Jehova i Laikim Tru Pasin Bilong Yu Long Bihainim Tok

“Pikinini bilong mi, yu mas kisim gutpela tingting na save na bai mi belgut tru.”​—SINDAUN 27:11.

 1. Ol man i save bihainim wanem pasin long nau?

LONG olgeta hap ol man i save bihainim pasin bilong bosim wokabaut bilong ol yet na pasin bilong sakim tok. Aposel Pol i kamapim as bilong dispela samting long pas em i raitim long ol Kristen long Efesus: “Long dispela taim yupela i bin wokabaut long pasin bilong dispela graun, na yupela i bin bihainim pasin bilong hetman i bosim strong bilong win, em spirit i stap insait long bel bilong ol man i sakim tok.” (Efesus 2:​1, 2, NW) Pasin bilong bosim wokabaut bilong ol yet i kain olsem wanpela sik, na Satan, em “hetman i bosim strong bilong win,” i givim dispela sik long olgeta man. Em i bin mekim olsem long taim bilong ol aposel, na em i bin mekim moa yet bihain long em i raus long heven long taim bilong Wol Woa 1.​—KTH 12:9.

2, 3. I gat wanem ol as na yumi mas bihainim tok bilong Jehova?

² Tasol yumi ol Kristen i save olsem i stret long yumi bihainim tok bilong God Jehova bikos em i Man Bilong Wokim yumi, Man Bilong Helpim yumi long i stap laip, gutpela King, na Man Bilong Kisim Bek yumi. (Song 148:​5, 6; Aposel 4:24; Kolosi 1:13; KTH 4:11) Lain Israel long taim bilong Moses i save olsem Jehova em i Man Bilong Givim Laip long ol na Man Bilong Kisim Bek ol. Olsem na Moses i tokim ol: “Yupela i mas lukaut gut, na bihainim olgeta lo God, Bikpela bilong yumi, i bin givim long yupela.” (Lo 5:32) Tru tumas, i stret ol i bihainim tok bilong Jehova. Tasol kwiktaim ol i sakim tok bilong King bilong ol.

³ Pasin bilong bihainim tok bilong Man Bilong Wokim olgeta samting em i bikpela samting olsem wanem? God i bin tokim profet Samuel long tokim King Sol olsem: ‘Pasin bilong bihainim tok em i namba wan pasin tru, pasin bilong mekim ofa em i namba 2 tasol.’ (1 Samuel 15:​22, 23) Bilong wanem i olsem?

Pasin Bilong Bihainim Tok i Winim ‘Pasin Bilong Mekim Ofa’

 4. Olsem wanem yumi ken givim samting long Jehova?

⁴ Jehova em i Man Bilong Wokim olgeta samting, olsem na olgeta samting bilong skin yumi holim i bilong em. Sapos olsem, yu ting i gat wanpela samting yumi inap givim long em? Yes, yumi inap givim em samting i dia tumas. Em wanem samting? Yumi ken kisim bekim long dispela skripsa: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) Yumi ken bihainim tok bilong God. Maski sindaun na pasin yumi bin go bikpela long en i narapela narapela, long rot bilong bihainim tok yumi wan wan i ken bekim dispela tok Satan i sutim long ol man olsem ol man i no inap stap gut long God sapos hevi i painim ol. Em i wanpela gutpela samting yumi ken mekim!

 5. Taim man i sakim tok, dispela i mekim wanem long Man Bilong Wokim olgeta samting? Kamapim tok piksa i stori long dispela.

⁵ God i save tingim ol disisen yumi save mekim. Sapos yumi sakim tok, dispela i save mekim em i bel hevi. (Song 78:​40, 41) Tingim olsem sapos wanpela man i gat sik daiabitis i no kisim ol gutpela kaikai dokta i tokim em long kisim na em i kisim ol kaikai em inap nogutim em, yu ting gutpela dokta bilong em bai pilim olsem wanem? Taim ol man i sakim tok bilong em, Jehova i pilim bel hevi, long wanem, em i save long ol samting bai painim ol man taim ol i sakim gutpela tok bilong helpim ol long i stap laip.

 6. Wanem samting bai helpim yumi long bihainim tok bilong God?

⁶ Wanem samting bai helpim yumi wan wan long bihainim tok? I stret yumi wan wan i askim God long givim yumi “gutpela bel bilong bihainim tok,” olsem King Solomon i bin mekim. Em i mekim olsem na bai em inap “save wanem pasin i gutpela na wanem pasin i nogut” taim em i bosim ol wanlain Israel. (1 King 3:9; NW) Yumi stap long dispela graun i pulap long pasin bilong sakim tok, olsem na yumi mas i gat “gutpela bel bilong bihainim tok” bilong luksave long wanem samting i gutpela na wanem samting i nogut. Bilong helpim yumi long kisim “gutpela bel bilong bihainim tok” God i givim Baibel long yumi, ol buk i helpim yumi long stadi long Baibel, ol miting Kristen, na ol gutpela elda long kongrigesen. Olsem wanem? Yu save mekim gutpela wok long ol dispela gutpela samting?

 7. Bilong wanem Jehova i tok pasin bilong bihainim tok i winim pasin bilong mekim ofa?

⁷ Long samting bilong bihainim tok, tingim olsem bipo Jehova i bin tokim ol manmeri bilong em olsem pasin bilong bihainim tok em i bikpela samting moa, winim pasin bilong givim animal olsem ofa. (Sindaun 21:​3, 27; Hosea 6:6; Matyu 12:7) Bilong wanem Jehova i tok olsem? Em yet i bin tokim ol long mekim ol kain ofa olsem. Tingim, wanem samting i kirapim man long mekim ofa? Em i mekim bilong God i ken amamas long em? O em i bihainim nating wanpela pasin bilong lotu? Sapos man bilong mekim lotu i laik tru long God i amamas long em, orait em bai was gut na bihainim olgeta tok bilong God. God i no gat wok long ol animal em man i givim olsem ofa, tasol pasin bilong yumi long bihainim tok em i wanpela gutpela samting yumi ken givim long em.

Stori i Stap Olsem Tok Lukaut

 8. Bilong wanem God i sakim Sol olsem king?

⁸ Stori bilong King Sol long Baibel i kamapim klia olsem pasin bilong bihainim tok em i bikpela samting. Taim Sol i kirap mekim wok king em i gat pasin daun na em i ting olsem em i “samting nating.” Tasol bihain pasin antap na ol tingting giaman i kirap bosim ol disisen em i mekim. (1 Samuel 10:​21, 22; 15:17) Wanpela taim, Sol i mas pait wantaim ol Filistia. Samuel i tokim king long wetim em long kam na mekim ol ofa long Jehova, na long tokim king long samting em i mas mekim. Tasol Samuel i no kam long taim ol i ting em bai kam, na ol manmeri i kirap long lusim dispela bung. Sol i lukim dispela samting na em i “mekim ofa bilong paia i kukim olgeta.” Jehova i no amamas long dispela samting. Taim Samuel i kam kamap, king i givim eskius na i tok as na em i sakim tok em bikos Samuel i no kamap long taim stret, olsem na em i ting em i “mas mekim ofa” bilong Jehova i ken belgut long em. Long tingting bilong King Sol, pasin bilong mekim ofa em i bikpela samting moa winim pasin bilong bihainim tok long wetim Samuel long mekim ofa. Samuel i tokim em: “Pasin bilong yu i kranki tru. Yu no bihainim tok God, Bikpela bilong yumi, i bin givim yu.” Sol i sakim tok bilong Jehova, olsem na wok king bilong em i lus.​—1 Samuel 10:8; 13:​5-​13.

 9. Olsem wanem Sol i bin kisim pasin bilong sakim tok bilong God?

⁹ Yu ting king i larim dispela samting i skulim em? Nogat! Bihain, Jehova i tokim Sol long bagarapim na pinisim lain Amalek, em ol lain i bin kirap pait long Israel na i no gat as na ol i mekim. Sol i mas kilim i dai olgeta samting, ol sipsip na bulmakau tu. Em i bihainim tok na em i “mekim save pait na i winim ol Amalek, stat long graun bilong Havila na i go inap long ples drai bilong Sur.” Taim Samuel i kam bungim em, king i amamas nogut tru olsem em i bin winim ol dispela lain na em i tok: “Bikpela i ken mekim gut long yu. Mi bihainim pinis tok bilong Bikpela.” Tok ol i kisim long samting ol i mas mekim em i klia tru, tasol ol i sakim dispela tok na Sol na lain bilong em i larim King Agak i stap laip na ol i no kilim i dai ‘ol gutpela gutpela sipsip na bulmakau.’ King Sol i tok i gat as na em i sakim tok, em i tok: ‘Ol soldia bilong mi i bin kisim ol sipsip na bulmakau i gutpela gutpela bilong mekim ofa long God, Bikpela bilong yumi.’​—1 Samuel 15:​1-​15.

10. Sol i no bin lain long wanem bikpela samting?

¹⁰ Long dispela taim stret, Samuel i tokim Sol: “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en? Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol.” (1 Samuel 15:22) Jehova i bin tokaut pinis olsem ol i mas kilim i dai ol dispela animal, olsem na em i no orait long ol i yusim ol long mekim ol ofa.

Bihainim Tok Long Olgeta Samting

11, 12. (a) Jehova i gat wanem tingting long ol samting yumi mekim bilong lotuim em long pasin em i laikim? (b) Olsem wanem man inap giamanim em yet na ting olsem em i mekim laik bilong God, tasol long seim taim em i sakim tok bilong God?

¹¹ Jehova i save amamas tru long lukim ol wokboi bilong em i no lusim em maski ol man i mekim nogut long ol, na ol i autim tok bilong Kingdom maski ol man i les long harim, na ol i go oltaim long ol miting Kristen maski ol i hatwok long kisim mani bilong lukautim famili! Pasin bilong yumi long bihainim tok long ol dispela bikpela samting i save mekim Jehova i belgut tru! Taim pasin laikim i kirapim yumi long mekim ol samting bilong lotuim Jehova dispela i dia tumas long em. Ol man i no tingim hatwok bilong yumi, tasol God i luksave long wok em bel bilong yumi i kirapim yumi long mekim, na em i save tingim dispela.​—Matyu 6:4.

¹² Tasol bilong God i ken amamas tru long yumi, yumi mas bihainim tok long olgeta samting long laip bilong yumi. Yumi no ken giamanim yumi yet na ting olsem sapos yumi mekim sampela samting bilong lotuim God, orait i no gat rong long sakim sampela lo bilong em. Olsem: Ating man inap giamanim em yet na ting sapos em i mekim nating sampela wok bilong lotu orait em inap mekim pasin pamuk o narapela bikpela rong na bai em i no inap kisim strafe. Dispela kain tingting i no stret!​—Galesia 6:​7, 8.

13. Taim yumi stap long haus, olsem wanem traim inap kamap long pasin bilong yumi long bihainim tok bilong Jehova?

¹³ Olsem na yumi ken askim yumi yet, ‘Mi save bihainim tok bilong Jehova long ol samting mi save mekim long olgeta wan wan de, na long ol samting bilong mi yet?’ Jisas i tok: “Sapos wanpela man i save lukaut gut long ol liklik samting, orait em bai i lukaut gut long ol bikpela samting tu. Na man i save mekim pasin i no stret long ol liklik samting, em bai i mekim pasin i no stret long ol bikpela samting tu.” (Luk 16:10) Olsem wanem? Yumi “mekim stretpela pasin” taim yumi stap insait “long haus bilong [yumi],” we ol narapela i no inap lukim yumi? (Song 101:2) Yes, taim yumi stap long haus, traim inap kamap long pasin bilong yumi long bihainim stretpela pasin. Long planti kantri we ol man i gat kompiuta long haus, em i isi tru long yusim kompiuta bilong lukim ol piksa nogut. Sampela yia i go pinis, ol man i laik lukim ol kain piksa olsem i mas i go long wanpela klap o haus bisnis samting we ol i save soim ol dispela kain piksa. Olsem wanem? Bai yumi bihainim tok bilong Jisas olsem: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” Bai yumi sakim pasin bilong lukluk long ol piksa samting i soim pasin pamuk? (Matyu 5:28; Jop 31:​1, 9, 10; Song 119:37; Sindaun 6:​24, 25; Efesus 5:​3-5) Olsem wanem long ol TV program i kamapim pasin pait? Yumi wanbel wantaim God bilong yumi husat i tok “em i no laikim tru ol man i laikim pasin pait”? (Song 11:​5, NW) O olsem wanem long pasin bilong dring planti tumas taim yu stap long haus? Baibel i tambuim pasin bilong dring spak, tasol em i givim tu tok lukaut long ol Kristen long ol i “no ken larim wain i bosim tingting bilong ol.”​—Taitus 2:3; Luk 21:​34, 35; 1 Timoti 3:3.

14. Wanem sampela samting inap soim olsem yumi bihainim tok bilong God long ol samting bilong mani?

¹⁴ Narapela samting yumi mas was gut long en em ol samting long sait bilong mani. Olsem wanem? Bai yumi insait long sampela wok bilong kisim kwik bikpela mani na i klostu wankain olsem giamanim man na stilim mani bilong em? Pasin bilong giaman long baim takis i pulim yumi? O yumi save bihainim stret tok bilong “givim ol kain kain takis long man bilong kisim takis”?​—Rom 13:7.

Pasin Laikim i Kirapim Yumi Long Bihainim Tok

15. Wanem as na yu save bihainim tok bilong Jehova?

¹⁵ Pasin bilong bihainim ol lo bilong God i save kamapim ol blesing. Olsem: Taim yumi tingim olsem blut i holi, sakim smok samting, na yumi no pamuk, yumi abrusim ol kain kain sik. Na tu, taim yumi bihainim tok i tru bilong Baibel long ol narapela samting yumi mekim, dispela inap helpim yumi long sait bilong mani, sindaun, na insait long famili. (Aisaia 48:17) Yumi ken tok olsem ol gutpela samting i painim yumi long dispela rot ol i kamapim long ples klia olsem ol lo bilong God i save helpim ol man. Tasol nambawan as na yumi bihainim tok bilong Jehova em yumi laikim em tumas. Yumi no tingim ol gutpela samting yumi inap kisim na dispela i as na yumi lotuim God. Nogat. (Jop 1:​9-​11; 2:​4, 5) God i wokim yumi bilong yumi yet i ken makim olsem yumi laik bihainim tok bilong husat. Yumi makim olsem yumi laik bihainim tok bilong Jehova bikos yumi laik bai em i amamas long yumi na yumi laik bihainim stretpela pasin.​—Rom 6:​16, 17; 1 Jon 5:3.

16, 17. (a) Olsem wanem Jisas i bin kamapim olsem em i laikim tumas God na dispela em i as na em i bihainim tok bilong God? (b) Olsem wanem yumi ken bihainim pasin bilong Jisas?

¹⁶ Jisas i laikim tru Jehova na dispela i kirapim em long bihainim tok bilong em. Em i stap gutpela piksa tru long dispela. (Jon 8:​28, 29) Taim Jisas i stap long graun “em i karim pen, na dispela i skulim em tru long pasin bilong bihainim tok.” (Hibru 5:​8, 9) Olsem wanem dispela i skulim em? Jisas “i daunim em yet na i bihainim tok bilong God, i go inap long em i dai, yes, inap long em i dai long diwai.” (Filipai 2:​7, 8) Tru, Jisas i bin bihainim tok taim em i stap long heven, tasol ol samting i kamap long graun i traim moa yet pasin bilong em long bihainim tok. Yumi ken bilip tru olsem Jisas i winim tru mak bilong mekim wok Hetpris long ol brata spirit bilong em na long ol arapela manmeri i bilip long em.​—Hibru 4:15; 1 Jon 2:​1, 2.

¹⁷ Olsem wanem long yumi? Yumi ken bihainim pasin bilong Jisas na putim pasin bilong bihainim laik bilong God i stap nambawan samting long laip bilong yumi. (1 Pita 2:21) Yumi wan wan i ken amamas taim pasin bilong yumi long laikim God i kirapim yumi long bihainim tok bilong Jehova, maski sampela taim ol narapela i laik subim o pulim yumi long sakim tok. (Rom 7:​18-​20) Na laik bilong yumi long bihainim tok bilong ol man i go pas long lotu i tru, maski ol i no gutpela olgeta, em tu i insait long dispela. (Hibru 13:17) Pasin bilong yumi long bihainim tok bilong God long ol samting yumi mekim taim yumi wanpela tasol i stap, dispela em i dia tumas long ai bilong Jehova.

18, 19. Taim bel bilong yumi i kirapim yumi long bihainim tok bilong God wanem samting i save kamap long dispela?

¹⁸ Long nau, bilong bihainim tok bilong Jehova ating sampela i mas sanap strong taim ol man i mekim nogut long ol. (Aposel 5:29) Na tu, bilong bihainim tok bilong Jehova long mekim wok bilong autim tok na skulim ol man yumi mas sanap strong i go inap long dispela taim yumi stap long en i pinis. (Matyu 24:​13, 14; 28:​19, 20) Yumi mas i gat pasin bilong sanap strong na bai yumi wok yet long bung wantaim ol brata bilong yumi, maski ol hevi bilong dispela graun i laik daunim yumi. Gutpela God bilong yumi i save gut long olgeta samting yumi mekim bilong bihainim tok long ol dispela samting. Tasol bilong bihainim gut olgeta tok, yumi mas daunim ol laik nogut bilong skin na givim baksait long ol pasin nogut, na kisim laik long bihainim ol gutpela pasin.​—Rom 12:9.

¹⁹ Taim yumi lotuim Jehova, long wanem, yumi laikim em tumas na bel bilong yumi i kirapim yumi long mekim olsem, long kain taim olsem em “i save mekim gut tru long ol man [long yumi] i wok long painim em.” (Hibru 11:6) Yumi mas mekim ol gutpela ofa na God i laik bai yumi mekim olsem, tasol Jehova i amamas moa yet taim yumi bihainim tok bilong em, long wanem, yumi laikim em tumas.​—Sindaun 3:​1, 2.

Bai Yu Bekim Olsem Wanem?

• Bilong wanem yumi ken tok olsem yumi gat wanpela samting yumi ken givim long Jehova?

• Sol i bin mekim wanem ol rong?

• Olsem wanem yu ken soim olsem yu bilip olsem pasin bilong bihainim tok i winim pasin bilong mekim ofa?

• Wanem samting i kirapim yu long bihainim tok bilong Jehova?

[Piksa long pes 26]

Gutpela dokta bai pilim olsem wanem sapos sikman i sakim tok em i mekim bilong helpim em?

[Piksa long pes 28]

Bilong wanem Jehova i no amamas long King Sol?

[Ol Piksa long pes 30]

Olsem wanem? Yu save bihainim ol tok bilong God taim yu stap long haus?