“Singautim Ol Hetman”
“Wanpela bilong yupela i gat sik? Orait em i mas singautim ol hetman bilong [kongrigesen] i kam long em.”—JEMS 5:14.
LONG nau yumi stap long taim bilong “las de” na “planti hevi nogut tru” i kamap. (2 Timoti 3:1-5) Ol man i save tingim ol yet tasol, na ol i tingim mani kago, na planti taim ol i save kirapim ol man long birua na pait. I gat 3-pela samting i laik bagarapim yumi ol Kristen, olsem: Satan, na ol man i save givim baksait long God, na sin i stap long skin bilong yumi.—Rom 5:12; 1 Pita 5:8; 1 Jon 5:19.
2 Olsem na ating sampela taim yumi pilim olsem dispela 3-pela samting nogut i laik daunim yumi. Orait, wanem samting inap helpim yumi long sanap strong na i stap gut long God? Husat inap soim rot long yumi taim yumi mas tingim ol wok Kristen bilong yumi na lotu bilong yumi?
I Gat Helpim i Stap
3 Yumi save Jehova i As bilong strong bilong yumi na dispela i save strongim bel bilong yumi. (2 Korin 1:3, 4; Filipai 4:13) Em i bin helpim Devit, olsem na Devit i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.” “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 37:5; 55:22) Yumi ken amamas tru long God i save helpim na strongim yumi olsem.
4 Na narapela samting inap strongim bel bilong yumi i olsem: Yumi save ol hevi na traim i no save painim yumi tasol—em i painim olgeta Kristen. Aposel Pita i tokim ol Kristen olsem: “Yupela i mas i stap strong long bilip na sakim em. Yupela i save, ol arapela manmeri bilong God . . . ol tu i save karim wankain pen olsem yupela.” (1 Pita 5:9) Olgeta Kristen i gat laik long sanap strong na holimpas bilip. Tru, ating planti taim “kain kain hevi i save kamap” long yumi; sampela taim aposel Pol tu i pilim olsem. Tasol em i tok, “ol i no pinisim tru strong bilong mipela.” Ating sampela taim yumi tingting planti, “tasol tingting bilong [yumi] i no bagarap olgeta.” Ol man i mekim nogut long yumi, “tasol God i no save lusim [yumi].” Maski ol i “mekim [yumi] i pundaun,” “ol i no bagarapim [yumi] olgeta.” Olsem na yumi “i no save slek.” “Yumi save lukluk strong long ol samting yumi no inap lukim long ai.” (2 Korin 4:8, 9, 16, 18) Yumi inap mekim olsem wanem?
5 Jehova, em Man bilong harim beten, em i save helpim yumi long 3-pela rot. (Song 65:2; 1 Jon 5:14) Namba wan samting, em i givim Baibel long yumi bilong soim rot long yumi. (Song 119:105; 2 Timoti 3:16) Namba tu samting, spirit holi bilong em i save strongim yumi long mekim wok bilong em. (Lukim Aposel 4:29-31.) Namba tri samting, oganaisesen bilong Jehova long graun i redi oltaim long helpim yumi. Orait, yumi mas mekim wanem bilong kisim ol dispela helpim?
God i Givim Ol Man Olsem “Presen”
6 Samting i bin kamap long ples Tabera long taim bilong Moses i helpim yumi long pilim bikpela sori bilong Jehova, em i wokim rot bilong helpim ol wokman bilong Em. Insait bilong nem Tabera em “Paia I Kukim.” Long dispela hap bilong Sainai God i mekim na paia i kam daun na bagarapim ol Israel em ol i toktok planti long Em. Ol narapela lain i bin lusim Isip wantaim ol Israel ol tu i toktok planti long kaikai God i bin givim long ol. Moses i lukim belhat bilong Jehova na em i pilim bikpela hevi bilong em long lukautim dispela bikpela lain, olsem na em i singaut long Jehova: “Mi wanpela tasol mi no inap lukautim ol dispela manmeri. . . . Mobeta yu sori long mi na yu kilim mi i dai na bai mi no ken hatwok moa long karim dispela hevi.” (Namba 11:1-15) Orait, Jehova i makim “70 bikman” bilong Israel na em i putim spirit bilong em long ol bambai ol inap helpim Moses long lukautim dispela bikpela lain. (Namba 11:16, 17, 24, 25) Olsem na nau i gat planti man bilong helpim ol Israel.—Kisim Bek 12:38.
7 Taim ol Israel i sindaun long Graun Bilong Promis inap planti yia pinis God i makim Jerusalem olsem nambawan biktaun bilong ol Israel na em i putim Devit olsem king. Devit i laik litimapim nem bilong “God I Gat Olgeta Strong,” na em i mekim singsing olsem: “God i bin i go antap long maunten i antap moa, na em i kisim bikpela lain kalabus i go wantaim em. Em i bin kisim ol presen bilong ol bikhetman i bin pait long em.” (Song 68:14, 18) Ol man em ol Israel i bin daunim ol taim ol i pait na kisim Graun Bilong Promis, ol i mekim wok bilong helpim lain Livai long haus lotu.—Esra 8:20.
8 Long taim bilong ol Kristen, aposel Pol i kolim tok bilong Devit bilong makim wanpela truim bilong dispela tok. Pol i tok: “Krais i givim bikpela presen moa long yumi . . . Buk bilong God i tok olsem, ‘Em i go antap tru, na em i kisim bikpela lain kalabus i go wantaim em. Na em i givim ol presen long ol man.’ Na dispela tok ‘em i go antap’ em i soim yumi olsem Krais i no i go antap tasol. Nogat. Pastaim em i go daun insait long hap bilong graun i stap daunbilo tru. Dispela man pastaim em i go daun, em i go . . . antap tru.” (Efesus 4:7-10) “Dispela man” em i husat? Em Man i winim Devit, em King Krais Jisas. Em dispela man God i bin kirapim em bek na givim bikpela namba long em na putim em i stap “antap tru.”—Filipai 2:5-11.
9 Orait, husat ol dispela man i olsem “presen”? Pol i tok, Nambawan Mausman bilong God i “givim wok aposel” long sampela, na “long sampela em i givim wok profet. Na long sampela em i givim wok bilong autim gutnius long ol manmeri. Na long sampela em i givim wok [wasman] na wok bilong skulim ol manmeri long ol pasin God i laikim. Krais i givim ol dispela presen bilong helpim yumi manmeri bilong God bai yumi inap long mekim gutpela wok bilong em.” (Efesus 4:11, 12) Olgeta dispela man olsem aposel, profet, man bilong autim tok, wasman, tisa, olgeta i wok aninit long God Jehova na Jisas. (Luk 6:12-16; Aposel 8:12; 11:27, 28; 15:22; 1 Pita 5:1-3) Long taim bilong yumi spirit holi i makim sampela man bilong mekim wok olsem wasman long ol kongrigesen bilong ol Witnes Bilong Jehova long olgeta hap, inap olsem 70,000 samting. Ol dispela wasman i olsem “presen” God i givim long yumi. (Aposel 20:28) Wok bilong autim tok bilong Kingdom i go bikpela hariap long olgeta hap, olsem na planti brata moa i laik kisim wok olsem “wasman” insait long kongrigesen. (1 Timoti 3:1) Taim ol i kisim namba bilong mekim dispela wok ol tu i kamap olsem “presen” God i givim long yumi.
10 Profet Aisaia i makim stret ol elda Kristen, olsem “presen,” taim em i tok profet long wok ol “bikman” bai mekim aninit long Kingdom. Olgeta wan wan elda Kristen i mas i “stap olsem ol ples hait ol manmeri i ken i go na hait long en long taim bilong bikpela win na ren. Na bai ol i stap tu olsem wara i ran i go long ples drai na olsem bikpela ston i haitim san long ples drai na ol man i kam sindaun long ples kol bilong en na malolo long taim bilong hatpela san.” (Aisaia 32:1, 2) Dispela i kamapim klia olsem ol dispela wasman i mas mekim pasin sori na helpim tru ol manmeri insait long kongrigesen. Orait, yu ken mekim wanem na bai ol i ken helpim yu gut olsem?
Kirap Mekim Sampela Samting
11 Taim man i laik bagarap long solwara em i save singaut long ol man i mas helpim em. Em i no save wetim wanpela man i kirapim em long singaut. Planti taim King Devit i bin singaut long Jehova i mas helpim em. (Song 3:4; 4:1; 5:1-3; 17:1, 6; 34:6, 17-19; 39:12) Orait, taim yumi stap bel hevi na yumi no strong long spirit, yumi tu i save beten long Jehova na krai long em i mas soim rot long yumi na helpim yumi long rot bilong spirit holi. (Song 55:22; Filipai 4:6, 7) Yumi wok long kaunim ol tok bilong Baibel bilong mekim gut bel bilong yumi. (Rom 15:4) Yumi lukim ol buk samting em Sosaiti Was Taua i wokim bambai yumi ken kisim sampela gutpela tok bilong helpim yumi. Planti taim dispela inap helpim yumi long stretim ol hevi bilong yumi. Tasol sapos ol hevi bilong yumi i wok long daunim yumi, yumi inap i go long ol elda bilong kongrigesen bilong kisim sampela tok long ol. Ating sampela taim hevi bilong yumi i bikpela tru na yumi mas “singautim ol hetman.” Orait, bilong wanem yumi mas singautim ol elda Kristen? Olsem wanem ol inap helpim ol manmeri ol i no strong long ol samting bilong spirit?
12 Taim yumi gat sik, yumi save malolo bilong helpim skin long kisim bek strong. Tasol sapos sik bilong yumi i no pinis, yumi save go lukim dokta na bai em i ken helpim yumi. Orait, yumi mas mekim olsem tu sapos yumi gat sik bilong spirit, a?
13 Jems i tok: “Wanpela bilong yupela i gat sik? Orait em i mas singautim ol hetman bilong [kongrigesen] i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen.” (Jems 5:14) Jems i toktok long wanem kain sik? Sampela man i ting em i toktok long sik bilong skin, long wanem, bipo ol i save putim wel long skin bilong man taim em i gat sik. (Luk 10:34) Na ol i tok, Jems i tingting long ol hetman bai putim han long ol dispela sikman na oraitim ol long rot bilong mirakel. Tasol ol narapela tok bilong Jems i stap klostu ol inap givim wanem save long yumi?
14 Jems i tok long tupela samting, olsem “bel . . . i amamas” na “karim hevi.” Long dispela yumi inap ting olsem Jems i toktok long sik bilong spirit. (Jems 5:13) Ol i mas singautim “ol hetman [olsem elda] bilong [kongrigesen]”; ol i no ken singautim ol dokta o ol man i gat strong bilong wokim mirakel na oraitim sikman. Orait, ol i mas mekim wanem? Jems i tok: “Ol i mas [beten] long God i ken mekim em i kamap orait gen.” (Jems 5:14, 15; lukim Song 119:9-16.) Yumi inap save tru olsem Jems i toktok long sik bilong spirit, long wanem, em i tok: “Yupela wan wan i mas autim sin bilong yupela long ol arapela manmeri bilong God. Na yupela wan wan i mas [beten] long God i helpim ol arapela, na bai God i mekim yupela i kamap orait gen.” Sapos man i mekim bikpela rong na long dispela as em i gat sik bilong spirit, orait em i mas givim bel long bihainim ol tok bilong Baibel long dispela samting na em i mas tanim bel tru na lusim dispela rong em i bin mekim. Olsem bai em inap kamap strong gen long spirit.—Jems 5:16; Aposel 3:19.
15 Yumi ken kisim sampela helpim moa long tok bilong Jems. Maski wanem samting i painim Kristen, em i mas mekim beten. Sapos ol i mekim nogut long em, em i mas beten long God, na sapos em i stap belgut, orait em i mas ‘singim ol song long Jehova,’ olsem singaut amamas long Jehova. Jems i askim olsem: “Wanpela bilong yupela i gat sik?” Sapos olsem, em i tok, Kristen “i mas singautim ol hetman bilong [kongrigesen] i kam long em.”—Song 50:15; Efesus 5:19; Kolosi 3:16.
“Ol Hetman” i Helpim Yumi Olsem Wanem?
16 Taim yumi gat hevi, sampela taim i hatwok long save, olsem wanem ol lo bilong Baibel inap helpim yumi yet. Long kain taim olsem ol elda Kristen inap helpim yumi. Olsem: Taim man i gat sik long spirit, ol i save mekim beten, na ‘long nem bilong Jehova ol i mas putim wel long skin bilong em,’ olsem ol i kamapim ol gutpela tok bilong Baibel bilong helpim em. Olsem na ol elda inap helpim tru yumi long kamap orait gen long spirit. (Song 141:5) Taim yumi toktok wantaim wanpela elda Kristen na kamapim hevi bilong yumi long em, dispela bai strongim yumi long mekim ol samting i stret.—Sindaun 27:17.
17 Taim Kristen i singautim ol elda long helpim em, ol i gat wok long “strongim bel bilong ol man i save pret.” Ol i mas “helpim ol man i no strong. Na [ol] i mas isi isi long olgeta man.” (1 Tesalonaika 5:14) Taim ol elda i mekim gut olsem long “ol man i no strong,” dispela inap helpim ol long kamap orait gen long spirit.
Samting Yumi Yet i Mas Mekim na Beten
18 Ol elda Kristen i mas mekim wok bilong ol long lukautim na helpim lain bilong God, olsem Pol i tok: “Ol brata, sapos yupela i save olsem wanpela bilong yupela i bin mekim sin, orait yupela man i bihainim Holi Spirit, yupela i mas mekim pasin isi long dispela man na helpim em long stretim pasin bilong em. Tasol yupela i mas lukaut gut long yupela yet. Nogut Satan i traim yupela. . . . Yupela i mas helpim ol arapela long karim hevi bilong ol.” Na Pol i tok moa olsem: “Olgeta man wan wan bai i karim hevi bilong . . . ol yet.”—Galesia 6:1, 2, 5.
19 Olsem wanem yumi inap “helpim ol arapela long karim hevi bilong ol” tasol yumi mas karim hevi bilong yumi yet? Long tok Grik dispela tok “hevi” olsem Pol i bin kolim, long tok Grik ol i kolim olsem tupela kain tok. Sapos wanpela hevi bilong spirit i painim Kristen na em i hatwok tru long karim, orait ol elda na ol narapela wanbilip inap helpim em, na long dispela rot ol i helpim em long karim “hevi” bilong em. Tasol Kristen i mas mekim ol wok God i makim bilong em, olsem ‘karim hevi bilong em yet.’a Ol elda i amamas long helpim ol brata long karim “hevi” bilong ol, olsem givim gutpela tok long ol bilong strongim bel bilong ol, na kamapim ol tok bilong Baibel long ol, na beten wantaim ol. Tasol ol elda i no save karim ol narapela kain “hevi” bilong Kristen, olsem ol wok bilong spirit em Kristen yet i mas karim.—Rom 15:1.
20 Beten em i bikpela samting na yumi no ken les long mekim. Tasol planti Kristen i gat sik long spirit ol i save hatwok long beten. Taim ol elda i mekim beten bilong helpim wanpela Kristen i gat sik long spirit, dispela beten i bilong mekim wanem? ‘Jehova bai i mekim orait dispela man’ na strongim em bilong bihainim gut tok i tru na stretpela pasin. Ating Kristen i gat sik long spirit em i gat sampela tingting kranki, tasol i no olsem em i bin mekim wanpela bikpela rong. Olsem Jems i tok: “Sapos em i bin mekim sin, orait Bikpela bai i lusim ol dispela sin.” Taim elda i givim sampela tok bilong Baibel long Kristen na beten wantaim em, sampela taim dispela i save kirapim Kristen long kamapim sampela rong em i bin mekim na em i kamapim long ples klia olsem em i bel hevi long dispela rong bilong em, orait, God bai lusim tingting long rong bilong em.—Jems 5:15, 16.
21 Ol elda i gat bikpela wok long lukautim ol planti planti nupela man i wok long kam insait long kongrigesen Kristen. Tru tumas, ol elda i gutpela presen tru Jehova i givim bilong helpim yumi long sanap strong nau long dispela taim nogut i gat planti hevi. Tasol sampela Kristen i save surik long singautim ol elda long helpim ol, long wanem, ol i ting ol dispela brata i gat planti wok tumas o ol i gat planti hevi bilong ol yet long karim. Narapela stori i kam bihain long dispela bai helpim yumi long save, ol elda i amamas long helpim yumi, long wanem, long laik bilong ol yet ol i mekim wok olsem ol nambatu wasman insait long kongrigesen Kristen.
[Ol Futnot]
a Long buk bilong Fritz Rienecker (A Linguistic Key to the Greek New Testament) em i kolim wanpela tok Grik phor·tiʹon na insait bilong en i olsem wanpela hevi em man yet i mas karim. Buk i tok: ‘Dispela hevi i olsem wanpela ruksak samting em soldia i mas karim.’
Bai Yu Bekim Olsem Wanem?
◻ Taim yumi gat hevi Jehova i save helpim yumi long wanem 3-pela rot?
◻ Long taim bilong yumi husat ol man i olsem “presen”?
◻ Wanem taim yumi mas singautim ol elda bilong helpim yumi?
◻ Ol elda Kristen inap helpim yumi olsem wanem?
[Askim Bilong Stadi]
1, 2. (a) Ol wokman bilong Jehova i stap long wanem kain taim? Olsem na ating ol i pilim olsem wanem? (b) I gat wanem ol askim yumi laik save long bekim bilong en?
3. Husat inap helpim yumi na strongim bel bilong yumi? Em i mekim olsem wanem?
4. Wanem tok bilong Pita na Pol i strongim bel bilong yumi?
5. Jehova i save helpim yumi long wanem 3-pela rot?
6. Jehova i mekim wanem long ples Tabera bilong helpim ol Israel?
7, 8. (a) Long Israel, olsem wanem Jehova i givim ol man olsem “presen”? (b) Pol i tok wanem bilong makim wanpela truim bilong Song 68:18 i kamap long taim bilong em?
9. (a) Long taim bilong ol aposel, husat ol i olsem “presen” God i givim? (b) Long nau husat i olsem “presen” God i givim long yumi?
10. Bilong wanem tok profet bilong Aisaia long ol “bikman” i makim stret wok bilong ol elda Kristen long nau?
11. Taim yumi bel hevi na yumi pilim olsem yumi no strong long spirit, wanem samting inap helpim yumi?
12-14. (a) Taim yumi gat sik, yumi ken mekim wanem bilong bihainim gutpela tingting? (b) Olsem Jems 5:14 i tok, ol Kristen i gat “sik” ol i ken mekim wanem? (c) Jems 5:14 i tok long wanem kain sik? Olsem wanem yumi inap save long dispela?
15. Jems 5:13, 14 i tok long mekim wanem?
16, 17. Olsem wanem ol elda inap helpim yumi long bihainim ol tok bilong Baibel bilong stretim hevi bilong yumi?
18, 19. Ol elda i gat wanem wok, olsem Galesia 6:2,5 i makim?
20. Bilong wanem yumi no ken les long beten?
21. (a) Bilong wanem sampela Kristen i save surik long singautim ol elda long helpim ol? (b) Long stori i kam bihain long dispela bai yumi toktok long wanem samting?
[Piksa long pes 15]
Yu save beten na stadi long Baibel na singautim ol elda Kristen bilong helpim yu?