“Bihainim Olgeta Pasin i Save Mekim Yumi i Stap Wanbel”

WANPELA nupela rot ol i wokim na putim kolta long en, em i strong na i no gat wanpela samting inap bagarapim. Tasol bihain long sampela yia, rot inap bruk na ol pot-hol inap kamap. Ol i mas stretim gut rot na bai rot i stap gut, na tu, bai ol man i no ken kisim bagarap.

Olsem tasol, sampela taim pasin pren bilong yumi wantaim ol narapela inap bagarap o bruk. Aposel Pol i luksave olsem ol Kristen long Rom i gat narapela narapela tingting long ol samting. Em i tokim ol wanbilip Kristen olsem: “Yumi mas bihainim olgeta pasin i save mekim yumi i stap wanbel, na olgeta pasin i save strongim bilip bilong ol arapela.” (Ro. 14:​13, 19) Bilong wanem yumi mas “bihainim olgeta pasin i save mekim yumi i stap wanbel”? Olsem wanem yumi ken strongim bel na wok strong long i stap wanbel?

Bilong Wanem Yumi Mas i Stap Wanbel?

Sapos ol i no stretim ol bruk bruk long kolta, dispela inap kamap ol bikpela pot-hol na inap kamapim bagarap. Olsem tasol, sapos yumi no stretim ol hevi i kamap namel long yumi yet na ol narapela, dispela inap kamapim samting nogut. Aposel Jon i tok: “Sapos wanpela man i tok, ‘Mi laikim tru God,’ tasol em i no laikim wanpela bilong ol arapela manmeri bilong God, orait dispela man em i man bilong giaman. I no gat wanpela man i bin lukim God. Olsem na man i no save laikim ol arapela, em ol manmeri em i lukim pinis, em i no inap laikim God em i no bin lukim.” (1 Jo. 4:20) Sapos tupela Kristen i no stretim hevi i stap namel long tupela, dispela inap kirapim wanpela long heitim narapela brata bilong em.

Jisas Krais i kamapim klia olsem Jehova i no inap orait long lotu yumi mekim sapos yumi no stap wanbel wantaim ol narapela. Jisas i tokim ol disaipel bilong em: “Sapos yu bringim ofa bilong yu i kam long alta, na yu tingim brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.” (Mt. 5:​23, 24) Yes, as tru na yumi laik stap wanbel wantaim ol narapela em yumi laik amamasim God Jehova.a

Wanpela samting i bin kamap long kongrigesen long Filipai i kamapim klia narapela as na yumi mas i stap wanbel wantaim ol narapela. Wanpela hevi i stap namel long tupela sista Kristen em Yuodia na Sintike, na dispela i laik bagarapim pasin wanbel bilong kongrigesen olgeta. (Fl. 4:​2, 3) Sapos yumi no stretim hevi i kamap namel long yumi na narapela, wantu ol man inap luksave long en. Strongpela laik bilong holimpas pasin laikim na pasin wanbel insait long kongrigesen, dispela i save kirapim yumi long bihainim pasin bilong i stap wanbel wantaim ol wanbilip bilong yumi.

Jisas i tok: “Ol manmeri i save mekim dai ol kros na pait, em ol i ken amamas.” (Mt. 5:⁠9) Pasin bilong wok strong long i stap bel isi i save mekim yumi belgut na amamas. Na tu, pasin bilong stap bel isi i save helpim helt bilong yumi, long wanem, “sapos man i stap bel isi, orait bodi bilong en bai i stap gut.” (Snd. 14:30) Tasol sapos yumi save holim kros long bel, dispela inap mekim yumi sik.

Planti Kristen bai wanbel olsem pasin bilong wok strong long stap bel isi em i bikpela samting, tasol ating yu laik save long olsem wanem yu inap stretim hevi namel long yu na narapela. Yumi ken skelim ol stiatok bilong Baibel bilong stiaim yumi.

Toktok Wantaim Long Pasin Isi i Kamapim Bel Isi

Sapos ol i karamapim ol liklik bruk bruk long kolta, ol inap stretim rot i bagarap. Yu ting i gat rot long yumi ken lusim na karamapim ol liklik rong bilong ol brata bilong yumi? Sapos yumi mekim olsem, dispela bai stretim hevi i stap namel long yumi na narapela, long wanem, aposel Pita i tok “pasin bilong laikim tru ol arapela, em i save karamapim planti sin.”​—⁠1 Pi. 4:⁠8.

Tasol sampela taim, hevi i bikpela tru na yumi no inap karamapim tasol. Tingim samting i bin painim lain Israel bihain tasol long ol i go insait long Graun Bilong Promis. Paslain long “ol man bilong lain bilong Ruben na lain bilong Gat na hap lain bilong Manase” i brukim wara Jordan, ol i sanapim “wanpela bikpela alta.” Ol hap lain bilong Israel i ting olsem ol i mekim wok long dispela alta bilong lotuim ol giaman god, olsem na ol i no laik larim dispela hevi i stap olsem tasol. Ol i redi long pait.​​—⁠Jos. 22:​9-​12.

Ating sampela Israel i pilim olsem i gat ol samting i kamapim klia olsem ol hap lain i mekim rong pinis, olsem na sapos ol i hait na mekim pait, orait planti man long lain bilong ol i no inap i dai. Tasol ol i no kirap kwik na mekim samting, dispela lain long hap wes bilong wara Jordan i salim ol man long lain bilong ol i go bilong stretim hevi wantaim ol brata bilong ol. Ol i askim: “Bilong wanem yupela i mekim dispela samting nogut long God bilong yumi? . . . Yupela i no moa bihainim [em].” Dispela hap lain i wokim alta, ol i no lusim Jehova na i laik lotuim giaman god, nogat. Tasol ol bai mekim wanem samting bilong stretim tok em hap lain i sutim long ol? Ol bai kros long ol man i sutim tok long ol o ol bai pasim maus na ol i no toktok long ol? Dispela lain i bin wokim alta, ol i bekim tok isi na ol i tok klia olsem as na ol i wokim dispela alta em bilong lotuim Jehova. Pasin bilong ol long bekim tok isi i mekim na ol i pas gut yet wantaim God na laip bilong ol i no lus. Pasin bilong toktok wantaim long pasin isi i stretim hevi na ol i stap wanbel gen.​​—⁠Jos. 22:​13-​34.

Paslain long mekim samting nogut, ol hap lain Israel i bihainim gutpela tingting na ol i toktok long dispela hevi wantaim lain bilong Ruben, Gat, na hap lain bilong Manase. Baibel i tok: “Yu no ken belhat kwik long narapela man, long wanem, belhat em i pasin bilong ol man i no gat gutpela tingting.” (Sav. 7:⁠9) Rot em Baibel i makim bilong stretim bikpela hevi namel long yumi na ol narapela, em olsem: Yumi mas toktok gut wantaim narapela na kamapim stret tingting bilong yumi na mekim long pasin isi. Yu ting Jehova bai blesim yumi sapos yumi holim kros long bel na yumi no mekim sampela samting bilong toktok wantaim man em yumi pilim olsem em i rongim yumi?

Tasol olsem wanem sapos wanpela Kristen i ting olsem yumi rongim em, o ating em i giaman na sutim tok long yumi? Baibel i tok: “Sapos man i belhat long yu, orait bekim tok isi long em, na bai belhat bilong en i dai.” (Snd. 15:⁠1) Long pasin isi na long tok i klia, dispela hap lain em ol i bin sutim tok long ol, ol i kamapim as bilong pasin ol i mekim na dispela i pinisim dispela tingting kranki em hap lain brata bilong ol i gat. Maski yumi go pas na toktok wantaim brata bilong yumi long wanpela hevi o em i toktok long yumi long wanpela hevi, yumi mas askim yumi yet olsem: ‘Wanem ol tok, krai bilong nek, na pasin bilong toktok bai kamapim pasin wanbel?’

Tingim Gut Tok Yu Mekim

Jehova i save olsem yumi mas kamapim tingting bilong yumi long ol narapela. Sapos yumi no stretim hevi namel long yumi na narapela, bai yumi laik stori long ol narapela long dispela samting. Sapos yumi holim kros long bel, dispela inap mekim na yumi mekim ol tok i no stret. Sindaun 11:11 i tok long pasin bilong mekim wok nogut long maus olsem: “Ol man bilong mekim pasin nogut, ol i save mekim kain kain tok nogut, na dispela i save bagarapim taun.” Olsem tasol, pasin bilong i no bosim gut maus na mekim ol tok nabaut long ol wanbilip Kristen, dispela inap bagarapim pasin wanbel bilong kongrigesen.

Wok strong long i stap wanbel, dispela i no makim olsem yumi no ken toktok long ol samting bilong ol brata na sista bilong yumi, nogat. Aposel Pol i tokim ol wanbilip: “Yupela i no ken larim ol kain kain tok nogut i kamap long maus bilong yupela. Nogat.” Na em i tok moa olsem: “Gutpela tok tasol i mas kamap, inap long strongim ol man. . . . Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol.” (Ef. 4:​29-​32) Sapos wanpela brata o sista i kam tokim yu olsem toktok o pasin bilong yu i mekim em i bel hevi, ating em bai isi long yu tok sori na kamap wanbel gen sapos pastaim dispela brata o sista i save kamapim ol gutpela stori bilong yu long ol narapela. Olsem na sapos yumi gat pasin bilong toktok long ol gutpela samting bilong ol wanbilip Kristen, taim hevi i kamap em bai isi long yumi stretim hevi na kamap wanbel.​​—⁠Lu. 6:⁠31.

“Wanbel” Long Mekim Wok Bilong God

Sin i stap long skin bilong yumi i mekim na yumi laik stap longwe long ol man i rongim yumi na yumi laik stap yumi yet tasol. Tasol dispela kain pasin em i no gutpela. (Snd. 18:⁠1) Yumi lain i stap wanbel na nem bilong Jehova i stap long yumi, yumi laik wok strong long stap “wanbel” long mekim wok bilong em.​​—⁠Sef. 3:⁠9.

Pasin kranki o tok i no stret em narapela i mekim, dispela i no ken daunim pasin bilong yumi long givim bel tru long lotu i tru. Sampela de paslain tasol long ofa bilong Jisas i pinisim pasin bilong mekim ofa long tempel, na bihain tasol long Jisas i tok strong long ol saveman bilong lo, em i lukim wanpela rabismeri i putim long bokis mani bilong tempel “olgeta mani em i holim bilong baim kaikai bilong en.” Olsem wanem? Jisas i traim long pasim em? Nogat, em i mekim gutpela tok long pasin dispela meri i mekim bilong sapotim kongrigesen bilong Jehova long dispela taim. (Lu. 21:​1-4) Pasin kranki bilong ol narapela i no pasim em long mekim samting em i mas mekim bilong sapotim ol wok bilong lotuim Jehova.

Maski yumi pilim olsem wanpela brata o sista Kristen i mekim pasin i no stret, bai yumi mekim wanem? Bai yumi larim dispela i bagarapim pasin bilong yumi long givim bel olgeta long mekim wok bilong Jehova? O bai yumi strongim bel na mekim ol samting bilong stretim ol hevi i kamap namel long yumi na narapela bambai bel isi i ken i stap yet insait long kongrigesen bilong God long nau?

Baibel i tokim yumi: “Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.” (Ro. 12:18) Yumi mas tingting strong long mekim olsem na wokabaut gut yet long dispela rot i go long laip.

[Futnot]

[Piksa long pes 17]

Yuodia na Sintike i mas wok strong long stap wanbel wantaim

[Piksa long pes 18]

Wanem ol tok, krai bilong nek, na pasin bilong toktok, bai kamapim pasin wanbel?