. (1 Pita 3:11; skelim wantaim Jems 3:18.) Em gutpela samting tru, a?
“Yupela i Mas Sanap Strong”
9 Orait nau yumi kaunim namba 7 toksave bilong Jehova. Wanem dispela toksave? “Bikpela I Gat Olgeta Strong i tok olsem, ‘Bipo ol tumbuna bilong yupela i mekim mi i belhat na mi bin tingting long mekim nogut long ol na mi no senisim tingting bilong mi. Nogat. Mi bin bagarapim ol. Tasol nau mi tingting long mekim gut long ol Jerusalem na ol Juda. Olsem na yupela i mas sanap strong.’ ”—Sekaraia 8:14, 15.
10 Long taim bilong Namba Wan Pait, i olsem Jehova i rausim lain bilong em i go nabaut, tasol long bel bilong ol, ol i laik mekim pasin i stret. Olsem na taim Jehova i stretim ol pinis, em i senisim sampela pasin em i bin mekim long ol. (Malakai 3:2-4) Long nau yumi tingim bek ol dispela samting na yumi tenkyu tru long Jehova long ol samting em i bin mekim. Tru, ‘olgeta manmeri bilong graun i bel nogut long yumi.’ (Matyu 24:9) Planti ol i bin kalabus, na sampela em ol birua i bin kilim ol i dai, long wanem, ol i holimpas bilip. Na taim yumi autim tok, planti man i les long harim, o ol i bel nogut long yumi. Tasol yumi no pret. Yumi save, Jehova i strong moa, winim ol man i biruaim yumi, maski ol i man bilong graun o ol i spirit. (Aisaia 40:15; Efesus 6:10-13) Bai yumi no lusim pasin bilong bihainim tok olsem: “Yu mas bilip na wetim Bikpela i kam helpim yu. Sanap strong, yu no ken bel hevi.”—Song 27:14.
‘Mekim Tok Tru Long Ol Arapela’
11 Bilong kisim ol blesing long Jehova, yumi mas tingim gut sampela samting. Sekaraia i tok olsem: “Yupela olgeta i mas mekim tok tru tasol long ol arapela man. Na yupela i mas stretim tok gut long kot na bai tok i dai. Yupela i no ken tingting long mekim pasin nogut long ol arapela manmeri. Taim yupela i sanap long kot, yupela i no ken autim tok giaman. Mi no laikim tru pasin bilong giaman na pasin bilong paulim kot na pasin bilong kros pait.”—Sekaraia 8:16, 17.
12 Jehova i strong long yumi mas mekim tok tru tasol. (Efesus 4:15, 25) Em i no save harim beten bilong ol man i tingting long mekim nogut long narapela man, o haitim tok i tru bilong helpim em yet, o autim tok giaman long kot. (Sindaun 28:9) Em i bel nogut tru long ol man i bikhet na givim baksait long tok i tru, olsem na em i laik bai yumi holimpas tok i tru bilong Baibel. (Song 25:5; 2 Jon 9-11) Na tu, olsem ol hetman bilong Israel i bin sindaun long dua bilong banis bilong taun na harim kot, ol elda i gat wok long harim kot long nau ol i mas larim tok i tru bilong Baibel i stap olsem as bilong ol tok ol i givim long man na ol tok ol i pasim—ol i no ken bihainim tingting bilong ol yet. (Jon 17:17) Jehova i laik bai ol i wok long painim rot bilong “stretim tok gut long kot na bai tok i dai”—ol i mas wok strong olsem wasman Kristen long mekim dai kros namel long tupela brata na helpim ol sinman i bin tanim bel na bai ol i ken kamap wanbel gen wantaim God. (Jems 5:14, 15; Jut 23) Na ol i wok strong na bai kongrigesen i stap wanbel, na ol i strongim bel na rausim ol man i bikhet na i wok long mekim pasin nogut na dispela i laik bagarapim pasin wanbel bilong kongrigesen.—1 Korin 6:9, 10.
‘Bikpela De Bilong Amamas’
13 Orait nau yumi harim namba 8 toksave bilong Jehova, em i tokaut olsem: “Yupela i save tambu long kaikai long sampela de bilong namba 4 na namba 5 na namba 7 na namba 10 mun, bilong makim ol hevi i bin kamap long yupela. Tasol ol dispela de bilong hevi bai i kamap bikpela de bilong olgeta Juda i ken amamas. Olsem na yupela i mas laikim tok i tru na pasin bilong sindaun gut wantaim ol arapela manmeri.” (Sekaraia 8:19) Aninit long Lo Bilong Moses, ol Israel i stap tambu long kaikai long Bikpela De Bilong God I Tekewe Sin Bilong Ol; ol i mekim bilong kamapim olsem ol i bel hevi long ol rong bilong ol. (Wok Pris 16:29-31) Dispela fopela taim bilong i stap tambu long kaikai olsem Sekaraia i kolim, ating ol i mekim bilong makim olsem ol i krai sori long ol narapela lain i bin daunim na bagarapim Jerusalem. (2 King 25:1-4, 8, 9, 22-26) Tasol nau ol i wok long wokim gen haus bilong Jehova na ol man i kam sindaun gen long Jerusalem. Nau ol i no ken krai sori moa—ol i ken amamas na belgut; na ol de bilong i stap tambu long kaikai, em bai kamap olsem ol bikpela de bilong amamas.
14 Long nau yumi no save bihainim ol dispela de bilong i stap tambu long kaikai, olsem Sekaraia i kolim o Lo i makim bilong ol man i mas bihainim. Jisas i bin givim skin bilong em olsem ofa bilong tekewe sin bilong yumi, olsem na yumi kisim ol blesing bilong wanpela Bikpela De Bilong God i Tekewe Sin. Em i no ken lusim sin bilong yumi inap wanpela yia samting tasol, nogat. Em bai lusim olgeta. (Hibru 9:6-14) Yumi bihainim tok bilong Hetpris long heven, em Krais Jisas, na yumi save mekim Memorial bilong tingim i dai bilong em; dispela de tasol em bikpela de bilong ol Kristen—i no gat narapela bikpela de bilong ol. (Luk 22:19, 20) Tru tumas, taim yumi bung wantaim long olgeta yia bilong mekim Memorial, yumi save kisim bikpela amamas, a?
15 Long yia i go pinis, inap 13,147,201 manmeri ol i bung wantaim bilong mekim Memorial. Dispela namba i winim bilong 1994 inap 858,284. Em bikpela lain tru, a? Tingim bikpela amamas i kamap insait long dispela 78,620 kongrigesen bilong ol Witnes Bilong Jehova taim bikpela lain tru i kam long Haus Kingdom bilong mekim Memorial. Yumi save, olgeta manmeri i kam long dispela bung, bel bilong ol i save kirapim ol long “laikim tok i tru na pasin bilong sindaun gut wantaim,” taim ol i tingim dai bilong dispela Man em i ‘rot na as bilong tok tru na as bilong laip,’ na nau em i mekim wok king olsem “King bilong kamapim gutpela sindaun na bel isi,” em Jehova yet i givim dispela namba long em! (Jon 14:6; Aisaia 9:6) Dispela bung i bikpela samting tru long ol manmeri i bin mekim Memorial long ol kantri i gat planti hevi na pait long en. Sampela brata bilong yumi i bin lukim ol samting nogut tru long 1995. Tasol ‘bel isi God i save givim yumi i mekim yumi i stap bel isi tru, na long dispela pasin yumi pas gut wantaim Krais Jisas, na bel na tingting bilong yumi i stap gut tru.’—Filipai 4:7.
‘Yumi Askim Jehova Long Mekim Gut Long Yumi’
16 Tasol ol dispela planti milion manmeri i kam bung long Memorial, ol i kam we? Namba 9 toksave bilong Jehova i tok: “Bikpela I Gat Olgeta Strong i tok moa olsem, ‘Bihain ol manmeri bilong planti bikpela taun bai i kam long Jerusalem. Na ol manmeri bilong wanpela taun bai i tokim ol manmeri bilong ol arapela taun olsem, “Mipela i laik i go long Jerusalem bilong lotu long Bikpela I Gat Olgeta Strong na bilong askim em long mekim gut long mipela. Yupela kam wantaim mipela.” Ol manmeri bilong planti bikpela na strongpela kantri bai i kam long Jerusalem bilong lotu long Bikpela I Gat Olgeta Strong, na askim em long mekim gut long ol.’ ”—Sekaraia 8:20-22.
17 Ol manmeri i bin kam long Memorial ol i laik ‘askim Jehova long mekim gut long ol.’ Planti em ol wokman bilong em i dediket na baptais pinis. Tasol planti milion ol i no kamap yet long dispela mak. Long sampela kantri, namba bilong ol manmeri i kam long Memorial i winim namba bilong ol pablisa bilong Kingdom inap 4-pela o 5-pela taim. Ol dispela manmeri i gat laik long harim tok bilong Baibel, i mas i gat sampela man bilong helpim ol na bai ol i ken wok yet long kamap strong. Yumi mas lainim ol long amamas long dispela save ol i kisim, olsem Jisas i dai bilong tekewe sin bilong yumi na nau em i mekim wok king long Kingdom bilong God. (1 Korin 5:7, 8; KTH 11:15) Yumi mas wok long kirapim ol long dediket long God Jehova na daun long dispela King em i bin makim. Long dispela rot bai ol inap ‘askim Jehova long mekim gut long ol.’—Song 116:18, 19; Filipai 2:12, 13.
‘Tenpela Man Bilong Ol Longwe Ples’
18 Orait, nau yumi kaunim laspela toksave bilong Jehova long Sekaraia sapta 8. Wanem dispela laspela toksave bilong em? Em i tok: “Long dispela taim 10-pela man bilong ol longwe ples bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ” (Sekaraia 8:23) Long taim bilong Sekaraia, Israel bilong skin em i lain bilong God. Tasol long taim bilong ol aposel ol i sakim Mesaia, em dispela man Jehova i bin makim. Olsem na God bilong yumi i makim wanpela “Juda”—em wanpela nupela lain Israel—bilong kamap lain bilong em stret, em “Israel tru bilong God,” na dispela lain em ol Juda bilong spirit. (Galesia 6:16; Jon 1:11; Rom 2:28, 29) Taim olgeta i insait pinis long dispela lain, bai ol inap olsem 144,000, na God i kisim ol namel long ol man bilong graun na bai ol i ken i stap king wantaim Jisas long Kingdom bilong em long heven.—KTH 14:1, 4.
19 Klostu olgeta bilong dispela lain 144,000 ol i dai pinis na ol i bin i stap gut long God, na ol i go antap pinis long heven na kisim prais bilong ol. (1 Korin 15:51, 52; KTH 6:9-11) Wan wan tasol i stap yet long graun na ol i amamas long lukim olsem dispela “10-pela man” i laik bihainim dispela “Juda,” ol i “planti manmeri tru . . . bilong olgeta lain man na bilong olgeta kantri na bilong olgeta kain skin na bilong olgeta tok ples.”—KTH 7:9; Aisaia 2:2, 3; 60:4-10, 22.
20 Pinis bilong dispela pasin bilong graun i wok long i kam klostu tru, na long dispela taim ol lotu i holim nating nem Kristen ol i olsem ol lain bilong Jerusalem long taim bilong Jeremaia, ol i tok: “Mipela i bin ting bai mipela i sindaun gut. . . . Na mipela i bin ting bai mipela i gat taim bilong kamap orait gen, tasol ol birua i kam na ol i wok long mekim mipela i pret nogut tru.” (Jeremaia 14:19) Dispela pret bilong ol bai i go bikpela tru taim ol lain bilong graun i birua long ol lotu giaman na bagarapim olgeta. Bihain liklik long en, ol lain bilong graun yet bai kisim bagarap long laspela pait bilong God, em Armagedon, na ol bai pinis olgeta. (Matyu 24:29, 30; KTH 16:14, 16; 17:16-18; 19:11-21) Bai em i taim nogut tru bilong ol man i pret na longlong nabaut!
21 Tasol long dispela taim nogut Jehova bai lukautim ol man i laikim tok i tru na ol i wok long kisim pasin bilong i stap “bel isi.” (Sekaraia 8:12; Sefanaia 2:3) Olsem na yumi mas i stap gut insait long “kantri” bilong lain bilong Jehova, na wok strong long autim tok bilong em long ol man na litimapim nem bilong em, na helpim planti man long kam long Jehova na ‘askim em long mekim gut long ol.’ Sapos yumi mekim olsem, oltaim Jehova bai givim bel isi long yumi. Tru tumas, “Bikpela i givim strong long ol manmeri bilong em. Em i mekim gut long ol na ol i stap bel isi.”—Song 29:11.
Yu Inap Stori Long Dispela?
◻ Olsem wanem lain bilong God i bin “taitim bun na wok strong” long taim bilong Sekaraia na long taim bilong yumi tu?
◻ Taim ol man i mekim nogut long yumi, na biruaim yumi, na ol i les long harim tok bilong yumi, yumi save mekim wanem?
◻ Bilong “mekim tok tru tasol long ol arapela manmeri,” yumi mas mekim wanem?
◻ Olsem wanem man i ken ‘askim Jehova long mekim gut long em’?
◻ Olsem yumi lukim long truim bilong Sekaraia 8:23, wanem samting i mekim yumi i amamas tru?
[Askim Bilong Stadi]
1, 2. (a) Olsem wanem long ol lain bilong dispela graun long i stap bel isi? (b) Bilong wanem gutaim na bel isi i no inap kamap long dispela taim nau?
3. Wanem gutpela samting tru Jehova i bin givim long lain bilong em, maski ol i stap long taim nogut bilong pait?
4. Sekaraia i wok long kirapim ol Israel long mekim wanem bambai ol i ken i stap bel isi?
5, 6. (a) Ol Israel i bel hevi na lusim wok bilong wokim gen haus bilong Jehova, olsem na ol i stap olsem wanem? (b) Jehova i tok promis long mekim wanem long ol Israel sapos ol i putim wok bilong lotuim em i go pas long ol narapela wok?
7. (a) Wanem ol bikpela senis i bin painim lain bilong Jehova i kam inap long yia bilong wok bilong 1995? (b) Taim yu skelim ripot bilong yia, yu lukim wanem ol kantri i gat planti pablisa na painia na ol i lusim planti aua long autim tok?
8. Olgeta wan wan Kristen i mas mekim wanem na bai ol i ken kisim bel isi?
9. Jehova i tok promis long senisim wanem ol pasin em i bin mekim long lain bilong em?
10. Wanem ol samting i bin painim ol Witnes Bilong Jehova na yumi save ol i no bin pret?
11, 12. Sapos yumi laik kisim ol blesing Jehova i save givim long lain bilong em, yumi mas tingim wanem samting?
13. (a) Sekaraia i tok profet long wanem senis bai kamap long pasin bilong i stap tambu long kaikai? (b) Ol Israel i gat wanem ol tambu long kaikai?
14, 15. (a) Olsem wanem yumi bin kisim bikpela amamas long bung bilong Memorial? Dispela i mas kirapim yumi long tingim wanem samting? (b) Olsem yumi lukim long ripot bilong yia, wanem ol kantri i gat bikpela lain tru i bin bung long Memorial?
16, 17. Olsem wanem ol manmeri bilong ol narapela lain ol inap ‘askim Jehova long mekim gut long ol’?
18, 19. (a) Long truim bilong Sekaraia 8:23, husat long nau i olsem “wanpela Juda”? (b) Long nau husat dispela “10-pela man bilong ol longwe ples” ol bai i “kam holim wanpela Juda man”?
20, 21. Las de i wok long i kam klostu tru, olsem na yumi mas mekim wanem bilong i stap bel isi wantaim Jehova?
[Piksa long pes 18]
Long yia i go pinis, ol Witnes Bilong Jehova i bin lusim 1,150,353,444 aua long tokim ol man long Kingdom bilong God