Helpim Ol Long Kam Bek Kwiktaim!
“Bai mipela i go long husat? Tok bilong yu tasol i save givim laip i stap gut oltaim oltaim.”—JO. 6:68.
1. Taim planti disaipel i lusim Jisas, Pita i tok wanem?
WANPELA taim, planti disaipel husat i no wanbel long wanpela tok bilong Jisas Krais ol i lusim em. Jisas i askim ol aposel: “Ating yupela tu i laik lusim mi na i go?” Pita i bekim tok: “Bikpela, bai mipela i go long husat? Tok bilong yu tasol i save givim laip i stap gut oltaim oltaim.” (Jo. 6:51-69) Ol i no inap kisim dispela tok long narapela rot, nogat. Lotu Juda long dispela taim i no gat ol tok “i save givim laip i stap gut oltaim oltaim,” na long nau, yumi no inap painim dispela tok long Bikpela Babilon, em olgeta lotu giaman. Ol bratasista i bin lusim lain sipsip bilong God, tasol ol i laik mekim ol samting Jehova i laikim, “nau em i taim” bilong kam bek long lain sipsip.—Ro. 13:11.
2. Pablisa i mas mekim wanem sapos em i kisim save long samting em ol elda i mas harim long kot o samting ol elda tasol i mas save long en?
2 Jehova i bin soim olsem em i tingim tru ol sipsip bilong lain Israel i lus. (Ritim Esekiel 34:15, 16.) Na olsem tasol, ol elda Kristen i gat laik, na ol i gat wok tu, long helpim ol man i kain olsem sipsip em ol i bin lusim lain sipsip. Sapos ol i makim wanpela pablisa long stadi wantaim wanpela wanbilip i no kam moa long ol miting na em i laik kisim helpim, orait pablisa i mas mekim wanem sapos em i kisim save olsem dispela wanbilip i bin mekim wanpela bikpela rong? Pablisa i no ken toktok wantaim em long samting em ol elda i mas harim long kot o samting ol elda tasol i mas save long en. Pablisa i mas tokim em long toksave long ol elda. Sapos em i no mekim olsem, orait pablisa yet i mas tokim ol.—Wkp. 5:1; Ga. 6:1.
3. Man i gat 100 sipsip em i mekim wanem taim em i painim pinis wanpela sipsip i lus?
3 Long stadi i kamap paslain long dispela, yumi bin stori long tok piksa bilong Jisas long man i gat 100 sipsip. Taim wanpela bilong ol i lus, em i lusim ol 99 sipsip i stap na i go painim dispela wanpela sipsip. Taim em i painim pinis, em i amamas tru! (Lu. 15:4-7) Yumi tu i save kisim wankain amamas taim wanpela sipsip bilong God i kam bek long lain sipsip. Ating ol elda na ol narapela long kongrigesen em ol i gat pasin laikim, ol i bin i go lukim dispela wanbilip i no kam moa long ol miting. Ol tu i laik bai em i kam bek long lain sipsip na bai God i ken helpim, lukautim, na mekim gut long em. (Lo 33:27; Sng. 91:14; Snd. 10:22) Sapos i gat rot long ol i ken helpim em long kam bek, ol i ken mekim wanem?
4. Yumi kisim wanem save long tok bilong Galesia 6:2, 5?
4 Ating ol i ken strongim dispela wanbilip long kam bek long kongrigesen long rot bilong helpim em long save olsem Jehova i save laikim ol sipsip bilong Em na ol samting em i laik yumi mas mekim, em ol samting yumi inap long mekim. Jehova i laik bai yumi stadi long Baibel, go long ol miting Kristen, na autim gutnius bilong Kingdom. Ol i ken ritim Galesia 6:2, 5 na tok, ol Kristen i ken helpim ol arapela long karim hevi bilong ol, tasol ‘olgeta wan wan i mas karim hevi bilong ol yet,’ olsem mekim ol wok God i makim bilong ol long mekim. Narapela i no inap mekim dispela wok bilong yumi, nogat.
Ating Pasin Bilong “Wari Long Ol Samting” i Bin Daunim Ol?
5, 6. (a) Bilong wanem yumi mas putim gut yau taim ol wanbilip, em ol i no kam moa long ol miting, i kamapim tingting bilong ol? (b) Yu ken mekim wanem bilong helpim ol wanbilip i no kam moa long ol miting long save olsem dispela i bin nogutim ol?
5 Bilong ol elda na ol narapela strongpela pablisa i ken save long olsem wanem ol inap helpim ol wanbilip i no kam moa long ol miting, ol i mas putim gut yau taim ol dispela wanbilip i kamapim tingting bilong ol. Sapos yu wanpela elda na yu go lukim tupela marit em ol i no kam moa long ol miting, long wanem, pasin bilong “wari long ol samting” i bin daunim ol, orait yu bai mekim wanem? (Lu. 21:34) Ating hevi bilong mani o bikpela wok bilong lukautim famili i bin mekim na isi isi ol i bin lusim ol miting. Ating ol i pilim olsem ol i laik kisim liklik malolo, tasol yu ken tok, pasin bilong stap wanpis na i no bung moa wantaim ol bratasista, dispela i no inap helpim ol. (Ritim Sindaun 18:1.) Yu ken askim ol: “Nau yu no kam moa long ol miting, yu stap amamas? Sindaun bilong famili bilong yu i gutpela moa? Yu holim yet dispela amamas long bilip strong long Jehova?”—Neh. 8:10.
6 Taim ol i tingim ol dispela askim, ating dispela inap helpim ol long luksave olsem pasin bilong lusim ol miting i bin daunim amamas bilong ol na ol i no stap klostu long Jehova olsem long pastaim. (Mt. 5:3; Hi. 10:24, 25) Na ating yu inap helpim ol long luksave olsem ol i lus long dispela amamas i save kamap long wok bilong autim gutnius. (Mt. 28:19, 20) Olsem na i gutpela sapos ol i mekim wanem?
7. Ol wanbilip husat i bin lusim lain sipsip, yumi ken strongim ol long mekim wanem?
7 Jisas i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. . . . Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap.” (Lu. 21:34-36) Ol wanbilip i bin lusim lain sipsip, tasol ol i laik kisim bek dispela amamas bipo ol i gat, yumi ken strongim ol long beten askim God long givim holi spirit long ol na helpim ol na ol i mas mekim ol samting i stret wantaim ol beten bilong ol.—Lu. 11:13.
Ating Sampela Samting i Bin Mekim Ol i Pundaun?
8, 9. Olsem wanem elda inap toktok wantaim wanbilip em wanpela samting i bin mekim em i pundaun?
8 Yumi ol man i gat sin, olsem na sampela taim kros i save kamap namel long yumi, na dispela inap mekim man i pundaun. Sampela i bin pundaun taim wanpela long kongrigesen, em ol i rispek long em, i mekim sampela pasin i no stret long ol stiatok bilong Baibel. Sapos kain samting olsem i bin pundaunim wanpela na em i no kam moa long ol miting, orait elda i go lukim em i ken stori olsem, Jehova i no save mekim man i pundaun. Olsem na i no gat as na dispela man i lusim pasin bilong pas gut wantaim God na em i no bung moa wantaim lain bilong Em. Em i mas mekim yet wok bilong God, na bilip strong olsem “Jas bilong olgeta graun” i save long dispela samting i bin kamap na Em bai stretim. (Stt. 18:25; Kl. 3:23-25) Sapos wanpela man i wokabaut long rot na em i pundaun, bai em i no stap olsem tasol, nogat; wantu em bai kirap.
9 Taim elda i wok long helpim ol long kam bek, em i ken tok, bihain long sampela hap taim, sampela i luksave olsem samting i bin mekim ol i pundaun, dispela i no stap bikpela samting moa long ol. O ating samting i bin mekim ol i lusim Jehova em i no stap moa. Sapos wanpela i bin kisim sampela tok bilong stretim em na dispela i mekim em i pundaun, orait sapos em i beten na tingim gut dispela samting long bel, ating em inap luksave olsem em i bin mekim rong na i gutpela sapos em i no bin larim dispela samting i mekim em i pundaun.—Sng. 119:165; Hi. 12:5-13.
Ating Em i No Wanbel Long Wanpela Tok Bilong Baibel?
10, 11. Yu ken tok wanem bilong helpim wanpela i no wanbel long wanpela tok bilong Baibel?
10 Ating sampela i bin lusim lain sipsip bilong God, long wanem, ol i no wanbel long wanpela tok bilong Baibel. Ol Israel i bin lusim kalabus long Isip ol i “lusim tingting long ol samting Bikpela i bin mekim” bilong helpim ol, na ol i kirap “mekim ol samting long tingting bilong ol yet.” (Sng. 106:13) Ating yu ken kirapim wanbilip i no bung moa wantaim kongrigesen long tingim olsem “wokboi i gat gutpela tingting” i save tilim gutpela kaikai tru bilong spirit. (Mt. 24:45) Long dispela rot em i bin kisim save long tok i tru. Olsem na i gutpela sapos em i tingting strong long bihainim gen tok i tru.—2 Jo. 4.
11 Taim elda i laik helpim ol wanbilip i bin lusim lain bilong God, ating em i ken tokim ol long ol disaipel em ol i bin lusim Jisas, long wanem, ol i no wanbel long wanpela tok bilong em. (Jo. 6:53, 66) Taim ol dispela disaipel i lusim Jisas na ol i no bung moa wantaim ol disaipel tru bilong em, ol i lusim amamas bilong ol na pasin bilong ol long pilim tru ol samting bilong spirit. Olsem wanem? Ol bratasista i no kam moa long ol miting, ol i bin painim narapela rot we ol inap kisim gutpela kaikai bilong spirit? Nogat, long wanem, i no gat narapela rot!
Ating Ol i Bin Mekim Wanpela Bikpela Rong?
12, 13. Sapos wanpela husat i bin lusim lain sipsip em i tokaut olsem em i bin mekim wanpela bikpela rong, olsem wanem em inap kisim helpim?
12 Sampela i lusim wok autim tok na ol miting, long wanem, ol i bin mekim wanpela bikpela rong. Ol i ting olsem sapos ol i autim dispela rong long ol elda, ol bai rausim em long kongrigesen. Tasol sapos ol i no bihainim moa dispela pasin nogut na ol i tanim bel tru, ol i no inap raus long kongrigesen. (2 Ko. 7:10, 11) Ol elda bai amamas long ol i kam bek, na ol bai helpim ol long kamap strong gen long sait bilong spirit.
13 Sapos yu wanpela strongpela pablisa em ol i bin askim yu long helpim wanpela husat i no kam moa long ol miting, yu mas mekim wanem sapos em i tokaut olsem em i bin mekim wanpela bikpela rong? Olsem yumi stori pinis, no ken toktok moa wantaim em long dispela samting, tokim em long go lukim ol elda. Sapos em i no laik mekim olsem, orait soim olsem yu tingim nem bilong Jehova na kongrigesen na mekim samting God i tokim yumi long mekim long kain taim olsem. (Ritim Wok Pris 5:1.) Ol elda i save long rot bilong helpim brata o sista i gat laik long kam bek na bihainim pasin i stret wantaim laik bilong God. Bilong kisim helpim, ating em i mas kisim sampela tok bilong stretim em. (Hi. 12:7-11) Sapos em i tokaut olsem em i bin mekim rong long God, na em i no bihainim moa dispela pasin nogut, na em i tanim bel tru, ol elda bai helpim em, na Jehova bai lusim dispela rong bilong em.—Ais. 1:18; 55:7; Jem. 5:13-16.
Amamas Long Pikinini i Kam Bek
14. Long toktok bilong yu yet, stori long tok piksa bilong Jisas long pikinini i lusim papa.
14 Taim pablisa, em ol elda i bin askim em long helpim wanpela sipsip i lus, em i laik helpim dispela sipsip, ating em i ken stori long tok piksa bilong Jisas long Luk 15:11-24. Long dispela tok piksa, wanpela yangpela man i tromoi nating olgeta mani samting em i bin kisim long papa bilong em. Bihain em i les pinis long ol kain kain hambak pasin em i bin mekim. Em i hangre, em i misim famili bilong em, na em i tingting strong long i go bek long papa! Taim em i stap longwe yet, papa i lukim em i wokabaut i kam na em i ran i go na i holimpas pikinini na i givim kis long em na papa i belgut tru. Taim brata o sista i lusim kongrigesen i tingim dispela tok piksa, ating dispela inap kirapim em long kam bek long lain sipsip. Klostu nau pasin bilong dispela graun bai pinis, olsem na em i mas kam bek kwiktaim.
15. Bilong wanem na sampela i lusim kongrigesen isi isi?
15 Planti husat i lusim kongrigesen ol i no wankain stret long dispela pikinini i lusim papa. Long sampela, ol i lusim kongrigesen isi isi, kain olsem bot em anka i no holim na i drip isi isi i go. Pasin bilong wari long ol samting i mekim na sampela i lusim pasin bilong pas gut wantaim Jehova. Na sampela i larim pasin bilong narapela long kongrigesen i mekim ol i pundaun, o ol i lusim kongrigesen, long wanem, ol i no wanbel long wanpela tok bilong Baibel. Wan wan tasol i insait long pasin nogut. Ating dispela stadi inap helpim yu long strongim ol wanbilip—em ol dispela samting o sampela narapela samting i bin mekim na ol i lusim lain sipsip—long kam bek taim rot i op yet i stap.
“Welkam Bek, Pikinini!”
16-18. (a) Wanpela elda i mekim wanem bilong helpim wanpela brata em planti yia pinis em i no bin bung wantaim kongrigesen? (b) Wanem samting i bin mekim na dispela brata i lusim pasin bilong kam long ol miting? Em i kisim helpim olsem wanem? Kongrigesen i gat wanem tingting long em taim em i kam bek?
16 Wanpela elda Kristen i tok: “Lain elda long kongrigesen bilong mi ol i gat bikpela laik long go lukim ol wanbilip em ol i no kam moa long ol miting. Mi tingim wanpela brata mi bin stadi wantaim em na helpim em long kisim save long tok i tru. Inap 25 yia em i no bin kam moa long ol miting na em i gat planti hevi tru, olsem na mi stori wantaim em long olsem wanem pasin bilong bihainim ol stiatok bilong Baibel inap helpim em. Bihain, em i kirap long kam long Haus Kingdom na em i orait long wanpela i stadi wantaim em long Baibel bilong strongim tingting bilong em long kam bek long lain sipsip.”
17 Wanem samting i mekim na dispela brata i no bung moa wantaim kongrigesen? Em i tok: “Mi stat long tingim tumas ol samting bilong graun na mi no tingim tumas ol samting bilong spirit. Bihain mi lusim pasin bilong stadi, na autim tok, na go long ol miting. Mi no stap moa olsem wanpela bilong kongrigesen Kristen. Tasol dispela elda i soim olsem em i tingim mi na dispela i helpim mi.” Taim dispela brata i orait long wanpela i stadi wantaim em long Baibel, isi isi dispela i daunim ol hevi bilong em. Em i tok: “Mi luksave olsem samting mi lus long en em pasin bilong Jehova na oganaisesen bilong em long laikim na stiaim mi.”
18 Kongrigesen i gat wanem tingting long dispela brata i kam bek? Em i tok: “Mi pilim wankain olsem dispela pikinini i lusim papa em Jisas Krais i bin stori long en. Wanpela sista husat i bin stap long kongrigesen 30 yia i go pinis na em i strong yet long wok bilong Jehova, em i tok, ‘Welkam bek, Pikinini!’ Mi pilim tru dispela tok. Mi luksave olsem kongrigesen em ples we mi inap i stap gut. Mi tenkyu tru long gutpela pasin laikim, pasin bilong i no les kwik, na pasin bilong tingim mi, em dispela elda na kongrigesen olgeta i bin soim long mi. Pasin bilong ol long laikim Jehova na ol narapela, dispela i bin helpim mi long kam bek long lain sipsip.”
Kirapim Ol Long Kam Bek Kwiktaim!
19, 20. Olsem wanem yu inap kirapim ol wanbilip i no bung moa wantaim kongrigesen, long kam bek hariap long lain sipsip? Olsem wanem yu inap helpim ol long save olsem God i no putim bikpela mak tumas long yumi mas winim?
19 Yumi stap long taim bilong las de, na klostu nau pasin bilong dispela graun bai pinis. Olsem na ol wanbilip i no kam moa long ol miting Kristen, kirapim ol long kam bek. Kirapim ol long kirap kwik na kam long ol miting. Tokim ol olsem Satan i laik bagarapim pasin bilong ol long pas gut wantaim God, na em i laik bai ol i ting olsem ol inap kisim malolo long ol hevi bilong ol long rot bilong lusim pasin bilong lotu tru long God. Tokim ol olsem taim ol i stap disaipel tru bilong Jisas, long dispela rot tasol ol inap kisim malolo tru.—Ritim Matyu 11:28-30.
20 Kirapim ol long tingim dispela samting: God i laik bai yumi mekim ol samting yumi inap long mekim. Taim ol man i krosim Maria, em susa bilong Lasarus, long em i kapsaitim sanda i gat bikpela pe tru long het bilong Jisas paslain liklik long em i dai, Jisas i tok: “Yupela larim dispela meri. . . . Samting dispela meri inap mekim, em i mekim pinis.” (Mk. 14:6-8) Jisas i litimapim nem bilong wanpela wido i sot long ol samting, em i tromoi liklik mani tasol long bokis mani bilong tempel. Dispela meri tu i mekim samting em inap long mekim. (Lu. 21:1-4) Ating yumi olgeta inap kam long ol miting Kristen na insait long wok autim tok bilong Kingdom. Long rot bilong helpim Jehova i save givim, planti wanbilip em nau ol i no bung moa wantaim kongrigesen, ol inap kirap na mekim ol dispela samting.
21, 22. Bilong strongim bel bilong ol wanbilip i kam bek long Jehova, yu ken tokim ol long wanem samting?
21 Sapos wanpela wanbilip i lusim lain sipsip na em i pret long bungim gen ol brata, yu ken kirapim em long tingim dispela pikinini i lusim papa na bikpela amamas i kamap taim em i kam bek. Taim ol wanbilip i kam bek long kongrigesen, dispela tu i save kamapim amamas. Strongim ol long kirap nau na sakim Satan na go klostu long God.—Jem. 4:7, 8.
22 Bikpela amamas i wetim ol wanbilip i kam bek long Jehova. (Kra. 3:40) Ol samting i bin painim ol bipo long wok bilong God, dispela i bin givim bikpela amamas long ol. Planti gutpela blesing i wetim ol wanbilip i kam bek kwiktaim long lain sipsip!
Bai Yu Bekim Olsem Wanem?
• Sapos wanpela Kristen i bin pundaun, olsem wanem yu inap helpim em long kam bek long lain sipsip?
• Sapos wanpela wanbilip i no wanbel long wanpela tok bilong Baibel na em i lusim lain sipsip bilong God, orait yu ken mekim wanem tok bilong helpim em?
• Olsem wanem yu inap helpim wanpela wanbilip em i pret long kam bek long kongrigesen?
[Piksa long pes 13]
Putim gut yau taim wanpela wanbilip i no kam moa long ol miting em i kamapim tingting bilong em
[Piksa long pes 15]
Tok piksa bilong Jisas long pikinini i lusim papa, dispela inap kirapim sampela long kam bek long lain sipsip