Yu Ting Yu Inapim Tru Wok Bilong God?

 1. Olgeta wokman bilong God i laik mekim wanem? Bilong wanem? (Lukim fran pes piksa.)

KRAIS JISAS i tokim ol disaipel long “go na kamapim ol disaipel long olgeta lain man.” (Mat. 28:19) Olgeta wokman bilong God i laik kisim save long hau ol i ken “inapim tru” dispela wok. (2 Tim. 4:5) Dispela wok i nambawan tru winim olgeta narapela wok, na em bai helpim tru olgeta manmeri, na klostu tru nau dispela wok bai pinis. Tasol sampela samting inap pasim yumi long lusim bikpela haptaim moa long mekim dispela wok.

 2. Wanem ol samting inap pasim yumi long inapim wok bilong God?

² Long olgeta de, yumi lusim sampela haptaim na strong bilong yumi long mekim ol narapela bikpela wok. Ating yumi lusim planti aua long wok mani bambai yumi inap lukautim yumi yet na famili long ol samting yumi nidim, olsem kaikai, klos, na haus. Ating yumi mekim sampela narapela wok bilong helpim famili, o yumi gat bikpela sik, o bel hevi i daunim yumi, o yumi karim hevi bilong kamap lapun. Hau bai yumi ken inapim tru wok bilong God taim ol kain bikpela hevi olsem i painim yumi?

 3. Yumi inap kisim wanem skul long tok bilong Jisas long Matyu 13:23?

³ Sapos sampela samting long laip bilong yumi i pasim yumi long givim bikpela haptaim moa long mekim wok bilong Jehova, orait yumi no ken bel hevi. Jisas i save olsem taim yumi mekim wok bilong Kingdom, wok bilong yumi bai karim kaikai, tasol skel bilong en bai narapela narapela. (Ritim Matyu 13:23.) Jehova i save pilim tru hatwok bilong yumi taim yumi givim bel olgeta long mekim wok bilong em. (Hib. 6:10-12) Tasol yumi inap pilim olsem sindaun bilong yumi i opim rot long yumi inap mekim sampela wok moa. Long dispela atikol, yumi bai stori long hau yumi inap putim wok autim tok i stap nambawan bikpela wok long laip bilong yumi. Yumi bai stori tu long olsem wanem ol narapela samting i no ken pinisim taim na strong bilong yumi. Na tu, yumi bai stori long olsem wanem yumi inap kamap gutpela moa long wok bilong autim tok na skulim man. Pastaim, yumi laik save long olsem wanem yumi ken inapim tru wok bilong God.

 4.Yumi mas mekim wanem sapos yumi laik inapim tru wok bilong God?

⁴ Sapos yumi laik inapim tru wok bilong God, orait yumi mas autim tok na skulim ol man, na mekim dispela wok inap tru long skel bilong yumi. Yumi givim taim bilong yumi, tasol yumi mas tingim narapela samting tu. Jehova bai skelim astingting bilong yumi long mekim dispela wok. Yumi laikim tru Jehova na ol narapela manmeri, olsem na yumi givim bel olgeta long mekim wok Kristen.b (Mak 12:30, 31; Kol. 3:23) Yumi givim yumi yet long mekim wok bilong God—dispela i makim olsem yumi mekim wok bilong em inap tru long skel bilong olgeta strong yumi gat. Taim yumi tingim wok autim tok olsem wanpela blesing, dispela bai kirapim yumi long autim gutnius long olgeta lain yumi bungim.

5-6. Sapos man i gat planti wok, olsem wanem em inap mekim wok autim tok i stap nambawan bikpela wok long laip bilong em?

⁵ Tingim wanpela yangpela man husat i save amamas long pilaim gita. Em i yusim olgeta fri taim bilong em long pilaim musik. Bihain, em i kisim wok bilong pilaim gita long wanpela hauskai bilong baim ti, kofi, na keik. Maski em i kisim mani long pilaim musik, dispela mani i no inap lukautim em long ol samting em i nidim. Olsem na em i wok long stua long Mande i go inap long Fraide. Em i lusim bikpela haptaim long stap long stua, tasol em i laikim moa yet wok bilong pilaim musik. Em i laik tru long kamap gutpela moa long pilaim musik na bai em inap mekim dispela wok long laip olgeta bilong em. Olsem na em i yusim olgeta fri taim bilong em long pilaim musik, maski em i pilaim inap sotpela taim tasol.

⁶ Olsem tasol, sampela samting inap pasim yu long lusim bikpela haptaim long autim tok. Tasol yu laikim tru wok bilong autim tok. Yu wok strong long kamap gutpela moa long wei bilong kirapim ol man long pilim tru tok bilong gutnius. Sapos yu gat planti wok, olsem wanem yu inap mekim wok autim tok i stap nambawan bikpela wok long laip bilong yu?

7-8. Olsem wanem yumi inap bihainim pasin bilong Jisas long sait bilong wok autim tok?

⁷ Jisas i soim gutpela pasin tru yumi ken bihainim long sait bilong wok autim tok. Oltaim em i stori long Kingdom Bilong God, na dispela i stap nambawan bikpela wok long laip bilong em. (Jon 4:34, 35) Em i save wokabaut inap planti handret kilomita bambai em inap autim tok long planti manmeri moa. Em i save autim tok maski ol manmeri i stap long pablik ples o long haus bilong ol yet. Wok bilong God i stap nambawan bikpela samting long laip bilong Jisas.

⁸ Yumi inap bihainim pasin bilong Krais, olsem na yumi painim rot bilong autim gutnius long olgeta kain taim na ples. Yumi redi long daunim laik bilong yumi yet na autim gutnius. (Mak 6:31-34; 1 Pita 2:21) Sampela long kongrigesen i mekim wok olsem spesel painia, painia oltaim, o painia haptaim. Sampela pablisa i lainim narapela tokples na sampela i go long ples i sot long ol pablisa. Sampela i no gat rot long lainim narapela tokples o go long narapela ples, tasol ol i mekim bikpela wok moa long autim tok inap tru long skel bilong ol. Maski yumi inap mekim bikpela wok o liklik wok tasol, Jehova i laik bai yumi mekim wok inap long skel bilong yumi. Em i laik bai yumi olgeta i amamas long autim “gutnius i nambawan tru na i kam long God bilong amamas.”—1 Tim. 1:11; Lo 30:11.

 9. (a) Taim Pol i mekim wok mani, olsem wanem wok autim tok i stap yet olsem nambawan bikpela wok long laip bilong em? (b) Olsem Aposel 28:16, 30, 31 i kamapim, Pol i holim wanem tingting long wok autim tok?

⁹ Aposel Pol i mekim wok autim tok i stap nambawan bikpela wok long laip bilong em. Taim em i mekim namba 2 raun bilong em long wok misineri na em i stap long Korin, em i sot long mani, olsem na em i lusim sampela haptaim long samapim ol haus sel. Tasol Pol i no tingim dispela wok olsem nambawan bikpela wok. Em i mekim dispela wok bambai em i gat mani bilong lukautim em yet. Taim em i autim gutnius long lain Korin, “i no gat pe” bilong dispela wok—i no gat wok long lain Korin i tromoi mani long lukautim em. (2 Kor. 11:7) Maski Pol i mekim liklik wok mani, em i putim wok autim tok i stap nambawan bikpela wok, na em i autim tok long olgeta de Sabat.Taim em i bungim pinis mani inap long lukautim em yet, em i mekim bikpela wok moa bilong autim tok. Em i “kirap lusim bikpela haptaim tru long autim tok . . . long ol Juda bilong soim klia olsem Jisas em i Krais.” (Apo. 18:3-5; 2 Kor. 11:9) Bihain, Pol i kalabus long haus bilong em yet long Rom inap 2-pela yia, na insait long dispela haptaim em i autim tok long ol visita na raitim pas long ol narapela. (Ritim Aposel 28:16, 30, 31.) Pol i no laik bai wanpela samting i pasim em long autim tok. Em i tok: “God . . . i givim dispela wok long mipela, olsem na mipela i no givap.” (2 Kor. 4:1) Olsem Pol, maski yumi lusim bikpela haptaim long wok mani, wok autim tok inap stap yet olsem nambawan bikpela wok long laip bilong yumi.

10-11. Maski hevi bilong sik i pasim yumi long mekim bikpela wok moa, yumi ken mekim wanem bilong inapim tru wok bilong God?

¹⁰ Maski hevi bilong lapun o bikpela sik i pasim yumi long go long haus bilong man na autim tok, yumi inap kisim amamas taim yumi bihainim ol narapela rot bilong autim tok. Long taim bilong ol aposel, ol Kristen i autim tok long ol manmeri ol i bungim long olgeta hap ol i go long en. Ol i autim tok i tru long olgeta hap i gat “ol lain i stap,” olsem long haus, pablik ples, na long kain kain taim na ples. (Apo. 17:17; 20:20) Sapos yumi no inap wokabaut tumas, orait yumi ken sindaun long pablik ples we yumi inap autim tok long ol manmeri i go i kam. O yumi ken raitim pas o autim tok long rot bilong telefon. Planti pablisa husat i gat hevi bilong bikpela sik o sampela narapela hevi, ol i kisim bikpela amamas long autim tok long ol kain rot olsem.

¹¹ Maski hevi bilong sik i pasim yu long mekim bikpela wok moa, i gat rot bilong inapim tru wok bilong God. Tingim gen eksampel bilong aposel Pol. Em i tok: “Long olgeta samting, mi gat strong long rot bilong dispela man husat i save givim pawa long mi.” (Fili. 4:13) Pol i nidim dispela pawa taim sik i painim em long wanpela raun bilong em long wok misineri. Em i tokim ol Kristen long Galesia olsem: “Mi bin sik, na long dispela rot mi bin autim gutnius long yupela long namba 1 taim.” (Gal. 4:13) Taim yu sik, rot i op long yu inap autim tok long ol dokta, ol nes, na ol narapela wokman bilong haus sik. Planti bilong dispela wok lain i no save stap long haus taim ol pablisa i raun autim tok long haus.

12. Wanem mining bilong tok bilong Jisas long “lukluk long wanpela samting tasol”?

¹² Jisas i tok: “Ai em i lam bilong bodi. Olsem na sapos ai bilong yu i lukluk long wanpela samting tasol, orait bodi olgeta bilong yu bai i lait.” (Mat. 6:22) Tok bilong Jisas i makim olsem yumi mas tingting long wanpela samting tasol. Yumi no ken larim ol narapela samting i pulim nabaut tingting bilong yumi. Jisas i tingting tasol long mekim wok bilong God, na em i skulim ol disaipel long tingting tasol long mekim wok bilong Jehova na Kingdom bilong heven. Yumi bihainim eksampel bilong Jisas taim yumi putim wok autim tok i stap nambawan samting long laip bilong yumi, i olsem yumi “painim Kingdom pastaim na stretpela pasin bilong God.”—Mat. 6:33.

13. Yumi ken mekim wanem na bai yumi tingting tasol long mekim wok bilong God?

¹³ Sapos yumi laik bai tingting bilong yumi i stap tasol long wok bilong God, orait yumi no ken lusim bikpela haptaim long mekim ol wok i no gat mining. Long dispela rot yumi inap lusim bikpela haptaim moa long helpim ol narapela long kisim save long Jehova na laikim em.c Olsem, yumi ken senisim sediul bilong wok mani na bai yumi inap lusim bikpela haptaim moa long autim tok namel long wik. Na tu, yumi ken lusim sampela amamas we i save pulim bikpela haptaim bilong yumi.

14. Tupela marit i mekim wanem ol senis na bai tupela inap lusim bikpela haptaim moa long autim tok?

¹⁴ Elias em wanpela elda, na em na meri bilong em i mekim sampela senis. Elias i tok: “I no gat rot long mitupela inap kirap kwik long mekim wok painia. Olsem na mitupela i mekim sampela liklik senis bambai mipela inap lusim bikpela haptaim moa long autim tok. Mipela i no tromoi bikpela mani long baim ol samting, na mipela i lusim ol amamas we i pinisim nating taim bilong mipela, na mipela i askim ol bos long senisim sediul bilong mipela long ples wok. Taim mipela i mekim olsem, mitupela inap autim tok long apinun, mekim planti moa Baibel stadi, na 2-pela taim long olgeta mun mipela i autim tok namel long wik. Mipela i kisim bikpela amamas tru!”

15-16. Olsem 1 Timoti 4:13, 15 i kamapim, olsem wanem yumi inap kamap gutpela moa long wok autim tok? (Lukim tu blok “Rot Bilong Inapim Tru Wok Bilong God.”)

¹⁵ Narapela rot bilong inapim tru wok bilong God em long kamap gutpela moa long wok autim tok. Long sampela wok, oltaim ol man i mas kisim trening na bai save bilong ol long mekim wok inap kamap gutpela moa. Wankain samting i kamap long ol man i autim tok bilong Kingdom. Oltaim yumi mas kisim trening na bai yumi inap kamap gutpela moa long wok autim tok.—Prov. 1:5; ritim 1 Timoti 4:13, 15.

¹⁶ Olsem wanem yumi inap kamap gutpela moa long wok autim tok? Long olgeta wik, yumi mas putim gut yau long ol skultok i kamap long miting bilong Kristen Laip na Wok Autim Tok. Dispela miting i trenim gut yumi long kamap gutpela moa long wok autim tok. Taim siaman i givim tok kaunsel long ol sumatin, ol dispela tok inap helpim yumi tu long kamap gutpela moa long wok autim tok. Yumi ken bihainim ol dispela tok taim yumi autim gutnius. Yumi ken askim wasman bilong grup long helpim yumi, o yumi ken wok wantaim em long autim tok, o yumi ken wok wantaim pablisa i save gut moa long autim tok, o wanpela painia, o wasman sekit. Taim yumi lain gut long yusim ol tul bilong autim tok na skulim man, yumi bai amamas moa long mekim dispela wok.

17. Wanem gutpela samting bai kamap taim yu inapim tru wok bilong God?

¹⁷ Jehova i larim yumi i stap olsem “ol wanwok” bilong em, na dispela em gutpela blesing tru! (1 Kor. 3:9) Taim yu “skelim gut wanem ol samting i bikpela samting moa” na yu tingting tasol long wok autim tok, yu bai “amamas na lotu long Jehova.” (Fili. 1:10; Sng. 100:2) Yu inap bilip tru olsem God bai strongim yu long inapim wok bilong em maski wanem ol hevi i painim yu. (2 Kor. 4:1, 7; 6:4) Maski sindaun bilong yu i opim rot long yu inap lusim liklik haptaim tasol o bikpela haptaim long autim tok, yu inap “amamas long samting [yu] yet i mekim” taim yu givim bel tru long mekim dispela wok. (Gal. 6:4) Taim yu inapim tru wok bilong God, yu soim olsem yu laikim tru Jehova na ol narapela. “Long dispela rot yu bai kisim laip na ol man i harim tok bilong yu, ol tu bai kisim laip.”—1 Tim. 4:16.