Bilip Long Jehova—Em God i Stap Tru
Olsem wanem? Yu bin lukluk i go antap long nait na lukim planti handet sta i stap? Yu ting ol i bin kamap olsem wanem?
TAIM King Devit bilong Israel i lukim ol sta, i olsem ol sta i tokaut long em na i kirapim em long tok olsem: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em.” (Song 19:1) Yes, Man bilong wokim olgeta samting em tasol em inap tru long yumi ‘ken amamas long em na litimapim nem bilong em na stap aninit long strong bilong em.’—KTH 4:11; Rom 1:25.
Baibel i tok: “God i bin wokim olgeta samting.” (Hibru 3:4) Tru tumas, trupela God, ‘nem bilong em Jehova, em i God Antap Tru na i bosim olgeta hap bilong graun.’ (Song 83:18, NW ) Em i wanpela man i stap tru—em i no olsem samting yumi lukim nating long tingting tasol, nogat. Jisas Krais i mekim tok long papa bilong em long heven, em Jehova, olsem: “Pasin bilong en i tru.”—Jon 7:28.
Jehova—Em Man Bilong Kamapim Tru Ol Laik Bilong Em
Nem tru tru bilong God, Jehova, i stap inap olsem 7,000 taim long Ol Skripsa Hibru. Dispela nem yet i makim olsem em i wanpela man i stap tru. Insait tru bilong dispela nem bilong God i olsem, “Em i Mekim i Kamap.” Olsem na God Jehova i toktok long em yet olsem Man bilong mekim ol samting i kamap olsem em i makim pinis. Taim Moses i askim God long kamapim nem bilong em, Jehova i kamapim sampela insait moa bilong dispela nem, olsem: “Mi bai kamap wanem wanem kain mi laikim.” (Kisim Bek 3:14, NW ) Jehova inap kamap wanem wanem kain em i laikim na bai em i ken kamapim tru tru ol laik bilong em na truim ol tok promis bilong em. Olsem na sampela nem em i holim i olsem: Man bilong wokim yumi, Papa, Bikpela King, Wasman, Jehova bilong ol bikpela lain ami, Man bilong harim beten, Jas, Nambawan Tisa, Man bilong baim bek yumi.—Hetman 11:27, NW; Song 23:1; 65:2; 73:28, NW; Song 89:26; Aisaia 8:13, NW; Aisaia 30:20; Aisaia 40:28; Aisaia 41:14.
Trupela God tasol inap tru long holim dispela nem Jehova, long wanem, ol man bilong graun ol i no save bai ol samting i kamap olsem ol i laikim o nogat. (Jems 4:13, 14) Jehova wanpela tasol inap tok: “Ren i save pundaun long skai, em i no save go bek nating antap long skai. Nogat. Em i save givim wara long graun na mekim ol kaikai i kamap long gaden, na ol man i save kisim. . . . Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”—Aisaia 55:10, 11.
Jehova i save mekim laik bilong em i kamap tru, olsem na samting ol man bilong graun i ting i no samting tru tru, long tingting bilong Jehova em samting tru tru. Bihain tru long taim Abraham na Aisak na Jekop i dai pinis, Jisas i toktok long ol na i tok: “Em [Jehova] i God bilong ol man i stap laip. Long ai bilong em, olgeta manmeri i stap laip.” (Luk 20:37, 38) Tru, dispela 3-pela gutpela wokman ol i dai pinis, tasol laik bilong God long kirapim ol bek bai kamap tru, olsem na long tingting bilong God i olsem ol i stap laip pinis. I no hatwok long Jehova long givim laip gen long ol, olsem em i no bin hatwok long kisim graun na wokim namba wan man.—Stat 2:7.
Aposel Pol i kamapim narapela samting i soim olsem samting God i tingting pinis long mekim, em bai mekim i kamap tru. Baibel i tok Abraham i “tumbuna bilong planti lain manmeri.” (Rom 4:16, 17) Taim Abram i no gat pikinini yet, Jehova i senisim nem bilong em na kolim em Abraham, olsem “Papa Bilong Planti Lain Manmeri.” Samting dispela nem i makim, Jehova i mekim i kamap tru long rot bilong wanpela mirakel—em i kirapim bek strong bilong lapun Abraham na lapun meri bilong em, Sara, long kamapim pikinini.—Hibru 11:11, 12.
Jisas Krais i gat bikpela strong na namba, na em i toktok long ol samting tru tru bai kamap, em ol samting i winim tru tingting bilong ol man bilong graun. Gutpela pren bilong em Lasarus i dai pinis, tasol Jisas i tokim ol disaipel: “Pren bilong yumi Lasarus i slip. Tasol mi bai go na kirapim em.” (Jon 11:11) I gat wanem as na Jisas i tok dispela man i dai pinis em i slip tasol?
Taim Jisas i kamap pinis long as ples bilong Lasarus, em Betani, em i go long matmat bilong Lasarus na i tokim ol man long rausim bikpela ston i pasim ai bilong en. Jisas i beten long maus na bihain em i tok: “Lasarus, yu kam ausait.” Ol man i lukluk i go long matmat, na nau “Lasarus i kirap bek na i kam ausait. Lek na han na pes bilong en ol i bin karamapim long laplap.” Orait nau Jisas i tok: “Lusim laplap na larim em i wokabaut.” (Jon 11:43, 44) Jisas i kirapim bek Lasarus—em i bekim laip long wanpela man i bin stap long matmat inap 4-pela de! Krais i no giaman taim em i tok pren bilong em i slip. Long tingting bilong Jehova na Jisas, maski Lasarus i dai pinis, i olsem em i slip tasol. Yes, Jisas na Papa bilong em long heven ol i save tingim ol samting bai kamap tru tru.
Samting Yumi Wetim, Jehova Inap Mekim i Kamap Tru
Trupela God i stap narapela kain tru long ol god giaman! Ol man i lotuim ol imis ol i tok ol imis inap long mekim ol strongpela wok, tasol dispela tok i kranki tru. Maski man i bilip strong long ol imis, dispela i no inap givim strong long ol long wokim ol mirakel. Tasol God Jehova inap tok long ol wokman bilong em i dai pinis olsem ol i stap laip, long wanem, em inap bekim laip long ol. Jehova em i “God tru,” na em i no save giamanim lain bilong em.—Jeremaia 10:10.
Yumi save, long taim Jehova i makim, ol man i dai pinis na em i tingim yet ol, em bai kirapim bek ol, olsem givim laip gen long ol, na dispela save i mekim gut bel bilong yumi! (Aposel 24:15) Taim God i kirapim bek man i dai pinis, God bai bekim bek olgeta tingting na pasin samting bilong dispela man. Tasol dispela i no hatwok long Man bilong wokim olgeta samting, long wanem, em i gat gutpela tingting na save i bikpela moa yet na em i gat olgeta strong. (Jop 12:13; Aisaia 40:26) Na Jehova i gat bikpela pasin sori moa yet. Olsem na em bai mekim wok long strong bilong em long tingim bek olgeta samting, na kirapim bek ol man i dai pinis na bai ol i ken stap long Paradais long graun na holim yet wankain pasin na tingting olsem ol i bin holim taim ol i no dai yet.—1 Jon 4:8.
Pinis bilong dispela graun Satan i bosim em i kam klostu, na ol man i bilip long trupela God ol i wetim gutpela samting tru i kamap. (Sindaun 2:21, 22; Daniel 2:44; 1 Jon 5:19) Man bilong raitim song i tok: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:10, 11) Pasin nogut bai pinis. Stretpela pasin tasol bai stap, na bai i no gat hevi moa long mani. (Song 37:6; 72:12, 13; Aisaia 65:21-23) Pasin bilong daunim ol man i no gat nem na ol man bilong narapela skin na lain, dispela pasin i no ken i stap moa. (Aposel 10:34, 35) Ol pait na ol samting bilong pait bai pinis. (Song 46:9) Long dispela taim “bai i no gat wanpela man i tok: ‘Mi gat sik.’ ” (Aisaia 33:24, NW ) Skin bilong olgeta man bai i gutpela olgeta na i no gat sik. (KTH 21:3, 4) Klostu nau Paradais bai kamap tru long graun. Dispela em laik bilong Jehova!
Tru tumas, olgeta samting yumi bilip na wet long en olsem Baibel i makim, klostu nau ol bai kamap tru. Ol samting ol man bilong dispela graun ol i lotuim, yumi no ken larim ol dispela samting i giamanim yumi, nogat; yumi mas bilip tru long Jehova. Em i laik “kisim bek olgeta [kain] manmeri, bai ol i ken save long as bilong tok tru.” (1 Timoti 2:3, 4) Olsem na nogut yumi givim taim na mani long ol pasin bilong dispela graun wantaim ol god bilong en, em ol i no samting tru tru na ol inap giamanim yumi. Yumi mas wok long kisim sampela save moa long dispela God i stap tru tru na bilip strong long em.—Sindaun 3:1-6; Jon 17:3.
[Piksa long pes 6]
Long tingting bilong Jehova na Jisas, i olsem Lasarus i slip tasol
[Ol Piksa long pes 7]
Klostu nau Paradais bai kamap tru tru long graun