Husat Dispela “Man Bilong Sakim Lo”?
“Long dispela taim dispela man bilong sakim lo em bai i kamap ples klia. Na Bikpela Jisas bai i kilim em i dai.”—2 TESALONAIKA 2:8.
1, 2. Bilong wanem i bikpela samting yumi mas save long dispela man bilong sakim lo?
YUMI stap long taim bilong planti man i mekim pasin bikhet. Long olgeta hap bilong graun pasin bilong sakim lo i go bikpela. Taim yumi stap long haus o yumi wokabaut long rot na long ol narapela taim tu, yumi save pret long man nogut i bagarapim yumi o stilim samting bilong yumi. Tasol i gat narapela kain pasin tu bilong sakim lo em i stap hait na i giamanim ol man na i wok i stap inap planti handet yia pinis. Baibel i kolim olsem “man bilong sakim lo.”
2 Em bikpela samting yumi mas save, husat dispela “man,” long wanem em i laik bagarapim yumi na bai yumi no stap gutpela moa long ai bilong God, na yumi no inap kisim laip i stap oltaim. Em i bihainim wanem rot bilong mekim olsem? Em i wok long pulim yumi bambai yumi lusim ol tok i tru na yumi kirap long bilipim ol tok giaman. Na bai yumi no lotuim God moa “long strong bilong Holi Spirit na long pasin i tru.” (Jon 4:23) Ol samting dispela “man” i mekim i kamapim long ples klia olsem em i birua long God na long ol samting God i laik mekim, na em i birua long lain bilong God, em ol i dediket long Em.
3. Baibel i stori olsem wanem long man bilong sakim lo?
3 Baibel i stori long dispela man bilong sakim lo long 2 Tesalonaika 2:3. Spirit bilong God i givim save long aposel Pol na Pol i tok: “Yupela i no ken larim wanpela man i giamanim yupela long tok bilong en o long pasin em i mekim. Harim. Dispela De [bilong Jehova i pinisim pasin nogut nau i stap long graun] i no inap kamap nating. Nogat. Pastaim planti man bai i bikhet na givim baksait long God. Na man bilong sakim lo bai i kamap ples klia.” Em, Pol i tok profet olsem taim dispela pasin bilong nau i no pinis yet bai pasin bilong bikhet na givim baksait long God i kamap, na long dispela taim bai wanpela man bilong sakim lo i kamap ples klia. Long ves 7, Pol i tok: “Nau dispela pasin bilong sakim lo em i wok hait i stap.” Olsem na yumi save, long taim bilong ol aposel dispela man bilong sakim lo i wok long kamap ples klia!
Dispela Man Bilong Sakim Lo i Kamap Olsem Wanem?
4. Husat i bin kamapim dispela man bilong sakim lo na i helpim wok bilong em?
4 Husat i bin kamapim dispela man bilong sakim lo na helpim wok bilong em? Pol i bekim dispela askim, olsem: “Dispela man bilong sakim lo bai i kamap ples klia long strong bilong Satan tasol. Na long pasin giaman bilong Satan em bai i mekim olgeta kain strongpela wok na ol kain kain giaman mirakel. Na long olgeta giaman bilong pasin nogut em bai i giamanim ol dispela manmeri i wokabaut long rot bilong bagarap. Ol dispela manmeri bai i bagarap, long wanem, taim God i givim tok tru long ol, bai em i ken kisim bek ol, ol i no laikim tru dispela tok.” (2 Tesalonaika 2:9, 10) Olsem na Satan i bin kamapim na helpim dispela man bilong sakim lo. Satan i birua long Jehova, na long ol samting Jehova i laik mekim, na long lain bilong Jehova, na dispela man bilong sakim lo i mekim olsem tasol, maski em i no save em i mekim olsem o em i save.
5. Wanem samting bai painim dispela man bilong sakim lo na ol man i bihainim em?
5 Ol man i bihainim dispela man bilong sakim lo bai kisim wankain strafe olsem em bai kisim—bai ol i bagarap. Baibel i tok: “Dispela man bilong sakim lo em bai i kamap ples klia. Na Bikpela Jisas bai i kilim em i dai . . . Bikpela bai i kamap ples klia . . . em bai i bagarapim tru dispela man bilong sakim lo.” (2 Tesalonaika 2:8) Taim bilong bagarapim dispela man bilong sakim lo wantaim ol lain i helpim em (em “ol dispela manmeri i wokabaut long rot bilong bagarap”), dispela taim i klostu pinis. Dispela samting bai kamap “long taim Bikpela Jisas wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas, Bikpela bilong yumi. Ol dispela man bai . . . bagarap i stap oltaim oltaim.”—2 Tesalonaika 1:6-9.
6. Pol i mekim wanem tok moa long dispela man bilong sakim lo?
6 Pol i stori moa long dispela man bilong sakim lo na em i tok: “Em bai i birua long olgeta samting ol man i save lotu long en na kolim olsem god bilong ol. Na em bai i hambak na litimapim nem bilong em yet na daunim dispela olgeta samting. Olsem na em bai i sindaun insait long haus bilong God, na em bai i autim tok olsem, ‘Mi yet mi God.” ’ (2 Tesalonaika 2:4) Olsem na Pol i toksave olsem Satan yet bai kamapim wanpela man bilong sakim lo, em wanpela giaman samting ol man bai litimapim olsem god bilong ol, na em bai sakim ol lo bilong God na litimapim em yet olsem em yet i God.
Husat Dispela Man Bilong Sakim Lo?
7. Olsem wanem yumi ken save, Pol i no stori long wanpela man tru? Dispela man bilong sakim lo i makim wanem samting?
7 Olsem wanem? Pol i toktok long wanpela man tru? Nogat. Long wanem Pol i tok, dispela “man” i stap long taim bilong em na em bai stap inap long taim Jehova i bagarapim em long pinis bilong dispela taim nau. Olsem na dispela “man” i bin i stap inap planti handet yia. Tasol i no gat wanpela man tru i bin i stap longtaim olsem. Olsem na dispela tok “man bilong sakim lo” i makim wanpela lain.
8. Husat dispela man bilong sakim lo? Wanem sampela samting i makim olsem dispela lain ol i “man bilong sakim lo”?
8 Em wanem lain? Olgeta samting i bin kamap i makim klia olsem dispela lain em i ol bikman bilong ol misin ol i kolim Kristen. Inap planti handet yia pinis dispela lain i bin litimapim ol yet i stap antap na ol i autim tok olsem ol yet i God. Ol i sakim ol lo bilong God na putim ol lo bilong ol yet. Olsem na long nau ol lain ol i kolim Kristen ol i bruk bruk na i gat planti tausen lotu ol i kolim Kristen. Olgeta dispela lain i gat lain pris na pasto bilong ol na ol i lainim ol man long kain kain tok na pasin, na tok bilong narapela i pait wantaim tok bilong narapela. Ol i no stap wanbel—ol i bruk long narapela narapela lain na dispela samting i kamapim long ples klia olsem ol i no save bihainim ol lo bilong God. Ol i no bilong God. (Lukim Maika 2:12; Mak 3:24; Rom 16:17; 1 Korin 1:10.) Dispela olgeta lotu i wankain tasol, long wanem olgeta i no bin holimpas ol tok bilong Baibel. Ol i bin sakim wanpela lo bilong Baibel i tok “Yupela i no ken kalapim dispela tok [bilong buk bilong God].”—1 Korin 4:6; lukim tu Matyu 15:3, 9, 14.
9. Dispela man bilong sakim lo i no lainim ol man long ol tok i tru bilong Baibel, em i lainim ol long wanem ol bilip giaman?
9 Olsem na dispela man bilong sakim lo em i makim wanpela lain, em olgeta pris pasto bilong ol misin ol i kolim Kristen. Olgeta wantaim, olsem ol pop na ol pris na ol bikman bilong ol na ol pasto Talatala, olgeta wantaim i gat asua long rong bilong ol lotu i gat nem Kristen. Ol i no bin givim tok i tru bilong God long ol man. Nogat. Ol i bin givim ol tok giaman long ol. Ol i bin lainim ol man long ol bilip giaman bilong ol haiden i no stret long tok bilong Baibel, olsem tok bilong God Triwan, na yumi gat tewel, na tok bilong bikpaia na klinpaia. Ol dispela pris pasto i wankain olsem ol bikman bilong lotu long bipo, em Jisas i bin tokim ol: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. . . . Em i man bilong tok giaman, na em i papa tru bilong pasin bilong tok giaman.” (Jon 8:44) Ol pasin ol i mekim tu i makim olsem ol i man bilong sakim lo, long wanem, ol i save insait long ol wok i kalapim lo bilong God. Jisas i tokim ol kain man olsem: “Yupela ol man bilong mekim pasin nogut, yupela klia long mi.”—Matyu 7:21-23.
Ol i Litimapim Ol Yet
10. Dispela man bilong sakim lo i bin mekim wanem long ol king na hetman bilong graun?
10 Dispela man bilong sakim lo, olsem ol dispela bikman bilong lotu, em ol pris pasto hia, ol i bin hambak na mekim pasin antap na ol i bin bosim ol gavman. Ol i tok, God i givim wok long ol king, na ol yet i stap olsem namelman long God na ol king. Ol i bin putim sampela man i stap king o hetman, na ol i bin rausim sampela man long dispela wok. Ol inap kirapim ol man na ol i givim bel long gavman o ol i bikhet long gavman. I olsem ol i mekim tok wankain olsem ol bikman bilong lotu Juda i bin sakim Jisas, em ol i tok: “Mipela i no gat narapela king. Sisar wanpela tasol!” (Jon 19:15) Tasol Jisas i bin lainim ol man klia olsem: “Kingdom bilong mi em i no bilong dispela graun.”—Jon 18:36.
11. Ol pris pasto i mekim wanem na ol i litimapim ol yet?
11 Dispela lain bilong sakim lo ol i laik antap moa yet long ol man, olsem na ol i save pasim ol narapela kain klos, olsem blakpela klos samting. Na ol i save pasim kain kain bilas bambai ol man i litimapim nem bilong ol—ol i save pasim hat olsem bilong king na kruse na bikpela hat bilong bisop. (Lukim Matyu 23:5, 6.) Tasol Jisas wantaim ol disaipel bilong em i no bin pasim ol narapela kain klos na bilas olsem. Ol i bin pasim klos wankain olsem bilong ol narapela man. Na ol pris pasto i save kolim ol bikpela nem long ol yet, olsem “Pater” na “Pater Holi” na “Reveren” samting, na dispela pasin bilong ol tu i ‘litimapim ol yet antap long olgeta man.’ Tasol Jisas i stori long ol bikman bilong lotu i kisim ol bikpela nem olsem, na em i tok: “Long graun hia yupela i no ken kolim wanpela man em i papa bilong yupela.” (Matyu 23:9) Na taim Elihu i laik bekim tok long ol pren giaman bilong Jop, Elihu i tok: “Mi no inap mekim switpela tok [olsem kolim bikpela nem long man] bilong grisim wanpela man.”—Jop 32:21.
12. Pol i tok ol pris pasto i wokman bilong husat?
12 Pol i tok, man bilong sakim lo i kirap pinis long mekim wok bilong en long taim bilong Pol. Taim Pol i stori olsem, em i stori tu long ol man i bihainim pasin bikhet wankain olsem bilong dispela man bilong sakim lo na em i tok: “Dispela ol man ol i giaman aposel na giaman wokman. Ol i save senisim pasin bilong ol bilong mekim ol man i ting ol i stap aposel tru bilong Krais. Na yupela i no ken kirap nogut long dispela pasin ol i mekim. Yumi save, Satan yet i save senisim pasin bilong en na kamap olsem ensel bilong lait. Olsem na sapos ol wokman bilong Satan tu i senisim pasin bilong ol na i mekim olsem ol wokman bilong stretpela pasin, yumi no ken kirap nogut long dispela. Bihain ol bai i kisim pe inap tru long dispela ol pasin ol i bin mekim.”—2 Korin 11:13-15.
Ol i Bikhet long Lotu i Tru
13. Wanem dispela pasin bikhet Pol i tok bai kamap?
13 Pol i tok klia olsem dispela man bilong sakim lo bai kamap wantaim pasin bilong bikhet na givim baksait long God. Namba wan tok Pol i mekim na i helpim yumi long save long dispela lain bilong sakim lo, em Pol i tok: “De bilong Bikpela [bilong pinisim pasin nogut nau i stap long graun] . . . i no inap kamap nating. Nogat. Pastaim planti man bai i bikhet na givim baksait long God.” (2 Tesalonaika 2:2, 3) Wanem insait bilong dispela tok olsem ol bai “bikhet na givim baksait long God”? I no olsem bilip bilong ol i no strong moa o ol i no strong moa long ol samting bilong spirit. Nogat. Long tok Grik dispela tok i makim olsem ol i “lusim” God o “bikhet” long God. Sampela Baibel moa (olsem bilong William Barclay na The Jerusalem Bible) i kolim dispela tok “bikhet” long dispela ves. Olsem na sapos yumi skelim ol samting Pol i stori long en long dispela ves na long ol narapela ves klostu, yumi ken save dispela tok “bikhet na givim baksait long God” i makim olsem ol i bikhet long God na lusim lotu i tru.
14. Wanem taim rot i op na dispela pasin bikhet i ken kamap?
14 Dispela pasin bikhet i bin wok long kamap olsem wanem? Long 2 Tesalonaika 2:6, Pol i stori long taim bilong em na em i stori long “dispela samting nau i pasim rot bilong dispela man” bilong sakim lo. Wanem dispela samting i pasim rot bilong em? Em ol aposel tasol. Ol i stap, na spirit holi i givim strong long ol bilong mekim kain kain strongpela wok, na dispela samting i pasim dispela pasin bikhet na i no ken kamap bikpela olgeta. (Aposel 2:1-4; 1 Korin 12:28) Tasol taim ol aposel i dai pinis na i no gat wanpela moa i stap, olsem long yia 100 samting, nau i no gat wanpela samting i stap bilong pasim rot bilong dispela pasin bikhet i ken kamap.
Lain Pris Pasto i Wok long Kamap na i No Stret long Baibel
15. Jisas i bin kamapim wanem pasin long kongrigesen Kristen?
15 Jisas i kirapim lain Kristen na paslain long yia 100 dispela lain i wok long kamap strong, long wanem ol i gat ol elda (o wasman) na ol wokman bilong lukautim ol kongrigesen na soim rot long ol. (Matyu 20:25-27; 1 Timoti 3:1-13; Taitus 1:5-9) Ol yet i bilong dispela lain Kristen, na ol i strongpela man long ol samting bilong spirit. Ol i no bin lain long wanpela skul samting, olsem Jisas yet i no bin lain. Long dispela as ol birua bilong Jisas i bin tok long em, olsem: “Olsem wanem na dispela man i gat ol dispela save? Em i no bin i go long skul.” (Jon 7:15) Na ol bikman bilong lotu i bin mekim wankain tok long ol aposel. Baibel i tok: “Ol bikman i save, Pita wantaim Jon i no bin skul. Tupela i man nating tasol. Tasol ol i lukim tupela i tokaut strong na i no pret, olsem na ol i tingting planti. Na ol i save, bipo tupela i stap wantaim Jisas.”—Aposel 4:13.
16. Taim ol man i lusim lotu Kristen tru, wanem pasin i kamap na i no stret wantaim pasin bilong lain Kristen tru bilong pastaim?
16 Tasol bihain pasin bikhet i kirap, na sampela man i pulim tok giaman i kam insait long lotu Kristen, em ol bilip bilong ol bikman bilong lotu Juda na bilip bilong lotu haiden bilong Rom. Na taim ol i lusim pinis lotu Kristen tru, nau ol pris i kirap bosim ol man i gat nem Kristen. Dispela samting i no stret long tok bilong Baibel. Ol pop i kamap, na ol i bosim lain kadinal, em pastaim ol i bilong lain bisop na asbisop, na ol dispela bisop na asbisop, pastaim ol i pris na ol i bin skul long ol bikpela skul bilong lotu. Em nau, bihain liklik long yia 100 dispela lain bikman bilong lotu i kirap bosim ol man i gat nem Kristen. Dispela pasin i no pasin bilong lain Kristen tru bilong pastaim, em ol i gat ol elda na wokman bilong lukautim ol kongrigesen; dispela pasin em bilong ol lotu haiden.
17. Wanem taim tru man bilong sakim lo i kisim bikpela strong?
17 Liklik taim bihain, olsem long yia 250 samting, ol bikman bilong lotu i wok long daunim ol bilipman i stap olsem ol man nating tasol, na ol dispela bisop na pris samting, em ol i bikhet na givim baksait long God na ol i man bilong sakim lo, ol i kisim strong bilong bosim olgeta samting bilong lotu. Na taim Konstantin i stap bikman bilong Rom ol i kisim bikpela strong long bosim ol samting. Bihain long bikpela bung bilong ol bisop long Naisia long yia 325, dispela lain i kisim bikpela strong long bosim ol samting, long wanem Misin na Gavman i pas wantaim. Kirap long dispela taim, inap planti handet yia i kam inap long nau, dispela man bilong sakim lo—em ol pris pasto bilong ol misin i gat nem Kristen—i bin bikhet long Jehova, em God tru, na ol i givim baksait long em. Ol i no bihainim ol lo na pasin God i bin kamapim; ol i bihainim ol lo na pasin bilong ol yet.
Ol Tok Haiden
18. Dispela man bilong sakim lo i kirap bihainim wanem ol tok bilong ol lotu haiden na i bagarapim nem bilong God?
18 Dispela lain olsem “man bilong sakim lo” i wok long kamap na ol i kirap long bihainim ol tok bilong ol lotu haiden. Ol i kirap lainim ol man long wanpela tok hait ol i no inap save long en, olsem God em i Triwan, na ol i sakim God tru, em dispela Man i tok: “Mi tasol mi Bikpela. [Jehova], em nem bilong mi, na yupela i mas givim biknem long mi wanpela tasol.” “Mi wanpela tasol mi Bikpela, na i no gat narapela god moa i stap.” (Aisaia 42:8; 45:5) Ol i senisim ol tok i tru bilong God na kamapim tok bilong ol man, na bilong ol haiden, na ol i bagarapim nem bilong God. Ol i mekim olsem taim ol i litimapim nem bilong Maria na tok em i “Mama bilong God.” Baibel i stori long Maria em i wanpela gutpela meri i gat pasin daun, tasol Baibel i no tok em i mama bilong God. Ol dispela pris pasto bilong ol misin i gat nem Kristen ol i kirapim ol man long bihainim ol dispela tok giaman, olsem na dispela lain i olsem “gras nogut” em Satan i bin planim bilong bagarapim gutpela pikinini wit Krais i bin planim.—Matyu 13:36-39.
19. Ol lain i gat nem Kristen ol i bruk bruk olsem wanem? Tasol ol i holimpas wanem pasin?
19 Ol misin i gat nem Kristen i bruk na planti handet nupela lotu i kamap, tasol olgeta i holimpas dispela pasin, olsem i gat lain pris na pasto na ol man nating. Olsem na dispela lain, olsem man bilong sakim lo, i stap yet. Na ol i wok yet long pasim ol narapela kain klos na kisim ol bikpela nem bambai ol i ken antap long ol narapela man. Ol samting i bin kamap stret tru olsem Pol i bin tok—dispela lain, olsem man bilong sakim lo, ol i bin litimapim ol yet i stap olsem wanpela god.
Ol Pop
20. Wanpela buk Katolik i stori olsem wanem long pop?
20 Ol pop bilong Rom i bin litimapim nem bilong ol olsem. Wanpela buk Katolik (bilong Lucio Ferraris, ol i wokim long Itali) i stori long pop na i tok, em i “gat bikpela namba moa na em i no olsem man, nogat, em i olsem God, na em i Pris bilong God.” Hat king bilong em i olsem tripela na i makim em i “king bilong heven na graun na hel.” Na dispela buk i tok moa, olsem: “Pop em i olsem God long graun, em wanpela tasol em i hetman bilong lain bilong Krais, em i king i winim olgeta narapela king.” Na buk i tok: “Sampela taim pop i ken senisim lo bilong God na putim narapela lo.” Na narapela buk Katolik (The New Catholic Dictionary) i stori long pop na i tok: “Ol mausman bilong em i winim ol narapela long lain mausman bilong gavman.”
21. Skelim ol samting pop i mekim wantaim ol samting Pita na wanpela ensel i bin mekim.
21 Pop em i narapela kain long ol disaipel bilong Jisas, long wanem planti taim em i save pasim ol narapela kain klos na bilas na em i amamas long ol man i litimapim nem bilong em. Em i orait long ol man i brukim skru long em, na kis long ring bilong em, na karim em long sol bilong ol long narapela kain sia. Inap planti handet yia ol pop i bin hambak tru na litimapim nem bilong ol! Ol i narapela kain long Pita. Pita em i man bilong pasin daun na taim Kornilius, em wanpela kepten long ami bilong Rom, em i brukim skru klostu long lek bilong Pita na i laik lotu long em, Pita i tok: “Yu kirap. Mi tu mi man tasol”! (Aposel 10:25, 26) Na ol i narapela kain long ensel i bin givim ol tok bilong Kamapim Tok Hait long aposel Jon! Jon i laik brukim skru long dispela ensel na lotu long em, tasol ensel i tok: “Yu no ken mekim olsem! Mi tu mi wanwok bilong yu wantaim ol brata bilong yu, em ol profet. Na mi wanwok bilong olgeta man i save bihainim tok bilong dispela buk. Yu mas lotu long God wanpela tasol.”—Kamapim Tok Hait 22:8, 9.
22. I gat wanem lo bilong Baibel i helpim yumi long save long dispela man bilong sakim lo?
22 Yu ting dispela tok mipela i mekim long dispela lain, olsem ol pris pasto samting, em i strong tumas? Bilong skelim dispela samting, yumi ken bihainim wanpela lo Jisas i kolim bilong makim ol man i profet giaman, em i tok: “Yupela lukim pasin bilong ol na bai yupela i save, ol i giaman profet, o nogat.” (Matyu 7:15, 16) Orait, ol bikman bilong lotu, olsem ol pris pasto samting, long bipo na i kam inap long nau, ol i bin mekim wanem kain pasin? Wanem strafe bai painim dispela lain ol i olsem man bilong sakim lo? Na em bai painim husat moa? Ol man i save aninit tru long God, ol i gat wanem wok ol i mas mekim long dispela man bilong sakim lo? Ol tok i kamap bihain long dispela bai stori long ol dispela samting.
Sampela Askim Bilong Kamapim Gen Ol Bikpela Tok:
◻ Man bilong sakim lo i makim wanem samting? Wanem taim dispela lain i bin kamap ples klia?
◻ Baibel i tok wanem na i makim man i bin kamapim dispela lain bilong sakim lo?
◻ Ol pris pasto i bin mekim wanem na ol i bin litimapim ol yet antap long ol narapela man?
◻ Ol pris pasto i bin lainim ol man long wanem ol tok giaman na pasin bilong bikhet na givim baksait long God?
◻ Olsem wanem long pasin bilong ol pop na pasin bilong Pita wantaim wanpela ensel?
[Piksa long pes 15]
Aposel Pita i no olsem ol pop—Pita i no orait long wanpela man i brukim skru long em na i laik lotu long em