Yu Save Long Dispela?
Tru tru ol man i bin winim flut long ol fiuneral long taim bilong Jisas?
▪ Baibel i stori olsem long taim bilong ol bung bilong amamas ol man i bin winim mambu, olsem flut. (1 King 1:40; Aisaia 5:12; 30:29) Na tu, Baibel i tok ol i bin winim ol flut long ol fiuneral. Long kain taim olsem ol i winim ol flut tasol, na ol narapela musik nogat. Gutnius Bilong Matyu i stori long wanpela hetman Juda i bin askim Jisas long oraitim pikinini meri bilong em, klostu em i laik dai. Tasol taim Jisas i kamap long haus bilong dispela hetman “em i lukim ol man bilong winim flut, na bikpela lain manmeri ol i mekim nois i stap,” long wanem, pikinini i dai pinis.—Matyu 9:18, 23.
Yu ting Matyu i kamapim stret ol tok taim em i stori long dispela? William Barclay, man bilong tanim Baibel, em i tok: “Long planti hap bilong ol kantri bilong bipo olsem Rom, Grik, Fonisia, Asiria, na Palestain, ol man i save winim flut long taim wanpela i dai o long taim bilong bikpela hevi.” Buk Talmut i tok, long taim bilong ol aposel, maski wanpela Juda i stap rabis tru, taim meri bilong em i dai em bai haiarim tupela man bilong winim flut na wanpela meri bilong krai sori long meri bilong em. Flavius Josifas, em wanpela saveman long taim bilong ol aposel, em i tok olsem taim nius i go kamap long Jerusalem olsem ol Rom i daunim Jotapata long Galili na kilim i dai ol manmeri bilong en long yia 67 C.E., “planti manmeri bilong krai sori i haiarim ol man long winim flut taim ol i mekim ol singsing bilong krai sori.”
Tupela man nogut em ol i kilim i dai wantaim Jisas, ol i bin mekim wanem rong?
▪ Baibel i kolim dispela tupela man nogut olsem “raskol.” (Matyu 27:38; Mak 15:27) Sampela dikseneri bilong Baibel i tok olsem Baibel i save yusim ol narapela narapela tok bilong makim wanem kain pasin nogut ol man i mekim. Tok Grik kleptes i makim stilman husat i save stilim ol samting long pasin hait bambai i no gat man i save. Dispela tok i makim Judas Iskariot, em i bin hait na stilim mani long bokis mani bilong ol disaipel. (Jon 12:6) Tasol tok Grik lestes i makim man husat i save pait na stilim ol samting, na inap makim tu paitman o man i bikhet na i laik daunim gavman. Ol man nogut em ol i bin kilim i dai wantaim Jisas, ol i kain man olsem. Wanpela bilong ol i bin tok: “Yumi kisim pe inap stret long ol samting yumi bin mekim.” (Luk 23:41) Dispela inap makim olsem ol i no stilim tasol ol samting, nogat, ol i mekim bikpela rong moa.
Olsem dispela tupela raskol, ol i kolim Barabas olsem lestes. (Jon 18:40) Tok bilong Luk 23:19 i kamapim ples klia olsem Barabas i no wanpela stilman tasol, nogat, em i bin “kilim man i dai na em i kirapim ol man long wanpela taun long bikhet long gavman na ol i kalabusim em.”
Olsem na tupela man em ol i bin kilim i dai wantaim Jisas, ol i bin mekim pasin raskol, tasol ating ol i bin insait tu long bikhet long gavman o kilim man i dai. Maski ol i bin mekim wanem rong, Gavana Pontius Pailat bilong Rom i tok ol i mas hangamapim tupela long pos na kilim ol i dai.