Redi Nau Bilong Wan Tausen Yia Long Bihain
“Ol bai i stap king wantaim Krais long dispela 1,000 yia.”—KAMAPIM TOK HAIT 20:6.
1. Winim 1,000 yia bihain long taim bilong yumi, bai graun na ol manmeri long graun i stap olsem wanem?
OLSEM WANEM? Inap 1,000 yia bihain bai ol manmeri i stap yet long graun? Tru tumas! Na long dispela taim bihain bai olgeta manmeri i stap gutpela olgeta long skin na long bel na long tingting—wankain olsem namba wan man na meri bilong graun. Yes, 1,000 yia bihain bai ol manmeri i kamap olsem God bilong ol, em Man bilong helpim ol long kamap gutpela olgeta. (Stat 1:26-30) Bai ol i stap amamas long graun i kamap gutpela ples Paradais, kain olsem “dispela gaden long Iden,” na bai i no gat wanpela samting nogut i stap long dispela ples na ol manmeri i no pas pas tumas long en. (Stat 2:15) Dispela olgeta samting i laik kamap em bilong inapim laik bilong God long pastaim—em i laik bai dispela graun na olgeta manmeri i stap gutpela olsem. Dispela gutpela samting God i laik kamapim bai litimapim nem bilong em, em i man bilong truim tok promis bilong em long givim blesing long olgeta manmeri maski i gat planti samting i laik pasim rot.
2. Winim 1,900 yia bipo, olsem wanem ol man inap save long kain skin samting bilong ol manmeri ol i kamap gutpela olgeta long nupela taim bihain?
2 Taim God i bosim graun inap 1,000 yia long rot bilong Pikinini bilong em i gat biknem pinis long heven, bai God i kamapim ol dispela gutpela samting. Winim 1,900 yia bipo Pikinini bilong God i bin lusim heven na em i kamap man bilong graun i gutpela olgeta; em i stap inap 33 na hap yia long graun. Long dispela taim em i wanem kain? Baibel i tok: “Em i bin kamap man, na em i kam i stap namel long mipela. Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em.” (Jon 1:14) Olsem na taim ol manmeri bilong Israel i lukim Jisas, ol inap save, man i gutpela olgeta em i wanem kain. (Luk 3:23, 38) Tru tumas, winim 1,900 yia bipo sampela manmeri inap save long kain skin samting bilong ol manmeri ol i kamap gutpela olgeta long Paradais long graun long bihain.
3, 4. (a) Inap hamas yia tru bai Jehova i mekim wok long rot bilong Krais Jisas na ol 144,000 wanwok bilong em? (b) Taim bilong Krais i mekim wok King ol i kolim olsem wanem? Kolim nem bilong sampela buk bilong Sosaiti Was Taua i gat dispela tok long en.
3 Baibel i tok profet olsem Krais Jisas na ol 144,000 disaipel bilong em bai ol i stap king inap 1,000 yia long Kingdom bilong Jehova. Lapun aposel Jon i stori long dispela ‘Taim Bilong 1,000 Yia na em i tok: “Na mi lukim ol sia olsem sia king i stap, na ol man i sindaun i stap long ol dispela sia. God i givim wok long ol bilong skelim pasin bilong ol manmeri long kot. Na mi lukim . . . planti manmeri i bin bilip long Jisas na autim nem bilong en na ol i bin holim strong tok bilong God, na long dispela as tasol ol birua i bin katim nek bilong ol na kilim ol i dai. Na mi lukim . . . ol manmeri i no bin lotu long wel animal na long piksa bilong en, na ol i no bin kisim mak bilong en long pes na long han bilong ol. Ol dispela manmeri ol i kisim laip, na ol i stap king wantaim Krais inap long 1,000 yia. Ol arapela manmeri i dai pinis, ol i no kisim laip long dispela taim. Ol i mas wetim dispela 1,000 yia i pinis pastaim. Dispela em i namba wan taim ol manmeri i kirap bek long matmat. Ol manmeri i kirap bek long dispela namba wan taim, God i makim ol bilong em yet na ol i ken amamas. Namba 2 dai em i no gat strong bilong daunim ol dispela lain. Nogat. Ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.”—Kamapim Tok Hait 20:4-6.
4 Dispela taim bilong Krais i stap King em inap olsem 1,000 yia na ol i kolim olsem ‘Taim Bilong 1,000 Yia.’ Olsem na ol manmeri i bilip long dispela tok bilong Baibel na ol i lainim ol man long en, sampela taim ol man i kolim ol olsem ‘ol manmeri bilong Taim Bilong 1,000 Yia.’ Bipo Sosaiti Was Taua i bin wokim sampela buk bilong lainim ol man long Baibel (Studies in the Scriptures) na pastaim ol i kolim olsem ‘Taim Bilong 1,000 Yia i Kirap’ (Millenial Dawn). Na bipo buk singsing bilong ol Witnes (Intenesenel Baibel Stiudens) i gat nem olsem ‘Ol Singsing Bilong Taim Bilong 1,000 Yia i Kirap’ (Hymns of the Millennial Dawn).
5. Taim Krais i bosim graun inap 1,000 yia, bai Satan na ol spirit nogut i stap olsem wanem?
5 Dispela tok “1,000 yia” long Kamapim Tok Hait 20:4 em i no tok piksa; em i makim ol yia tru, olsem 1,000 yia stret. Long dispela taim bilong 1,000 yia bai Satan na ol spirit nogut i stap kalabus long hul i no gat as. Aposel Jon i stori long dispela samting paslain long taim em i laik stori long dispela 1,000 yia bilong Jisas i mekim wok king. Jon i tok: “Mi lukim wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim, na bihain ol i mas lusim em, na long sotpela taim tasol em i ken i go nabaut.”—Kamapim Tok Hait 20:1-3.
6. (a) Sampela Katolik i ting 1,000 yia bilong Krais i mekim wok king i pinis long wanem yia? (b) Sapos tok bilong ol Katolik i stret, orait dispela “sotpela taim” bilong Satan i stap kalabus long hul i no gat as em inap hamas yia i kam inap long nau?
6 Sampela Katolik i tok, dispela 1,000 yia bilong Krais Jisas i stap king em i pinis long yia 1799 taim ol ami bilong Frans i daunim Rom na pop i no i stap bos moa long Rom. Ol i bin rausim pop i go kalabus long Frans, na taim em i stap yet long Frans, em i bin i dai. Ol pris Katolik i tok, long dispela taim Satan na ol spirit nogut i bin lusim “hul i no gat as” na inap “sotpela taim” ol i kirap gen long mekim wok bilong ol long giamanim ol man. Em, sampela pris i tok olsem. (Kamapim Tok Hait 20:1-3) Tasol sapos tok bilong ol i stret, orait dispela “sotpela taim” em planti yia, inap olsem 190 yia i kam inap long nau na i no pinis yet.
7. Wanem taim bai Krais i kirap mekim wok king inap 1,000 yia, olsem Baibel i makim? Na wanem ol samting bai kamap long dispela taim, olsem Baibel i tok?
7 Tasol Baibel i makim olsem dispela Taim Bilong 1,000 Yia bilong Krais Jisas i mekim wok king em i no kirap yet; em bilong bihain. Ol samting i kamap long nau, olsem Baibel i bin tok profet long en, i makim olsem dispela taim i klostu pinis. Long dispela taim tru bilong 1,000 yia, Satan na ol spirit nogut bai kalabus tru, na Krais Jisas wantaim ol 144,000 wanwok bilong em bai ol i bosim olgeta manmeri long graun, na bai lain o oganaisesen bilong Satan i no inap pasim wok bilong ol liklik. Jehova i bin wokim kontrak wantaim “pren” bilong em, Abraham, na em i tok promis olsem: Long lain bilong Abraham bai olgeta manmeri inap kisim blesing. Truim bilong dispela tok promis bai painim ol manmeri bilong ‘bikpela lain’ pastaim, em ol bai abrusim bagarap long taim bilong bikpela hevi tru em bai kamap long pinis bilong dispela taim nogut bilong nau. Na bihain long en, truim bilong dispela tok promis bai painim ol planti milion manmeri i dai pinis, em “blut bilong Pikinini Sipsip,” em Krais Jisas, i bin baim bek ol. (Jems 2:21-23; Kamapim Tok Hait 7:1-17; Stat 12:3; 22:15-18; Matyu 24:21, 22) Bai ol i kirap bek long matmat na i stap laip long graun.—Jon 5:28, 29.
Wanpela Oganaisesen Kristen
8. Wanpela buk bilong Sosaiti Was Taua (The New Creation) i stori long wanem oganaisesen? Tasol dispela buk i no stori long wanem wok bilong dispela oganaisesen?
8 Planti handet yia paslain long taim ol dispela gutpela samting i mas kamap, God i wok long kamapim laik bilong em na em i bin kamapim wanpela nupela lain o oganaisesen. Baibel i stori long dispela lain o oganaisesen na i tok: “Sapos wanpela man i pas wantaim Krais, orait God i mekim em i kamap nupela man tru.” “Nau pasin bilong katim skin em i samting nating, na pasin bilong man i no katim skin, em tu i samting nating. God i mekim yumi i kamap ol nupela manmeri, na dispela tasol em i samting tru.” (2 Korin 5:17; Galesia 6:15) Bipo, long yia 1904, wanpela buk bilong Sosaiti Was Taua (The New Creation) i stori long dispela nupela oganaisesen em i bin kamap long taim bilong ol aposel. Ol man bilong raitim dispela buk ol i no klia long ol samting i mas kamap long pinis bilong taim bilong ol manmeri bilong ol arapela lain long yia 1914. Olsem na buk i no stori long bikpela wok dispela oganaisesen i mas mekim bihain long namba wan pait bilong olgeta hap, em dispela pait i bin bagarapim wok bilong ol.—Luk 21:24.
9. Lain remnan ol i kirap mekim wanem?
9 Liklik hap lain bilong dispela nupela oganaisesen God i bin kamapim ol i stap yet long graun, olsem lain remnan, na God i lukautim ol long taim bilong Namba Wan Pait, olsem na taim pait i pinis long yia 1918 ol i stap laip yet long graun, na ol i stap olsem i go long yia 1919 tu. Ol i kirap nogut long dispela samting i bin painim ol na ol i amamas. Tasol gutpela taim bilong 1,000 yia i no kirap yet. Olsem na ol i save, i gat sampela wok moa ol i mas mekim long graun pastaim, na bihain bai ol i kisim laip long heven na wok wantaim Krais Jisas long bosim graun long taim bilong 1,000 yia. Olsem na pastaim ol i mas stretim ol samting bambai ol i ken kisim bek strong na ol i ken redi gut long mekim dispela wok bilong ol. Ol i kirap na redi olsem, long wanem bilip bilong ol i stap strong na bel bilong ol i kirap tru long mekim dispela bikpela wok i stap yet.
10. I gat wanem ol askim long ol planti milion ol inap abrusim bagarap na i stap long nupela taim?
10 Liklik lain remnan ol i tingting olsem bai sampela manmeri i abrusim bagarap taim dispela pasin nogut bilong nau i pinis, na bai ol i stap long Taim Bilong 1,000 Yia bilong Krais Jisas i mekim wok king. Dispela tingting i kamap strong moa bihain long taim ol i harim wanpela pablik-tok i bin kamap long Los Enjeles, long Kalifonia, long yia 1918, nem bilong en: “Planti Milion Manmeri Nau Ol i Stap Laip, Ating Bai Ol i No Ken Dai.” Olsem wanem long ol dispela milion manmeri ol bai abrusim bagarap long Armagedon? Lain remnan i mas redim ol tu bilong mekim dispela wok? (Kamapim Tok Hait 16:14-16) Taim ol i no i go insait yet long Taim Bilong 1,000 Yia na kamap olsem hap bilong “nupela graun,” bai ol i wok wantaim lain remnan long autim tok bilong Kingdom o nogat? (2 Pita 3:13) Ol samting i bin kamap bihain long taim bilong namba wan bikpela pait i bekim ol dispela askim.
11. (a) Olsem wanem long ol arapela sipsip ol i bilong kamap wanpela lain sipsip tasol wantaim lain remnan? (b) Lain remnan i wet long kisim laip long heven na ol arapela sipsip i wet long kisim laip long graun, tasol olsem wanem dispela i no ken brukim ol i stap tupela lain?
11 Tok bilong Gutpela Wasman, em Krais Jisas, i kamap ples klia, em i bin tok: “Mi gat ol arapela sipsip tu, na ol i no bilong dispela banis. Mi mas bringim ol dispela sipsip tu i kam. Na bai ol i harim maus bilong mi. Na bai i gat wanpela lain sipsip tasol na wanpela wasman tasol bilong ol sipsip.” (Jon 10:16) Sapos lain remnan i mas stretim ol samting na redi gut bambai ol inap mekim ol wok bilong ol bihain long taim bilong pait, olsem kirap long yia 1919, na sapos ol arapela sipsip i mas kamap wanpela lain sipsip tasol wantaim lain remnan, orait ol dispela arapela sipsip i mas mekim wanem? Ol i mas redi long wok gut wantaim lain remnan! Tru, lain remnan ol i wet long kisim laip long heven na ol arapela sipsip i wet long kisim laip long paradais long graun, tasol ol i no ken bruk na i stap olsem tupela lain. Nogat. Olgeta i bihainim wanpela Wasman tasol na ol i mas i stap olsem wanpela lain sipsip tasol. Ol i mas bung wantaim na i stap wanpela lain tasol i go inap long taim ol laspela man bilong lain remnan i go antap long heven na kamap king pinis long Kingdom.
12. (a) Wanem wok i bikpela samting moa, winim wok bilong kisim bek ol man? (b) Wanem taim wok bilong autim tok bilong Kingdom i kamap nambawan bikpela samting? Bilong wanem dispela wok i nambawan bikpela samting long dispela taim?
12 Wok bilong kisim bek ol manmeri long sin na i dai, na pinisim ol lain bilong Satan ol i bosim graun, na helpim ol manmeri bilong bihainim tok bai ol i kamap gutpela na i stap long Paradais i kamap bek long graun—em sampela bikpela wok Jehova i laik mekim long pasin sori bilong em. Tasol i gat wanpela wok i bikpela samting moa long olgeta lain bilong heven na bilong graun. Em wanem wok? Em wok bilong stretim bek nem bilong God Jehova, em i King tru bilong heven na graun, na bilong mekim nem bilong Em i kamap holi. Em taim stret bilong autim tok bilong Kingdom bilong Jehova i stap long han bilong King Krais Jisas, na long yia 1922 namba 2 kibung bilong ol Witnes (Intenesenel Baibel Stiudens) long Sida Poin, Ohaio, long Amerika, i kamapim dispela samting long ples klia. Taim bilong ol manmeri bilong ol arapela lain i pinis long yia 1914, olsem na nau em i taim bilong mekim dispela wok Jisas i bin tok profet long en, olsem: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Dispela Kingdom i gat wok long stretim bek nem bilong Jehova na kamapim klia olsem em i King tru bilong heven na graun, na i gat wok long mekim holi nem bilong Jehova; dispela Kingdom i kamap pinis long heven long yia 1914, olsem na nau Krais Jisas i kirap pinis long mekim wok king namel long ol birua bilong em. Tok bilong ol dispela samting em nambawan gutpela tok yumi mas wok strong long autim—yumi mas wok strong long painim olgeta rot bilong mekim dispela wok na autim tok bilong dispela King na Kingdom bilong em!
13. God i mekim wanem bilong helpim wok autim tok bilong Kingdom? Bilong wanem em i mekim olsem?
13 Jehova em i Man bilong stretim na redim gut ol samting long heven na long graun, long wanem em i God Antap Tru na em i Nambawan Bikpela. Olsem na em i redim gut ol samting hia long graun bambai lain bilong em i ken autim tok bilong Kingdom bilong em long olgeta hap bilong graun, na bihain bai las de i kamap. Em i bungim gut hap lain remnan ol i stap yet long graun na ol i kamap wanpela oganaisesen bilong olgeta hap ol i gat wok long kamapim laik bilong em. Ol i mas tokim olgeta manmeri bilong graun olsem Satan i bin sutim tok long wok king bilong Jehova, olsem na Jehova i mas stretim bek nem bilong em bambai olgeta man i ken save, em i Bos tru bilong heven na bilong graun na i stret em i stap Nambawan Bos. Em bai stretim gut dispela tok Satan i bin sutim long em na inap long olgeta taim bihain bai i no gat tok moa long en.
Oganaisesen i Stap Taim 1,000 Yia i No Kirap Yet
14. (a) Paslain long taim bilong Krais, wanem lain i kamap olsem lain o oganaisesen bilong Jehova long graun? (b) Devit i mekim wanem na em i kamapim long ples klia olsem em i man bilong stretim gut ol wok?
14 Inap 15 handet yia paslain long taim bilong Krais, God Jehova i gat wanpela lain o oganaisesen bilong em hia long graun. Em i givim wok long Moses olsem namelman bilong stretim ol wok samting bilong lain Israel taim ol i lusim pinis Isip, em nambawan bikpela gavman bilong graun Baibel i stori long en. Ol Israel i stap aninit long Lo em Jehova i bin givim long ol long rot bilong Moses na ol i kamap lain bilong Jehova long graun. King Devit em i bilong dispela lain God i bin makim bilong em yet, na em i wanpela man bilong stretim gut ol wok. Baibel i tok: “I gat tripela lain famili bilong ol Livai. Ol i kamap long ol tripela pikinini man bilong Livai, em Gerson na Kohat na Merari. Na nau Devit i tilim ol Livai long dispela tripela lain, bilong ol i ken mekim wok bilong ol.” “Taim Devit i laik makim ol man long mekim wok Pris, em i no inap makim ol man long lain bilong Eleasar tasol, o long lain bilong Itamar tasol. Nogat. Em i mas makim ol man bilong tupela lain wantaim, long wanem, tupela lain i gat ol man inap long mekim wok bilong God, na i gat ol man inap long mekim wok long haus bilong Bikpela. Olsem na ol i bin pilai satu na makim ol man.”—1 Stori 23:3, 6; 24:1, 5.
15. (a) Taim ol Israel i lusim kantri Isip, ol i lusim long wanem kain pasin? (b) Husat tu ol i lusim Isip long laik bilong ol yet? Bihain tu ol i stap wantaim ol Israel o nogat?
15 Planti handet yia paslain long taim bilong Devit, olsem long taim ol Israel i bin lusim kantri Isip, ol i no longlong nabaut na ranawe i go. Nogat. Ol i wokabaut gut wantaim i go. Olsem na yumi save, Moses, em namelman bilong ol, em i man bilong stretim gut ol samting na em i bin bosim gut ol. Planti manmeri bilong ol arapela lain ol i bihainim lain Israel na lusim Isip wantaim ol, long wanem ol i lukim ol strongpela wok o mirakel God bilong ol Israel i bin mekim na ol i save em i gat bikpela strong, winim tru olgeta god bilong ol Isip. Planti hevi i kamap, tasol sampela yia bihain ol dispela “planti arapela lain manmeri,” em ol i belgut long dispela lain Jehova i bin makim, ol i stap yet wantaim ol long ples nating bilong Sainai. (Kisim Bek 12:37-51; Namba 11:4) Ol dispela planti arapela lain manmeri i bihainim senis bilong Moses, em Josua, na ol i bin go insait long Graun Bilong Promis wantaim ol Israel. Yumi inap save long dispela samting, long wanem God i bin putim lo na kolim ol samting ol Israel i mas mekim long ol man bilong narapela lain i stap wantaim ol.
16. (a) Ol dispela planti arapela lain manmeri i olsem piksa na ol i makim wanem lain? (b) Dispela lain i mas mekim wanem bambai ol inap abrusim bagarap taim pasin bilong dispela graun i pinis?
16 Dispela bikpela lain manmeri bilong ol arapela lain, em ol i bin lusim kantri Isip bilong bipo i gat king bilong en, ol i olsem piksa na ol i makim bikpela lain manmeri nau long taim bilong yumi. Ol i no ol Israel bilong spirit; ol i bilong arapela lain sipsip bilong Gutpela Wasman Krais Jisas. Ol yet wantaim lain remnan God i bin makim long spirit holi ol i wetim taim bilong lusim ‘kantri Isip’ bilong nau, olsem pasin bilong dispela graun, em Satan, olsem ‘king bilong Isip,’ i bosim na em i olsem god bilong en. (Jon 10:16; 2 Korin 4:4; Kamapim Tok Hait 7:9) Tasol ol dispela arapela sipsip i mas mekim wanem bambai ol inap abrusim bikpela bagarap i laik painim olpela pasin Satan i bosim, na bai ol inap bihainim Man I Winim Josua, em Krais Jisas, na i go insait long nupela taim God i tok promis long kamapim? (2 Pita 3:13) Ol i mas wok gut wantaim liklik hap lain God i bin makim long spirit holi, em lain remnan. Ol i mas bihainim ol tok dispela liklik lain i putim bilong stretim gut wok bilong oganaisesen bilong Jehova long graun.
17. Ol manmeri bilong dispela graun ol i longlong nabaut, tasol ol manmeri bilong bikpela lain ol i mekim wanem? Ol i wetim wanem samting?
17 Kirap long yia 1935 samting bikpela lain arapela sipsip ol i bin kam insait long dispela wanpela lain sipsip ol i stap aninit long wanpela Wasman tasol, em King Krais Jisas. Long nau ol manmeri bilong dispela graun i longlong nabaut moa yet, maski i gat dispela lain ol i kolim Yunaitet Nesen bilong stretim ol samting bilong ol. Ol manmeri bilong bikpela lain arapela sipsip ol i stap namel long ol dispela manmeri i longlong nabaut, tasol ol i givim bel olgeta long helpim wok bilong liklik hap lain God i bin makim long spirit, na dispela samting i kamapim long ples klia olsem spirit holi bilong Jehova i gat strong bilong mekim ol manmeri i stap wanbel. Bikpela lain arapela sipsip ol i strong long wok gut wantaim lain remnan na ol i wet long mekim bikpela wok long graun long Taim Bilong 1,000 Yia bilong Krais Jisas i mekim wok king.
Yu Gat Wanem Tingting?
◻ Wanem taim bai Krais i kirap mekim wok king inap 1,000 yia, olsem Baibel i makim? Na wanem ol samting bai kamap long dispela taim, olsem Baibel i tok?
◻ Wanem wok i bikpela samting moa, winim wok bilong kisim bek ol man?
◻ Paslain long taim bilong Krais, wanem lain ol i kamap olsem lain o oganaisesen bilong God long graun?
◻ Bikpela lain, em ol “planti arapela lain manmeri” i piksa bilong ol, ol i mekim wanem na bai ol inap abrusim bagarap na i stap long Taim Bilong 1,000 Yia?