Sapos Yu Bin Stap Bipo, Yu Ting Bai Yu Luksave Long Mesaia?
INAP tri na hap yia Krais Jisas i autim Tok Bilong God namel long ol Israel. Tasol i kam inap long taim wok bilong em long graun i laik pinis, klostu olgeta man long taim bilong em ol i bin sakim em—ol i no bilip olsem em i Mesaia, o “Man God i Makim,” em God i tok promis long em bai kamap. Bilong wanem ol i sakim em?
Baibel i helpim yumi long save long sampela as na ol Juda long taim bilong ol aposel ol i no laik tokaut olsem Jisas em i Mesaia. Tripela bilong ol dispela as i pasim rot na planti man i no laik tokaut olsem long nau Jisas i mekim wok king olsem King Mesaia.
“Mipela i Laik Bai Yu Wokim Wanpela Mirakel”
Wanpela as na ol Juda long taim bilong ol aposel i no luksave long Mesaia, em ol i sakim ol mak em Baibel i tok i makim olsem em i Mesaia. Sampela taim ol man i harim ol tok em Jisas i mekim ol i tokim em long wokim wanpela mirakel bilong kamapim klia olsem em i kam long God. Olsem: Matyu 12:38 i tok sampela saveman bilong lo na sampela Farisi i bin tok: “Tisa, mipela i laik bai yu wokim wanpela mirakel olsem mak.” Olsem wanem? Jisas i no bin soim sampela mirakel long ol? Nogat, em i bin soim long ol.
I kam inap long dispela taim, Jisas i wokim pinis planti mirakel. Em i bin tanim wara i kamap wain, na mekim orait wanpela pikinini man em klostu i laik i dai, na mekim orait mama bilong meri bilong Pita em i gat sik, na mekim wanpela man i gat sik lepra i kamap klin, na em i oraitim wanpela man bun bilong em i dai olgeta na nau em inap wokabaut, na oraitim bek skin bilong man i gat sik inap 38 yia pinis, na stretim bek han bilong wanpela man em i drai pinis, na oraitim planti manmeri ol i gat bikpela sik, na mekim orait wokboi bilong wanpela kepten bilong ami, na kirapim bek pikinini man bilong meri wanpis, na oraitim wanpela man em i aipas na mauspas. Ol dispela mirakel i bin kamap long Kana, Kaperneam, Jerusalem, na Nain. Na tu, stori bilong ol dispela mirakel i go nabaut long olgeta hap bilong Judia na long ol narapela hap.—Jon 2:1-12; 4:46-54; Matyu 8:14-17; 8:1-4; 9:1-8; Jon 5:1-9; Matyu 12:9-14; Mak 3:7-12; Luk 7:1-10; 7:11-17; Matyu 12:22.
Olsem na i gat planti mirakel, olsem mak, i kamapim klia olsem Jisas em i Mesaia. Tasol maski em i wokim planti mirakel long ai bilong ol man, ol i no bilip long em. Ol man i lukim ol samting i makim klia olsem God i bin salim Jisas i kam tasol ol i no tokaut olsem em i Mesaia, ol i stap aipas long ol samting bilong spirit. Tingting na bel bilong ol i pas na tok i tru i no inap i go insait long en.—Jon 12:37-41.
Olsem wanem long taim bilong yumi? Sampela man i save tok, “Mi bilip tasol long ol samting mi inap lukim long ai bilong mi yet.” Tasol yu ting dispela em i gutpela tingting bilong bihainim? Ol tok profet bilong Baibel i makim olsem Jisas i kamap King pinis long Kingdom bilong Mesaia long heven. Ol man i no inap lukim em, olsem na i mas i gat wanpela mak bilong helpim yumi long save em i mekim wok king, em dispela i makim kirap bilong las taim bilong dispela taim nogut. Olsem wanem? Yu luksave long dispela mak?—Matyu 24:3.
Baibel i tok, taim Krais i kirap mekim wok king olsem King Mesaia, ol pait, guria, kaikai i sot, na bikpela sik bai i kamap bikpela moa yet, winim olgeta taim bipo. Long “taim bilong las de,” planti man bai tingim ol yet tasol, na mangal, na ol bai i no bosim skin bilong ol. (2 Timoti 3:1-5; Matyu 24:6, 7; Luk 21:10, 11) Winim 20 narapela narapela samting, em ol samting i makim taim bilong las de, i makim olsem Mesaia i kirap mekim wok king long yia 1914, na Baibel tu i makim dispela yia.—Lukim Wastaua bilong Mas 1, 1993, pes 5.
“Laikim Mani”
Pasin bilong laikim tumas mani kago em i narapela as na ol Juda i sakim Jisas olsem Mesaia. Pasin bilong tingim olsem mani i bikpela samting tru em i pasim rot na planti man i no bihainim Jisas. Olsem: Ol Farisi i gat nem olsem man bilong “laikim mani.” (Luk 16:14) Tingim wanpela yangpela maniman i gat namba em i kam long Jisas na askim em, em i mas mekim wanem na bai em inap kisim laip oltaim. Jisas i bekim tok olsem: “Yu mas bihainim ol lo bilong God.” Yangpela man i tok: “Mi save bihainim tasol dispela olgeta lo. Tasol mi sot yet long wanem samting?” Ating man hia i pilim olsem i gat sampela samting moa em i mas mekim. Jisas i tokim em: “Yu go salim olgeta samting bilong yu na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven.” Man! Em i gat rot long kamap disaipel bilong Mesaia! Tasol bel bilong dispela man i hevi na em i lusim Jisas i go. Bilong wanem em i mekim olsem? Em i tingim ol gutpela samting long graun i winim ol gutpela samting long heven.—Matyu 19:16-22.
Na long nau tu i wankain. Bilong kamap disaipel tru bilong King Mesaia, man i mas putim ol samting bilong spirit i go pas long olgeta narapela samting, na ol samting bilong em long graun tu. Man i tingim tumas mani kago samting, em i gat hatwok tru long mekim olsem. Olsem: Tupela marit i mekim wok misineri long wanpela kantri bilong Is ol i toktok wantaim wanpela meri long Baibel. Ol i ting em i gat laik long kisim sampela save moa long God Jehova na Pikinini bilong em, Krais Jisas, olsem na ol i tilim Wastaua na Kirap! long em. Em i mekim wanem? Em i askim ol: “Ol dispela nius bai helpim mi long kisim sampela mani moa?” Meri hia em i gat bikpela laik long kisim ol samting bilong skin, winim ol samting bilong spirit.
Tupela marit hia i stadi wantaim wanpela yangpela man long Baibel na em i kirap long kam long ol miting long Haus Kingdom. Papamama i tokim em olsem: “Yu lusim nating taim bilong yu. Gutpela sapos yu kisim namba tu wok mani long apinun na kisim sampela mani moa.” Sori tru! Sampela papamama i save kirapim ol pikinini bilong ol long putim ol samting bilong skin i go pas long wok bilong kisim save long King Mesaia! Wanpela savetok bilong ol Saina i tok olsem: “Maski king i gat planti mani tru, em i no inap baim ten tausen yia bilong i stap laip.”
Nau planti man i save olsem, sapos ol i kisim save long King Mesaia na bihainim em, orait ol i no ken laikim tumas mani. Wanpela Witnes bilong Jehova em pastaim em i gat wanpela bisnis bilong em yet na i kisim bikpela mani long en, em i tok: “Sapos yumi gat planti mani em gutpela, tasol i no olsem yumi mas i gat. Mani i no samting i save mekim man i amamas.” Nau em i wanpela bilong famili bilong Betel long wanpela brens-ofis bilong Sosaiti Was Taua long Yurop.
“Pret Long Ol Juda”
Pasin bilong pret long man em narapela as na ol Juda i no kisim Jisas olsem Mesaia. Sapos ol i tokaut long ai bilong ol man olsem Jisas em i Mesaia, dispela inap mekim na bai ol i no gat biknem moa. Sampela i no laik lusim biknem bilong ol—em bikpela samting tumas long ol. Tingim Nikodemus, em wanpela kaunsil bilong ol Juda. Em i kirap nogut long ol mirakel na ol tok bilong Jisas, na em i tok: “Tisa, mipela i save, God i bin salim yu i kam olsem tisa. Sapos God i no i stap wantaim wanpela man, orait dispela man i no inap wokim ol dispela mirakel yu save wokim.” Tasol em i go lukim Jisas long tudak. Ating em i pret, nogut ol narapela Juda i lukim em.
Planti man i harim Jisas i toktok, ol i ting em i bikpela samting long ol man i mas laikim ol, tasol ol i no ting olsem em i bikpela samting long God i mas laikim ol. (Jon 5:44) Taim Jisas i stap long Jerusalem long bung bilong Ol Bikpela De Bilong i Stap Long Haus Win long yia 32 C.E., “ol manmeri i toktok planti long em namel long ol yet.” I no gat wanpela man i toktok long pasin bilong Jisas long ples klia, long wanem, “ol i pret long ol bikman bilong ol Juda.” (Jon 7:10-13) Na tu, papamama bilong wanpela aipasman em Jisas i oraitim, ol i no laik tokaut olsem wanpela mausman bilong God i bin wokim dispela mirakel. Ol tu ol i “pret long ol Juda.”—Jon 9:13-23.
Long nau, sampela i save olsem Jisas em i King Mesaia long heven na em i mekim wok king, tasol ol i pret long tokaut long dispela long ples klia. Ol i no laik lusim gutnem bilong ol, em bikpela samting tumas long ol. Olsem: Long Jemani, wanpela Witnes Bilong Jehova i toktok wantaim wanpela man long Baibel, na dispela man i tok: “Ol samting bilong Baibel yupela ol Witnes i autim tok long en, em i tru. Tasol sapos nau mi kamap wanpela Witnes, orait tumora bai olgeta manmeri i save long dispela. Ol wanwok, na ol wantok, na ol memba bilong klap, em mi wantaim famili bilong mi i insait long en, ol bai kisim wanem tingting long mi? Mi no inap tru karim kain hevi olsem.”
Wanem samting i mekim na ol man i pret long ol narapela? Pasin antap, pasin bilong laikim famili na ol pren i mas laikim ol, pret long ol man i tok bilas long ol na semim ol, tingting planti long i stap narapela kain long planti ol narapela man. Kain tingting olsem inap traim bel bilong ol man i kirap stadi wantaim ol Witnes Bilong Jehova long Baibel. Olsem: Wanpela yangpela meri em i amamas tru long kisim save olsem Kingdom bilong Mesaia bai kamapim Paradais long graun aninit long wok king bilong Krais Jisas. Tasol em i laikim tumas disko, na pasin bilong pret long ol man i mekim na em i no toktok wantaim ol narapela long dispela gutpela samting em i bin kisim save long en. Tasol bihain em i strongim bel na em i kirap long toktok wantaim ol narapela long ol tok bilong Baibel. Ol pren bilong em i save go disko wantaim em ol i no laikim em moa, tasol papamama na man bilong em ol i gat laik long harim tok. Bihain moa, dispela meri wantaim mama bilong em i kisim baptais, na papa na man bilong em ol i kirap long stadi long Baibel. Em i kisim gutpela pe tru, a? Long wanem, em i daunim pasin bilong pret long man.
Tru Yu Luksave Long Mesaia?
Taim Jisas i laik i dai long diwai pos, sampela disaipel bilong em ol i stap. Ol i luksave pinis olsem em i Mesaia em God i bin tok profet long salim i kam. Ol hetman bilong Juda ol tu i stap, na i olsem ol i laik yet bai Jisas i mas wokim wanpela mirakel. Ol i tok: “Em i bin helpim ol arapela man. Sapos i tru em i dispela man God i bin makim [olsem Mesaia] bilong mekim wok bilong en na bilong kisim bek ol manmeri bilong en, orait em i ken helpim em yet.” (Luk 23:35) Ol i no laik lusim dispela pasin bilong askim Jisas long wokim wanpela mirakel, a? Tasol Jisas i bin wokim planti planti mirakel. Na tu, planti samting bilong em, olsem nupela meri i karim em, na wok, na kot, na i dai, na kirap bek bilong em, ol i truim planti tok profet bilong Ol Skripsa Hibru.—Lukim buk “All Scripture Is Inspired of God and Beneficial,” em Sosaiti Wastaua bilong Nu Yok i wokim, pes 343-344.
Ol man i go i kam ol i tok bilas long Jisas; ol i bin sakim ol samting i makim klia olsem em i Mesaia. (Matyu 27:39, 40) Ol soldia i tingting long kisim planti samting bilong skin, olsem na ol i tilim ol klos bilong Jisas namel long ol yet, na ol i pilai satu bilong makim wanem man bai kisim siot bilong em. (Jon 19:23, 24) Pasin bilong pret long ol man i mekim na sampela man ol i sakim ol samting i kamapim klia olsem Jisas em i Mesaia. Olsem: Tingim Josep bilong Arimatea, em wanpela kaunsil. Em i “wanpela disaipel bilong Jisas, tasol em i pret long ol Juda na em i haitim bilip bilong en.” Taim Mesaia i dai pinis, Josep na Nikodemus i kisim skin bilong Jisas na redim bilong planim. Em nau, Josep i daunim pinis pret bilong em.—Jon 19:38-40.
Sapos yu bin i stap long taim bilong ol aposel, yu ting bai yu luksave olsem Jisas em i Mesaia? Bilong mekim olsem yu mas bilip long ol tok bilong Baibel i makim Jisas em i Mesaia, na sakim pasin bilong tingim tumas ol mani kago samting, na no ken pret long ol man. Nau long dispela taim bilong las de, yumi olgeta wan wan i mas askim yumi yet, ‘Mi luksave olsem Jisas em i King Mesaia long heven long nau?’ Klostu nau em bai kirap na bosim olgeta samting hia long graun. Taim em i mekim olsem, bai yu stap namel long ol man i luksave olsem Krais Jisas em i Mesaia, em God i bin tok promis long em bai kam?
[Ol Piksa long pes 28]
No ken givim baksait long ol samting i makim olsem Jisas em i King Mesaia
[Piksa long pes 31]
Taim yu kisim save long Mesaia, ating yu mas daunim pasin bilong pret long ol narapela bai ting olsem wanem long yu