Wok Strong Long Kamap Wanbel Wantaim Ol Man!
“Sapos man i laik bai laip bilong en i kamap gutpela, na em i laik lukim gutpela taim, . . . em i mas givim baksait long pasin nogut, na bihainim gutpela pasin tasol. Em i mas wok long kamap wanbel wantaim ol arapela manmeri, na em i mas strong long bihainim dispela pasin.”—1 PITA 3:10, 11.
“BAI ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” (Aisaia 2:4) Ol i raitim dispela skripsa long wanpela hap klostu long hetkota bilong Yunaitet Nesen long Nu Yok Siti, tasol dispela lain i no bin truim dispela tok liklik. Tasol dispela tok bai kamap tru, long wanem, em tok bilong God Jehova, na ol tok bilong em i no save lus nating.—Aisaia 55:10, 11.
2 Dispela tok bilong Aisaia 2:4 em i insait long wanpela gutpela tok profet, em wanpela tok profet bilong gutaim tru—na truim bilong en i wok long kamap nau long taim bilong yumi. Dispela tok profet i stori long taim i no gat pait moa o ol samting bilong pait, tasol pastaim em i tok: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en. Ol lain manmeri bilong olgeta hap bai i tok olsem, ‘Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ Ol bai i tok olsem, long wanem, Jerusalem bai i stap ples bilong Bikpela i skulim ol manmeri na autim tok bilong em long ol.”—Aisaia 2:2, 3.
Ol Man Inap Kamap Man Bilong Bel Isi
3 Ol man i laik stap isi wantaim ol narapela man ol i mas skul long ol pasin bilong Jehova. Taim man i bihainim ol tok Jehova i skulim yumi long en, tingting na pasin bilong em i save kamap nupela, olsem na man bilong kros na pait inap kamap man bilong bel isi. Dispela senis i save kamap olsem wanem? Rom 12:2 i tok: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God.” Taim yumi pulimapim ol lo bilong Baibel long tingting bilong yumi, yumi larim God i mekim tingting bilong yumi i kamap nupela, olsem stiaim i go long narapela rot. Bilong dispela samting i ken kamap, yumi mas stadi oltaim long Baibel na bai yumi inap save tru long ol samting Jehova i laik bai yumi mekim, na yumi inap save gut wanem rot yumi mas bihainim.—Song 119:105.
4 Tok i tru bilong Baibel i no save mekim tingting tasol bilong yumi i kamap nupela, em i save mekim pasin bilong yumi tu i kamap nupela. Em i helpim yumi long bihainim tok bilong Pol, em i tok: “Bipo yupela tu i bin wokabaut long pasin bilong olpela man, em pasin bilong giaman na bel i kirap long mekim ol samting nogut . . . Tasol nau yupela i mas rausim dispela olpela pasin na tingting bilong yupela i mas kamap nupela. Yupela i mas kamap ol nupela manmeri, em . . . God i mekim ol i kamap nupela na . . . pasin bilong ol i stretpela olgeta na i holi tru.” (Efesus 4:22-24) Dispela nupela tingting em i stap insait long bel, na taim yumi wok long laikim moa yet Jehova na ol lo bilong em, dispela i save strongim nupela tingting bilong yumi. Na dispela nupela tingting i mekim na yumi kamap man bilong tingim ol samting bilong spirit na i stap bel isi wantaim ol man.
5 Yumi mas wok long kamap nupela man, na dispela i kamap ples klia long ol tok Jisas i givim long ol disaipel bilong em klostu long taim em i laik dai: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:34, 35) Ol disaipel i stap wanbel tru, long wanem, ol i bihainim dispela pasin bilong Krais long laikim tru ol narapela, na ol i no save tingim ol yet tasol. (Kolosi 3:14) Ol man i amamas long kisim dispela “nupela lo” na ol i laik bihainim, ol tasol bai kisim dispela bel isi em God i promis long givim. Olsem wanem? I gat sampela manmeri long nau ol i mekim olsem?
6 Ol Witnes Bilong Jehova i wok strong long kamapim pasin sori insait long lain brata bilong ol, em ol i stap long olgeta hap. Ol i bilong olgeta lain bilong graun, tasol ol i no save insait long ol kros pait bilong dispela graun, maski ol lain politik na ol lotu i strong long ol i mas mekim olsem. Jehova i skulim lain bilong em na ol i stap wanbel na bel isi. (Aisaia 54:13) Ol i no save insait long ol pait politik. Ol i no save insait long olgeta kain pait. Bipo sampela ol i man bilong pait, tasol ol i lusim pinis dispela pasin. Ol i kamap Kristen i save laikim tumas pasin bilong i stap bel isi na ol i bihainim pasin bilong Krais Jisas. Na ol i givim bel long bihainim tok bilong Pita, olsem: “Sapos man i laik bai laip bilong en i kamap gutpela, na em i laik lukim gutpela taim, orait em i no ken mekim tok nogut na em i no ken mekim ol tok giaman. Em i mas givim baksait long pasin nogut, na bihainim gutpela pasin tasol. Em i mas wok long kamap wanbel wantaim ol arapela manmeri, na em i mas strong long bihainim dispela pasin.”—1 Pita 3:10, 11; Efesus 4:3.
Ol i Wok Strong Long Kamap Wanbel Wantaim Ol Man
7 Yumi ken tingim stori bilong Rami Oved, bipo em i ofisa bilong wanpela lain ami ol i save mekim pait long ol lain i birua long gavman. Em i bin lain long kilim i dai ol birua. Em i givim bel tru long kantri bilong em, Israel, i go inap long taim em i kisim save olsem ol rabai i no laik bai em i maritim meri em i laikim tumas. Bilong wanem ol i no laik? Long wanem, meri em i bilong Esia—em i no bilong lain Juda. Kirap long dispela taim, Rami i wok long painim tok i tru bilong Baibel. Bihain em i bungim ol Witnes Bilong Jehova. Em i stadi wantaim ol Witnes long Baibel na nau em i save, em i no ken strong moa long litimapim kantri bilong em. Bilong bihainim pasin Kristen bilong laikim tru ol narapela, em i mas lusim pait na ol gan na em i mas lain long laikim ol manmeri bilong olgeta lain. Wanpela taim em i kisim pas, na namba wan tok bilong pas i tok olsem, “Brata bilong mi, Rami”! Em i kirap nogut long dispela tok. Bilong wanem em i kirap nogut long en? Long wanem, meri bilong raitim pas em i wanpela Witnes bilong Palestain. Rami i tok: “Ol Palestain i birua bilong mi, tasol wanpela i kolim mi ‘Brata.’ ” Long nau Rami wantaim meri bilong em i wok strong long kamap wanbel wantaim ol man olsem God i makim.
8 Na yumi ken tingim stori bilong Georg Reuter, bipo em i insait long ami bilong Jemani i bin go na pait long Rasia long Namba 2 Pait. Bihain em i save, dispela tingting bilong Hitler long bosim olgeta hap bilong graun em i wanpela tingting nating i no gat as bilong en. Taim pait i pinis na em i kam bek long Jemani, em i kirap stadi wantaim ol Witnes Bilong Jehova. Em i stori olsem: “Nau tingting bilong mi i klia liklik. Mi save God i no gat asua long blut bilong planti man i kapsait. . . . Mi kisim save olsem God i gat laik long kamapim gutpela paradais long olgeta hap bilong graun, na olgeta man i bihainim tok bilong em bai ol i kisim ol gutpela blesing tru bilong i stap oltaim oltaim. . . . Hitler i bin hambak na tok long kamapim ‘Gavman Bilong i Stap Inap Wan Tausen Yia,’ tasol gavman bilong em i stap 12-pela [yia] tasol na i pinis, na dispela gavman bilong em i kamapim ol wok nogut tru bilong bagarapim ol man! Nau mi save, Krais tasol . . . inap bosim dispela graun inap long wan tausen yia na kamapim gutaim long graun—na em bai mekim olsem.” Inap 50 yia nau, long olgeta de Georg i save mekim wok bilong autim tok long gutaim tru God bai kamapim.
9 Taim ol Natsi i bosim Jemani, ol brata bilong yumi long Jemani i save laikim tru bel isi, ol i bin stap gut long God na ol i no insait long pait, na long dispela pasin ol i bin mekim, ol i kisim nem, na dispela nem i mekim wok yet olsem witnes i kam inap nau, em olsem 50 yia bihain. I gat wanpela buklet, em Holocaust Memorial Museum bilong Wosington, D.C., i bin wokim, na buklet i tok: “Ol Witnes Bilong Jehova i bin kisim nogut tru aninit long gavman Natsi. . . . Klostu olgeta ol i gat strongpela bel na i no pret long sakim [tok bilong ol Natsi olsem ol i mas lusim lotu bilong ol], na long taim ol i givim bikpela pen tru long ol, na mekim nogut long ol insait long ol banis kalabus, na sampela taim ol i kilim ol i dai; na planti man i bin kisim save long dispela pasin bilong ol, ol i litimapim nem bilong ol.” Na buklet i tok moa olsem: “Taim ol narapela ami i kam na i wok long lusim ol man long ol banis kalabus, ol Witnes i mekim yet wok bilong ol na ol i go namel long ol man i bin abrusim bagarap na ol i autim tok bilong kirapim ol long tanim bel.”
Bikpela Senis Moa Yet
10 Olsem wanem? Dispela i makim olsem ol Witnes Bilong Jehova i ting ol bai kirapim planti lain long tanim bel na kisim bilip Kristen olsem ol i no ken insait long ol pait, na long dispela rot ol inap kamapim gutaim long graun? Nogat! I mas i gat bikpela senis moa yet i kamap bambai gutaim i ken kamap gen long graun. Wanem dispela senis? Ol gavman bilong graun em ol i save brukim ol man i stap narapela narapela lain, na mekim hatpela pasin long ol, na bagarapim ol man, ol dispela gavman i mas pinis bambai Kingdom bilong God i ken bosim graun, em dispela Kingdom Jisas i bin lainim ol disaipel long beten long em i mas kam. (Matyu 6:9, 10) Tasol dispela senis bai kamap olsem wanem? Long wanpela driman God i givim long em, profet Daniel i kisim save olsem long taim bilong las de, Kingdom bilong God, olsem wanpela traipela ston “em yet i bruk long maunten,” em bai brukbrukim wanpela traipela imis i makim ol bikpela gavman politik bilong graun. Bihain em i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:31-44.
11 Bilong wanem dispela bikpela senis bai kamap long graun? Long wanem, Jehova i tok pinis olsem em bai rausim olgeta man i wok long bagarapim graun. (KTH 11:18) Dispela bikpela senis bai kamap taim Jehova i mekim stretpela pait bilong em long Satan na ol lain nogut bilong em long graun. Kamapim Tok Hait 16:14, 16 i tok: “Ol dispela spirit nogut tru i save wokim ol kain kain mirakel, na ol i go nabaut long ol king [olsem ol gavman politik] bilong olgeta kantri bilong graun. Ol i laik mekim ol king i bringim ol ami bilong ol i kam bung, bai ol i ken kirapim pait long dispela bikpela de bilong God I Gat Olgeta Strong i kotim ol manmeri. Orait ol spirit nogut i bringim ol king i kam bung long dispela hap, long tok Hibru ol i kolim Armagedon.”
12 Tasol Armagedon bai i olsem wanem? Em i no olsem wanpela pait nuklia i pinisim olgeta samting i stap long graun, na em i no olsem wanpela bikpela bagarap i kamap long pasin bilong ol man long mekim nabaut long ol samting bilong graun, nogat. Em i pait bilong God bilong pinisim olgeta pait bilong graun na olgeta man i save kirapim ol lain long mekim pait. Em i pait bilong God bilong kamapim gutaim tru bilong ol man i laik tumas long i stap isi wantaim ol narapela man. Yes, Armagedon bai kamap olsem Jehova i tok pinis. Em i no ken kamap bihaintaim. Jehova i kirapim profet Habakuk long raitim dispela tok: “Taim bilong ol dispela samting i mas kamap, em i no yet. . . . Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:3) Yumi ol man bilong graun i laikim ol samting i mas kamap hariap, olsem na yumi inap ting Jehova i lusim taim long kamapim Armagedon. Tasol nogat. Jehova i save mekim ol samting long taim stret bilong en. Armagedon bai kamap long aua stret olsem Jehova i bin makim long bipo yet.
13 Dispela pait bai opim rot long gutaim tru i ken kamap! Tasol bilong gutaim tru i ken kamap strong, narapela samting i mas kamap pastaim—dispela man i save kirapim ol man long brukim lain, na bel nogut long narapela, na birua long narapela, em i mas pinis. Na Baibel i tok profet long dispela samting bai kamap taim Armagedon i pinis. Satan, dispela man bilong kamapim ol pait na papa bilong pasin bilong tok giaman, em bai kalabus long hul i no gat as. Aposel Jon i bin lukim dispela samting i kamap long wanpela driman olsem tok profet, na em i stori long en long Kamapim Tok Hait 20:1-3: “Orait mi lukim wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim, na bihain ol i mas lusim em, na long sotpela taim tasol em i ken i go nabaut.”
14 Dispela em i no wanpela driman nating; em i tok promis bilong God. Na Baibel i tok: “God i no inap tru long giaman.” (Hibru 6:18) Olsem na long rot bilong profet Jeremaia, Jehova inap tok olsem: “Oltaim mi save laikim tumas olgeta manmeri bilong graun na mi save mekim gutpela na stretpela pasin long ol. Mi Bikpela, mi save amamas long mekim dispela kain pasin.” (Jeremaia 9:24) Tru tumas, Jehova i save mekim stretpela kot, na em i amamas long dispela gutaim em bai kamapim long graun.
King Bilong Gutaim i Bosim Graun
15 Jehova i laik bai olgeta manmeri i stap aninit long Kingdom bilong em ol i ken i stap bel isi tru, olsem na em i givim wok king long Krais Jisas, em King tru bilong kamapim gutpela sindaun na bel isi, olsem Aisaia 9:6, 7 i tok: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi.’ . . . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim. . . . Bikpela I Gat Olgeta Strong . . . bai i mekim ol dispela samting i kamap.” Na man bilong raitim Song em tu i tok profet long gutpela wok king bilong Mesaia, olsem: “Taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap.”—Song 72:7.
16 Na tu, 144,000 brata bilong Krais em God i bin makim ol long spirit holi, ol tu bai mekim wok king wantaim em long heven. Pol i tok long dispela lain olsem: “Long liklik taim, God bilong givim gutpela sindaun na bel isi long yumi, em bai i larim yupela i krungutim Satan aninit long lek bilong yupela. Marimari bilong Jisas, Bikpela bilong yumi, em i ken i stap wantaim yupela.” (Rom 16:20) Yes, taim Krais i winim pait na i daunim dispela man bilong kirapim pait, em Satan, ol brata bilong Krais bai insait long dispela samting!
17 Orait nau yu mas tingim wanpela askim: Yu mas mekim wanem na bai yu ken i stap long dispela gutaim tru? Gutaim tru inap kamap long wanpela rot tasol—em rot God i makim. Sapos yu laik stap long dispela gutaim, i gat sampela samting yu mas mekim. Yu mas bilip long dispela King bilong kamapim gutaim. Olsem na yu mas bilip olsem Krais em i Man bilong baim bek ol sinman bilong graun. Jisas yet i bin mekim tok yumi lukim long Jon 3:16, em planti man i save long en. Em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Olsem wanem long yu? Yu laik bilip olsem Krais Jisas em i rot God i bin makim bilong kamapim gutaim tru na kisim bek ol man? I no gat narapela nem aninit long heven em inap kamapim gutaim tru na em inap tok promis tru long kamapim. (Filipai 2:8-11) Bilong wanem i no gat narapela? Long wanem, Jisas em Man God i Makim. Em i nambawan man tru i bin autim tok long graun long gutaim bai kamap. Bai yu putim yau long tok bilong Jisas na bihainim pasin bilong em?
18 Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Nau em taim bilong go oltaim long ol miting bilong ol Witnes Bilong Jehova long Haus Kingdom na kisim stretpela save. Ol dispela miting i save skulim yumi. Ol bai kirapim yu long tokim ol narapela man long ol save yu kisim, na tokim ol long gutpela samting yu bilip na wet long en. Yu tu inap kamap man bilong autim tok long bel isi God i save givim. Na yu inap i stap bel isi long nau sapos yu bilip na wetim God Jehova, olsem Aisaia 26:3 i tok: “Ol i stap aninit long yu na tingting bilong ol i stap strong long yu tasol. Olsem na yu save mekim pasin bel isi i pulap tru long ol.” Yumi mas bilip long husat? “Bikpela [“Jehova,” NW] em i strongpela ples hait bilong yumi. Na em bai i stap olsem oltaim. Olsem na yumi mas bilip tru long em na aninit long em oltaim.”—Aisaia 26:4.
19 Nau yu mas mekim ol samting i kamapim klia olsem yu laik kisim laip i stap oltaim long nupela taim God bai kamapim, em bel isi bai stap long en. Long Kamapim Tok Hait 21:3, 4, God i tok promis olsem: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Em dispela taim bilong bel isi yu laik tru long i stap long en long bihain, a?
20 Sapos olsem, orait tingim samting God i tok promis long en: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap. Yu tingting long man i no gat asua long wanpela samting, na lukim stretpela man. Man i save sindaun isi wantaim ol arapela manmeri, lain bilong en bai i stap oltaim.” (Song 37:11, 37) Taim dispela de bilong amamas i kamap, bai yumi tok: “Em nau! Gutaim tru i kamap pinis! Mi tenkyu tru long God Jehova, em i As bilong gutaim tru!”
Yu Inap Stori Long Dispela?
◻ Wanem samting inap helpim man long senisim tingting na pasin bilong em?
◻ Olsem wanem lain Witnes Bilong Jehova i bin kamapim klia olsem ol i laikim tumas bel isi? Olsem wanem long ol wan wan?
◻ Jehova bai mekim wanem long ol man i save kirapim ol lain long bel nogut long ol narapela na mekim pait?
◻ Taim King Bilong Gutaim i bosim graun, wanem ol gutpela samting bai kamap?
[Askim Bilong Stadi]
1. Wanem tok bilong Aisaia bai kamap tru, em planti man i save long en?
2. Aisaia 2:2, 3 i tok long wanem samting bai kamap “long wanpela taim bai i kamap bihain”?
3. Olsem wanem man bilong kros na pait inap senis na kamap man bilong bel isi?
4. Olsem wanem man inap kamap olsem nupela man na stap bel isi wantaim ol narapela man?
5. Dispela “nupela lo” Jisas i givim long ol disaipel, olsem wanem dispela i helpim ol long i stap wanbel tru?
6. Bilong wanem ol Witnes Bilong Jehova i stap wanbel, tasol ol man bilong dispela graun nogat?
7, 8. Stori long sampela man em ol i lusim pinis pasin bilong pait na nau ol i wok strong long kamap wanbel wantaim ol man. (Kamapim sampela narapela stori yu save long en.)
9. Ol samting i painim ol Witnes Bilong Jehova long Jemani taim ol Natsi i bosim Jemani, olsem wanem dispela i kamapim klia olsem ol i gat strongpela bel tasol ol i save laikim tru bel isi?
10. (a) Wanem bikpela senis i mas kamap pastaim na bai gutaim tru i ken kamap long graun? (b) Buk Daniel i stori olsem wanem long dispela samting?
11. Jehova bai kamapim dispela bikpela senis long wanem rot?
12. Armagedon bai i olsem wanem?
13. God bai mekim wanem long Satan, em i as tru bilong ol pait?
14. Yumi ken stori olsem wanem long dispela samting Jehova bai mekim long daunim Satan?
15, 16. (a) Jehova i makim husat long kamap King? (b) Baibel i stori olsem wanem long wok king bilong em? Husat bai mekim wok king wantaim em?
17. Yumi mas mekim wanem na bai yumi inap stap long dispela gutaim tru?
18. Yumi mas mekim wanem na bai yumi bihainim tok bilong Jisas long Jon 17:3?
19, 20. Wanem ol gutpela samting i wetim ol man em ol i wok strong nau long kamap wanbel wantaim ol man?
[Ol Piksa long pes 14]
Ol man i bihainim tok bilong Jehova ol i truim tok profet bilong Aisaia, Yunaitet Nesen nogat
[Ol Piksa long pes 15]
Tupela man hia i senisim pasin bilong ol na ol i kamap man bilong bel isi
Rami Oved
Georg Reuter
[Piksa long pes 16]
Gutaim tru bai kamap taim King Bilong Gutaim i bosim graun