Tok Bilong Jehova i Gat Laip
Sampela Bikpela Tok Bilong Pas i Go Long Ol Rom
LONG yia 56 C.E. samting, taim Pol i mekim namba 3 misineri raun bilong em, em i go kamap long taun Korin. Em i bin harim olsem ol Kristen i stap long Rom, sampela bilong lain Juda na sampela bilong ol arapela lain, ol i gat narapela narapela tingting long sampela samting. Pol i laik bai ol i stap wanbel wantaim, olsem na em i raitim wanpela pas i go long kongrigesen long Rom.
Long dispela pas em i raitim i go long ol Rom, Pol i stori long ol samting i mekim na God i kolim ol man olsem stretpela man na ol dispela man i mas bihainim wanem ol pasin long i stap bilong ol. Dispela pas i helpim yumi long kisim save moa long God na Tok Bilong Em, na i kamapim klia gutpela pasin sori bilong God, na i litimapim wok bilong Krais long kisim bek yumi.—Hi. 4:12.
OLSEM WANEM GOD I KOLIM YUMI STRETPELA MANMERI?
Pol i tok: “Yumi olgeta man yumi bin mekim sin, na yumi no inap i stap wantaim God long heven. Tasol God i marimari long yumi, na long wok Krais Jisas i mekim bilong baim bek yumi, God i save kolim yumi stretpela manmeri. Yumi no kamap stretpela manmeri long wok yumi yet i mekim. Nogat. God i givim nating long yumi long han bilong Krais Jisas.” Na Pol i tok tu olsem: “Yumi kamap stretpela long ai bilong God long rot bilong bilip tasol, na i no long rot bilong bihainim lo.” (Ro. 3:23, 24, 28) Long rot bilong bilip long “wanpela man i mekim stretpela pasin” ol Kristen God i makim na “planti manmeri tru” bilong ol “arapela sipsip” ol i kamap stretpela manmeri long ai bilong God. Ol Kristen God i bin makim ol bai kisim laip long heven na mekim wok king wantaim Krais na ol bikpela lain manmeri bai i stap pren bilong God, na ol i wet long abrusim bagarap long taim bilong “bikpela hevi tru.”—Ro. 5:18; KTH 7:9, 14; Jo. 10:16; Jem. 2:21-24; Mt. 25:46.
Pol i mekim dispela askim: “Yumi stap aninit long marimari bilong God, olsem na ating i orait long yumi mekim sin?” Na em i bekim dispela askim olsem: “Nogat tru.” Na Pol i tokaut klia olsem, ‘yumi i stap wokboi bilong sin, na dispela bai i mekim yumi i dai. O yumi ken wok long bihainim tok bilong God na bai yumi kamap stretpela manmeri.’ (Ro. 6:15, 16) Em i tok: “Sapos long strong bilong Holi Spirit yupela i kilim i dai ol pasin nogut bilong bodi, orait yupela bai i stap laip.”—Ro. 8:13.
Bekim Bilong Ol Askim Bilong Baibel:
1:24-32—Husat i mekim ol pasin em dispela ves i stori long en, ol Juda o ol man bilong narapela lain? Tru dispela tok inap makim ol Juda o em inap makim ol man bilong narapela lain, tasol tok Pol i mekim long ol dispela ves i makim ol Israel bilong bipo em ol i bin lusim Jehova. Maski ol i save long ol stretpela lo bilong God, “ol i no tingting long i stap aninit long God.” Olsem na ol i gat asua.
3:24, 25—Olsem wanem ‘blut bilong Jisas bilong rausim sin’ inap “tekewe ol sin bilong bipo,” (King Jems Nupela Testamen) em ol sin ol man i bin mekim paslain long Jisas i mekim ofa? Namba wan tok profet bilong Mesaia i stap long Stat 3:15 i kamap tru long yia 33 C.E. taim ol i hangamapim Jisas long pos diwai na em i dai. (Ga. 3:13, 16) Kirap stret long taim Jehova i mekim dispela tok profet, long ai bilong em i olsem dispela pe bilong baim bek ol man i kamap pinis, long wanem, i no gat wanpela samting inap pasim God long inapim laik bilong em. Olsem na long rot bilong ofa bilong Jisas Krais em bai kamap bihain, Jehova inap long lusim sin bilong ol tumbuna pikinini bilong Adam em ol i bin bilip long dispela tok promis bilong em. Ofa bilong baim bek ol man i opim rot bilong ol manmeri i stap paslain long taim bilong Jisas long ol tu i ken kirap bek.—Ap. 24:15.
6:3-5—Dispela tok “pas wantaim Krais Jisas” na kisim baptais na “pas wantaim dai bilong em” i makim wanem samting? Taim Jehova i makim ol disaipel bilong Krais long holi spirit, ol i bung wantaim Jisas na ol i insait long kongrigesen bilong ol Kristen em God i bin makim, kongrigesen em i bodi bilong Krais na Krais em i Het bilong en. (1 Ko. 12:12, 13, 27; Kl. 1:18) Dispela i makim olsem ol i pas wantaim Krais Jisas na kisim baptais. Ol Kristen God i bin makim ol i pas wantaim dai bilong em, dispela i makim olsem ol i save bihainim pasin bilong daunim laik bilong ol yet na ol i no gat tingting long kisim laip long graun. Olsem na indai bilong ol em i olsem ofa, wankain olsem bilong Jisas, tasol indai bilong ol i no bilong baim bek ol man. Taim ol i dai na ol i kirap bek na kisim laip long heven, orait nau dispela baptais na pas wantaim dai bilong Krais i pinis.
7:8-11—Olsem wanem ‘sin i painim rot long tok bilong lo’? Lo i helpim ol man long kliagut long sin em i wanem samting, na ol i luksave olsem ol i sinman. Na ol i luksave long planti samting moa ol i mekim i soim olsem ol i sinman. Olsem na yumi ken tok sin i painim rot long tok bilong Lo.
Skul Yumi Kisim:
1:14, 15. I gat planti as na yumi mas givim bel long autim tok. Wanpela as na yumi mas mekim olsem em yumi gat wok long helpim ol man long kisim save long God na laik bilong em.
1:18-20. Ol man nogut na ol man i no save bihainim stretpela pasin ol i no inap tok ‘ol i no gat asua,’ long wanem, ol i lukim ol samting em God i bin wokim na ol i save long ol pasin bilong God.
2:28; 3:1, 2; 7:6, 7. Pastaim Pol i mekim ol tok ating ol Juda bai i no amamas long en na bihain em i mekim ol tok i mekim gut bel bilong ol na bai ol inap kisim tok em i mekim. Pol i stap gutpela piksa bilong yumi long olsem wanem yumi ken toktok wantaim ol man long ol samting we ol man i no wanbel long en na ol i gat narapela narapela tingting.
3:4. Taim tok bilong ol man i pait wantaim tok bilong God long Baibel, yumi ‘save God i save mekim tok tru oltaim’ olsem na yumi bilip long tok bilong em long Baibel na yumi mekim samting i stret wantaim laik bilong God. Taim yumi givim bel long autim tok bilong Kingdom na kamapim ol disaipel, yumi inap helpim ol arapela long kisim save olsem oltaim God i save tok tru.
4:9-12. Bilip bilong Abraham i mekim na God i kolim em stretpela man paslain tru long ol i katim skin bilong Abraham taim em i gat 99 krismas. (Stt. 12:4; 15:6; 16:3; 17:1, 9, 10) Long dispela rot, God i kamapim klia samting i mekim na man i stap stretpela man long ai bilong em.
4:18. Pasin bilong bilip na wetim gutpela samting i kamap em i wanpela bikpela samting long bilip bilong yumi na i as bilong bilip bilong yumi.—Hi. 11:1.
5:18, 19. Pol i kamapim ol tok i no hatwok long kisim taim em i stori long olsem wanem Jisas i wankain long Adam, na long dispela rot em i stori long olsem wanem wanpela man inap “givim laip bilong em bilong baim bek planti manmeri.” (Mt. 20:28) Yumi mas bihainim dispela pasin bilong em long kamapim ol tok i no hatwok long kisim taim yumi skulim ol man.—1 Ko. 4:17.
7:23. Ol hap bilong bodi bilong yumi olsem han, lek na maus bilong yumi inap mekim na lo bilong sin inap “kalabusim” yumi, olsem na yumi mas was gut na no ken mekim wok nogut long ol.
8:26, 27. Taim hevi i painim yumi na yumi no save yumi bai beten long wanem samting, “Holi Spirit yet i save prea bilong helpim yumi.” Orait Jehova, em Man bilong “harim beten” bai orait long ol beten em ol i stap long Baibel na i stret long hevi bilong yumi, na em bai tingim ol dispela beten olsem ol i kam long yumi.—Sng. 65:2.
8:38, 39. Ol hevi, ol spirit nogut, na ol gavman bilong ol man ol i no inap pasim Jehova long laikim yumi; yumi tu i no ken larim ol i pasim yumi long laikim em.
9:22-28; 11:1, 5, 17-26. Planti tok profet long Israel bai kam bek long graun bilong ol i kamap tru long kongrigesen bilong ol Kristen em God i bin makim, em Baibel i tok ol i “no kam long lain Juda tasol,” nogat, ol i “kam long ol arapela lain tu.”
10:10, 13, 14. Yumi laikim God na ol arapela man, na tu, pasin bilong bilip strong long Jehova na ol tok promis bilong em inap kirapim yumi long givim bel long autim tok.
11:16-24, 33. “God i save mekim gutpela pasin na hatpela pasin tu.” Yes, “God bilong yumi i save stap olsem oltaim. Em i olsem wanpela bikpela strongpela ston i no save senis. Oltaim em i save bihainim tok bilong en.”—Lo 32:4.
GOD I KOLIM YUMI STRETPELA MAN OLSEM NA YUMI MAS MEKIM OL SAMTING I STRET WANTAIM DISPELA
Pol i tok: “Ol brata, mi tingting long bikpela marimari bilong God na mi tokaut strong long yupela olsem. Yupela i mas givim bodi bilong yupela long God olsem ofa. Na taim yupela i stap laip bai yupela i stap ol manmeri bilong God stret na bai yupela i mekim ol pasin God i laikim.” (Ro. 12:1) God i kolim ol Kristen olsem stretpela manmeri, long wanem, ol i bilip, olsem na tok Pol i mekim bihain long dispela i mas stiaim tingting ol i gat long ol yet, long ol arapela, na long ol gavman.
Pol i tok: “Mi laik givim dispela tok lukaut long yupela olgeta wan wan. Yupela i no ken ting save na pasin bilong yupela i winim ol arapela. Nogat.” Pol i kirapim ol Kristen olsem: “Yupela i mas givim bel bilong yupela tru long ol arapela. Yupela i no ken giaman.” (Ro. 12:3, 9) “Olgeta man i mas i stap aninit long ol gavman.” (Ro. 13:1) Long ol samting olgeta wan wan Kristen yet i mas makim long mekim, Pol i kirapim ol long ol i no ken “skelim pasin bilong ol arapela.”—Ro. 14:13.
Bekim Bilong Ol Askim Bilong Baibel:
12:20—Olsem wanem yumi mekim man i birua long yumi i sem, olsem “putim hatpela sit bilong paia antap long het bilong em,” (NW)? Long taim bilong ol man i raitim Baibel, ol i save putim hap ain insait long aven, na ol i putim sampela hatpela sit bilong paia aninit long hap ain na antap long en. Ol hatpela sit bilong paia i stap antap i mekim na aven i hat moa na hap ain i kamap olsem wara na ol pipia i stap long en i lus. Olsem tasol, taim yumi mekim gutpela pasin long man i birua long yumi, i olsem yumi putim hatpela sit bilong paia antap long het bilong em, na dispela mekim na em bai senisim pasin bilong em na i kirapim em long kamapim ol gutpela pasin bilong em.
12:21—Olsem wanem yumi inap wok long ‘mekim gutpela pasin bilong daunim pasin nogut’? Wanpela rot yumi inap mekim olsem em long rot bilong wok strong long mekim wok God i givim yumi em wok bilong autim gutnius bilong Kingdom i go inap long mak Jehova i laikim.—Mk. 13:10.
13:1—Olsem wanem ‘God yet i putim ol gavman na ol i stap’? Ol gavman i stap, long wanem, “God yet i putim ol na ol i stap,” dispela i makim olsem God i larim ol i stap, na sampela taim God i bin tok profet long wok gavman bilong ol bai kamap. Dispela i kamap klia long tok Baibel i mekim long sampela bikman.
Skul Yumi Kisim:
12:17, 19. Sapos yumi bekim pasin nogut narapela i mekim long yumi, orait yumi mekim samting em Jehova tasol i mas mekim. Em pasin hambak sapos yumi “bekim pasin nogut” narapela i mekim long yumi!
14:14, 15. Yumi no ken givim kaikai o dring samting long brata em brata i ting i no klin long ai bilong Jehova, nogut dispela i mekim na em i pundaun.
14:17. Bilong pas gut wantaim God em i no bikpela samting long yumi kaikai na dring wanem samting, nogat. Bikpela samting em yumi mas mekim stretpela pasin, stap bel isi na amamas.
15:7. Yumi mas amamas long olgeta kain man i laik kisim save long tok i tru em ol i kam bung wantaim kongrigesen na yumi mas autim tok bilong Kingdom long olgeta kain man yumi bungim.
[Piksa long pes 31]
Yu ting pe Jisas i givim bilong baim bek ol man inap tekewe ol sin bilong ol man em ol i bin i stap paslain long Jisas i mekim ofa?