Yu Wetim “Dispela Taun i Gat Faundesen Tru Tru”?

 1. Planti manmeri i daunim laik bilong ol yet long wanem ol samting? Bilong wanem?

LONG nau, planti milion manmeri bilong God i daunim laik bilong ol yet. Planti bratasista i mekim disisen long stap singel. Ol marit lain i daunim laik bilong ol long kamapim pikinini. Ol famili i daunim laik bilong bungim planti mani kago. Wanpela bikpela risen i stiaim disisen bilong olgeta dispela lain em olsem: Ol i laik givim bel olgeta long mekim wok bilong Jehova. Ol i amamas na bilip tru olsem Jehova bai givim olgeta samting ol i sot tru long en. Yu ting bai ol i bel hevi? Nogat! Wai na yumi inap tok olsem? Wanpela risen em olsem Jehova i blesim Abraham, em “papa bilong olgeta man em God i kolim ol stretpela man, long wanem, ol i bilip.”—Rom 4:11.

 2. (a) Olsem Hibru 11:8-10, 16 i kamapim, wai na Abraham i redi long lusim taun Ur? (b) Long dispela atikol, yumi bai stori long wanem samting?

² Abraham i redi long lusim gutpela sindaun bilong em long taun Ur. Wai? Bikos em i wetim “dispela taun i gat faundesen tru tru.” (Ritim Hibru 11:8-10, 16.) Dispela “taun” em wanem samting? Abraham i feisim wanem ol hevi taim em i wet long God i bildim dispela taun? Olsem wanem yumi inap bihainim eksampel bilong Abraham na ol manmeri long taim bilong yumi em ol tu i bihainim eksampel bilong Abraham?

 3. Wanem dispela taun em Abraham i wetim?

³ Dispela taun em Abraham i wetim em Kingdom Bilong God. Jisas Krais em King bilong dispela Kingdom, na 144,000 Kristen em God i anointim, ol tu bai mekim wok King wantaim em. Pol i kolim dispela Kingdom olsem “wanpela taun bilong God i gat laip, em Jerusalem bilong heven.” (Hib. 12:22; Rev. 5:8-10; 14:1) Jisas i skulim ol disaipel long beten long dispela Kingdom i ken i kam na bai laik bilong God i ken kamap long graun olsem i kamap long heven.—Mat. 6:10.

 4. Olsem Stat 17:1, 2, 6 i kamapim, yu ting Abraham i gat sampela save long dispela taun, o Kingdom, em God i tok promis long en?

⁴ Yu ting Abraham i gat sampela save long hau Kingdom Bilong God bai kamap? Nogat. Inap planti handret yia, dispela save i stap olsem “tok hait holi.” (Efe. 1:8-10; Kol. 1:26, 27) Tasol Abraham i save olsem sampela tumbuna pikinini bilong em bai mekim wok king. Jehova i bin mekim dispela tok promis long Abraham. (Ritim Stat 17:1, 2, 6.) Abraham i gat strongpela bilip long ol tok promis bilong God, na i olsem em inap lukim Man God i Anointim o Mesaia, em Man husat bai kamap King long Kingdom Bilong God. Olsem na Jisas i tokim ol Juda long taim bilong em: “Papa bilong yupela Abraham i bin i gat tingting long lukim taim bilong mi na em i amamas tru long dispela, na em i bin lukim na em i belgut.” (Jon 8:56) Abraham i save olsem ol tumbuna pikinini bilong em tu bai mekim wok king long wanpela Kingdom em Jehova yet bai kamapim, na Abraham i redi long wetim Jehova long truim dispela tok promis.

 5. Hau na yumi save olsem Abraham i wetim dispela taun em God bai disainim?

⁵ Olsem wanem Abraham i soim klia olsem em i wetim dispela taun, o Kingdom, em God bai disainim? Wanpela samting em olsem, Abraham i no kamap sitisen bilong ol gavman bilong graun. Em i stap olsem tripman; em i no sindaun long wanpela ples stret na wokim haus long en, na em i no sapotim ol king bilong graun. Na tu, Abraham i no traim long kamapim Kingdom bilong em yet. Oltaim em i bihainim tok bilong Jehova na wetim Em long truim tok promis bilong Em. Abraham i kamapim klia olsem em i trastim tru Jehova. Yumi ken skelim sampela samting i bin putim hevi long Abraham, na painimaut long ol skul yumi inap kisim long eksampel bilong em.

 6. Ur em wanem kain taun?

⁶ Abraham i lusim taun we ol manmeri i stap seif na ol i gat gutpela sindaun. Traipela banis i raunim dispela taun, na ol i wokim ol bikpela baret wara long 3-pela sait bilong banis. Ol manmeri long Ur i save gut tru long matematiks na wei bilong raitim tok. Na i luk olsem dispela taun em ples bilong mekim wok bisnis; ol saveman i digim graun long hap we dispela taun i bin stap long en, na ol i lukim planti pepa bilong wok bisnis. Ol manmeri i yusim ol brik long wokim haus, na ol wol bilong haus ol i simenim na i smut na ol i peintim long waitpela peint. Sampela bilong ol dispela haus i gat 13 o 14 rum, na ol dispela rum i stap raunim wanpela ples bung; ol i yusim ol ston long wokim floa bilong ples bung.

 7. Bilong wanem Abraham i mas bilip tru olsem Jehova bai lukautim em na famili bilong em?

⁷ Abraham i mas bilip tru olsem Jehova bai lukautim em na famili bilong em. Wai? Tingim: Abraham na Sara i lusim naispela haus bilong em long taun Ur we em i stap seif long en, na em i go stap long ol haus sel long kantri-sait bilong Kenan. I no gat ol traipela banis na ol bikpela baret wara we inap lukautim em na famili bilong em. Nau em isi tru long ol birua inap bagarapim ol.

 8. (a) Abraham i bungim wanem hevi?

⁸ Abraham i mekim laik bilong God, tasol wanpela taim famili bilong em i sot long kaikai. Bikpela hangre i kamap long Kenan, em kantri we Jehova i salim Abraham i go sindaun long en. Ol i sot tru long kaikai, olsem na Abraham i kisim famili bilong em na em i tingting long ol bai go stap long Isip inap liklik haptaim. Tasol taim ol i go stap long Isip, Fero, king bilong Isip, i tokim ol ofisa bilong em long kisim meri bilong Abraham i go long haus king. Ating Abraham i wari nogut tru, olsem na Jehova i mekim sampela samting bilong kirapim Fero long larim Sara i go bek long Abraham.—Stt. 12:10-19.

 9. Wanem ol hevi i kamap insait long famili bilong Abraham?

⁹ Ol bikpela hevi i kamap insait long famili bilong Abraham. Em i laikim tru meri bilong em Sara, tasol Sara i no inap karim pikinini. Inap planti yia, Abraham na Sara i bel hevi tru long dispela samting. Olsem na Sara i kisim wokmeri bilong em, Hagar, na givim long Abraham olsem meri bilong em, na bai Hagar inap karim ol pikinini bilong Abraham na Sara. Tasol taim Hagar i gat bel, em i stat long luk daun long Sara. Hevi i kamap bikpela tru, na Sara i rausim Hagar long famili bilong ol.—Stt. 16:1-6.

10. Wanem ol samting i kamap long Ismael na Aisak na ating dispela i traim pasin bilong Abraham long bilip tru long Jehova?

¹⁰ Bihain Sara i gat bel na em i karim pikinini man, na em i kolim em Aisak. Abraham i laikim tru 2-pela pikinini man bilong em, Ismael na Aisak. Tasol Ismael i wok long tok bilas long Aisak, olsem na God i tokim Abraham long salim Ismael na Hagar i go long narapela ples. (Stt. 21:9-14) Bihain, Jehova i askim Abraham long givim Aisak olsem ofa. (Stt. 22:1, 2; Hib. 11:17-19) Abraham i bilip tru olsem Jehova bai truim ol tok promis Em i bin mekim long sait bilong ol pikinini man bilong em.

11. Wai na Abraham i mas wetim Jehova na em i no ken les kwik?

¹¹ Paslain long ol tok promis bilong Jehova i kamap tru, Abraham i mas wet na em i no ken les kwik. Ating em i winim pinis 70 krismas taim em na famili bilong em i lusim Ur. (Stt. 11:31–12:4) Na inap olsem 100 yia olgeta, em i stap long ol haus sel na raun long ol hap bilong Kenan. Abraham i dai taim em i gat 175 krismas. (Stt. 25:7) Em i no lukim Jehova i truim tok promis bilong Em long givim graun Kenan i go long ol tumbuna pikinini bilong em. Na em i no stap laip na bai em inap lukim dispela taun—Kingdom Bilong God—i kirap mekim wok. Maski Abraham i dai, Baibel i tok em i “stap i go inap long em i lapun tru na em i amamas long laip bilong em.” (Stt. 25:8) Maski olgeta kain samting i putim hevi long Abraham, em i holim yet strongpela bilip na em i amamas long wetim Jehova. Wai na Abraham inap sanap strong na karim hevi? Long laip olgeta bilong Abraham, Jehova i lukautim em na tingim Abraham olsem pren bilong em.—Stt. 15:1; Ais. 41:8; Jems 2:22, 23.

12. (a) Yumi wetim wanem samting? (b) Yumi bai skelim wanem samting?

¹² Olsem Abraham, yumi wetim dispela taun i gat faundesen tru tru. Tasol yumi no wet long God bai wokim dispela taun, nogat. God i kamapim pinis dispela taun, Kingdom Bilong God, long 1914, na dispela taun i kirap pinis long bosim heven olgeta. (Rev. 12:7-10) Yumi wetim dispela taun long bosim tu graun olgeta. Taim yumi wet i stap, yumi tu bai bungim ol wankain hevi olsem ol hevi i bin painim Abraham na Sara. Yu ting ol wokman bilong Jehova long nau i bihainim eksampel bilong Abraham? Ol laip stori long Wastaua i soim olsem planti Kristen i bilip na ol i no les kwik, wankain olsem Abraham na Sara i bin mekim. Yumi ken skelim sampela bilong ol dispela laip stori na painimaut long skul yumi inap kisim.

13. Yu kisim wanem skul long ekspiriens bilong Brata Walden?

¹³ Redi long daunim laik bilong yumi yet long sampela samting. Sapos yumi laik bai taun bilong God—Kingdom—i stap namba 1 samting long laip bilong yumi, orait yumi mas bihainim eksampel bilong Abraham, em i redi long daunim laik bilong em yet na bai em inap amamasim God. (Mat. 6:33; Mak 10:28-30) Tingim eksampel bilong wanpela brata, nem bilong em Bill Walden.b Long 1942, Bill i redi long grediuet long wanpela yunivesiti long Amerika wantaim digri bilong mekim wok ensinia, na long dispela taim Bill i kirap long stadi wantaim ol Witnes Bilong Jehova. Wanpela profesa bilong Bill i stretim rot long Bill inap wok mani bihain long em i grediuet, tasol Bill i tok nogat long wok mani. Em i tokim profesa olsem em i no inap kisim wok mani bikos em i laik givim bel olgeta long mekim wok bilong God. Bihain liklik, gavman i putim nem bilong Bill long joinim ami. Long pasin rispek, em i tok em i no inap joinim ami, so kot i sasim em na em i baim 10 tausen dola na kot i tok long em bai kalabus inap 5-pela yia. Tasol em i kalabus inap 3-pela yia na kot i larim em i go fri. Bihain, em i kisim invatesen long go long Skul Gileat, na em i mekim wok misineri long Afrika. Bill i maritim Eva na tupela i mekim wok misineri long Afrika, na dispela i makim olsem ol i mas daunim sampela laik bilong ol yet. Bihain, tupela i go bek long Amerika na bai ol i ken lukautim mama bilong Bill. Long pinis bilong laip stori bilong Bill, em i tok: “Mi save aiwara taim mi tingim hau Jehova i yusim mi long mekim dispela nambawan gutpela wok bilong em na mi inap mekim dispela wok winim 70 yia. Planti taim mi save tok tenkyu long em i stiaim mi long mekim wok bilong em long laip olgeta bilong mi.” Yu ting yu inap insait long fultaim sevis?

14-15. Yu kisim wanem skul long ekspiriens bilong Brata na Sista Apostolidis?

¹⁴ No ken ting olsem laip bilong yu bai no gat hevi. Stori bilong Abraham i givim skul long yumi olsem, maski sampela manmeri i yusim laip olgeta bilong ol long mekim wok bilong Jehova, ol bai wok yet long karim hevi. (Jems 1:2; 1 Pita 5:9) Skelim ekspiriens bilong Aristotelis Apostolidis.c Em i kisim baptais long Grik long 1946, na long 1952 em i tok promis long maritim wanpela sista nem bilong em Eleni; tupela wantaim i laik mekim wok bilong Jehova fultaim. Tasol Eleni i kisim bikpela sik na ol dokta i painimaut olsem em i gat tiuma long kru bilong em. Ol dokta i mekim operesen na rausim tiuma long kru bilong Eleni, tasol sampela yia bihain long Aristotelis na Eleni i marit, dispela tiuma i gro gen. Ol dokta i mekim gen operesen, na bihain long operesen sampela hap long bodi bilong Eleni i paralais, na em i hatwok long toktok gut. Maski Eleni i gat dispela hevi na gavman i mekim nogut long ol Witnes, em i givim bel tru long autim tok.

¹⁵ Aristotelis i lukautim Eleni inap 30 yia olgeta. Insait long ol dispela yia, em i mekim wok elda, wok long komiti bilong ol kibung, na helpim wok bilong sanapim wanpela Haus Kibung. Long 1987, Eleni i kisim bagarap long wanpela eksiden taim em i mekim wok autim tok. Em i stap long koma inap 3-pela yia, na bihain em i dai. Long pinis bilong laip stori bilong em, Aristotelis i tok: “Inap planti yia, ol traim, ol samting i putim hevi long mipela, na taim nogut i mekim na mi strongim tingting long sanap strong tru na no ken larim wanpela samting i daunim mi. Tasol oltaim Jehova i strongim mi na ol dispela hevi i no daunim mi.” (Sng. 94:18, 19) Jehova i laikim tru ol manmeri husat i givim bel olgeta long mekim wok bilong em maski ol i karim ol hevi!

16. Brata Knorr i givim wanem gutpela edvais long meri bilong em?

¹⁶ Tingim tingim ol samting bai kamap bihain. Abraham i tingim tingim ol blesing em Jehova bai givim long em, na dispela i helpim em long sanap strong na ol hevi i no daunim em. Sista Audrey Hyde i tingim tingim ol blesing em bai kisim long bihain, maski fes man bilong em, Nathan H. Knorr, i dai long sik kensa, na namba 2 man bilong em, Glenn Hyde, i kisim sik Alsaima.d Em i tingim tok Brata Knorr i mekim sampela wik paslain long em i dai. Sista Audrey i tok: “Nathan i tokim mi: ‘Taim yumi dai pinis, samting yumi wetim bai kamap tru, na yumi no inap karim pen gen.’ Orait em i strongim mi: ‘Lukluk i go long ol samting bai kamap bihain, long wanem, yu bai kisim prais bilong yu.’ . . . Na em i tok: ‘Mekim wok oltaim—mekim ol samting bilong helpim ol narapela. Dispela bai helpim yu long i stap amamas.’” Em gutpela long yumi bihainim dispela edvais na oltaim yumi mekim wok bilong helpim ol narapela na ‘amamas long samting yumi bilip na wet long en’!—Rom 12:12.

17. (a) Wai na yumi gat planti moa risen long tingim tingim ol samting bai kamap bihain? (b) Taim yumi bihainim eksampel bilong man i raitim tok bilong Maika 7:7, hau bai dispela i helpim yumi long amamas long ol blesing yumi bai kisim long bihain?

¹⁷ Long nau yumi gat planti moa risen long tingim tingim ol samting bai kamap bihain. Ol samting i kamap long graun i soim klia olsem yumi stap long laspela haptaim bilong las de bilong dispela graun. Klostu nau, dispela taun i gat faundesen tru tru—Kingdom Bilong God—bai bosim olgeta hap bilong graun. Yumi bai kisim planti blesing, na wanpela blesing yumi bai amamas long en em olsem, yumi bai lukim ol wanfamili na ol pren i kirap bek. Abraham i bilip long Jehova na em i no les kwik, olsem na Jehova bai kirapim bek em na famili bilong em na ol bai stap laip long graun. Yu ting yu bai stap long dispela taim na welkamim ol? Yu inap, sapos yu bihainim eksampel bilong Abraham na daunim laik bilong yu yet na mekim wok bilong Kingdom, na yu stap strong yet long bilip maski hevi i painim yu, na yu kisim pasin bilong wetim Jehova na yu no les kwik.—Ritim Maika 7:7.