Wanem Samting i Save Kirapim Yu Long Mekim Wok Bilong God?
“Yupela i mas laikim God . . . long bel bilong yupela na long spirit bilong yupela na long tingting bilong yupela na long strong bilong yupela.”—MAK 12:30.
SAPOS yu laik save long wanpela ka, em i gutpela tru o nogat, yu no ken lukim skin bilong ka tasol. Ating ol i bin penim gut na em i lait, na ka i gat stail tu na i pulim ai bilong man i laik baim. Tasol ol bikpela samting tru yu mas tingim, em ol samting yu no inap lukim hariap—olsem ensin i save kirapim ka na em i ran, na ol narapela samting i bosim ran bilong ka.
2 Na i wankain tu long wok bilong God ol Kristen i mekim. Ol Witnes Bilong Jehova i save mekim planti wok tru bilong God. Long olgeta yia ol i save lusim wan bilion aua samting long autim gutnius bilong Kingdom. Na ol i mekim planti milion Baibel-stadi wantaim ol man, na planti handet tausen ol i save kisim baptais. Sapos yu wanpela man o meri bilong autim gutnius, orait yu tu yu insait long dispela gutpela wok i bin kamap—maski yu ting yu bin mekim liklik wok tasol. Na yu ken bilip tru olsem “God em i no . . . lusim tingting long ol gutpela wok yupela i bin mekim. Nogat.”—Hibru 6:10.
3 Tasol bilong skelim wok bilong yumi olgeta wantaim o bilong yumi wan wan, yumi no ken tingim ol dispela namba tasol. Olsem Jehova i bin tokim Samuel: “Ol man i save lukluk long bodi. Tasol mi save lukim tingting na laik bilong man na mi skelim ol.” (1 Samuel 16:7) Em nau, bel bilong yumi i bikpela samting long God, na skin bilong yumi, nogat. Tru, yumi mas mekim ol wok. Taim yumi mekim wok bilong God, dispela i save givim biknem long tok bilong Jehova, na ol man i lukim ol dispela wok na bihain ol i kamap disaipel. (Matyu 5:14-16; Taitus 2:10; 2 Pita 3:11) Tasol ol wok bilong yumi i no save kamapim tru bel bilong yumi. Bihain long taim Jisas i kirap bek pinis, i gat as na em i tingting planti long kongrigesen bilong Efesus, maski ol i bin mekim gutpela wok. Em i tokim ol: “Mi save pinis long olgeta pasin yu save mekim . . . Tasol mi gat tok long yu olsem, taim yu bilip nupela, yu bin laikim mi tru, tasol nau nogat.”—KTH 2:1-4.
4 Em nau, yumi mas was gut long yumi yet. Sapos yumi bin mekim wok bilong God inap sampela yia pinis, nogut bel bilong yumi i no kirapim yumi moa—yumi mekim, long wanem, yumi save em i wanpela wok yumi mas mekim. Wanpela meri Kristen i tok: “Mi save go autim tok, go long ol miting, stadi, beten, tasol bel bilong mi i no kirapim mi long mekim—i olsem mi mekim nating tasol.” Tru, sampela taim ol wokman bilong God i kisim hevi, o ol i “stap bel hevi” samting, na ol i mas subim skin bilong ol long mekim wok bilong God, tasol yumi ken tok, ol i mekim gutpela wok. (2 Korin 4:9; 7:6) Tasol sapos yumi mekim nating wok Kristen bilong yumi na bel i no kirapim yumi long mekim, orait yumi mas skelim bel bilong yumi—i olsem yumi mas lukluk insait long ensin bilong ka na glasim gut. Maski ka i gutpela tru, sampela taim yumi mas stretim ol samting bilong en. Na i olsem tu long olgeta Kristen—oltaim ol i mas skelim bel bilong ol. (2 Korin 13:5) Ol narapela inap lukim ol wok bilong yumi, tasol ol i no inap save, wanem samting i kirapim yumi long mekim. Olsem na yumi olgeta wan wan i mas tingim gut dispela askim: ‘Wanem samting i save kirapim mi long mekim wok bilong God?’
Ol Samting i Save Pasim Yumi
5 Wanpela man i bin askim Jisas, wanem lo i namba wan. Orait, Jisas i kolim wanpela lo i toktok long ol samting bilong bel—i no bilong skin. Em i tok: “Yupela i mas laikim God . . . long bel bilong yupela na long spirit bilong yupela na long tingting bilong yupela na long strong bilong yupela.” (Mak 12:28-30) Em nau, Jisas i kamapim klia wanem samting i mas kirapim yumi long mekim wok bilong God—yumi mas laikim tru God.
6 Yumi olgeta inap kisim dispela nambawan bikpela pasin bilong laikim tru God, tasol Satan i laik pasim rot bilong yumi long kisim dispela pasin. Wanpela rot bilong em long mekim, em i laik bagarapim sindaun bilong famili, long wanem, insait long famili yet yumi save lain long pasin bilong laikim tru ol narapela. Satan i save pinis long tok bilong Baibel i tok, samting yumi bin lainim long taim yumi liklik yet, em inap helpim yumi taim yumi bikpela pinis. (Sindaun 22:6) Taim yumi liklik yet Satan i laik paulim tingting bilong yumi long pasin bilong laikim tru ol narapela. Satan em i “god bilong dispela graun,” olsem na em i amamas tru taim em i lukim ol pikinini i go bikpela insait long famili i no gat pasin sori na narapela i no save laikim narapela—ol i save kros pait na narapela i belhat na tok nogut long narapela.—2 Korin 4:4; Efesus 4:31, 32; 6:4; Kolosi 3:21.
7 Buk Rot Bilong Kamapim Amamas Insait Long Famili i tok, taim papa i mekim gut wok papa bilong em, dispela inap helpim gut ol pikinini, na “taim ol i bikpela pinis bai ol i harim gut tok bilong ol man i gat wok long bosim ol na tok bilong God tu.”a Wanpela man Kristen, em papa bilong em i hatpela man tru, em i tok: “Mi no hatwok long bihainim tok bilong Jehova, tasol mi hatwok long laikim em tru.” Tru, yumi mas bihainim tok bilong Jehova, long wanem, “pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol.” (1 Samuel 15:22) Tasol wanem samting inap helpim yumi long kisim pasin bilong laikim tru Jehova na dispela i kirapim yumi long lotuim em?
Sori Bilong Krais i Kirapim Yumi
8 Bikpela samting tru, em yumi mas pilim tru dispela ofa Jisas i bin mekim bilong baim bek yumi. “God i gat wanpela Pikinini tasol, na em i salim dispela Pikinini i kam long graun, bai yumi kisim laip long em. Long dispela pasin God i soim yumi olsem em i laikim yumi tru.” (1 Jon 4:9) Taim yumi pilim tru dispela bikpela pasin sori Jehova i bin mekim long yumi, dispela i save kirapim yumi long laikim em tru. “Yumi save laikim ol arapela, long wanem, God i bin laikim yumi pastaim.”—1 Jon 4:19.
9 Jisas i orait long mekim wok God i givim long em bilong kisim bek ol man. “Jisas i lusim laip bilong em yet na i dai bilong helpim yumi, na dispela pasin bilong en i soim yumi pinis long pasin bilong laikim tru ol arapela.” (1 Jon 3:16; Jon 15:13) Pasin bilong Jisas long laikim tru yumi na em i dai bilong helpim yumi, dispela i mas kirapim yumi long pilim tru na tenkyu tru long em. Yumi ken tok piksa olsem: Sapos yu laik bagarap long solwara na wanpela man i kisim bek yu, bai yu go bek long haus na senisim klos na nau yu lusim tingting long en? Nogat, a? Bai yu tenkyu tru long dispela man na yu pilim olsem yu gat dinau long em, long wanem, em i bin helpim yu na yu no bagarap. Orait, yumi gat bikpela dinau moa yet long God Jehova na Krais Jisas, a? Sapos Jisas i no bin mekim ofa bilong baim bek yumi, orait sin na dai bai bagarapim yumi. Tasol dispela bikpela pasin sori tupela i bin mekim long yumi i opim rot na yumi inap kisim laip i stap oltaim long Paradais long graun.—Rom 5:12, 18; 1 Pita 2:24.
10 Tingim gut dispela ofa. Tingting olsem Jisas i bin mekim bilong helpim yu yet. Pol i gat dispela tingting. Em i tok: “Mi bilip long Pikinini Bilong God em i bin laikim mi tru na em i lusim laip bilong em yet bilong helpim mi.” (Galesia 2:20) Sapos yu tingim gut olsem, orait dispela bai kirapim yu long laikim tumas Jehova na Krais Jisas, long wanem, Pol i bin tokim ol Korin: “Krais i bin givim bel bilong en long mipela, na dispela i save kirapim mipela long wok, long wanem, mipela i save pinis olsem, wanpela man i bin kisim ples bilong yumi olgeta na i dai . . . bilong helpim yumi ol man i stap laip, bai yumi no ken tingting moa long yumi yet na wokabaut.” (2 Korin 5:14, 15) Taim yumi tingim Krais i save laikim tru yumi, dispela i kirapim tru bel bilong yumi. Bel bilong yumi i save pilim tru na i kirapim yumi long mekim wok. Baibel bilong J. B. Phillips i kolim olsem, “Pasin bilong Krais long laikim tru yumi, dispela yet i save kirapim yumi long mekim wok.” Sapos narapela samting i kirapim yumi long mekim wok bilong God, yumi no inap kamapim gutpela kaikai bilong i stap oltaim. Pasin ol Farisi i bin mekim i kamapim klia tru dispela samting.
“Lukaut Long Yis Bilong Ol Farisi”
11 Ol Farisi i mekim na wok bilong ol man long lotuim God i olsem i no gat as bilong en. Ol Farisi i no tokim ol man long ol i mas laikim tru God. Ol i save tok, bilong save olsem man i strong long ol samting bilong spirit, yumi mas lukim wok bilong em. Ol Farisi i strong long bihainim ol liklik liklik lo, na dispela i mekim na long skin ol i olsem stretpela man, tasol long bel bilong ol, “ol bun bilong ol man i dai pinis na olgeta samting i doti i pulap i stap.”—Matyu 23:27.
12 Wanpela taim Jisas i sori tru long wanpela man em han bilong em i drai pinis. Yumi save, dispela i bin givim bikpela hevi long em. Olsem na ating em i amamas nogut tru taim Jisas i oraitim em wantu tasol! Tasol ol Farisi i no amamas. Ol i wok long painim rong bilong dispela samting na ol i skelim ol liklik liklik samting bilong lo na ol i tok, Jisas i bin helpim wanpela man long Sabat. Ol Farisi i laik kamapim insait bilong ol tok bilong Lo i stret long tingting bilong ol yet, tasol as tru bilong Lo ol i no pilim liklik. Jisas “i lukim bel bilong ol i pas, na em i bel hevi long dispela.” (Mak 3:1-5) Na em i toksave long ol disaipel olsem: “Yupela lukaut long yis bilong ol Farisi na ol Sadyusi.” (Matyu 16:6) Bilong helpim yumi, Baibel i kamapim long ples klia pasin na tingting bilong ol.
13 Pasin bilong ol Farisi i lainim yumi olsem: Yumi mas i gat stretpela tingting long wok bilong God yumi mekim. Tru yumi mas mekim wok, long wanem, “sapos man i bilip nating na bilip bilong en i no kamapim gutpela pasin [olsem wok] tu, orait bilip bilong dispela man i olsem em i dai pinis.” (Jems 2:26) Tasol yumi ol man bilong graun i save skelim ol man long ol samting ol i save mekim, na yumi no skelim bel bilong ol. Na ating yumi save skelim yumi yet olsem; yumi tingting tasol long ol wok bilong yumi na yumi strong long mekim i kamap gutpela tru—i olsem ol wok tasol bilong yumi i makim olsem yumi stap strong long spirit. Ating yumi lusim tingting olsem yumi mas skelim bel bilong yumi—wanem samting i save kirapim yumi long mekim wok bilong God. (Skelim wantaim 2 Korin 5:12.) Sapos yumi strong tumas long bihainim lo long olgeta liklik liklik samting na yumi kalapim ol gutpela tingting lo i laik givim long yumi, orait yumi olsem man i “lukim liklik binatang tru i stap long sup bilong en, na em i wok long rausim. Tasol em i no lukim kamel i stap long sup, na em i dring na daunim olgeta.”—Matyu 23:24.
14 Ol Farisi i no save long wanpela bikpela samting olsem: Sapos man i laikim tru Jehova, em bai kirap mekim ol wok na pasin bilong God. Pasin bilong spirit i save kirap long bel bilong man na i kam ausait. Jisas i tokaut strong long rong bilong ol Farisi, em ol i gat tingting kranki tru long dispela samting. Em i tok: “Yupela saveman bilong lo na yupela Farisi, yupela lukaut. Yupela i man bilong tupela maus. Yupela i save klinim gut ausait bilong ol kap na plet, tasol ol kaikai samting yupela i save pulapim insait bilong ol, em yupela i save kisim long pasin bilong stil na pasin bilong tingting tasol long yupela yet. Yu Farisi, yu aipas. Pastaim yu mas klinim insait bilong kap, na bai ausait bilong en tu inap kamap klin.”—Matyu 23:25, 26.
15 Ausait bilong kap o plet o haus tu i no save kamapim klia olgeta samting i stap insait long en. Ol disaipel bilong Jisas i kirap nogut long bikpela haus lotu bilong Jerusalem, em i naispela tru. Tasol Jisas i kolim dispela haus olsem “ples hait bilong ol stilman,” long wanem, em i tingim ol samting i kamap insait long en. (Mak 11:17; 13:1) Na i wankain tu long planti milion manmeri ol i tok ol i Kristen—ol samting i bin kamap bipo na i kam inap nau i kamapim klia dispela samting. Jisas i tok, long de bilong bikpela kot, sampela man i bin “wokim planti mirakel” long nem bilong em, em bai tokaut olsem ol i “man bilong mekim pasin nogut.” (Matyu 7:22, 23) Tasol Jisas i no tok olsem long wanpela meri, man bilong em i dai pinis, em i putim liklik mani tru long bokis mani long haus lotu. Jisas i tok: “Dispela rabismeri, man bilong en i dai pinis, em i givim bikpela mani moa, i winim olgeta mani ol arapela manmeri i bin putim . . . Em i sot tru, na em i tromoi olgeta mani bilong en. Em i no gat mani moa i stap bilong baim kaikai.” (Mak 12:41-44) Olsem wanem? Ating kot bilong Jisas long ol Farisi na dispela meri i no stret? Nogat. Taim em i tok olsem, em i kamapim tingting bilong Jehova yet. (Jon 8:16) Jisas i save wanem samting i kirapim ol long mekim ol wok bilong ol, na em i skelim ol long dispela.
“Pasin na Strong Bilong Ol Wokboi Wan Wan”
16 Sapos bel bilong yumi i stret, yumi no gat wok long skelim skelim ol wok bilong yumi yet wantaim wok bilong ol narapela Kristen. Sapos yumi strong long kisim wankain aua long autim tok olsem narapela Kristen i kisim, o yumi strong long ol wok bilong yumi i mas kamap gutpela tru wankain olsem bilong em, dispela i no inap helpim yumi. Jisas i tok, yu mas laikim tru Jehova long bel olgeta na tingting olgeta na strong olgeta bilong yu—i no bilong narapela Kristen. Strong na save na sindaun bilong yumi i narapela narapela kain. Sapos yu laikim tru Jehova, dispela bai kirapim yu long lusim bikpela hap taim long autim tok—na ating mekim wok painia tu—sapos yu gat rot long mekim. Tasol sapos yu gat wanpela sik, ating yu no inap mekim bikpela wok tumas, maski yu gat laik long mekim. Tasol yu no ken bel hevi long dispela. Bilong i stap gut long God, i no olsem yu mas kisim planti aua tru long autim tok. Sapos yu laikim tru Jehova na dispela i kirapim yu long mekim wok bilong em, yu ken amamas. Pol i tok: “Olgeta man i mas skelim wok bilong ol yet, em i gutpela o nogat. . . . Em i no mas skelim pasin bilong en wantaim pasin bilong narapela man.”—Galesia 6:4.
17 Tingim tok piksa bilong Jisas long ol wokboi i kisim mani, olsem yumi lukim long Matyu 25:14-30. Wanpela man i laik i go long wanpela longwe ples na em i singautim ol wokboi bilong em i kam, na em i putim ol samting bilong em long han bilong ol na bai ol i ken lukautim. “Em i tingim pasin na strong bilong ol wokboi wan wan, na em i tilim mani long ol. Long narapela em i givim 5,000 kina na long narapela em i givim 2,000 kina na long narapela em i givim 1,000 kina.” Orait, bihain bikman bilong ol i kam bek na em i laik stretim tok wantaim ol long dispela mani em i bin givim long ol. Orait, ol i bin mekim wanem long mani ol i kisim? Wokboi i bin kisim 5,000 kina em i winim 5,000 kina moa. Na wokboi i bin kisim 2,000 kina em i winim 2,000 kina moa. Tasol wokboi i bin kisim 1,000 kina em i haitim insait long graun na em i no mekim wanpela wok long en bilong kamapim sampela winmani bilong bikman bilong em. Orait, bikman i ting olsem wanem long ol wokboi?
18 Yumi ken tingim ol wokboi i bin kisim 5,000 kina na 2,000 kina. Bikpela i tokim tupela: “Yu gutpela wokboi. Yu bin mekim gutpela wok tumas. Yu save lukautim gut wok bilong yu.” Tasol yu ting Jisas inap tok olsem sapos dispela wokboi i bin kisim 5,000 kina em i kisim 2,000 kina moa tasol? Nogat, a? Dispela wokboi i bin kisim 2,000 kina, bikman i no tokim em: ‘Bilong wanem yu no kisim 5,000 kina moa? Wanwok bilong yu i bin kamapim bikpela winmani moa bilong mi!’ Bikman i no tok olsem. Em i gat pasin sori na i makim Jisas, na em i no skelim wok bilong narapela wantaim wok bilong narapela. Em i “tingim pasin na strong bilong ol wokboi wan wan” na em i tilim mani long ol. Na em i laik bai ol wan wan wokboi i bekim inap long skel bilong ol yet. Em i givim gutpela tok long tupela wantaim, long wanem, tupela wantaim i bin givim bel tru long mekim wok bilong em. Yumi olgeta inap kisim sampela save long dispela.
19 Bikman i no givim gutpela tok long namba 3 wokboi. Em i rausim em i go ausait long ples tudak. Em i bin kisim 1,000 kina tasol, na bikman i no ting em i mas kisim bikpela winmani moa olsem wokboi i bin kisim 5,000 kina. Tasol em i les na i no laik mekim wanpela wok. Bikman i givim strafe long em, long wanem, em i “wokboi nogut” na “lesman,” na dispela i kamapim bel bilong em, em i no laikim bikman bilong em.
20 Jehova i laik bai yumi olgeta wan wan i laikim em tru long strong olgeta bilong yumi, tasol “em i save . . . yumi i olsem das tasol.” Dispela i strongim bel bilong yumi, a? (Song 103:14) Sindaun 21:2 i tok, Jehova “i save skelim pasin [olsem bel] bilong yumi”—em i no skelim hamas aua samting yumi kisim long wok bilong em. Em i save, i gat sampela samting i pasim yumi—olsem mani i sot, o yumi gat sik, o yumi stap bel hevi samting. (Aisaia 63:9) Tasol samting yumi holim, olsem hap taim o mani o liklik strong samting, Jehova i laik bai yumi mekim wok long en inap tru long skel bilong yumi. Jehova em i gutpela olgeta, tasol em i save, yumi ol man i lotuim em, yumi no gutpela tumas, na em i no ting ol wokman bilong em i mas mekim wok i nambawan olgeta. Em i isi long yumi na em i no putim mak i antap tumas na yumi no inap winim.
21 Yumi mas laikim tru Jehova long bel na tingting na strong olgeta bilong yumi, na “dispela pasin em i winim . . . olgeta kain ofa.” (Mak 12:33) Sapos yumi laikim tru Jehova, orait dispela bai kirapim yumi long mekim wok bilong em inap tru long strong bilong yumi. Pita i tok, sapos ol gutpela pasin bilong God—na pasin bilong laikim tru God—i pulap long yumi, orait dispela save bilong yumi long Krais Jisas, Bikpela bilong yumi, “bai i no inap i stap nating. Nogat. Em bai i karim planti kaikai.”—2 Pita 1:8.
[Ol Futnot]
a Sosaiti Wastaua bilong Nu Yok i wokim.
Stori Gen
◻ Wanem samting i mas kirapim yumi long mekim wok bilong God?
◻ Krais i laikim tru yumi na olsem wanem dispela i kirapim yumi long mekim wok bilong Jehova?
◻ Yumi mas abrusim wanem pasin bilong ol Farisi?
◻ Bilong wanem i no gutpela long skelim skelim wok bilong yumi yet wantaim wok bilong narapela Kristen?
[Askim Bilong Stadi]
1, 2. Wanem ol bikpela samting i kamap long wok bilong autim tok na yumi amamas tru long en?
3. Tru, wok bilong autim tok i bikpela samting, tasol ol Kristen i mas tingim wanem narapela samting tu i bikpela samting? Bilong wanem ol i mas tingim dispela samting tu?
4. (a) Wanem samting inap mekim na yumi tingim wok bilong God em wanpela wok yumi mas mekim tasol? (b) Bilong wanem yumi mas skelim bel bilong yumi long dispela samting?
5. Jisas i tok, wanem lo i namba wan?
6, 7. (a) Satan i laik pasim wanem rot bilong yumi na em i laik bagarapim sindaun bilong famili? Bilong wanem em i mekim olsem? (2 Korin 2:11) (b) Pasin yumi go bikpela insait long en, em inap mekim wanem long tingting bilong yumi long bihainim tok bilong God?
8, 9. Taim yumi tingim ofa Jisas i bin mekim, dispela i mas kirapim yumi olsem wanem long laikim tru Jehova?
10. (a) Olsem wanem yumi ken tingim dispela ofa olsem samting bilong helpim yumi yet? (b) Taim yumi tingim Krais i save laikim tru yumi, olsem wanem dispela i save kirapim yumi?
11. Stori long tingting bilong ol Farisi long wok bilong lotu.
12. Taim Jisas i oraitim han bilong wanpela man, olsem wanem ol Farisi i kamapim klia olsem bel bilong ol i strong pinis?
13. Pasin bilong ol Farisi i lainim yumi long wanem samting?
14. Olsem wanem ol Farisi i kain olsem wanpela kap o plet i no klin?
15. Stori long sampela samting i soim yumi olsem Jisas i no save lukim skin tasol bilong ol samting.
16. Bilong wanem yumi no ken skelim skelim wok bilong yumi wantaim wok bilong narapela Kristen?
17. Long tok bilong yu yet, mekim liklik stori long tok piksa bilong ol wokboi i kisim mani.
18, 19. (a) Bilong wanem bikman i no skelim dispela wokboi i bin kisim 2,000 kina wantaim wokboi i bin kisim 5,000 kina? (b) Dispela tok piksa em inap skulim yumi olsem wanem long pasin bilong givim gutpela tok long man na pasin bilong skelim man wantaim narapela man? (c) Bilong wanem namba 3 wokboi i kisim strafe?
20. I gat sampela samting yumi no inap mekim, na Jehova i ting olsem wanem long dispela?
21. Sapos yumi laikim tru God na dispela i kirapim yumi long mekim wok bilong em, wanem gutpela samting bai kamap long en?
[Ol Piksa long pes 16]
Save na strong na sindaun bilong yumi wan wan i no wankain