Yumi Bilip Tru Olsem Bai i Gat Kirap Bek!

1-2. Ol wokman bilong Jehova i gat wanem gutpela bilip?

BILIP em i bikpela samting long yumi. Sampela man i bilip olsem marit bilong ol bai stap amamas, na ol bai mekim bikpela long ol pikinini i gat gutpela helt, na sampela narapela em ol i gat bikpela sik ol i bilip olsem sik bilong ol bai kamap orait. Ating yumi ol Kristen tu i laik bai ol dispela samting i painim yumi. Tasol bilip yumi holim na laikim tumas i gat sampela samting moa long en; yumi bilip long stap laip oltaim na yumi bilip tu olsem ol famili bilong yumi i dai pinis bai stap laip gen.

² Aposel Pol i tok: “Mi bilip na wet long God . . . olsem bai i gat kirap bek bilong ol man i dai pinis, em ol stretpela man na ol man nogut wantaim.” (Apo. 24:15) Pol em i no fes man long tokaut long bilip bilong kirap bek. Bilipman Jop tu i bin tokaut long kirap bek. Em i bilip tru olsem God bai tingim em na kirapim em bek.—Jop 14:7-10, 12-15.

 3. Olsem wanem tok bilong 1 Korin sapta 15 i ken helpim yumi?

³ “Kirap bek bilong ol man i dai pinis” em hap bilong dispela “faundesen” o “ol as bilip” bilong olgeta bilip Kristen. (Hib. 6:1, 2) Ol tok Pol i mekim long kirap bek i stap long 1 Korin sapta 15. Ol tok em i raitim i strongim tru bilip bilong ol Kristen long taim bilong ol aposel. Na ol tok bilong dispela sapta bai strongim bilip bilong yumi long kirap bek, em bilip yumi bin holim inap longpela taim pinis.

 4. Wanem samting i stap olsem faundesen bilong bilip yumi holim olsem ol famili bilong yumi i dai pinis bai kirap bek?

⁴ Kirap bek bilong Jisas Krais em i faundesen bilong dispela bilip yumi holim olsem ol famili bilong yumi i dai pinis bai kirap bek. Dispela bilip em hap bilong “gutnius” em Pol i bin autim long ol Korin. (1 Kor. 15:1, 2) Olsem na Pol i tok sapos wanpela Kristen i no bilip long dispela kirap bek, orait bilip bilong em i no inap helpim em liklik. (1 Kor. 15:17) Bilip long kirap bek bilong Jisas em faundesen bilong bilip yumi holim olsem ol narapela bai kirap bek.

5-6. Tok bilong 1 Korin 15:3, 4 i ken mekim wanem long yumi?

⁵ Taim Pol i stat long raitim ol tok long kirap bek, em i stori long 3-pela tok i tru. Ol dispela tok i tru em: (1) “Krais i bin dai bilong kisim bek yumi long sin.” (2) “Ol i bin planim em.” (3) “Long namba 3 de em i kirap bek olsem Rait Holi i tok.”—Ritim 1 Korin 15:3, 4.

⁶ Jisas i dai na ol i planim em na em i kirap bek, dispela i ken mekim wanem long yumi? Profet Aisaia i bin tok profet long samting bai painim Mesaia olsem, “ol i pinisim em long graun bilong ol man i stap laip” na “ol i bin givim em wanpela ples matmat wantaim ol man nogut.” Tasol i gat sampela samting moa bai kamap. Aisaia i tok moa olsem Mesaia bai “karim sin bilong planti manmeri.” Jisas i mekim olsem taim em i givim laip bilong em olsem pe bilong baim bek ol manmeri. (Ais. 53:8, 9, 12; Mat. 20:28; Rom 5:8) So Jisas i dai na ol i planim em na em i kirap bek, dispela i stap olsem strongpela faundesen bilong bilip bilong yumi long kamap fri long sin na dai na yumi bai bung gen wantaim ol famili bilong yumi i dai pinis.

7-8. Wanem samting i helpim ol Kristen long bilip tru olsem Jisas i bin kirap bek?

⁷ Olsem yumi stori pinis, yumi mas bilip long kirap bek bilong Jisas na dispela bai stap olsem faundesen bilong bilip bilong yumi long kirap bek. Wanem samting i mekim na yumi ken save tru olsem Jehova i bin kirapim bek Jisas?

⁸ I gat planti aiwitnes i bin tokaut olsem Jisas i bin kirap bek. (1 Kor. 15:5-7) Fes aiwitnes long lista bilong Pol em aposel Pita (Sifas). Ol narapela disaipel i tok olsem Pita i bin lukim Jisas i kirap bek pinis. (Luk 24:33, 34) Na tu, “ol 12-pela aposel” i bin lukim Jisas bihain long em i kirap bek pinis. Bihain Krais “i kamap long winim 500 brata,” ating em i kamap long ol long dispela bung long Galili em Matyu 28:16-20 i stori long en. Jisas “i kamap long Jems” em brata bilong em husat i no bin bilip long em. (Jon 7:5) Taim Jems i lukim Jisas i bin kirap bek pinis, em i bilip long em. Olsem na long yia 55 C.E. taim Pol i raitim dispela pas, em i tok i gat planti aiwitnes i stap em ol i bin lukim Jisas i kirap bek pinis, olsem na sapos wanpela man i gat tupela tingting long dispela, orait em i ken go lukim wanpela bilong ol dispela aiwitnes em ol i stap laip yet long dispela taim.

 9. Olsem wanem tok bilong Aposel 9:3-5 i soim olsem Pol em i wanpela aiwitnes olsem Jisas i bin kirap bek pinis?

⁹ Bihain Jisas i bin kamap long Pol. (1 Kor. 15:8) Pol (Sol) i go olsem long Damaskus taim em i harim nek bilong Jisas husat i bin kirap bek pinis, na long visen em i lukim Jisas i stap long heven. (Ritim Aposel 9:3-5.) Samting i painim Pol i strongim dispela tok olsem kirap bek bilong Jisas em i no wanpela stori nating.—Apo. 26:12-15.

10. Pol i bilip tru olsem Jisas i bin kirap bek pinis na dispela i kirapim em long mekim wanem?

¹⁰ Sampela manmeri bai i gat laik tru long save gut long tok Pol i mekim, bikos paslain long Jisas i kamap long em, Pol i save mekim nogut long ol Kristen. Taim Pol i bilip tru olsem Jisas i bin kirap bek pinis, em i wok strong tru long tokim ol narapela long dispela tok i tru. Pol i givim bel tru long autim tok olsem Jisas i bin dai, tasol nau em i stap laip gen, na long dispela as em i karim hevi long ol man i paitim em, kalabusim em, na sip em i stap long en i bagarap long solwara. (1 Kor. 15:9-11; 2 Kor. 11:23-27) Pol i bilip tru olsem Jisas i bin kirap bek pinis na em i redi long dai bilong sambai long dispela bilip bilong em. Tok bilong ol dispela aiwitnes i kirapim yumi tu long bilip tru olsem Jisas i bin kirap bek pinis, a? Olsem wanem? Dispela i strongim bilip bilong yu long kirap bek?

11. Wai na sampela Kristen long Korin inap holim ol tingting kranki long kirap bek?

¹¹ Sampela Kristen long Korin, em taun bilong ol Grik, ol i holim ol tingting kranki long kirap bek, na sampela narapela i tok “i no gat kirap bek bilong ol man i dai pinis.” Bilong wanem ol i tok olsem? (1 Kor. 15:12) Sampela saveman long narapela taun bilong Grik, em Atens, ol i tok bilas long dispela tingting olsem Jisas i bin kirap bek pinis. Sampela manmeri long Korin na sampela long kongrigesen Kristen tu, ol i holim dispela wankain tingting. (Apo. 17:18, 31, 32) Ol narapela i tingim kirap bek olsem wanpela tok piksa na i makim olsem taim man i mekim sin, em i dai, tasol taim em i kamap Kristen, i olsem em i kisim laip gen. Maski ol i givim wanem eskius, ol i no bilip long kirap bek, olsem na bilip bilong ol i no gat as bilong en. Sapos God i no bin kirapim bek Jisas, orait i no gat pe bilong baim bek ol man na i no gat rot long God i ken lusim sin bilong ol manmeri. Olsem na ol manmeri husat i no bilip long kirap bek, bilip bilong ol i no gat as bilong en.—1 Kor. 15:13-19; Hib. 9:12, 14.

12. Olsem 1 Pita 3:18, 22 i kamapim, hau na kirap bek bilong Jisas i no wankain long ol kirap bek i kamap pastaim?

¹² Jisas i bin kamap long Pol, olsem na Pol i save tru olsem “Krais i kirap bek long dai.” Dispela kirap bek i gutpela moa winim ol kirap bek i bin kamap paslain long en we God i bin kirapim bek ol man i dai pinis na bihain ol dispela man i dai gen. Pol i tok Jisas “i kirap bek paslain long ol arapela man i dai pinis, olsem namba 1 kaikai i redi long gaden.” Wai na Pol i tok Jisas em i namba 1 kaikai? Em i namba 1 man em God i kirapim em bek olsem wanpela spirit na em i namba 1 man long graun long kirap bek na go antap long heven.—1 Kor. 15:20; Apo. 26:23; ritim 1 Pita 3:18, 22.

13. (a) Pol i tok long rot bilong Adam, wanem samting i painim ol man? (b) Long rot bilong Jisas, wanem samting bai painim ol man?

¹³ Olsem wanem dai bilong wanpela man tasol inap givim laip long planti milion manmeri? Pol i bekim dispela askim. Em i tok long samting sin bilong Adam i mekim long ol manmeri na samting ofa bilong Krais inap mekim long ol manmeri. Pol i tok long Adam olsem: “Long rot bilong wanpela man, dai i kamap.” Taim Adam i mekim sin, em i bringim dai i kam long em yet na long olgeta pikinini bilong em. Yumi wok long karim pen na hevi yet long pasin bilong em long sakim tok. Tasol kirap bek bilong Jisas i opim rot long ol manmeri husat i dai pinis, ol bai kirap bek gen! “Long rot bilong wanpela man [Jisas], ol man bai kirap bek long dai.” Pol i tok: “Long rot bilong Adam ol man i save dai, olsem tasol long rot bilong Krais ol man bai kisim laip.”—1 Kor. 15:21, 22.

14. Adam bai kirap bek o nogat? Stori long dispela.

¹⁴ Wanem mining bilong tok bilong Pol olsem “long rot bilong Adam ol man i save dai”? Pol i tingim olgeta manmeri em ol i kamap long rot bilong Adam na ol i kisim sin long Adam, na ol bai dai. (Rom 5:12) Adam em i no wanpela bilong “ol man bai kisim laip.” Ofa bilong Krais long baim bek man i no karamapim sin bilong Adam, bikos Adam i gutpela olgeta na long laik bilong em yet em i sakim tok bilong God. Samting bai painim Adam em bai wankain long samting bai painim ol manmeri em “Pikinini bilong man” bai skelim ol olsem “ol meme,” em ol “bai i dai na stap olsem inap oltaim oltaim.”—Mat. 25:31-33, 46; Hib. 5:9.

15. Dispela tok “ol man bai kisim laip,” dispela i makim tu wanem lain?

¹⁵ Pol i tok “long rot bilong Krais ol man bai kisim laip.” (1 Kor. 15:22) Pol i raitim pas i go long ol Kristen long Korin em God i makim em ol bai kirap bek na kisim laip long heven. Ol dispela Kristen em ol lain em “God i mekim [ol] i kamap holi na [ol] i pas wantaim Krais Jisas.” Na Pol i stori long “olgeta man husat i bin pas wantaim Krais na i dai.” (1 Kor. 1:2; 15:18; 2 Kor. 5:17) Long narapela pas Pol i raitim, em i tok “yumi pas wantaim [Jisas] na yumi dai olsem em i bin dai, olsem tasol yumi pas wantaim em na yumi bai kirap bek olsem em i bin kirap bek.” (Rom 6:3-5) Jisas i kirap bek olsem spirit na go antap long heven. Olsem na olgeta manmeri em ol i “pas wantaim Krais”—em olgeta Kristen em God i bin makim—ol tu bai kirap bek na kisim laip long heven.

16. Wai na Pol i kolim Jisas olsem “namba 1 kaikai i redi long gaden”?

¹⁶ Pol i tok Krais i “kirap bek paslain long ol arapela man i dai pinis, olsem namba 1 kaikai i redi long gaden.” Tingim ol narapela husat i bin kirap bek, olsem Lasarus, ol i bin kirap bek na stap laip long graun, tasol Jisas em i namba 1 man long kirap bek olsem wanpela spirit na kisim laip oltaim. Em i olsem namba 1 kaikai i redi long gaden em lain Israel i save givim long God olsem ofa. Taim Pol i kolim Jisas olsem “namba 1 kaikai i redi long gaden,” Pol i kamapim klia olsem i gat ol narapela manmeri em ol bai kirap bek bihain long Jisas na ol tu bai kisim laip long heven. Ol aposel na ol narapela em ol i “pas wantaim Krais” ol bai kisim laip long heven wankain olsem Jisas. Ol bai dai, tasol bihain long sampela haptaim i lus ol bai kirap bek na kisim laip long heven.

17. Wanem taim bai lain i “pas wantaim Krais” i kisim laip long heven?

¹⁷ Ol lain i “pas wantaim Krais” em ol bai kirap bek na kisim laip long heven, ol i no bin kirap bek yet long dispela taim Pol i bin raitim pas i go long ol Korin. Pol i tok dispela kirap bek bai kamap long wanpela taim bihain, em i tok: “Olgeta wan wan i kisim laip long taim bilong ol yet: Krais pastaim, em i olsem namba 1 kaikai i redi long gaden, na bihain ol lain bilong Krais bai kisim laip long taim em i kam i stap.” (1 Kor. 15:23; 1 Tes. 4:15, 16) Nau yumi stap long dispela haptaim em Krais i “kam i stap” olsem Baibel i bin tok profet long en. Ol aposel na ol narapela Kristen em God i bin makim ol long holi spirit ol i bin dai, tasol ol i wet i go inap long taim Jisas i kam i stap na bai ol i ken “pas wantaim em na . . . kirap bek olsem em i bin kirap bek” na kisim laip long heven.

18. (a) Wai na yumi inap tok olsem bai i gat narapela kirap bek i kamap bihain long fes kirap bek? (b) Olsem 1 Korin 15:24-26 i kamapim, Jisas bai mekim wanem samting?

¹⁸ Wanem samting bai painim ol narapela Kristen em ol i no inap kisim laip long heven wantaim Krais? Ol tu i bilip olsem ol bai kirap bek. Baibel i tok Pol na ol narapela i go long heven, ol i insait long “dispela kirap bek i kamap pastaim.” (Fili. 3:11) Dispela i makim olsem bai i gat narapela kirap bek i kamap bihain long dispela fes kirap bek. Dispela i stret wantaim tok Jop i mekim long samting bai painim em long bihain. (Jop 14:15) “Ol lain bilong Krais” bai stap long heven wantaim Jisas taim em i pinisim olgeta gavman na olgeta wok bos na olgeta samting i gat strong. Na tu, “dai, dispela laspela birua, em bai pinisim olgeta.” Ol lain i kirap bek na kisim laip long heven, ol i no inap i dai moa. Tasol olsem wanem long ol narapela husat i no inap kisim laip long heven?—Ritim 1 Korin 15:24-26.

19. Ol manmeri em ol i bilip long kisim laip long graun, ol i ken wetim wanem gutpela samting bai kamap?

¹⁹ Ol manmeri em ol i bilip long kisim laip long graun, ol i ken wetim wanem gutpela samting bai kamap? Ol i ken bilip tru long tok Pol i mekim olsem: “Mi bilip na wet long God, . . . olsem bai i gat kirap bek bilong ol man i dai pinis, em ol stretpela man na ol man nogut wantaim.” (Apo. 24:15) I klia tru olsem ol man nogut i no inap go long heven, olsem na dispela ves i makim kirap bek bai kamap long graun.

20. Olsem wanem bilip bilong yu long kirap bek i ken strongim yu?

²⁰ Tru tumas, “bai i gat kirap bek bilong ol man i dai pinis”! Ol manmeri em ol i kirap bek na kisim laip long graun, ol i ken amamas long stap laip oltaim long graun. Yu ken bilip tru long dispela tok promis. Dispela bilip i ken mekim gut bel bilong yu taim yu tingim ol famili bilong yu i dai pinis. Ol bai kirap bek long taim Krais wantaim ol narapela “bai mekim wok king . . . inap 1,000 yia.” (Rev. 20:6) Yu tu ken holimpas dispela gutpela bilip tru olsem maski sapos yu dai paslain long Jisas i kirap mekim wok king long Wan Tausen Yia, yu bai kirap bek. “Dispela samting yumi bilip na wetim i no inap mekim yumi bel hevi.” (Rom 5:5) Dispela bilip i ken strongim yu nau na helpim yu long stap amamas taim yu mekim wok bilong God. Tasol i gat planti samting moa em yumi inap lainim long ol tok i stap long 1 Korin sapta 15, atikol i kamap bihain bai stori long dispela.