Lukautim Ol Lapun​—⁠Em Wok Bilong Ol Kristen

“Mi God bilong yupela, na bai mi lukautim yupela i go inap yupela i lapun pinis na i gat waitpela gras.”​—⁠AISAIA 46:⁠4.

1, 2. Olsem wanem gutpela lukaut bilong Papa bilong yumi long heven i narapela kain long lukaut bilong ol papamama bilong graun?

OL PAPAMAMA i laikim tru ol pikinini bilong ol, ol i save lukautim gut ol kirap long taim ol i liklik yet na i go inap long taim ol i bikpela. Na taim ol yangpela i kamap bikpela man na meri pinis na ol i gat famili bilong ol yet, papamama bilong ol i save mekim gut yet long ol na helpim ol.

² Tru, i gat sampela samting ol man bilong graun i no inap helpim ol pikinini bilong ol long en, tasol gutpela Papa bilong yumi long heven, oltaim em inap mekim gut long ol gutpela wokman bilong em na helpim ol. Jehova i tokim ol manmeri bilong bipo em i bin makim bilong em yet, olsem: “Mi God bilong yupela, na bai mi lukautim yupela i go inap yupela i lapun pinis na i gat waitpela gras.” (Aisaia 46:⁠4) Em gutpela tok tru bilong strongim bel bilong ol lapun Kristen! Jehova i no save lusim ol manmeri ol i stap gut long em, nogat. Em i tok promis long lukautim, helpim, na soim rot long ol long olgeta yia ol i stap laip, i go inap long ol i lapun.​—⁠Song 48:⁠14.

 3. Long dispela stadi bai yumi toktok long wanem samting?

³ Olsem wanem yumi ken bihainim pasin bilong Jehova long tingim tru ol lapun? (Efesus 5:​1, 2) Orait nau yumi ken toktok long sampela samting ol pikinini, ol wasman bilong kongrigesen, na ol wan wan Kristen yet i ken mekim bilong lukautim ol lapun insait long lain brata Kristen bilong yumi ol i stap long olgeta hap.

Ol Pikinini i Gat Wok Bilong Ol

 4. Ol pikinini Kristen i gat wanem wok long papamama?

⁴ “Yu mas aninit long papamama bilong yu.” (Efesus 6:2; Kisim Bek 20:12) Aposel Pol i kamapim dispela tok bilong Ol Skripsa Hibru bilong kirapim ol pikinini long tingim olsem ol i gat wok ol i mas mekim long papamama. Tasol olsem wanem yumi inap bihainim dispela tok long wok bilong lukautim ol lapun? Stori bilong wanpela man i bin stap olsem gutpela piksa tru paslain long taim bilong ol Kristen, em bai helpim yumi long bekim dispela askim.

 5. (a) Wanem samting i makim olsem Josep i no lusim tingting long wok em i mas mekim long papa? (b) Bilong soim ona long papamama yumi mas mekim wanem? Josep i mekim wanem na em i stap olsem gutpela piksa long dispela samting?

⁵ Winim 20 yia pinis, Josep i no bin lukim o kisim tok liklik long lapun papa bilong em, Jekop. Tasol Josep i no bin lusim pasin bilong laikim tru Jekop. Na taim Josep i kamapim long ol brata bilong em olsem em i husat tru, em i askim ol: “Papa bilong mi i stap gut yet, a?” (Stat 43:​7, 27; 45:⁠3) Long dispela taim i gat bikpela hangre tru long hap bilong Kenan. Olsem na Josep i salim tok long papa bilong em olsem: “Yu no ken wet. Yu mas kam hariap long mi. Bai yu ken sindaun long distrik Gosen klostu tasol long mi . . . na bai mi ken lukautim yu.” (Stat 45:​9-11; 47:12) Em nau, bilong soim ona long papamama i lapun pinis, pikinini i mas was long ol na lukautim ol long ol samting bilong skin taim ol i no inap mekim olsem. (1 Samuel 22:​1-4; Jon 19:​25-27) Josep i amamas long mekim dispela wok.

 6. Olsem wanem Josep i kamapim klia olsem em i laikim tumas papa bilong em? Olsem wanem yumi ken bihainim pasin bilong em?

⁶ Jehova i blesim Josep na em i kamap wanpela maniman tru na man i gat bikpela namba na strong long Isip. (Stat 41:40) Tasol em i no ting em i bikpela man tumas o em i gat planti wok tumas na em i no inap soim ona long papa bilong em i gat 130 krismas, nogat. Taim em i harim olsem Jekop (o Israel) i kamap klostu pinis, “Josep i tokim ol wokboi long redim karis bilong en, na em i go long Gosen bilong bungim papa. Na taim Josep i lukim papa, em i go holim papa na i krai longpela taim tru.” (Stat 46:​28, 29) Josep i no mekim nating dispela pasin bilong soim olsem em i rispektim papa, nogat. Em i laikim tumas lapun papa bilong em na em i no sem long kamapim long ples klia pasin laikim bilong em. Orait sapos papamama bilong yumi i lapun, yumi tu i save mekim gut long ol na kamapim klia olsem yumi laikim tumas ol?

 7. Bilong wanem Jekop i laik bai ol i planim em long hap bilong Kenan?

⁷ Jekop i holim strong pasin bilong givim bel bilong em long Jehova i go inap long taim em i dai. (Hibru 11:21) Em i bilip long ol tok promis bilong God, olsem na em i tok em i laik bai ol i kisim bodi bilong em i go planim long hap bilong Kenan. Josep i soim ona long papa bilong em na em i mekim olsem papa i tok, maski em i mas lusim bikpela mani na em i gat hatwok long mekim.​—⁠Stat 47:​29-31; 50:​7-14.

 8. (a) Wanem nambawan samting i kirapim yumi long lukautim ol lapun papamama? (b) Wanpela man i mekim wok bilong God fultaim em i bin mekim wanem ol samting bilong lukautim lapun papamama bilong em? (Lukim blok long pes 17.)

⁸ Wanem samting i bin kirapim Josep long lukautim papa bilong em? Tru, Josep i laikim tru papa na em i pilim olsem em i gat dinau long dispela man i bin givim laip long em na i lukautim em gut, tasol em i no tingim ol dispela samting tasol​—⁠em i gat strongpela laik tu long mekim ol samting Jehova i laikim. Na yumi tu i mas i gat wankain laik. Pol i tok: “Sapos . . . meri i gat ol pikinini bilong em yet o ol tumbuna pikinini, orait yu mas helpim ol long save gut olsem, namba wan wok bilong ol long ai bilong God em wok bilong lukautim gut dispela mama bilong ol. Long dispela pasin ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin.” (1 Timoti 5:⁠4) Tru tumas, sapos yumi laikim tumas Jehova na yumi pret long em, dispela bai kirapim yumi long lukautim ol lapun papamama, maski yumi gat sampela hatwok long mekim olsem.a

Ol Elda i Soim Olsem Ol i Tingim Ol

 9. Jehova i bin makim husat bilong lukautim ol sipsip, na ol lapun Kristen tu namel long ol?

⁹ Jekop i stap longpela taim pinis na klostu long taim em i dai, em i tok long Jehova olsem “God . . . [i] bin lukautim mi gut tru, stat long taim mama i karim mi na i kam inap nau.” (Stat 48:15) Long nau Jehova i save lukautim ol wokman bilong em long graun long rot bilong ol wasman Kristen, olsem ol elda, em ol i stap aninit long Pikinini bilong em, Jisas Krais, em “Namba Wan Wasman bilong sipsip.” (1 Pita 5:​2-4) Olsem wanem ol wasman inap bihainim pasin bilong Jehova taim ol i lukautim ol lapun namel long lain sipsip?

10. Ol i bin mekim wanem bilong helpim ol lapun Kristen long ol samting bilong skin? (Lukim blok long pes 19.)

¹⁰ Taim kongrigesen Kristen i kamap nupela yet, ol aposel i makim “7-pela man . . . Holi Spirit i pulap long ol, na ol i gat gutpela save,” na bai ol i ken bosim “wok long tilim kaikai” long ol meri Kristen, man bilong ol i dai pinis na ol i sot long kaikai. (Aposel 6:​1-6) Bihain Pol i tokim wasman Timoti long raitim long lista nem bilong ol lapun meri i gat gutpela nem, em man bilong ol i dai pinis na i stret kongrigesen i ken helpim ol long ol samting bilong skin. (1 Timoti 5:​3, 9, 10) Na ol wasman bilong kongrigesen long nau tu ol i amamas long stretim wok bilong helpim ol lapun Kristen taim ol i mas mekim olsem. Tasol i no dispela samting tasol i insait long wok bilong lukautim ol lapun i stap gut long God.

11. Jisas i tok wanem long dispela rabismeri i tromoi liklik mani tasol long bokis?

¹¹ Klostu long taim Jisas i pinisim wok bilong em long graun, em i sindaun long tempel na “em i lukim ol manmeri i kam putim ol ofa long bokis.” Orait nau em i lukim wanpela meri. Baibel i stori olsem: “Wanpela rabismeri, man bilong en i dai pinis, em i kam na i tromoi tupela liklik mani, inap olsem wan toea.” Jisas i singautim ol disaipel i kam na em i tokim ol: “Mi tok tru long yupela, dispela rabismeri, man bilong en i dai pinis, em i givim bikpela mani moa, i winim olgeta mani ol arapela manmeri i bin putim long bokis mani bilong tempel. Dispela olgeta manmeri ol i gat planti mani i stap, na ol i tromoi hap tasol i go long bokis. Tasol dispela meri em i sot tru, na em i tromoi olgeta mani bilong en. Em i no gat mani moa i stap bilong baim kaikai.” (Mak 12:​41-44) Tru, mani dispela meri i putim i liklik tru, tasol Jisas i save Papa bilong em long heven i tingim tru dispela kain pasin bilong givim bel olgeta long em. Maski dispela rabismeri i gat hamas krismas, Jisas i no givim baksait long samting meri i bin mekim.

12. Olsem wanem ol elda i ken soim olsem ol i amamas long wok ol lapun Kristen i mekim?

¹² Olsem Jisas, ol wasman Kristen i no save givim baksait long ol samting ol lapun Kristen i mekim bilong helpim lotu i tru. I gat as na ol elda i ken tok amamas long ol lapun long wok autim tok ol i mekim, long bekim tok long ol miting, long pasin bilong ol i save strongim ol arapela insait long kongrigesen, na long pasin bilong ol long i stap strong na karim hevi. Sapos yumi givim wanpela gutpela tok long ol lapun bilong strongim bel bilong ol, em inap helpim ol na bai ol i ken “amamas” long wok bilong God ol i mekim, na i no olsem ol i mas skelim wok ol i mekim wantaim wok narapela Kristen inap mekim o ol bikpela wok bipo ol i bin mekim.​—⁠Galesia 6:⁠4.

13. Olsem wanem ol elda i ken mekim wok long save ol lapun i bin kisim insait long planti yia na long save bilong ol long mekim ol samting?

¹³ Bilong kamapim olsem ol i tingim gutpela wok ol lapun Kristen i mekim, ol elda i ken mekim wok long save ol dispela lapun i bin kisim taim ol i mekim wok bilong Jehova inap planti yia, na long save bilong ol long mekim ol samting. Ol lapun i stap olsem gutpela piksa, sampela taim ol elda i ken singautim ol long mekim ol soim o inteviu. Wanpela elda i tok: “Kongrigesen i save putim gut yau taim mi mekim inteviu wantaim wanpela lapun brata o sista husat i bin mekim bikpela long ol pikinini insait long tok i tru.” Ol elda long narapela kongrigesen i tok, wanpela sista painia i gat 71 krismas em i bin helpim sampela pablisa bilong Kingdom long autim tok long olgeta mun. Na em i save kirapim ol long ritim Baibel na teks bilong de long olgeta de, na tingim tingim long bel ol tok ol i bin ritim.

14. Olsem wanem wanpela lain elda i soim olsem ol i amamas long wanpela lapun wanwok wasman?

¹⁴ Na ol elda i save amamas long wok ol lapun wanwok elda i mekim. José i gat 70 krismas samting na em i bin mekim wok elda inap planti yia pinis, tasol i no longtaim i go pinis na em i gat sik na ol dokta i katim em. Em i mas malolo inap planti mun na bai em i ken orait, olsem na em i tingting long lusim wok bilong em olsem wasman siaman. José i tok: “Mi kirap nogut long pasin ol arapela elda i mekim long mi. Ol i no tok, mi ken lusim dispela wok sapos mi laik. Ol i askim mi long ol inap helpim mi olsem wanem na bai mi ken mekim yet wok elda bilong mi.” Wanpela elda i yangpela liklik em i helpim José na em inap mekim yet wok olsem wasman siaman, na dispela i helpim gut kongrigesen. Wanpela wanwok elda i tok: “Ol brata i amamas tru long wok elda José i mekim. Ol i laikim em tru na rispek long em long ol save em i bin kisim insait long planti yia na pasin bilong em long bilip strong. Kongrigesen bilong mipela i kisim gutpela samting long em.”

Narapela i Ken Lukautim Narapela

15. Bilong wanem olgeta Kristen i mas tingim ol lapun namel long ol?

¹⁵ I no ol pikinini i gat ol lapun papamama na ol wasman bilong kongrigesen ol tasol i mas tingim ol lapun. Pol i tok piksa long kongrigesen Kristen i olsem bodi bilong man, na em i tok: “God i bin putim olgeta hap bilong bodi i stap wantaim. Na sampela hap ol i olsem ol i no gat nem, ol i save stap nambawan tru. Em i mekim olsem bai bodi i no ken bruk hap hap. Nogat. Olgeta hap wan wan ol i ken lukautim ol arapela hap long wankain pasin.” (1 Korin 12:​24, 25) Bilong kongrigesen Kristen i ken wok gut wantaim, olgeta wan wan i mas tingim ol wanbilip bilong ol, na ol lapun wantaim.​—⁠Galesia 6:⁠2.

16. Olsem wanem yumi ken soim olsem yumi tingim ol lapun taim yumi go long ol miting Kristen?

¹⁶ Ol miting Kristen i save givim rot long yumi long soim olsem yumi save tingim ol lapun. (Filipai 2:4; Hibru 10:​24, 25) Olsem wanem? Yumi save lusim haptaim long toktok wantaim ol lapun long ol miting? Tru, i stret yumi askim ol olsem ol i stap orait o ol i gat sik samting, tasol i gutpela yumi ken “givim sampela presen bilong Holi Spirit” long ol, olsem kamapim wanpela gutpela ekspiriens o wanpela gutpela tok bilong Baibel long ol. Sampela lapun i no inap wokabaut tumas, olsem na i gutpela sapos yumi yet i go long ol na yumi no wetim ol i kam long yumi. Sapos ol i yaupas liklik, yumi no ken toktok hariap, na yumi mas kolim klia ol tok. Na bilong “strongim bel bilong yumi olgeta wantaim,” yumi mas putim gut yau long tok lapun i mekim.​—⁠Rom 1:​11, 12.

17. Olsem wanem yumi ken soim olsem yumi tingim ol lapun Kristen i kalabus i stap long haus bilong ol?

¹⁷ Olsem wanem sapos sampela lapun Kristen i no inap i go long ol miting Kristen? Jems 1:27 i soim olsem em i wok bilong yumi long “tingting long ol pikinini, papamama bilong ol i dai pinis, na long ol meri, man bilong ol i dai pinis, na . . . helpim ol long karim ol hevi bilong ol.” Wanpela mining bilong dispela tok Grik ol i tanim “tingting long,” o lukautim, em olsem “go lukim.” (Aposel 15:36) Tru tumas, ol lapun i save amamas tru taim yumi go lukim ol! Taim Pol i lapun na em i stap kalabus long Rom long yia 65 C.E. samting, em i stap olsem wanpis. Em i dai stret long lukim wanwok Timoti na em i raitim pas na i tok: “Yu mas trai hat long kam long mi kwiktaim.” (Filemon 9; 2 Timoti 1:​3, 4; 4:⁠9) Tru, ol lapun i no stap long kalabus tru tru, tasol sampela lapun ol i kalabus i stap long haus, long wanem, ol i gat sik o skin bilong ol i bagarap. Ating i olsem ol i laik tok: ‘Plis, yu mas i kam lukim mi kwiktaim.’ Olsem wanem? Yumi bihainim dispela singaut bilong ol?

18. Wanem ol gutpela samting inap kamap taim yumi go lukim ol lapun?

¹⁸ Taim yu go lukim wanpela lapun brata o sista spirit, yu no ken ting dispela i no save helpim em tumas. Taim wanpela Kristen nem bilong em Onesiforus i stap long Rom, em i wok strong long painim Pol, na taim em i painim Pol pinis, planti taim em i go na ‘mekim gut bel bilong Pol.’ (2 Timoti 1:​16, 17) Wanpela lapun sista i tok: “Mi save amamas tru long i stap wantaim ol yangpela. Samting mi laikim tru, em ol i mekim olsem mi wanpela long famili bilong ol. Dispela i save strongim bel bilong mi.” Narapela lapun Kristen i tok: “Mi amamas tru taim wanpela i salim liklik pas long mi, o ring na toktok wantaim mi long telefon inap sampela minit tasol, o em i kam lukim mi inap liklik taim. Dispela i save givim nupela strong long mi.”

Jehova i Save Givim Gutpela Pe Long Ol Man i Tingim Ol Lapun

19. Taim yumi lukautim ol lapun, yumi kisim wanem ol blesing?

¹⁹ Taim yumi lukautim ol lapun, yumi save kisim planti blesing. Taim yumi bung na toktok wantaim ol lapun em i wanpela gutpela samting tru, long wanem, yumi harim ol samting ol i bin mekim na save ol i bin kisim insait long planti yia na dispela inap skulim yumi. Ol manmeri i gat wok long lukautim ol lapun, ol i kisim bikpela amamas moa i save kamap long pasin bilong givim samting, na tu, ol i pilim olsem ol i mekim gutpela wok na bel bilong ol i stap isi, long wanem, ol i bin mekim wok Baibel i tok ol i mas mekim. (Aposel 20:35) Na tu, ol manmeri i save lukautim ol lapun, ol i no ken pret na ting taim ol yet i lapun pinis olgeta bai lusim ol na ol i no gat helpim. Baibel i tok: “Man bilong givim samting bilong helpim ol arapela man, em yet bai i kisim planti samting. Sapos yu helpim ol arapela man bai ol i helpim yu tu.”​—⁠Sindaun 11:⁠25.

20, 21. Jehova i gat wanem tingting long ol man i save lukautim ol lapun? Yumi mas strong long mekim wanem?

²⁰ Jehova i save givim gutpela pe long ol pikinini i save pret long God, ol wasman, na ol arapela Kristen i save lukautim ol lapun wanbilip na ol i no tingim ol yet tasol. Dispela pasin bilong ol i stret wantaim dispela savetok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” (Sindaun 19:17) Sapos pasin laikim i kirapim yumi long mekim gut long ol taranguman na rabisman, God i tingim samting yumi givim long ol i olsem dinau em i kisim long yumi na em i save bekim na givim ol blesing long yumi. Na em i save bekim gutpela samting long yumi taim yumi mekim pasin sori na lukautim ol lapun wanlotu bilong yumi, em planti ol ‘i stap rabis long ai bilong ol man bilong graun, tasol ol i stap gutpela tru long pasin bilong bilip.’​—⁠Jems 2:⁠5.

²¹ Taim God i bekim pe long yumi, em i save givim planti samting tru! Wanpela samting em laip i stap oltaim oltaim. Klostu olgeta wokman bilong Jehova ol bai kisim dispela laip i stap oltaim long Paradais bai kamap long graun, na ol samting nogut i kamap long sin yumi bin kisim long Adam, ol bai pinis olgeta na ol lapun i stap gut long God ol bai kisim bek strong olsem long taim ol i yangpela yet. (KTH 21:​3-5) Orait taim yumi wetim dispela gutpela taim i kamap, yumi mas mekim yet wok Kristen bilong yumi long lukautim ol lapun.

[Futnot]

Wanem Ol Bekim Bilong Yu?

• Olsem wanem ol pikinini i ken soim ona long papamama i lapun pinis?

• Olsem wanem ol elda Kristen i soim olsem ol i amamas long ol lapun insait long lain sipsip?

• Ol wan wan Kristen yet i ken mekim wanem bilong soim olsem ol i tingim tru ol lapun?

• Taim yumi lukautim ol lapun Kristen, yumi kisim wanem ol blesing?

[Blok long pes 17]

Taim Papamama i Mas i Gat Helpim

Philip i bin mekim wok konstraksen olsem volantia long Laibiria long 1999 na em i kisim tok olsem papa bilong em i gat bikpela sik tru. Em i ting mama wanpela tasol i no inap karim dispela hevi, olsem na em i go bek long ples na stretim rot bilong helpim papa long ol samting bilong dispela sik bilong em.

Philip i tok: “I hatwok long mi go bek, tasol mi pilim olsem namba wan wok bilong mi em bilong lukautim papamama bilong mi.” Insait long 3-pela yia bihain, em i kisim papamama i go sindaun long narapela haus i stret moa long tupela, na ol wanlain Kristen bilong dispela hap i helpim em na em i senisim sampela samting long haus na bai i stret long papa.

Nau mama bilong Philip inap karim hevi bilong dispela bikpela sik bilong papa na lukautim em. I no longtaim i go pinis na Philip inap tok orait long mekim wok olsem volantia long brens ofis bilong ol Witnes Bilong Jehova long Masedonia.

[Blok long pes 19]

Samting Ol i Bin Mekim Bilong Helpim Em

Ada em wanpela meri Kristen bilong Australia i gat 85 krismas, na taim sik i painim em na em i mas i stap tasol long haus, ol elda bilong kongrigesen i stretim rot bilong helpim em. Ol i bungim sampela wanbilip em ol inap helpim em. Ol dispela brata na sista i amamas long mekim ol wok olsem klinim haus, wasim laplap, kukim kaikai, na go long stua samting.

Ol i bin kirap mekim ol dispela samting inap 10-pela yia pinis. I kam inap nau, inap olsem 30 Witnes Bilong Jehova i bin mekim sampela wok bilong lukautim Ada. Ol i wok yet long i go lukim em, na ritim ol buk samting bilong Baibel long em, na toksave long husat i wok long kamap strong long ol samting bilong spirit insait long kongrigesen, na beten wantaim em.

Wanpela elda Kristen bilong dispela hap i tok: “Ol brata na sista i lukautim Ada ol i ting em i gutpela samting long ol inap helpim em. Pasin bilong em long mekim wok bilong God inap planti yia pinis i kirapim tru planti brata na sista na ol i no inap givim baksait long wok bilong helpim em.”

[Piksa long pes 16]

Olsem wanem? Yumi save mekim ol gutpela tok long ol lapun papamama bilong kamapim olsem yumi laikim tru ol?

[Ol Piksa long pes 18]

Olgeta insait long kongrigesen ol i ken kamapim long ples klia pasin bilong ol long laikim tru ol lapun wanbilip