LESEN 53

Makim Ol Amamas Em Jehova i Orait Long En

Prin Edisen

Jehova em “God bilong amamas.” (1 Timoti 1:11) Em i laik bai yumi stap gut na amamas long laip bilong yumi. Em i laik bai yumi malolo long wok na kisim amamas sampela taim. Long dispela lesen, bai yumi lukim hau yumi ken yusim gut taim bilong yumi long malolo long ol rot we yumi bai kisim amamas—na tu, yumi amamasim Jehova.

1. Yumi mas tingim wanem samting taim yumi makim ol amamas yumi laik kisim?

Yu laik mekim wanem taim yu kisim malolo? Sampela i laik yusim taim bilong ol long malolo long stap isi tasol long haus—ritim buk, harim ol musik, watsim muvi, o lukluk long Intenet. Na sampela i amamas long mekim ol samting wantaim ol pren bilong ol—raun long bus, go was was, o pilai gem. Maski wanem kain amamas yumi makim, yumi laik bai “Bikpela i orait long en.” (Efesus 5:10) Em i bikpela samting long yumi mas kliagut long dispela bikos planti amamas long nau i kamapim ol samting we Jehova i heitim, olsem pait na kilim man i dai, pasin pamuk, na wok bilong ol spirit nogut. (Ritim Buk Song 11:5.) Wanem samting bai helpim yumi long makim gut ol amamas yumi laik kisim?

Sapos yumi gat ol pren husat i laikim Jehova, gutpela pasin bilong ol inap helpim yumi na i stiaim yumi long makim gut ol amamas yumi laik kisim. Olsem yumi lainim long wanpela lesen i go pinis, “man i wokabaut wantaim ol man i gat savetingting, em bai gat savetingting.” Tasol sapos yumi save poroman wantaim ol man i no laikim ol lo bilong God “trabel bai painim” yumi.—Provep 13:20.

2. Wai na em i bikpela samting long bosim gut hamas taim yumi lusim long ol amamas?

Maski amamas yumi kisim em i gutpela, yumi mas was gut long hamas taim yumi lusim long kisim dispela amamas. Nogut yumi no gat inap taim long mekim ol samting we i bikpela samting. Baibel i kirapim yumi long “yusim gut taim [bilong yumi].”—Ritim Efesus 5:15, 16.

KISIM SAMPELA SAVE MOA

Kisim save long hau yu inap mekim ol gutpela disisen long ol amamas yu laik kisim.

3. Sakim ol amamas nogut

Wai na yumi mas makim gut ol amamas yumi laik kisim? Pilaim VIDIO, na stori long ol dispela askim.

VIDIO: Bai Mi Makim Wanem Kain Amamas? (4:39)

Hau pait bilong ol gladieta bilong Rom bilong bipo i wankain long sampela amamas bilong nau?
Long vidio, Danny i kisim wanem skul long ol samting bilong amamas?

Ritim Rom 12:9, na stori long dispela askim:

Olsem wanem dispela ves i ken helpim yu long makim gut ol amamas yu laik kisim?

Wanem sampela samting Jehova i heitim? Ritim Provep 6:16, 17 na Galesia 5:19-21. Taim yupela i ritim wan wan skripsa pinis, stori long dispela askim:

Wanem ol pasin em dispela ves i kolim i stap insait long ol amamas bilong nau?

Ol askim bilong helpim yu long makim gut ol amamas

Askim yu yet:

Wanem? Dispela amamas i gat wanem ol samting em Jehova i heitim?
Taim? Em i pulim taim bilong mi long mekim ol samting we i bikpela samting moa?
Husat? Em i pulim mi long pas olgeta taim wantaim ol man i no laikim Jehova?

Sapos yumi stap longwe long ol samting inap bagarapim yumi, yumi bai stap gut. Em risen na yumi mas stap longwe long ol amamas em yumi lukim olsem i no gutpela long yumi

Wanpela kar i ron long rot arere stret long sait bilong maunten. As bilong kar i klostu go daun arere bilong rot.

4. Yusim gut taim bilong yu

Pilaim VIDIO, na stori long dispela askim.

VIDIO: Wanem Samting i Bosim Taim Bilong Yu? (2:45)

Long vidio, dispela brata i no lukim ol samting i nogut, tasol ol samting em i mekim long taim bilong em long malolo i mekim wanem long em?

Ritim Filipai 1:10, na stori long dispela askim:

Olsem wanem dispela ves i helpim yumi long makim hamas taim yumi laik lusim bilong kisim amamas?

5. Makim ol gutpela amamas

Tru, i gat sampela amamas em Jehova i no laikim, tasol i gat planti amamas we em i orait long en. Ritim Eklisiastis 8:15 na Filipai 4:8, na stori long dispela askim:

Wanem ol gutpela amamas yu laikim?

Ol piksa: Ol manmeri i gat kain kain krismas i mekim ol kain kain samting bilong kisim amamas. 1. Wanpela gel i harim musik na droim piksa. 2. Tripela yangpela man i pilai basketbal. 3. Tupela mangi i raun long baisikol. 4. Liklik mangi i wokim toi kar. 5. Wanpela man i paitim dram. 6. Liklik mangi i pilai vidio gem wantaim papa bilong em. 7. Wanpela meri i kisim foto. — I gat kain kain gutpela samting yu ken mekim bilong kisim amamas

SAMPELA MAN I TOK: “I no gat rong long watsim ol piksa i gat pasin bilong pait na kilim man i dai, pasin pamuk, o wok bilong ol spirit nogut, bikpela samting em mi yet i no mekim ol dispela pasin.”