‘Putim Yau na Kisimgut Mining’

1, 2. Bilong wanem planti manmeri i no bin kliagut long mining bilong ol tok bilong Jisas?

SAMPELA taim man inap harim nek bilong man i toktok long em. Em inap luksave tu long krai bilong nek. Tasol olsem wanem bai dispela toktok i helpim em sapos em i no kliagut long mining bilong ol tok? (1 Kor. 14:9) Long wankain pasin, planti tausen manmeri i bin harim ol tok Jisas i mekim. Em i yusim ol tok ol man i save long en. Tasol sampela man i no kliagut long mining bilong ol tok em i mekim. Olsem na Jisas i tok: “Yupela olgeta, putim yau long tok bilong mi na kisimgut mining bilong en.”—Mak 7:14.

² Bilong wanem planti manmeri i no kliagut long mining bilong ol tok Jisas i mekim? Sampela i holim pinis tingting bilong ol yet na astingting bilong ol i no stret. Long ol kain man olsem, Jisas i tok: “Yupela i save gut long pasin bilong givim baksait long tok bilong God na bai yupela i ken holimpas kastam bilong yupela.” (Mak 7:9) Ol dispela manmeri i no gat laik long kisim save long mining bilong ol tok Jisas i mekim. Ol i no laik senisim pasin na tingting bilong ol. Yau bilong ol i harim ol tok, tasol bel bilong ol i pas olgeta! (Ritim Matyu 13:13-15.) Tasol yumi inap mekim wanem na bel bilong yumi i ken redi long kisim ol tok bilong Jisas na bai ol dispela tok inap helpim yumi?

 3. Bilong wanem ol disaipel inap kliagut long ol tok bilong Jisas?

³ Yumi mas bihainim pasin daun olsem ol disaipel bilong Jisas i bin mekim. Jisas i tok long ol olsem: “Ai bilong yupela i ken amamas, long wanem, ai bilong yupela i lukim samting, na yau bilong yupela i ken amamas, long wanem, yau bilong yupela i harim samting.” (Mat. 13:16) Wai na ol i kliagut long mining bilong ol tok bilong Jisas, tasol ol narapela i no kliagut? Namba 1 risen: Ol i gat pasin bilong givim ol askim, na ol i redi long painimaut mining tru bilong ol tok Jisas i mekim. (Mat. 13:36; Mak 7:17) Namba 2 risen: Maski ol i holim pinis tingting bilong ol yet, ol i amamas long kisim sampela save moa. (Ritim Matyu 13:11, 12.) Namba 3 risen: Taim ol i harim na kliagut long ol tok bilong Jisas, ol i amamas long yusim ol dispela tok long helpim ol yet na ol narapela.—Mat. 13:51, 52.

 4. Sapos yumi laik kliagut long ol tok piksa bilong Jisas, orait yumi mas mekim wanem 3-pela samting?

⁴ Sapos yumi laik kliagut long ol tok piksa bilong Jisas, yumi mas bihainim eksampel bilong ol disaipel bilong em. I gat 3-pela samting moa yumi mas mekim. Namba 1: Yumi mas redi long lusim sampela haptaim long stadi na tingim tingim ol tok bilong Jisas, mekim wok painimaut, na mekim ol askim i stret. Dispela bai helpim yumi long kisim save. (Snd. 2:4, 5) Namba 2: Yumi mas luksave long olsem wanem dispela save i stret wantaim save yumi holim pinis, na olsem wanem em inap helpim yumi. Dispela bai helpim yumi long kisim gutpela tingting. (Snd. 2:2, 3) Namba 3: Long olgeta wokabaut bilong yumi, yumi mas yusim save yumi bin kisim. Dispela bai soim olsem yumi skelim gut ol pasin yumi mas bihainim.—Snd. 2:6, 7.

 5. Hau bai yumi inap soim olsem yumi gat save, gutpela tingting, na pasin bilong skelim gut ol pasin yumi mas bihainim?

⁵ Olsem wanem yumi inap soim olsem yumi gat save, gutpela tingting, na pasin bilong skelim gut ol pasin yumi mas bihainim? Tingim olsem: Yu sanap namel long rot na wanpela bas i ron i kam long yu. Pastaim, yu luksave olsem em i wanpela bas—dispela i makim olsem yu gat save. Bihain, yu luksave olsem bas bai bamim yu—dispela i makim olsem yu gat gutpela tingting! Olsem na kwiktaim yu kalap i go long sait bilong rot—dispela i makim olsem yu gat pasin bilong skelim gut ol pasin yu mas bihainim! Long dispela as, Baibel i kirapim yumi long “was gut na holim strong gutpela tingting na save.” Dispela bai lukautim laip bilong yumi!—Snd. 3:21, 22; 1 Tim. 4:16.

 6. Taim yumi skelim 7-pela tok piksa bilong Jisas, yumi bai skelim wanem 4-pela askim? (Lukim blok.)

⁶ Long dispela stadi na stadi i kamap bihain, yumi bai skelim 7-pela tok piksa em Jisas i bin yusim. Yumi bai skelim ol dispela askim: Wanem mining bilong dispela tok piksa? (Dispela bai helpim yumi long kisim save.) Bilong wanem Jisas i mekim dispela tok piksa? (Dispela bai helpim yumi long kisim gutpela tingting.) Olsem wanem yumi inap yusim dispela save long helpim yumi yet na ol narapela? (Dispela em pasin bilong skelim gut ol pasin yumi mas bihainim.) Dispela tok piksa i givim wanem skul long yumi long Jehova na Jisas?

 7. Wanem mining bilong tok piksa bilong sid mastet?

⁷ Ritim Matyu 13:31, 32. Wanem mining bilong tok piksa bilong Jisas long sid mastet? Sid mastet i makim tok bilong Kingdom na ol gutpela samting i kamap taim ol Kristen i autim dispela tok—kongrigesen Kristen i kamap bikpela. Sid mastet “em i liklik tru long ol arapela sid,” na olsem tasol, liklik lain tasol i stap insait long kongrigesen Kristen taim em i kirap nupela long 33 C.E. Tasol insait long 30 yia samting, kongrigesen i kamap bikpela hariap tru. Ol man i no bin ting kain samting olsem bai kamap. (Kol. 1:23) Gutpela samting i kamap, long wanem, Jisas i tok olsem “ol pisin” bai “i kam na stap long ol han bilong en.” Ol dispela pisin i olsem piksa na i makim ol man i gat gutpela bel. Ol i kam long kongrigesen Kristen, long wanem, ol i laik kisim helpim bambai ol inap pas gut wantaim God, karim hevi, na kisim bel isi.—Skelim Esekiel 17:22, 23.

 8. Bilong wanem Jisas i mekim tok piksa bilong sid mastet?

⁸ Bilong wanem Jisas i mekim dispela tok piksa? Sid mastet i liklik tru, tasol taim em i kamap bikpela, em i save winim olgeta narapela kaikai long gaden. Long wankain pasin, Kingdom Bilong God i gat strong long kamap bikpela, lukautim ol manmeri bilong God, na daunim olgeta kain hevi. Kirap long 1914, hap bilong oganaisesen bilong God long graun i kamap bikpela hariap tru! (Ais. 60:22) Ol manmeri i kam insait long dispela oganaisesen i amamas tru long kisim ol gutpela kaikai bilong lukautim ol long sait bilong bilip. (Snd. 2:7; Ais. 32:1 2) Na tu, wok bilong Kingdom i wok yet long kamap bikpela na i go long planti hap, olsem na ol birua i no gat rot long stopim dispela wok.—Ais. 54:17.

 9. (a) Yumi inap kisim wanem skul long tok piksa bilong sid mastet? (b) Dispela tok piksa i givim wanem skul long yumi long Jehova na Jisas?

⁹ Yumi inap kisim wanem skul long tok piksa bilong sid mastet? Ating yumi stap long hap we i no gat planti Witnes o wok autim tok i no kamapim kwik ol gutpela samting. Sapos yumi tingim olsem Kingdom Bilong God inap daunim olgeta kain hevi, dispela bai helpim yumi long sanap strong yet na karim hevi. Olsem: Taim Brata Edwin Skinner i go kamap long India long 1926, liklik lain manmeri tasol i stap olsem ol Witnes long dispela kantri. Long dispela taim, wok autim tok i no kamapim kwik ol gutpela samting, na ol brata i pilim olsem dispela wok i “hatwok tru.” Tasol em i wok yet long autim tok na em i lukim olsem tok bilong Kingdom i daunim ol bikpela samting we i laik pasim rot bilong dispela wok. Long nau, i gat moa long 37,000 Witnes long India, na winim 108,000 manmeri i bin bung long Memorial bilong 2013. Tingim tu wanpela samting i bin kamap na i soim klia olsem wok bilong Kingdom i kamap bikpela. Long wankain yia em Brata Skinner i go kamap long India, wok autim tok i kirap tu long Sambia. Long nau, winim 170,000 pablisa i autim tok long hap, na 763,915 i bin bung long Memorial bilong 2013. Dispela i makim olsem 1-pela man long olgeta 18 man long Sambia i go long bung bilong Memorial. Wok bilong Kingdom i kamap bikpela tru!

10. Wanem mining bilong tok piksa bilong yis?

¹⁰ Ritim Matyu 13:33. Wanem mining bilong tok piksa bilong yis? Dispela tok piksa tu i makim tok bilong Kingdom na ol gutpela samting i kamap long rot bilong en. “Plaua olgeta” i makim olgeta kantri. Taim plaua i solap, dispela i olsem piksa bilong soim klia olsem wok autim tok i helpim tok bilong Kingdom long i go long planti hap. Tasol taim yumi skelim gro bilong sid mastet na wok bilong yis, tupela i narapela narapela: Taim sid mastet i gro na i kamap bikpela, yumi inap luksave klia long dispela samting, tasol taim yis i go i kam insait long plaua olgeta, pastaim yumi no inap luksave long dispela samting. Sampela haptaim i mas lus, na bihain yumi inap luksave long wok bilong yis.

11. Bilong wanem Jisas i mekim tok piksa bilong yis?

¹¹ Bilong wanem Jisas i mekim dispela tok piksa? Jisas i kamapim klia olsem tok bilong Kingdom i gat strong long i go long planti hap na kamapim ol senis. Tok bilong Kingdom “i go inap long olgeta hap bilong graun.” (Apo. 1:8) Ating pastaim ol man i no inap luksave long ol senis. Tasol ol senis i save kamap—planti man moa i kisim tok bilong Kingdom, na pasin bilong ol tu i senis.—Rom 12:2; Efe. 4:22, 23.

12, 13. Kamapim sampela eksampel long olsem wanem wok bilong autim tok bilong Kingdom i kamap bikpela wankain olsem tok piksa bilong yis.

¹² Taim ol i kirapim wok autim tok long wanpela hap, planti yia i save lus paslain long ol i luksave long ol gutpela samting i kamap long dispela wok. Olsem: Franz na Margit em tupela marit husat i mekim wok nau long wanpela brens ofis. Long 1982, tupela i wok long brens ofis long Brasil. Tupela i autim tok long wanpela liklik taun, na ol i kirapim stadi wantaim wanpela mama na 4-pela pikinini bilong em. Bikpela pikinini man i gat 12-pela krismas, na em i gat pasin bilong sem na em i save laik hait paslain long stadi i kirap. Senis i kamap long asainmen bilong tupela marit, olsem na tupela i no stadi moa wantaim ol. Tasol 25 yia bihain, tupela i go visitim gen dispela taun. Tupela i lukim wanem ol senis? Dispela taun i gat wanpela kongrigesen we i gat 69 pablisa, na 13 painia oltaim, na olgeta i mekim ol miting long nupela Haus Kingdom. Orait, olsem wanem long dispela liklik mangi husat i gat pasin bilong sem? Em i mekim wok olsem kodineta bilong lain elda! Wankain olsem yis long tok piksa bilong Jisas, tok bilong Kingdom i kamap bikpela na i senisim laip bilong planti man, na dispela tupela marit i amamas nogut tru!

¹³ Tok bilong Kingdom i gat strong long senisim pasin bilong man, na dispela i kamap klia long ol kantri we gavman i tambuim wok bilong Kingdom. I hatwok long save long hamas manmeri i harim tok bilong Kingdom, tasol planti taim yumi kirap nogut long harim ripot bilong ol gutpela samting i kamap. Tingim samting i kamap long Kuba. Tok bilong Kingdom i go kamap long Kuba long 1910, na bihain Brata Russell i visitim Kuba long 1913. Pastaim, wan wan man tasol i harim tok bilong Kingdom. Long nau, wanem gutpela samting i kamap long Kuba? Winim 96,000 pablisa i autim gutnius bilong Kingdom, na 229,726 manmeri i go long bung bilong Memorial long 2013—dispela i kain olsem 1-pela long olgeta 48 manmeri long dispela kantri. Long sampela kantri, gavman i tambuim wok bilong yumi long autim tok. Olsem na ol Witnes i stap long ol dispela kantri i pilim olsem i no gat rot long ol inap autim tok long ol dispela hap. Tasol, ating tok bilong Kingdom i go kamap pinis long ol dispela ples.a—Sav. 8:7; 11:5.

14, 15. (a) Olsem wanem yumi olgeta wan wan inap kisim helpim long tok piksa bilong yis? (b) Dispela tok piksa i givim wanem skul long yumi long Jehova na Jisas?

¹⁴ Tok piksa bilong Jisas long yis inap helpim yumi olsem wanem? Taim yumi tingim tingim mining bilong tok piksa bilong Jisas, yumi luksave olsem i no gat wok long yumi tingting planti long olsem wanem tok bilong Kingdom bai i go kamap long planti milion manmeri husat i no harim yet dispela tok. Olgeta samting i stap long han bilong Jehova. Tasol yumi mas mekim wanem wok? Baibel i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” (Sav. 11:6) Na tu, oltaim yumi mas beten askim God long blesim wok bilong autim tok, na moa yet long ol kantri we ol i tambuim dispela wok.—Efe. 6:18-20.

¹⁵ Yumi no ken bel hevi sapos wok bilong yumi i no kamapim gutpela samting. Yumi no ken bel hevi sapos “wok i no go het hariap.” (Sek. 4:10) Bihain, planti gutpela samting inap kamap na i winim tru ol samting yumi bin tingim!—Sng. 40:5; Sek. 4:7.

16. Wanem mining bilong tok piksa bilong bisnisman na tok piksa bilong bokis mani i stap hait?

¹⁶ Ritim Matyu 13:44-46. Wanem mining bilong tok piksa bilong bisnisman na bokis mani i stap hait? Long taim bilong Jisas, sampela bisnisman i save raun i go longwe tru inap long solwara India long kisim ol gutpela bis i dia tumas. Bisnisman long dispela tok piksa i makim ol manmeri husat i gat gutpela bel na ol i wok hat long mekim ol samting bilong pas gut wantaim God. Dispela “bis i dia tumas” i makim tok i tru bilong Kingdom. Bisnisman i luksave olsem dispela bis i dia tumas, olsem na em i redi long salim olgeta samting bilong em na bai em inap baim dispela bis. Jisas i stori tu long wanpela man i mekim wok long wanpela hap graun na em i painim bokis mani “i stap hait.” Dispela man i no wankain olsem bisnisman, long wanem, em i no go bilong painim bokis mani. Tasol wankain olsem bisnisman, em i redi long salim “ol samting bilong en” na bai em inap kisim dispela bokis mani.

17. Wai na Jisas i mekim tok piksa bilong bisnisman na tok piksa bilong bokis mani i stap hait?

¹⁷ Bilong wanem Jisas i mekim dispela 2-pela tok piksa? Em i laik kamapim klia olsem ol man i save kisim tok i tru long kain kain rot. Sampela i wok hat tru long painim tok i tru. Sampela i no mekim ol samting bilong painim tok i tru, tasol tok i tru i go kamap long ol. Maski man i kisim tok i tru long wanem rot, olgeta wan wan man i luksave olsem ol i painim pinis samting i dia tumas, olsem na ol i redi long lusim sampela samting bilong ol yet na bai ol inap kisim dispela samting.

18. (a) Olsem wanem dispela 2-pela tok piksa inap helpim yumi? (b) Yu pilim olsem dispela 2-pela tok piksa i givim wanem skul long yu long Jehova na Jisas?

¹⁸ Dispela 2-pela tok piksa inap helpim yumi olsem wanem? (Mat. 6:19-21) Askim yu yet: ‘Mi holim wankain tingting olsem dispela 2-pela man? Mi tingim tok i tru olsem samting i dia tumas? Mi redi long lusim sampela samting bilong mi yet na bai mi inap kisim tok i tru, o mi larim ol hevi bilong wan wan de i pulim nabaut tingting bilong mi?’ (Mat. 6:22-24, 33; Luk 5:27, 28; Fili. 3:8) Sapos yumi amamas tru olsem yumi painim pinis tok i tru, orait yumi bai tingting strong long putim tok i tru i stap namba 1 samting long laip bilong yumi.

19. Long neks stadi, yumi bai stori long wanem samting?

¹⁹ I gutpela yumi soim olsem yumi bin putim yau na kliagut tru long mining bilong ol tok piksa i stori long Kingdom. Yumi mas save long mining bilong ol dispela tok piksa, na tu, yumi mas bihainim ol skul yumi kisim. Long neks stadi, yumi bai skelim 3-pela moa tok piksa na painimaut wanem skul yumi inap kisim.