Buk Bilong Baibel Namba 5—Lo
Man Bilong Raitim: Moses
Ples Em i Bin Raitim: Ples Stret Bilong Moap
Raitim Pinis: 1473 B.C.E.
Taim: Tupela mun (1473 B.C.E.)
1. Yumi ken mekim wanem ol askim bilong taim ol Israel i laik i go insait long Graun Bilong Promis?
OLGETA tok i stap long Buk Lo i kamapim ol strongpela tok bilong helpim lain Israel, em lain bilong Jehova. Ol i bin wokabaut long ples drai inap 40 yia pinis, na nau ol i redi long brukim wara Jordan na go insait long Graun Bilong Promis. Wanem samting bai painim ol long dispela hap? Taim ol i brukim pinis wara Jordan, wanem ol narapela kain hevi bai painim ol? Taim Moses i givim laspela tok long ol, em bai stori long wanem samting? Na yumi ken askim tu olsem: Bilong wanem i gutpela yumi ol manmeri long nau i kisim save long bekim bilong ol dispela askim?
2. Olsem wanem yumi ken tok Buk Lo i bikpela samting tru?
2 Bilong save long bekim bilong ol dispela askim, yumi mas lukim tok Moses i bin autim na em i bin raitim long namba 5 buk bilong Baibel, em Buk Lo. Buk Lo i kolim planti tok i stap long ol buk i kamap pastaim, tasol olgeta tok bilong en i bikpela samting long yumi mas kisim save long en. Bilong wanem i olsem? Em i strongim tok bilong God, na God i bin givim long lain bilong em long taim ol i mas i gat strongpela man bilong i go pas long ol na soim rot long ol. Klostu ol i laik i go insait long Graun Bilong Promis, na nau i gat nupela man bilong go pas long ol. Ol i mas i gat sampela tok bilong strongim ol na kirapim ol long i go insait long dispela hap, na Jehova i mas givim sampela strongpela tok lukaut long ol bambai ol i ken bihainim stretpela rot na Jehova i ken mekim gut long ol.
3. Long hap bilong Buk Lo, Moses i tokaut strong long wanem samting? Bilong wanem ol dispela tok i bikpela samting long yumi long nau?
3 Jehova i save long dispela samting, olsem na spirit bilong em i strongim Moses long tokaut strong long ol Israel i mas bihainim gut ol lo bilong God na stap gut long em. Long dispela buk, planti taim Moses i tokaut strong olsem Jehova em i God Antap Tru, na em i laik bai ol manmeri i mas lotuim em wanpela tasol, na em i laik bai lain bilong em i ‘laikim tru em long bel bilong ol na long tingting bilong ol na long strong bilong ol.’ Em “i winim olgeta kain giaman god na olgeta samting i gat strong. Em i bikpela na strongpela, na olgeta samting i mas pret na aninit long em. Em i no save bihainim wantok pasin na em i no save larim ol manmeri i grisim em long wanpela samting.” Em i no save larim wanpela i kisim ples bilong em. Ol man i bihainim tok bilong em ol bai stap laip, tasol ol man i sakim tok bilong em na bikhet long em, ol bai dai. Ol tok Jehova i givim long lain Israel na i stap long Buk Lo, em i bilong helpim na redim ol long bikpela samting em liklik taim ol i mas mekim. Em i gutpela tok bilong helpim yumi long nau tu, bambai yumi inap pret long Jehova na wokabaut, na wok long mekim holi nem bilong em namel long ol manmeri bilong dispela graun i bihainim ol pasin nogut.—Lo 5:9, 10; 6:4-6; 10:12-22.
4. Wanem insait bilong dispela nem Diuteronomi? Ol tok bilong dispela buk i gat wanem wok bilong en?
4 Narapela nem bilong Buk Lo em Diuteronomi. Ol i kisim dispela nem long Baibel Grik Septuagint, olsem Deu·te·ro·noʹmi·on. Ol i bungim tupela tok wantaim, em tok deuʹte·ros olsem “namba tu” na tok noʹmos olsem “lo,” na insait bilong dispela tupela tok em “Namba Tu Lo” o “Kolim Gen Lo.” Ol i kisim dispela tok Grik long wanpela hap tok Hibru i stap long Lo 17:18, em mish·nehʹ hat·toh·rahʹ, na insait bilong dispela tok i olsem ‘lo ol i bin raitim gen.’ Tasol maski dispela i insait bilong nem Diuteronomi, dispela buk em i no namba tu lo, na em i no wanpela buk i kolim gen Lo. Ol tok bilong dispela buk i kamapim insait bilong Lo, na i kirapim lain Israel long laikim tru Jehova na bihainim tok bilong em taim ol i go insait long Graun Bilong Promis.—1:5.
5. Olsem wanem yumi save Moses i bin raitim ol tok bilong Buk Lo?
5 Dispela buk em i namba 5 buk bilong Pentatuk, olsem na yumi save, man i bin raitim 4-pela buk i stap paslain em i bin raitim tu dispela namba 5 buk, na dispela man em Moses. Namba wan tok bilong Buk Lo i kamapim klia olsem “dispela buk i gat ol toktok Moses i bin mekim long ol manmeri bilong Israel.” Na sampela tok i kamap bihain, olsem “Moses i raitim lo,” na “Moses i raitim dispela song,” ol dispela tok tu i makim tru olsem Moses i raitim ol tok bilong Buk Lo. Nem bilong Moses i stap inap olsem 40 taim long Buk Lo, na em i bilong strongim ol tok i stap long en. Long olgeta hap bilong dispela buk i gat dispela tok “mi,” na dispela i makim Moses yet. Moses i dai pinis na ol i raitim ol laspela ves bilong Buk Lo. Ating Josua o hetpris Eleasar i raitim.—1:1; 31:9, 22, 24-26.
6. (a) Buk Lo i stori long ol samting i kamap insait long wanem hap taim? (b) Moses i raitim pinis klostu olgeta tok bilong dispela buk long wanem mun?
6 Ol samting Buk Lo i stori long en i bin kamap long wanem taim? Dispela buk yet i tok: “Ol Israel i lusim Isip inap 40 yia pinis, na long de namba wan bilong namba 11 mun Moses i tokim ol manmeri long olgeta samting God, Bikpela i bin tokim em.” Taim ol i raitim pinis ol tok bilong Buk Lo, ol i kirap raitim tok bilong Buk Josua, na ol i stori long ol samting i kamap 3-pela de paslain long taim ol i laik brukim wara Jordan, em “long de namba 10 bilong namba wan mun.” (Lo 1:3; Jos 1:11; 4:19) Olsem na ol samting Buk Lo i stori long en i kamap insait long tupela mun na wanpela wik. Tasol insait long dispela 9-pela wik, Moses i dai na lain Israel i krai inap 30 de long em. (Lo 34:8) Olsem na klostu olgeta samting Buk Lo i stori long en i bin kamap long namba 11 mun long namba 40 yia bihain long taim ol Israel i bin lusim Isip. Yumi ken ting olsem, long pinis bilong dispela mun Moses i raitim pinis klostu olgeta tok bilong dispela buk, long wanem, em i dai long kirap bilong namba 12 mun long namba 40 yia, olsem kirap long yia 1473 B.C.E.
7. Olsem wanem yumi save ol tok bilong Buk Lo i tru na yumi inap bilip long en?
7 Ol samting i kamapim klia pinis olsem ol tok bilong namba wan i go inap namba 4 buk bilong Pentatuk i tru na yumi inap bilip long en, ol dispela samting i makim olsem namba 5 buk, em Buk Lo, em tu i tru na yumi inap bilip long en. Em i wanpela namel long 4-pela buk bilong Ol Skripsa Hibru ol man bilong raitim Ol Skripsa Grik i kolim tok bilong en planti taim, na 3-pela narapela buk em Stat, Song, Aisaia. Inap 83 taim long Ol Skripsa Grik ol i kolim sampela tok bilong Buk Lo, na ol dispela tok i stap long 17 bilong ol dispela buk bilong Ol Skripsa Grik.a
8. Jisas i tok wanem na yumi save ol tok bilong Buk Lo i tru na yumi inap bilip long en?
8 Jisas yet i bin kolim sampela tok bilong Buk Lo na yumi ken save em i hap tru bilong Baibel. Taim Jisas i kirap long mekim wok autim tok, 3-pela taim Satan i traim em, na 3-pela taim Jisas i bekim tok long em olsem: ‘Buk bilong God i tok.’ Dispela tok i stap we? Em i stap long hap bilong Buk Lo (8:3; 6:16, 13), na Jisas i save spirit bilong God i bin kamapim ol tok bilong en, olsem na em i kolim hap tok bilong en, olsem: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” “Yu no ken traim strong bilong God, Bikpela bilong yu.” “Yu mas aninit long God, Bikpela bilong yu. Na yu mas lotu long em wanpela tasol.” (Mt 4:1-11) Bihain, taim ol Farisi i kam traim Jisas na ol i askim em long ol lo bilong God, Jisas i kolim “lo em i bikpela, na em i namba wan tru,” olsem i stap long Lo 6:5. (Mt 22:37, 38; Mk 12:30; Lu 10:27) Ol dispela tok Jisas i mekim i kamapim klia olgeta olsem Buk Lo i tru na yumi inap bilip long en.
9. Ol man i bin painim wanem ol samting na yumi ken save ol tok bilong Buk Lo i stret?
9 Ol samting dispela buk i stori long en na ol tok em i kamapim, i stret tru long ol samting i bin kamap long bipo na i makim stret ol dispela ples tru long bipo. Ol stori Buk Lo i mekim long Isip, Kenan, Amalek, Amon, Moap, Idom, i stret tru long ol dispela ples long dispela taim bipo, na Buk Lo i kolim stret nem bilong ol ples.b Ol saveman bilong painim ol samting bilong bipo insait long graun ol i wok yet long painim planti samting i kamapim long ples klia olsem ol tok Moses i raitim i stret. Wanpela man (Henry H. Halley) em i tok: ‘Ol saveman bilong painim ol samting bilong bipo insait long graun ol i bin kisim bikpela save na ol i tokaut olsem Moses i bin raitim ol tok bilong Pentatuk. Pastaim ol man i ting, long taim bilong Moses ol manmeri i no save long pasin bilong rait, tasol nau mipela save dispela tingting bilong ol i kranki. Na long olgeta yia, ol i wok long digim graun long hap bilong Isip na Palestain na Mesopotemia, na ol i painim sampela hap rait na sampela samting moa long graun, na ol i save tru olsem ol rait bilong Ol Skripsa Hibru i stori stret long ol samting i bin kamap long bipo. Na planti saveman long nau ol i wok long bilip olsem Moses i bin raitim ol tok bilong Buk Lo.’c Olsem na save em ol saveman i bin kisim i helpim tok bilong Buk Lo na ol narapela buk bilong Pentatuk, na i strongim tok olsem Moses, wanpela profet bilong God, i bin raitim ol tok bilong dispela buk.
HELPIM YUMI OLSEM WANEM?
30. Buk Lo i kamapim wanem ol tok bilong pinisim gut ol tok bilong Pentatuk?
30 Buk Lo em i laspela buk bilong Pentatuk, olsem na ol tok bilong Buk Lo i kamapim gen ol tok bilong ol narapela 4-pela buk i tokaut long bikpela nem bilong God Jehova na mekim holi dispela nem. Em wanpela tasol i God, na em i laik bai ol manmeri i lotuim em wanpela tasol, na em i nolaik tru long ol i lotuim ol god giaman. Long taim bilong yumi, olgeta Kristen i mas tingim gut ol as lo i stap long bikpela lo bilong God na ol i mas bihainim tok bilong em, na taim em i kam bilong bagarapim ol birua bilong em, bai ol inap abrusim bagarap. Nambawan bikpela lo bilong God i winim ol narapela lo, em i mas bosim olgeta wokabaut bilong ol; dispela lo i olsem: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.”—6:5.
31. Olsem wanem ol narapela hap bilong Baibel i mekim wok long Buk Lo bilong helpim yumi long pilim tru ol samting God i laik mekim?
31 Ol narapela hap bilong Baibel i save kolim tok bilong Buk Lo bilong helpim yumi long pilim tru ol samting God i laik mekim. Taim Satan i laik traim Jisas, em i kamapim tok bilong Buk Lo bilong bekim tok long Satan, na em i bin kamapim planti narapela tok bilong Buk Lo tu. (Lo 5:16—Mt 15:4; Lo 17:6—Mt 18:16 na Jo 8:17) Ol dispela tok bilong Buk Lo i go moa inap long hap bilong Kamapim Tok Hait, taim Jisas i givim tok lukaut long ol man olsem ol i no ken skruim o rausim wanpela tok long tok profet bilong Jehova. (Lo 4:2—KTH 22:18) Taim Pita i stori long Jisas em i Krais na em i wanpela Profet i winim Moses, na em dispela profet Jehova i bin kamapim long Israel, Pita i kolim tok bilong Buk Lo bilong strongim tok bilong em. (Lo 18:15-19—Ap 3:22, 23) Pol tu i kolim tok bilong Buk Lo taim em i stori long pe man i mas kisim long wok, na taim em i stori long man i mekim rong na ol i mas kisim tok long maus bilong tupela o tripela man bilong skelim gut dispela rong, na taim em i stori long pasin bilong lainim pikinini.—Lo 25:4—1 Ko 9:8-10 na 1 Ti 5:17, 18; Lo 13:14 na 19:15—1 Ti 5:19 na 2 Ko 13:1; Lo 5:16—Ef 6:2, 3.
32. Olsem wanem Josua na Gideon na ol profet i stap olsem gutpela piksa yumi ken bihainim?
32 Ol tok bilong Buk Lo i bin strongim ol man bilong raitim tok bilong Ol Skripsa Grik na ol wokboi bilong God i stap paslain long taim bilong Jisas, na ol dispela tok i bin skulim ol tu. Gutpela sapos yumi bihainim pasin bilong ol. Tingim Josua, em senis bilong Moses, em i man bilong bihainim tru tok bilong God na taim em i go insait long graun Kenan na daunim sampela biktaun, em i bagarapim olgeta samting bilong ol dispela ples na em i no kisim sampela samting bilong em yet olsem Akan i bin mekim. (Lo 20:15-18 na 21:23—Jos 8:24-27, 29) Ol man long ami bilong Gideon em ol i “pret,” Gideon i rausim ol long ami. Em i mekim olsem bilong bihainim Lo bilong God. (Lo 20:1-9—Het 7:1-11) Ol profet long Israel na Juda ol i laik i stap gut long lo bilong Jehova, olsem na ol i strongim bel na ol i tokaut strong long pasin nogut bilong ol lain i lusim God. Amos i bin stap olsem gutpela piksa tru bilong dispela samting. (Lo 24:12-15—Amo 2:6-8) Tru tumas, ol narapela hap bilong Baibel i kamapim planti handet tok i stap long Buk Lo, olsem na yumi save Buk Lo em wanpela hap tru bilong Baibel na em i bilong helpim yumi.
33. (a) Olsem wanem olgeta tok bilong Buk Lo i litimapim nem bilong Jehova? (b) Lukim lista hia na stori long sampela lo em ol gavman bilong graun i kisim long lo bilong God.
33 Olgeta tok bilong Buk Lo i litimapim nem bilong Nambawan Bikpela God, Jehova. Olgeta hap bilong en i toktok strong olsem: ‘Lotuim Jehova; lotuim em wanpela tasol.’ Nau ol Kristen i no stap moa aninit long Lo, tasol as tok bilong ol dispela lo i stap yet. (Ga 3:19) Ol Kristen tru inap kisim bikpela save long rot bilong dispela buk bilong ol lo bilong God em bilong skulim yumi, na i tokaut stret long ol samting, na ol tok bilong en i klia na yumi inap kisim gut. Ol gavman bilong graun i save ol lo bilong Jehova i gutpela tru, na ol i kisim planti lo i stap long Buk Lo na raitim long ol buk lo bilong ol yet. Long lista hia, yu ken lukim sampela lo em ol gavman bilong graun i bin kisim long Buk Lo, o ol i tingim as tok bilong wanpela lo na kamapim olsem lo bilong ol.
34. Olsem wanem long ol tok bilong Buk Lo na Kingdom bilong God?
34 Na tu, ol tok dispela buk i mekim long Lo i helpim yumi long save gut long Kingdom bilong God na pilim tru ol wok bilong en. Olsem wanem em inap mekim olsem? Taim Man Bilong Kamap King, em Krais Jisas, i stap long graun, em i save gut long ol tok bilong Buk Lo na em i mekim wok long en, na dispela i kamap ples klia long pasin bilong em long kolim ol dispela tok. Taim Kingdom bilong em i bosim olgeta hap bilong graun, em bai bosim ol man long ol stretpela lo em as bilong en i stap long dispela “lo.” Na olgeta man i laik kisim blesing long em aninit long dispela Kingdom, ol i mas bihainim ol dispela stretpela lo. (Stt 22:18; Lo 7:12-14) Gutpela sapos nau yumi kirap bihainim ol dispela lo, long wanem, em bai helpim yumi. Dispela “lo” i bin i stap inap 3,500 yia pinis, tasol em i stret tru long yumi long nau tu. Ol tok bilong en i gat strong bilong stiaim yumi long nau, na em bai wok yet long stiaim yumi taim Kingdom bilong God i bosim graun. Yumi laik bai lain bilong Jehova i wok yet long mekim nem bilong em i stap holi taim ol i bihainim as bilong ol gutpela lo bilong Pentatuk, em Buk Lo i kamapim gut tru ol laspela bikpela tok bilong en—em spirit bilong God yet i kamapim na kirapim tru tingting bilong yumi.
[Ol Futnot]
a Lukim lista “Quotations from the Old Testament” long buk The New Testament in Original Greek, em B. F. Westcott na F. J. A. Hort i bin raitim, 1956, pes 601-618.
c Buk Halley’s Bible Handbook, 1988, bilong Henry H. Halley, pes 56.
[Sat long pes 6]
SAMPELA LO I STAP LONG BUK LOd
I. Ol lo i bosim man yet na famili Sapta na Ves
A. Ol lo i bosim sindaun bilong man
1. Papamama na pikinini 5:16
2. Ol marit 22:30; 27:20, 22, 23
3. Lo bilong katim marit 22:13-19, 28, 29
B. Ol kago samting bilong man 22:1-4
II. Ol lo bilong gavman
A. Ol mak king i mas winim na ol wok bilong em 17:14-20
B. Lo bilong man i insait long ami
1. Ol man i no ken insait long ami 20:1, 5-7; 24:5
2. Ol ofisa i no gat bikpela namba 20:9
III. Ol samting bilong kot
A. Wok bilong ol jas 16:18, 20
B. Apil long sprim kot 17:8-11
IV. Ol lo bilong skelim man i mekim rong
A. Man i mekim rong long gavman
1. Kisim grismani, paulim wok jas 16:19, 20
2. Giaman na kotim nating man 5:20
B. Man i mekim pasin i gat sem
1. Bagarapim marit 5:18; 22:22-24
2. Kain marit i no stret long lo 22:30; 27:20, 22, 23
C. Mekim nogut long wanpela man
1. Kilim man i dai na paitim man 5:17; 27:24
2. Bagarapim meri na pulim meri 22:25-29
V. Ol lo bilong mekim gut long man na animal
A. Mekim gutpela pasin long ol animal 25:4; 22:6, 7
B. Tingim ol manmeri i stap tarangu o rabis 24:6, 10-18
C. Ol lo man i mas bihainim taim em i wokim haus samting 22:8
D. Pasin man i mas mekim long ol wokboi bilong em na ol man i wok kalabus long em na ol narapela i aninit long em 15:12-15; 21:10-14; 27:18, 19
E. Givim samting long ol rabisman 14:28, 29; 15:1-11; 16:11, 12; 24:19-22
[Futnot]
d Buk Israel’s Laws and Legal Precedents, 1907, bilong C. F. Kent, pes vii i go xviii; lukim tu buk Insight on the Scriptures, Vol. 2, pes 214-220.