Stap Wanbel na Laikim Tru Ol Narapela

“Laikim tru ol arapela manmeri bilong God na . . . stap wanbel tru wantaim ol.”​—⁠KOLOSI 2:⁠2.

HARIM! Wanpela strongpela nek long heven i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Long olgeta yia dispela toksave i sutim moa yet olgeta manmeri i stap long graun.

² Long bipo yet na i kam inap nau, ol i kolim dispela nambawan birua bilong Jehova olsem birua. Tasol nau dispela man bilong giamanim ol man em i kamap wanpela god i belhat nogut tru! Bilong wanem? Long wanem, long dispela pait i bin kamap long heven long 1914, Maikel wantaim ol ensel bilong em i rausim em long heven. (KTH 12:​7-9) Satan i save em i gat sotpela taim tasol bilong truim dispela tok bilong em olsem em inap pulim olgeta man na bai ol i no lotuim God. (Jop 1:11; 2:​4, 5) Nau em i no gat rot long ranawe, olsem na em wantaim ol ensel nogut bilong em i olsem wanpela lain binen i kros nogut tru na i laik bagarapim ol manmeri bilong dispela graun ol i no stap isi.​—⁠Aisaia 57:⁠20.

³ Taim yumi save long ol dispela samting i bin kamap em ol man i no bin lukim long ai, nau yumi ken save, bilong wanem planti manmeri bilong nau i lusim pinis stretpela pasin, na bilong wanem ol lain i bruk bruk na ol i no inap sindaun gut wantaim, na ol man i hatwok tru long stretim dispela pasin birua i stap namel long ol. Ol liklik lain insait long wanpela kantri ol i pait na narapela lain i bagarapim narapela lain, olsem na long nau planti milion manmeri i no gat haus, o ol i mas ranawe i go long ol narapela kantri. Long dispela as, pasin nogut i go bikpela moa, winim olgeta taim bipo! Olsem Jisas i tok profet pinis, ‘planti man i lusim pasin bilong laikim ol arapela.’ Long olgeta hap yumi lukim ol man i no stap wanbel, na ol i no laikim ol narapela man.​—⁠Matyu 24:⁠12.

⁴ Yumi tingim ol dispela hevi i kamap long graun na yumi pilim tru beten bilong Jisas long helpim ol disaipel bilong em. Em i beten olsem: “Mi no askim yu long tekewe ol long dispela graun. Nogat. Mi beten long yu long yu ken lukautim ol, na man nogut i no ken bagarapim ol. Ol i no bilong dispela graun, olsem mi yet mi no bilong dispela graun.” (Jon 17:​15, 16) Long nau dispela “man nogut” i belhat moa yet long ol man “i save bihainim ol lo bilong God, na ol i save autim tok bilong Jisas na bihainim em.” (KTH 12:17) Sapos Jehova i no was long ol gutpela Witnes bilong em na lukautim ol, longtaim Satan bai pinisim ol. Olsem na yumi mas mekim wok long olgeta samting God i givim long yumi bilong lukautim yumi long ol samting bilong spirit. Yumi mas taitim bun na mekim wok long strong bilong spirit holi God i givim long yumi long rot bilong Krais Jisas, olsem Pol i bin tokim ol Kolosi long mekim.​—⁠Kolosi 1:⁠29.

⁵ Ating i no gat wanpela taim Pol i bin lukim ol brata long Kolosi, tasol em i laikim tumas ol. Em i tokim ol: “Mi laik yupela i mas save olsem, mi save hatwok moa bilong helpim yupela.” (Kolosi 2:⁠1) Lain bilong Jisas i no bilong dispela graun, olsem na dispela “man nogut” bai wok strong long bagarapim pasin wanbel i stap namel long ol brata​—⁠em i laik kirapim ol long kisim ol tingting na pasin bilong dispela graun. Ol tok Epafras i bin bringim long Pol i makim olsem dispela samting i bin kamap long kongrigesen bilong Kolosi.

⁶ Bikpela tingting bilong Pol long ol brata Kristen i kamap klia long tok bilong em: “Laikim tru ol arapela manmeri bilong God na . . . stap wanbel tru wantaim ol.” Tok bilong em i sutim stret taim bilong yumi, em ol man i no stap wanbel na laikim ol narapela. Sapos yumi putim gut dispela tok bilong Pol long bel bilong yumi, Jehova bai lukautim yumi. Na bai yumi kisim strong bilong spirit bilong em na dispela bai helpim yumi long sakim ol hevi bilong dispela graun i laik daunim yumi. Man i gat gutpela tingting em bai bihainim gut dispela tok! Olsem na tok bilong Kolosi 2:2 em i yia-teks bilong 1995.

⁷ Long pas Pol i bin salim long ol Korin, em i mekim tok piksa long bodi bilong man. Em i tok, kongrigesen Kristen i no ken “bruk hap hap. Nogat. Olgeta hap wan wan ol i ken lukautim ol arapela hap long wankain pasin.” (1 Korin 12:​12, 24, 25) Em i gutpela tok piksa tru, a? Ol han lek samting bilong yumi, narapela i save helpim narapela, na olgeta i pas long bodi bilong yumi. Na i wankain tu long lain brata i stap long olgeta hap, em ol brata God i bin makim long spirit holi na ol brata i gat tingting long i stap long Paradais long graun. Yumi no ken bruk long ol narapela Kristen na bai yumi yet i stap! Long rot bilong Krais Jisas, bikpela hap spirit bilong God i save kam long yumi taim yumi bung wantaim ol brata.

Pasin Wanbel na Save i Wok Wantaim

⁸ Wanpela bikpela samting Pol i laik kamapim klia i olsem: Pasin bilong kisim save long Krais Jisas na ol narapela save bilong Baibel i mekim yumi i stap wanbel. Pol i tok, ol Kristen i mas “laikim tru ol arapela manmeri bilong God na . . . stap wanbel tru wantaim ol,” na ol i mas “save gut long as bilong tok hait bilong God. Krais yet em i as bilong dispela tok hait.” (Kolosi 2:⁠2) Taim yumi bin kirap stadi long tok bilong Baibel, yumi wok long kisim save​—⁠em save bilong ol samting tru. Na taim yumi wok long kisim save long olsem wanem ol dispela samting tru i insait long ol samting God i laik mekim, yumi save, Jisas i gat bikpela wok insait long dispela laik bilong God. “Olgeta kain save na tingting hait i pulap long Krais.”​—⁠Kolosi 2:⁠3.

⁹ Yu gat dispela kain tingting long Jisas na wok bilong em insait long ol samting God i laik mekim? Planti man i gat nem Kristen ol i amamas long toktok long Jisas​—⁠ol i tok ol i kisim pinis Jisas na nau ol i no inap lus. Tasol yu ting ol i save tru long em? Nogat. Long wanem, planti ol i bilip long God Triwan, na dispela tok i no stap long Baibel. Tasol yu save pinis long dispela samting, na ating yu gat bikpela save long ol tok bilong Jisas na ol samting em i bin mekim. Buk Nambawan Man Tru i Winim Olgeta Narapela Man em i bin helpim planti manmeri long kisim dispela save. Tasol yumi mas wok yet long kisim save long Jisas na ol pasin bilong em.

¹⁰ Tasol dispela tok, “Olgeta kain save na tingting hait i pulap long Krais,” em i no makim olsem yumi no inap kisim dispela kain save. Em i olsem gol-main i op tru na yumi no gat wok long go nabaut na painim ples bilong digim graun​—⁠yumi save pinis long ples em i stap long en. Yumi kirap long kisim save tru taim yumi save long ol tok Baibel i mekim long Krais Jisas. Orait taim yumi wok long pilim tru bikpela wok bilong Jisas insait long ol samting Jehova i laik mekim bilong kamapim laik bilong em, em nau, yumi kisim stretpela save na tingting. Olsem na yumi mas wok strong long “digim graun” i go daun moa bilong painim na kamautim ol gutpela save i hait i stap long dispela ples pastaim yumi bin kisim ol gutpela save long en.​—⁠Sindaun 2:​1-5.

¹¹ Olsem: Ating yumi save pinis olsem Jisas i bin wasim lek bilong ol aposel. (Jon 13:​1-20) Tasol olsem wanem? Yumi bin tingim gut long bel ol samting em i laik lainim yumi long en na wanem kain pasin em i bin kamapim taim em i mekim olsem? Sapos yumi tingim gut long bel, ating bai yumi painim ol gutpela save na tingting i helpim na kirapim yumi long senisim ol pasin yumi save mekim long wanpela brata o sista, em pasin bilong em i bin skrapim bel bilong yumi inap longtaim pinis. O sapos yumi kisim wanpela wok bilong spirit yumi no laikim tumas, orait sapos bel bilong yumi i kisim tru tok bilong Jon 13:​14, 15, ating bai yumi kisim narapela kain tingting long dispela wok. Save na gutpela tingting i save mekim olsem long yumi. Na taim yumi wok yet long kisim save long Krais na bihainim pasin bilong em, dispela inap mekim wanem long ol narapela? Yumi save, lain bilong God bai stap wanbel na narapela bai laikim tru narapela.a

Samting Inap Bagarapim Pasin Wanbel

¹² Sapos stretpela save i helpim yumi long i stap wanbel na narapela i laikim tru narapela, orait samting ol man i giaman na kolim “save” em inap mekim wanem? Em inap kamapim ol tok pait na pinisim pasin wanbel na yumi lusim bilip. Olsem na yumi mas lukaut long dispela kain giaman save, olsem Pol i bin tokim Timoti. (1 Timoti 6:​20, 21) Na Pol i tok: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.”​—⁠Kolosi 2:​4, 8.

¹³ Olkain giaman save i pulap tru long Kolosi na ol Kristen i stap namel long en. Planti man i litimapim ol “savetok” bilong ol Grik. Na sampela man i strong long bihainim pasin bilong ol Juda na ol i laik bai ol Kristen i bihainim Lo Bilong Moses, olsem ol bikpela de bilong lotu na ol lo bilong kaikai. (Kolosi 2:​11, 16, 17) Pol i no bel nogut long ol brata bilong em i kisim stretpela save, tasol ol i mas lukaut, nogut wanpela man i autim olkain giaman save na toktok nating long ol na mekim ol i bihainim tingting na pasin bilong ol man bilong graun. Yumi save, sapos sampela long kongrigesen i bihainim ol dispela kain tingting em Baibel i no as bilong en, dispela bai bagarapim pasin wanbel bilong ol brata sista insait long kongrigesen na pasin bilong laikim ol narapela.

¹⁴ Ating bai yu ting, ‘Tru, mi save ol Kolosi i mas lukaut long dispela samting, tasol ol tingting na bilip bilong ol Grik, olsem man i gat tewel, o god triwan, i no inap pulim mi. Na ol bikpela de bilong dispela lotu mi lusim pinis, em ol i kisim long ol haiden, dispela tu i no inap pulim mi.’ Em gutpela tingting bilong yu. Yumi mas bilip strong olsem tok i tru yumi kisim long rot bilong Krais Jisas na i stap long Baibel i winim tru tok bilong ol man. Tasol nogut ol narapela tok o tingting bilong dispela graun em planti man i bihainim long nau i pulim yumi.

¹⁵ Wanpela tingting em ol man i bin holim inap longtaim pinis em olsem: “Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.” (2 Pita 3:⁠4) Ating sampela man bai kolim dispela tok long narapela pasin, tasol ol i gat wankain tingting tasol. Olsem: Ating sampela bai tok, ‘Taim mi bin kisim save long tok i tru inap planti yia bipo, ol i tok, pinis i klostu tru. Tasol em i no kamap yet, na yumi no save wanem taim em bai kam.’ Tru i no gat wanpela man i save. Tasol tingim gut wanpela tok bilong Jisas, em i tok: “Yupela i mas was i stap, long wanem, yupela i no save wanem taim dispela ol samting bai i kamap.”​—⁠Mak 13:​32, 33.

¹⁶ Nogut yumi kisim tingting olsem: Yumi no save wanem taim bai pinis i kamap, olsem na nau yumi mas painim rot bilong kisim gutpela sindaun olsem ol narapela man! Dispela tingting i save kamap ples klia long kain tok olsem: ‘Ating bai mi kirap mekim ol samting bambai mi (o ol pikinini bilong mi) inap kisim wanpela gutpela wok mani i gat bikpela pe bilong en, na bai mi gat gutpela sindaun. Bai mi go long ol miting, na sampela taim mi ken autim tok, tasol i no gat as na bai mi mas taitim bun tru o lusim planti samting bilong skin.’​—⁠Matyu 24:​38-42.

¹⁷ Tasol tok bilong Jisas na ol aposel i kamapim klia olsem yumi mas ting, taim i sot pinis long autim gutnius, olsem na yumi mas taitim bun na daunim sampela laik bilong skin. Pol i tok: “Ol brata, mi tok olsem, taim i sotpela nau. Olsem na long dispela hap taim i stap yet, ol man i gat meri ol i mas i stap olsem ol i no gat meri. . . . Na ol man i save baim samting, ol i mas i stap olsem ol i no gat samting. Na ol man i save mekim wok long samting bilong graun, ol i mas i stap olsem dispela wok i no bikpela samting long laip bilong ol. Yumi save, i no longtaim na bai . . . olgeta samting bilong [dispela graun] bai i pinis.”​—⁠1 Korin 7:​29-31; Luk 13:​23, 24; Filipai 3:​13-15; Kolosi 1:29; 1 Timoti 4:10; 2 Timoti 2:4; KTH 22:⁠20.

¹⁸ Em nau, Pol i no tok yumi mas tingting long kisim gutpela sindaun long nau, a? Spirit holi i kirapim Pol long raitim tok olsem: “Taim mama i karim yumi na yumi kamap long graun, yumi no bin karim wanpela samting i kam. Na taim yumi lusim graun yumi bai i no inap karim wanpela samting i go. Tasol sapos yumi gat kaikai na laplap samting, orait yumi ken tok, ‘Em inap long mi.’ . . . Olsem na yu mas ran strong long dispela gutpela resis na bai yu kisim laip i stap gut oltaim oltaim. Long taim yu bin sanap strong na autim bilip bilong yu long ai bilong planti man, God i bin singautim yu bilong kisim dispela laip.”​—⁠1 Timoti 6:​7-12.

¹⁹ Taim olgeta Kristen long kongrigesen i wok strong long ‘autim bilip bilong ol,’ ol i save stap wanbel. Ol i no bihainim tingting olsem, ‘Mi gat planti samting i stap inap planti yia. Orait nau bai mi malolo na kaikai na amamas i stap.’ (Luk 12:19) Ol i wanbel long mekim wankain wok, na ol i amamas long lusim sampela samting bilong skin bambai ol inap mekim wok autim tok inap tru long strong bilong ol, em dispela wok i no inap kamap gen.​—⁠Skelim wantaim Filipai 1:​27, 28.

Lukaut Long Tok Gris Bilong Man

²⁰ Tasol i gat ol narapela rot tu na tok gris inap giamanim ol Kristen na bai ol i no stap wanbel moa. Brens-ofis bilong Sosaiti Was Taua long Jemani i raitim pas olsem: ‘Pasin bilong wanpela brata long glasim sik i kamapim tok pait insait long planti kongrigesen, na sampela pablisa na sampela elda tu i kirap helpim narapela narapela tok insait long dispela tok pait.’ Na pas i tok: ‘Em i gat kain kain pasin bilong stretim sik, na planti sikman i save go long em, olsem na i gat kain kain tingting inap kamap long dispela, na sapos sampela pasin em i mekim i wankain liklik olsem wok bilong ol glasman samting, dispela inap nogutim man.’​—⁠Efesus 6:⁠12.

²¹ Ol Kristen i laik i stap laip na no gat sik na bai ol i ken lotuim God. Tasol yumi gat sin na yumi save go lapun na sik i save painim yumi. Orait yumi no ken mekim bikpela tok long ol samting bilong helpim skin na oraitim sik​—⁠yumi mas toktok long rot tru bilong stretim ol sik bilong yumi na bilong ol narapela man tu. (1 Timoti 4:16) Yumi mas tingim Krais yet i rot bilong stretim dispela hevi, olsem Pol i bin tokim ol Kolosi long tingim Krais. Tasol Pol i makim olsem sampela bai kam na ‘autim giaman save’ bilong ol long yumi na nau yumi no tingim Krais​—⁠yumi tingim ol pasin bilong glasim sik na olkain marasin, o ol kaikai yumi mas kisim na ol kaikai yumi no ken kisim.​—⁠Kolosi 2:​2-4.

²² Long olgeta hap ol i putim planti toksave long ol nius na televisen i stori long kain kain rot bilong glasim na stretim sik. Sampela i gat nem na planti man i save mekim wok long en, na sampela em planti man i no orait long en o ol i tingting planti long en.b Olgeta wan wan yet i mas tingim samting em bai mekim bilong stretim sik bilong em. Tasol ol man i bihainim tok bilong Pol long Kolosi 2:​4, 8, dispela i helpim ol na ol “giaman save” o “toktok nating” i no inap pulim ol olsem i save pulim planti man em ol i no save long ol gutpela samting Kingdom bai mekim, na ol i laik painim rot bilong stretim sik bilong ol. Na sapos wanpela Kristen i bilip tru olsem wanpela marasin samting i helpim em, em i no ken strong long kirapim ol narapela Kristen long kisim, long wanem, dispela inap kamapim bikpela tok na tok pait tu namel long ol brata. Sapos em i no mekim dispela kain pasin, em i kamapim klia olsem em i tingim pasin wanbel insait long kongrigesen i bikpela samting tru.

²³ Pol i tok, pasin wanbel bilong ol Kristen em i samting bilong amamas tru. Long taim bilong Pol i no gat planti kongrigesen olsem nau i stap. Tasol em inap raitim pas long ol Kolosi olsem: “Mi no i stap wantaim yupela. Tasol long tingting bilong mi, i olsem mi stap wantaim yupela, na mi amamas long lukim yupela i wok stret na i bilip strong long Krais.” (Kolosi 2:⁠5; lukim tu Kolosi 3:14.) Tasol i gat planti as tru na yumi ken amamas! Yumi inap lukim pasin wanbel, na ol samting i wok stret, na strongpela bilip insait long kongrigesen bilong yumi yet, na ol dispela pasin i stap long lain bilong God long olgeta hap. Olsem na long dispela sotpela taim i stap yet, yumi olgeta wan wan i mas strong long i stap wanbel na laikim tru ol brata.

[Ol Futnot]

Yu Tingim?

◻ Wanem yia-teks bilong ol Witnes Bilong Jehova bilong 1995?

◻ Bilong wanem ol Kristen long Kolosi i mas i stap wanbel na laikim tru ol brata? Bilong wanem yumi tu i mas mekim olsem?

◻ Wanem kain tingting inap bagarapim ol Kristen bilong nau na ol i mas lukaut gut long en?

◻ Bilong wanem ol Kristen i mas tingting gut na bai ol tok gris long marasin na pasin bilong glasim sik i no ken pulim ol?

[Askim Bilong Stadi]

1, 2. Wanem samting i mekim na ol man i bruk bruk long nau?

 3. Ol i rausim Satan long heven long taim bilong yumi na dispela i mekim wanem?

 4. Bilong wanem lain bilong God i mas was gut moa yet?

5, 6. Aposel Pol i ting olsem wanem long ol Kristen long Kolosi? Olsem wanem yia-teks bilong 1995 i stret long dispela taim?

 7. Wanem pasin i mas i stap namel long ol Kristen tru?

8, 9. (a) Wanem bikpela samting tru bilong helpim kongrigesen long i stap wanbel? (b) Olsem wanem yu bin kisim save long Krais?

10. Olsem wanem yumi inap kisim ol save i stap hait?

11. Taim yumi tingim ol pasin bilong Jisas, olsem wanem dispela i helpim yumi long kisim sampela save moa? (Stori tu long Jisas i bin wasim lek bilong ol disaipel, o narapela samting Jisas i bin mekim.)

12. Yumi mas lukaut long wanem kain save?

13, 14. (a) Bilong wanem ol brata long Kolosi i mas lukaut, nogut sampela kain save i pulim ol? (b) Bilong wanem sampela long nau i ting ol i no gat wok long lukaut long dispela samting?

15, 16. Wanem kain tingting inap paulim Kristen?

17, 18. Jisas na ol aposel i laik kirapim yumi long kisim wanem kain tingting?

19. Taim olgeta long kongrigesen i holim dispela tingting Jisas i laik kirapim yumi long kisim, dispela i save mekim wanem long kongrigesen?

20. I gat wanem narapela rot na ol tok gris inap giamanim ol Kristen?

21. Long nau wanem samting inap mekim na Kristen i no tingting stret?

22. Yumi mas i gat wanem stretpela tingting long ol kain kain tok long ol inap glasim sik o mekim sampela samting bilong oraitim sik?

23. Bilong wanem i gat as na yumi ken amamas?

[Ol Piksa long pes 17]

Olsem wanem? Yu tingim Jisas i stap pinis olsem King na dispela i stiaim tingting bilong yu long ol samting yu laik mekim bihain?