Heven

Stori: Heven em ples God Jehova na ol gutpela ensel i stap long en; ai bilong ol man i no inap lukim. Baibel i kolim dispela tok “heven” bilong makim kain kain samting, olsem God yet, o lain ensel i stap gut long em, o God i amamas long man, o skai, o ples antap, o ol gavman Satan i bosim, o stretpela nupela gavman long heven em Jehova i givim strong long Krais Jisas na ol wanwok bilong em long bosim.

Taim yumi no kamap yet long graun, yumi bin stap long ples spirit o nogat?

Jo 8:23: “[Krais Jisas i tok:] ‘Yupela ol lain bilong daunbilo. Tasol mi, mi bilong antap. Yupela i bilong dispela graun. Tasol mi no bilong dispela graun.’ ” (Jisas i kam long ples spirit. Tasol yumi nogat, olsem Jisas i tok.)

Ro 9:​10-12: “Taim Rebeka i no karim tupela pikinini yet, na tupela i no bin mekim gutpela pasin o pasin nogut, God i tokim Rebeka olsem, ‘Pikinini i kamap pastaim, em bai i stap wokboi bilong pikinini i kamap bihain.’ ” (Tupela pikinini hia, em Jekop na Iso, sapos tupela i bin i stap long ples spirit pastaim, orait tupela i bin mekim sampela pasin long dispela ples, a? Tasol nogat. Mama i karim tupela pinis na nau tupela i mekim sampela pasin, olsem gutpela pasin o pasin nogut.)

Yu ting olgeta gutpela man i go long heven?

Ap 2:34: “Devit [em Baibel i tok, ‘Jehova i laikim em’] i no bin i go long heven.”

Mt 11:11: “Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.” (Olsem na Jon i no go long heven taim em i dai.)

Sng 37:​9, 11, 29: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol. . . . Ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap. Ol stretpela man bai i kisim graun God i givim ol, na bai ol i stap oltaim long en.”

Sapos Adam i no bin mekim sin, yu ting em bai i go long heven?

Stt 1:26: “Bihain God i tok olsem, ‘Nau yumi wokim ol manmeri bai ol i kamap olsem yumi yet. Bai yumi putim ol i stap bos bilong ol pis na ol pisin na bilong olgeta kain animal na bilong olgeta samting bilong graun.’ ” (Olsem na God i laik bai Adam i lukautim graun na olgeta animal i stap long graun. Em i no tok liklik olsem Adam bai go long heven.)

Stt 2:​16, 17: “Na God i tokim man olsem, ‘Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.’ ” (I no laik bilong God long pastaim long man i mas i dai. Dispela tok bilong God i bilong pasim man na bai em i no bihainim rot bilong i dai. Dai em i strafe man bai kisim sapos em i sakim tok, i no rot bilong kisim gutpela sindaun moa long heven. Sapos man i bihainim tok, em bai stap oltaim long Paradais God i bin putim em long en long graun. Lukim tu Aisaia 45:18.)

Yu ting man i mas i go long heven bambai em inap i stap amamas tru long bihain?

Sng 37:11: “Ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.”

KTH 21:​1-4: “Mi lukim nupela skai na nupela graun . . . Na long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. . . . Na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ ”

Mai 4:​3, 4: “Olgeta lain manmeri bai i no pait moa, na bai ol i no skul moa long pait. Na olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.”

Ol man i dai paslain long Jisas, yu ting em i opim rot bambai ol i ken i go long heven?

Wanem insait bilong tok bilong 1 Pita 3:​19, 20? “[Jisas] i stap spirit [taim em i kirap bek pinis] na em i go autim tok long ol spirit i stap long ples kalabus. Dispela ol spirit em ol spirit i bin sakim tok bilong God long taim bilong Noa. Long taim bilong Noa, . . . [God] i wet i go inap Noa i wokim pinis sip bilong en. Na liklik lain tasol, inap 8-pela manmeri, ol i bin i go antap long sip . . . na ol i stap gut.” (Dispela “ol spirit i stap long ples kalabus,” yu ting em ol spirit o tewel bilong ol man i bin sakim tok bilong Noa na ol i dai paslain long Bikpela Tait, na yu ting nau rot i op long ol bilong go long heven? Sapos yumi skelim 2 Pita 2:4 na Jut 6 wantaim Stat 6:​2-4 bai yumi save, dispela ol spirit em ol ensel i bin tanim i kamap man na maritim ol meri long taim bilong Noa. Long 1 Pita 3:​19, 20, hap tok Grik [pneuʹma·sin] yumi tanim olsem “ol spirit” i narapela kain long hap tok [psy·khaiʹ] yumi tanim olsem “manmeri.” Olsem na dispela “ol spirit” i no tewel bilong ol manmeri, nogat; em ol ensel i bin bikhet long God. Olsem na tok Jisas i autim long dispela “ol spirit i stap long ples kalabus” i kolim strafe i mas painim ol.)

Wanem insait bilong tok bilong 1 Pita 4:6? “Long dispela as tasol na ol dispela manmeri i dai pinis ol i bin harim gutnius . . . tasol nau ol i kisim laip na i stap.” (Yu ting “ol dispela manmeri i dai pinis” em ol manmeri i bin dai paslain long Krais? Olsem yumi stori pinis long 1 Pita 3:​19, ol dispela manmeri i dai pinis, ol i no “ol spirit i stap long ples kalabus.” Ol dispela spirit em ol ensel i bikhet. Na sapos wanpela man i autim gutnius long ol man i dai pinis, dispela i no inap helpim ol, long wanem, Baibel i tok, “ol man i dai pinis, ol i no inap save long wanpela samting.” [Sav 9:5] Na Song 146:4 i mekim kain tok olsem. Tasol Efesus 2:​1-7, 17 i stori long ol man i olsem ol i dai pinis long ai bilong God, na taim ol i harim gutnius na bilip long en, i olsem ol i “kisim laip.”)

Yu ting “Nupela Testamen” i tok, olgeta Kristen bai kisim laip long heven?

Jo 14:​2, 3: “Long haus bilong Papa bilong mi i gat planti rum i stap, na mi go bilong redim ples bilong yupela. Sapos i no olsem, orait mi no inap mekim dispela tok long yupela. Na sapos mi go redim ples bilong yupela, bai mi kam bek na kisim yupela i go i stap wantaim mi.” (Jisas i toktok wantaim ol aposel i stap gut long em na em i tokim ol, bihain bai ol i stap wantaim em long “haus” bilong Papa, olsem long heven. Tasol em i no tok hamas ol narapela tu bai go long heven.)

Jo 1:​12, 13: “Sampela manmeri i kisim em [Jisas], em ol lain i bilip long nem bilong em. Na em i givim namba long ol long ol i ken kamap pikinini bilong God. . . . God yet i mekim ol i kamap pikinini bilong em.” (Joh 1 Ves 11 i tok long “ol lain bilong en [Jisas],” em ol Juda. Sampela Juda i bin bilip long em taim em i stap long graun na ol i bin kamap ol pikinini bilong God, na ol i bilong kisim laip long heven. Tasol ol dispela ves i stori long dispela taim bipo; ol i no stori long olgeta manmeri i bin kamap Kristen bihain long dispela taim.)

Ro 8:​14, 16, 17: “Olgeta manmeri i larim Spirit bilong God i stiaim wokabaut bilong ol, dispela ol manmeri i stap pikinini bilong God. . . . Orait yumi stap pikinini bilong God, na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis. . . . Bihain bai yumi kisim biknem na gutpela sindaun tru wantaim em.” (Taim Pol i raitim dispela tok, i tru olgeta manmeri i larim spirit bilong God i stiaim ol, ol i kamap pikinini bilong God na ol i bilong kisim biknem wantaim Krais long heven. Tasol paslain long dispela taim, nogat. Luk 1:15 i stori long spirit holi i pulap long Jon Bilong Baptais, tasol olsem Matyu 11:11 i makim, Jon i no ken kisim biknem long Kingdom bilong heven. Olsem na taim God i bungim pinis lain bilong kisim Kingdom long heven, i gat narapela lain ol tu bai kamap disaipel bilong Krais na mekim wok bilong God, tasol ol i no bilong i stap long heven wantaim Krais.)

I gat wanem tok long “Nupela Testamen” i makim olsem sampela Kristen bai kisim laip oltaim long graun?

Mt 5:5: “Ol man i save daunim nem bilong ol yet, em ol i ken amamas. Bai God i givim olgeta graun long ol.”

Mt 6:​9, 10: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Wanem laik bilong God long graun? Stat 1:28 na Aisaia 45:18 i tok wanem?)

Mt 25:​31-33, 40, 46: “Taim Pikinini Bilong Man i kam bek olsem king . . . olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais. . . . Na king bai i bekim tok bilong ol [sipsip] olsem, ‘Mi tok tru long yupela, olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.’ Na ol dispela lain [ol meme] bai i go bilong kisim pe nogut . . . Tasol ol stretpela manmeri [ol sipsip] bai i kisim laip i stap oltaim oltaim.” (“Ol sipsip” i narapela long ol brata bilong King, em God i “singautim” ol bilong go long heven. [Hi 2:10–3:1] Tasol ol dispela “sipsip” i stap long taim Krais i kam bek na i stap king na sampela “brata” bilong em i stap yet long graun na karim hevi.)

Jo 10:16: “Mi gat ol arapela sipsip tu, na ol i no bilong dispela banis. Mi mas bringim ol dispela sipsip tu i kam. . . . Na bai i gat wanpela lain sipsip tasol na wanpela wasman tasol bilong ol sipsip.” (Ol “arapela sipsip” i husat? Ol i disaipel bilong Gutpela Wasman Krais Jisas, tasol ol i no insait long “banis,” olsem “nupela kontrak,” bilong kisim laip long heven. Tasol ol i bung wantaim na wok gut wantaim lain bilong “nupela kontrak.”)

2 Pi 3:13: “God i promis pinis long em bai i wokim nupela skai na nupela graun, na stretpela pasin tasol bai i stap long en.” (Na KTH 21:​1-4)

KTH 7:​9, 10: “Bihain mi lukluk gen [taim aposel Jon i lukim pinis namba tru bilong ol manmeri i kisim “mak bilong God,” em God “i bin baim bek ol namel long olgeta manmeri bilong graun” bilong i stap wantaim Krais long maunten Saion bilong heven; lukim KTH 7:​3, 4; 14:​1-3], na mi lukim planti manmeri tru ol i bung i stap, na i no inap man i kaunim namba bilong ol. . . . Ol i bilong olgeta lain . . . Ol i sanap i stap long pes bilong sia king na long ai bilong Pikinini Sipsip. . . . Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi.’ ”

Hamas bai kisim laip long heven, olsem Baibel i tok?

Lu 12:32: “Yupela liklik lain sipsip, yupela i no ken pret. Papa bilong yupela em i tok pinis long em bai i . . . givim kingdom bilong en long yupela.”

KTH 14:​1-3: “Mi lukim Pikinini Sipsip [Krais Jisas] i sanap long maunten Saion [long heven; lukim Hibru 12:​22-24], na 144,000 manmeri i sanap wantaim em. Nem bilong Pikinini Sipsip na nem bilong Papa bilong en, dispela nem God i bin raitim long pes bilong ol. . . . Ol i singim wanpela nupela song. Dispela 144,000 manmeri God i bin baim bek ol namel long olgeta manmeri bilong graun, ol tasol inap long kisim save long dispela song.”

Lain 144,000 em ol Juda tasol, o olsem wanem?

KTH 7:​4-8: “Mi harim ol i kolim namba bilong ol manmeri i kisim mak. Ol i putim mak long 144,000 manmeri namel long ol lain bilong Israel. . . . Juda . . . Ruben . . . Gat . . . Aser . . . Naptali . . . Manase . . . Simeon . . . Livai . . . Isakar . . . Sebulun . . . Josep . . . Benjamin.” (Dispela i no ol lain Israel bilong skin, long wanem, long ol lain Israel bilong skin i no gat lain bilong Josep; na dispela lista i no kolim lain bilong Efraim na Dan; na lain Livai i no wanpela lain bilong ol 12-pela lain, long wanem, ol i givim ol Livai bilong mekim wok bilong God long haus lotu. Lukim Namba 1:​4-16.)

Ro 2:​28, 29: “Sapos man i stap Juda long nem tasol, em i no Juda tru. Na pasin bilong katim skin, em i no samting bilong bodi tasol. Nogat. Man i stap Juda long bel na tingting bilong en, em i Juda tru. Na pasin tru bilong katim skin, em tu i mas kamap insait long bel na tingting bilong man. Em i no save kamap long pasin bilong bihainim ol tok ol i bin raitim long lo. Nogat. Em i samting Spirit bilong God i save kamapim.”

Ga 3:​26-29: “Yupela olgeta i bilip long Krais Jisas na . . . i kamap pikinini bilong God. . . . Na long lain bilong Krais, i no gat ol Juda na ol Grik. I no gat ol wokboi nating na ol man i stap fri. I no gat ol man na ol meri. Nau long Krais Jisas yupela olgeta i stap wanpela tru. Na sapos yupela i stap lain bilong Krais, orait yupela i stap pikinini bilong Abraham tu.”

Namba 144,000 em namba tru o tok piksa tasol?

Kamapim Tok Hait sapta 7 i makim olsem em namba tru, long wanem, dispela sapta i stori long dispela lain i gat namba stret bilong en, olsem 144,000, na bihain, long ves 9, em i stori long bikpela lain “i no inap man i kaunim namba bilong ol.” Sapos namba 144,000 em tok piksa na i no namba tru, i no gat as na Jon i skelim wantaim dispela ‘bikpela lain.’ Dispela i wankain olsem tok Jisas i mekim long Kingdom bilong heven long Matyu 22:14: “God i save singautim planti man, tasol em i save makim wanpela wanpela tasol.”

‘Bikpela lain’ bilong Kamapim Tok Hait 7:​9, 10, ol tu i go long heven o olsem wanem?

Kamapim Tok Hait i no tok God i bin baim bek dispela ‘bikpela lain’ “namel long olgeta manmeri bilong graun” bilong i go i stap wantaim Krais long maunten Saion bilong heven, olsem Em i bin mekim long lain 144,000. Nogat.​—⁠KTH 14:​1-3.

Ol i sanap “long pes bilong sia king na long ai bilong Pikinini Sipsip.” I no olsem dispela i makim ples ol i stap long en, nogat; em i makim olsem ol i stap gutpela long ai bilong God na Krais. (Skelim wantaim KTH 6:17; Luk 21:36.) Ol i sanap “long pes bilong sia king” (tok Grik, e·noʹpi·on tou throʹnou; olsem “long ai bilong sia king”), tasol i no olsem ol i stap long heven. Nogat. Ol i stap ‘long ai bilong God’​—⁠em i tok em i stap long heven na lukluk i kam daun long ol manmeri.​—⁠Sng 11:4; lukim tu Matyu 25:​31-33; Luk 1:​74, 75; Aposel 10:⁠33.

Kamapim Tok Hait 19:​1, 6 i stori long “bikpela lain manmeri i stap long heven,” tasol ol i no dispela lain Kamapim Tok Hait 7:⁠9 i kolim. Baibel i no tok, dispela lain long heven “ol i bilong olgeta lain man” o ol i singaut na tok, Pikinini Sipsip i bin kisim bek ol. Dispela “bikpela lain manmeri i stap long heven” em ol ensel.

Ol manmeri i go long heven bai mekim wanem wok?

KTH 20:6: “Ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.” (Na Daniel 7:27)

1 Ko 6:2: “Yumi manmeri bilong God yumi bai i skelim pasin bilong olgeta manmeri bilong graun.”

KTH 5:10: “Yu bin mekim ol i kamap ol pris bilong lain bilong king, na ol i stap lain pris bilong God bilong mipela. Na bai ol i stap king na bosim ol manmeri bilong graun.”

Husat i makim ol manmeri bilong i go long heven?

2 Te 2:​13, 14: “God i bin makim yupela bilong i stap namel long ol namba wan lain manmeri em i laik kisim bek. . . . Em i laik bai yupela i ken i stap long bikpela lait na strong bilong Bikpela bilong yumi Jisas Krais, olsem na em i singautim yupela pinis long dispela gutnius mipela i bin autim.”

Ro 9:​6, 16: “Mi save, planti bilong ol man i bin kamap long lain bilong Israel, ol i no lain tru bilong Israel. . . . Taim God i makim man, dispela i no kamap long laik bilong man na long hatwok bilong em. Nogat. Em i kamap long marimari bilong God tasol.”