I Gat Wanem As na Yumi Mas Tok Tru Tasol?

MANFRED, em i gat 18 krismas, em i wok long wanpela kampani na i lain long mekim wok long ofis.a Dispela kampani i stretim rot bilong em na sampela moa i ken go long wanpela vokesenel skul tupela de long olgeta wik. Wanpela de, skul i pinis hariap. Kampani i bin putim lo olsem sapos skul i pinis hariap, ol i mas kam bek long ples wok. Manfred wanpela tasol i kam bek long wok; ol arapela ol i go raun raun. Bos bilong kampani i gat wok long lukautim dispela lain i skul em i lukim Manfred na i askim em: “Bilong wanem yu no stap long skul? Na ol narapela i stap we?” Manfred bai tok wanem?

Manfred i gat hatwok. Em i mas tokaut stret, o em i mas karamapim tok na bai ol wanklas bilong em i no ken kisim hevi? Sapos em i tok stret, hevi inap painim ol wanklas na ol i no ken laikim em moa. Olsem wanem? Long kain taim olsem, i orait long mekim tok giaman? Sapos yu Manfred, bai yu mekim wanem? Bihain bai yumi stori moa long Manfred, tasol pastaim yumi ken stori long ol samting i insait long pasin bilong mekim tok tru na pasin bilong tok giaman.

Tok Tru na Tok Giaman

Taim God i wokim namba wan man na meri, pasin i tru tasol em i as bilong olgeta samting. I no gat pasin bilong giaman na paulim tok. Jehova, Man Bilong Wokim olgeta samting, em i “God bilong mekim pasin tru tasol.” Tok bilong em i tru olgeta; em i no save giaman, na em i no laikim tru pasin bilong tok giaman na ol man i save mekim tok giaman.​​—Song 31:5; Jon 17:17; Taitus 1:2.

Olsem na pasin bilong tok giaman i bin kamap olsem wanem? Jisas Krais i kamapim bekim bilong dispela askim taim em i tokim ol birua i laik kilim em i dai, olsem: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. Bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em. Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:​44) Dispela tok Jisas i mekim em i stori long samting i bin kamap long gaden Iden taim Satan i kirapim namba wan man na meri long sakim tok bilong God na nau ol i kamap sinman na dai i painim ol.​​—Stat 3:​1-5; Rom 5:​12.

Tok bilong Jisas i kamapim klia olsem Satan em i “papa tru bilong pasin bilong tok giaman.” Satan i stap yet olsem nambawan man bilong strongim pasin bilong tok giaman. Em i save “giamanim olgeta manmeri bilong graun.” Em i as bilong planti hevi em pasin bilong tok giaman i bin kamapim long ol manmeri long nau.​​—KTH 12:9.

Pasin bilong mekim tok giaman, em Satan i bin kamapim, dispela pasin i stap yet long nau long olgeta kain lain na i save nogutim olgeta manmeri. Pasin ol man i bihainim long i stap bilong ol inap makim olsem ol i laikim pasin bilong tok tru o nogat. Ol man husat i stap long sait bilong God ol i save bihainim tok tru bilong Baibel. Ol man husat i no bihainim pasin bilong tok tru, maski ol i save o nogat, ol i stap long han bilong Satan, long wanem, ‘dispela graun olgeta i stap aninit long strong bilong em.’​​—1 Jon 5:​19; Matyu 7:​13, 14.

Bilong Wanem Planti Man i Tok Giaman?

“Dispela graun olgeta” i stap aninit long strong bilong Satan, na dispela samting i helpim yumi long save long as na planti man i save tok giaman. Tasol yumi laik save, ‘Bilong wanem Satan, “papa tru bilong pasin bilong tok giaman,” i kirap mekim tok giaman?’ Satan i save olsem i stret Jehova i holim namba olsem King bilong olgeta samting Em i bin wokim, na namba wan man na meri tu. Tasol Satan i laik kisim dispela namba. Em i mangal long dispela samting em i no gat rait long en na em i wok long painim rot bilong kisim ples bilong Jehova. Bilong mekim olsem, Satan i mekim tok giaman.​​—1 Timoti 3:6.

Olsem wanem long nau? Ating yu wanbel olsem pasin mangal i wok yet long kirapim ol man long mekim tok giaman. Ol lain bilong bikpela bisnis, wok politik, na lotu giaman, ol i save mekim tok giaman na paulim mani. Bilong wanem ol i mekim olsem? Long wanem, ol i mangal na laikim tumas long kisim biknem, planti mani moa, o namba i no stret long ol i kisim. Saveman King Solomon bilong Israel bilong bipo, em i tok: “Sapos man i wok strong tumas long kamap maniman kwiktaim, Bikpela bai i no inap larim em i go nating. Nogat. Bai em i mekim save long em.” (Sindaun 28:20) Na aposel Pol i tok: “Pasin bilong laikim tumas mani em i as bilong olgeta pasin nogut.” (1 Timoti 6:​10) Yumi ken mekim wankain tok long pasin bilong laikim tumas biknem na namba.

Narapela samting i kirapim man long mekim tok giaman, em pasin bilong pret​​—pret long ol hevi em pasin bilong mekim tok tru inap kamapim, na pret long ol narapela bai ting olsem wanem long em sapos em i mekim tok tru. Yumi ol man i gat laik long narapela i mas laikim yumi o orait long yumi. Tasol dispela laik inap kirapim man long paulim tok tru, maski em long liklik samting tasol, bambai em i ken karamapim sampela rong o samting i no stret, o bilong grisim ol narapela long laikim em. Solomon i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.”​​—Sindaun 29:25.

Stap Gut Long God Bilong Mekim Tok Tru Tasol

Manfred i tok wanem taim bos bilong kampani i givim askim long em? Manfred i mekim tok tru. Em i tok: “Tisa i pinisim skul hariap, olsem na mi kam bek long wok. Long ol narapela, ating i gutpela yu yet i ken askim ol.”

Manfred inap bekim tok i no kamapim stret ol samting i bin kamap na long dispela rot ol wanklas bai laikim em. Tasol i gat as na em i mekim tok tru tasol. Manfred em i wanpela Witnes Bilong Jehova. Em i mekim tok tru tasol na nau bel bilong em i no gat tok. Na tu, dispela i kirapim bos long bilip long em. Bos i putim Manfred long dipatmen bilong salim ol yau ring na nekles samting, em hap we ol i no save putim ol nupela wokman. Inap 15 yia bihain, taim Manfred i kisim bikpela wok i gat namba long kampani, dispela bos i telefon bilong tok amamas long em na stori long dispela samting i bin kamap bipo taim Manfred i mekim tok tru.

Jehova em i God bilong pasin tru tasol, olsem na sapos man i laik pas gut wantaim em, em i mas “lusim pasin bilong giaman” na “mekim tok tru tasol.” Wokboi bilong God i mas laikim tru pasin bilong mekim tok tru. Saveman Solomon i tok: “Sapos witnes em i man bilong tok tru, orait em i save autim stretpela tok tasol long kot.” Tasol tok giaman i wanem kain tok?​​—Efesus 4:​25; Sindaun 14:5.

Tok Giaman i Wanem Kain Tok?

Tok giaman em wanpela tok i no stret, tasol sampela taim tok i no stret i no tok giaman. Bilong wanem i olsem? Taim man i mekim tok giaman, em i save em i mekim tok i no tru na em i mekim bilong giamanim narapela. Tasol sapos man i popaia na kamapim sampela tok i no stret, olsem kolim kranki sampela namba, dispela i no wankain long pasin bilong tok giaman.

Na tu, yumi mas skelim olsem man i givim askim long yumi, em i gat wok long save long bekim bilong dispela tok o nogat. Olsem: Sapos wanpela bos bilong narapela kampani i bin givim wankain askim long Manfred, yu ting Manfred i gat wok long stori long olgeta samting i bin kamap? Ating nogat. Dispela bos i no gat wok long save long ol dispela samting, olsem na Manfred i no gat wok long tokaut long em. Tasol i no stret long em i mekim tok giaman.

Jisas Krais i bin bihainim wanem kain pasin? Wanpela taim, Jisas i toktok wantaim sampela man i no disaipel bilong em na ol i laik save long raun bilong em. Ol i tokim em: “Yu mas lusim dispela ples na yu go long Judia.” Jisas i tok wanem long ol? “Yupela go long ol dispela bikpela de bilong lotu long Jerusalem. Mi, bai mi no inap i go, long wanem, taim bilong mi em i no kamap yet.” Bihain liklik, Jisas i go long Jerusalem long dispela bikpela de bilong lotu. Bilong wanem em i bin tok em i no inap i go? Long wanem, i no gat wok long ol i save long olgeta samting long raun bilong em, olsem long wanem taim stret em bai kamap long Jerusalem. Jisas i no tok giaman, tasol em i no tokaut klia long dispela samting, long wanem, em i no laik bai dispela i nogutim em yet o ol disaipel bilong em. Yumi ken save olsem dispela i no wanpela tok giaman, long wanem, aposel Pita i stori long Krais olsem: “Em i no bin mekim sin, na tu em i no bin mekim wanpela tok giaman.”​​—Jon 7:​1-​13; 1 Pita 2:​22.

Olsem wanem long Pita yet? Long dispela nait taim ol birua i holim Jisas, inap 3-pela taim Pita i tok em i no save long Jisas. Pita i pret long man na em i giaman. Tasol wantu em i “krai nogut tru” na tanim bel na God i lusim tingting long dispela rong. Na tu, em i kisim skul long dispela pasin kranki bilong em. Sampela de bihain, em i autim tok long Jisas long ai bilong ol man na taim ol bikman Juda long Jerusalem i tokim em long pasim maus, em i no mekim. Pita i bin pundaun inap sotpela taim tasol na em i kamap strong gen hariap, na dispela inap strongim yumi olgeta, long wanem, yumi olgeta inap pundaun na mekim popaia long toktok na long pasin bilong yumi.​​—Matyu 26:​69-​75; Aposel 4:​18-​20; 5:​27-​32; Jems 3:2.

Tok Tru Bai Stap Oltaim Oltaim

Sindaun 12:19 i tok: “Tok giaman i save stap sotpela taim tru na ol man i lusim tingting long en. Tasol tok tru i save stap oltaim.” Na tu, taim ol man i mekim tok tru na bihainim, dispela i save helpim narapela long i stap gut wantaim narapela. Tru tumas, pasin bilong mekim tok tru tasol i save kamapim ol gutpela samting long nau. Bel bilong ol man i no gat tok, ol i holim gutnem, na ol i stap gut wantaim poroman marit, ol wan wan insait long famili, ol pren, na ol wanwok tu.

Tru, tok giaman inap giamanim man, tasol tok giaman i save stap sotpela taim tasol. Bihain liklik em i save kamap ples klia. Na Jehova, God bilong pasin tru, i bin makim wanpela taim we em bai pinisim pasin bilong tok giaman na ol man i save tok giaman. Baibel i tok promis olsem Jehova bai pinisim olgeta wok bilong Satan, em papa bilong pasin bilong tok giaman na man bilong giamanim olgeta manmeri bilong graun. Klostu nau Jehova bai pinisim pasin bilong mekim tok giaman na ol man i save mekim tok giaman.​​—KTH 21:8.

Em bai gutpela tru taim pasin bilong “tok tru” i stap oltaim!

[Futnot]

[Rait long pes 5]

Pasin mangal na strongpela laik long kisim bikpela namba samting i save kirapim man long mekim tok giaman

[Rait long pes 6]

Tok giaman em wanpela tok i no stret, tasol sampela taim tok i no stret i no tok giaman

[Piksa long pes 6]

Pita i sakim Krais na dispela i givim wanem skul long yumi?

[Piksa long pes 7]

Pasin bilong tok tru i helpim yumi long stap gut wantaim narapela