Kongrigesen i Bilong Litimapim Nem Bilong Jehova

“Bai mi autim nem bilong yu long ol brata bilong mi. Taim ol i bung bilong lotu bai mi singim song bilong litimapim nem bilong yu namel long ol.”​—HIBRU 2:12.

1, 2. Olsem wanem kongrigesen i save helpim gut ol man? Wanem bikpela wok bilong kongrigesen?

LONG bipo yet na i kam inap long nau, ol man i bin kisim ol poroman na bel isi insait long famili. Tasol Baibel i stori long narapela samting we planti manmeri long olgeta hap bilong graun i kisim ol gutpela poroman na bel isi insait long en. Dispela samting em kongrigesena Kristen. Maski yu insait o yu no insait long wanpela famili i save pas gut wantaim we narapela i save helpim narapela, yu inap amamas long ol samting God i bin givim yumi long rot bilong kongrigesen, na em samting yu mas mekim. Sapos yu save bung wantaim wanpela kongrigesen bilong ol Witnes Bilong Jehova, ating yu pilim pinis gutpela pasin pren i stap insait long en na bel isi yu ken kisim long rot bilong en.

² Kongrigesen i no ples bilong bung wantaim na amamas, na em tasol. Na tu, em i no ples we ol man bilong komiuniti i ken bung wantaim, o wanpela klap we ol man bilong wankain sindaun o ol man i gat laik long wankain spot o amamas ol i save bung wantaim. Nogat. Namba wan wok bilong kongrigesen em bilong litimapim nem bilong God Jehova. Inap longpela taim pinis kongrigesen i bilong mekim dispela samting, olsem Buk Song i kamapim klia. Long Song 35:​18, Baibel i tok: “Bai mi tenkyu long yu namel long planti lain manmeri i bung wantaim. Tru tumas, bai mi litimapim nem bilong yu namel long bikpela lain manmeri.” Na Song 107:​31, 32 i tok: “Ol i mas tenkyu long Bikpela, oltaim em i save laikim ol tumas, na em i save mekim gutpela wok tru bilong helpim ol. Taim ol i bung wantaim ol manmeri bilong God ol i mas tokaut long biknem bilong em.”

 3. Olsem tok bilong Pol i kamapim, kongrigesen i mekim wanem?

³ Kristen aposel Pol i kamapim klia narapela wok bilong kongrigesen taim em i toktok long ‘lain bilong God, i stap sios [“kongrigesen,” NW] bilong God bilong i stap oltaim, na dispela sios i olsem strongpela pos i karim tok tru.’ (1 Timoti 3:15) Pol i toktok long wanem kongrigesen? Long wanem ol rot Baibel i save yusim dispela tok “kongrigesen”? Na dispela i mas mekim wanem long laip bilong yumi na ol samting yumi wet long en? Bilong kisim bekim bilong ol dispela askim, pastaim yumi ken skelim ol samting dispela tok “kongrigesen” i makim long Baibel.

 4. Planti taim tok “kongrigesen” long Ol Skripsa Hibru i makim wanem samting?

⁴ Tok Hibru em planti taim ol i tanim olsem “kongrigesen” i kam long wanpela tok i makim olsem “singautim ol man i kam bung” o “bung i stap.” (Lo 4:10; 9:10) Planti taim dispela tok long Ol Skripsa Hibru i makim lain Israel. God i tok Jekop bai i kamap kongrigesen “bilong planti lain manmeri,” na dispela samting i bin kamap tru. (Stat 28:3; 35:11; 48:4) God i singautim, o makim, lain Israel long kamap “ol manmeri [“kongrigesen,” NW] bilong Bikpela.”​—Maika 2:5; Nehemia 13:1; Josua 8:35; 1 Samuel 17:47.

 5. Planti taim ol i tanim wanem tok Grik olsem “kongrigesen”? Dispela tok inap makim wanem ol samting?

⁵ Tok Grik i makim kongrigesen em ek·kle·siʹa, ol i kisim dispela tok long tupela tok Grik mining bilong ol em “aut” na “singaut.” Dispela tok inap makim wanpela lain i no bung bilong mekim lotu, olsem “lain manmeri” em Demitrius i bin kirapim long kros long Pol long Efesus. (Aposel 19:​32, 39, 41) Tasol planti taim Baibel i yusim dispela tok bilong makim kongrigesen Kristen. Sampela Baibel i tanim dispela tok olsem “sios.” Tasol wanpela buk (The Imperial Bible-Dictionary) i tok, dispela tok “i no . . . makim haus lotu yet we ol Kristen i save bung wantaim bilong mekim lotu.” Long Ol Skripsa Grik, dispela tok “kongrigesen” i makim fopela narapela narapela samting.

Kongrigesen God i Bin Makim Long Holi Spirit

 6. Devit na Jisas i bin mekim wanem insait long kongrigesen?

⁶ Aposel Pol i soim olsem tok bilong Devit long Song 22:22 i makim Jisas, em i tok: “ ‘Bai mi autim nem bilong yu long ol brata bilong mi. Taim ol i bung bilong lotu bai mi singim song bilong litimapim nem bilong yu namel long ol [“kongrigesen,” NW].’ Olsem na long olgeta samting [Jisas] i mas kamap wankain tru olsem ol brata bilong en, na em bai inap i stap hetpris bilong ol na mekim wok bilong God.” (Hibru 2:​12, 17) Devit i bin litimapim nem bilong God namel long kongrigesen bilong lain Israel bilong bipo. (Song 40:9) Tasol Pol i toktok long wanem samting taim em i tok Jisas i litimapim nem bilong God ‘namel long kongrigesen’? Pol i toktok long wanem kongrigesen?

 7. Wanem bikpela mining bilong tok “kongrigesen” long Ol Skripsa Grik?

⁷ Tok i stap long Hibru 2:​12, 17 i bikpela samting. Em i soim olsem, Krais em i memba bilong wanpela kongrigesen we em i autim nem bilong God long ol brata bilong em. Ol dispela brata ol i husat? Em lain i insait long “lain tumbuna bilong Abraham,” ol brata bilong Krais em God i bin makim ol long holi spirit, na i “singautim” ol long i go long heven. (Hibru 2:16–3:1; Matyu 25:40) Em nau, bikpela mining bilong tok “kongrigesen” long Ol Skripsa Grik i makim lain bilong Krais God i bin makim ol long holi spirit. Dispela lain 144,000 ol i “kibung [“kongrigesen,” NW] bilong ol namba wan pikinini bilong God, em ol lain God i raitim nem bilong ol long buk bilong en long heven.”​—Hibru 12:23.

 8. Jisas i tok wanem bilong soim olsem kongrigesen Kristen bai kamap?

⁸ Jisas i tok olsem dispela “kongrigesen” Kristen bai kamap. Inap wanpela yia paslain long em i dai, em i tokim wanpela aposel olsem: “Yu Pita, na bai mi wokim sios [“kongrigesen,” NW] bilong mi antap long dispela ston. Na bai strong bilong Dai i no inap daunim dispela sios.” (Matyu 16:18) Pita na Pol i save olsem Jisas yet i dispela ston em i tok profet long en. Pita i tok ol man husat i kamap olsem “ol ston i gat laip” bilong haus bilong God i stap antap long ston, em Krais, ol i ‘lain manmeri God i bin makim bilong em yet, bai ol i ken tokaut long olgeta gutpela pasin’ bilong dispela Man husat i bin singautim ol.​—1 Pita 2:​4-9; Song 118:22; Aisaia 8:14; 1 Korin 10:​1-4.

 9. Long wanem taim kongrigesen bilong God i kirap long kamap?

⁹ Long wanem taim dispela “lain manmeri God i bin makim bilong em yet” i bin kirap long kamap olsem kongrigesen Kristen? Em long Pentikos bilong yia 33 C.E., taim God i kapsaitim holi spirit long ol disaipel i bung long Jerusalem. Bihain, long dispela de yet, Pita i mekim gutpela tok tru long sampela Juda na ol man i bihainim lotu Juda. Indai bilong Jisas i bagarapim tru bel bilong planti man; ol i tanim bel na kisim baptais. Baibel i tok inap 3 tausen manmeri i mekim olsem, na bihain stret long dispela ol i kamap hap bilong nupela kongrigesen bilong God i wok long i go bikpela. (Aposel 2:​1-4, 14, 37-​47) Em i go bikpela, long wanem, planti moa Juda na ol man i bihainim lotu Juda i bilip olsem lain Israel bilong skin i no stap moa olsem kongrigesen bilong God. Nogat. Ol Kristen God i bin makim em ol ‘lain Israel bilong God,’ ol i kamap kongrigesen tru bilong God.​—Galesia 6:16; Aposel 20:28.

10. Jisas em i wanem samting bilong kongrigesen bilong God?

¹⁰ Planti taim Baibel i soim olsem Jisas i narapela na ol Kristen God i bin makim ol i narapela, olsem wanpela ves i tok “mi tok long Krais na kongrigesen.” Jisas em i Het bilong dispela kongrigesen bilong ol Kristen God i bin makim. Pol i tok God “i mekim [Jisas] i stap het tru bilong olgeta samting, na long dispela pasin em i stap het bilong sios [“kongrigesen,” NW]. Sios em i bodi bilong Krais.” (Efesus 1:​22, 23; 5:​23, 32, NW; Kolosi 1:​18, 24) Long nau, liklik lain tasol bilong dispela kongrigesen i stap long graun. Tasol yumi ken bilip tru olsem, Het bilong ol, Jisas Krais, i laikim ol tru. Efesus 5:25 i kamapim tingting bilong Jisas long ol. Em i tok: “Krais i laikim tumas sios na i givim laip bilong em yet bilong helpim sios.” Em i laikim ol tru, long wanem, ol i wok strong long givim “biknem long God long nem bilong Jisas, na dispela pasin i mas i stap olsem ofa,” wankain olsem Jisas i bin mekim taim em i stap long graun.​—Hibru 13:15.

Ol Narapela Mining Bilong Tok “Kongrigesen”

11. Ol Skripsa Grik i save yusim tok “kongrigesen” long wanem narapela rot?

¹¹ Sampela taim Baibel i yusim tok “kongrigesen” bilong makim sampela man tasol, na i no makim lain 144,000 olgeta em ol i ‘kongrigesen bilong God.’ Olsem: Pol i tok long sampela Kristen olsem: “Yupela i mas ting long ol Juda na ol Grik na ol manmeri bilong sios [“kongrigesen,” NW] bilong God, na yupela i no ken mekim olkain pasin inap long mekim ol i pundaun long sin.” (1 Korin 10:32) Sapos wanpela Kristen long Korin bilong bipo i mekim pasin i no stret, dispela inap pundaunim sampela. Tasol olsem wanem? Dispela pasin inap pundaunim olgeta man Grik, Juda, na ol Kristen God i bin makim, kirap long dispela taim na i kam inap long nau? Nogat. Olsem na ating long dispela 1 Korin 10 ves 32 ‘kongrigesen bilong God’ i makim ol Kristen i stap long wanpela haptaim. Olsem na yumi inap tok God i save stiaim, lukautim, o blesim kongrigesen, na dispela i makim olgeta Kristen i stap long wanpela haptaim, maski ol i stap we. O yumi inap toktok long pasin amamas na bel isi i stap long kongrigesen bilong God long nau, na dispela i makim lain brata Kristen olgeta.

12. Wanem namba tri rot bilong Baibel long yusim tok “kongrigesen”?

¹² Namba tri rot bilong Baibel long yusim tok “kongrigesen” i makim olgeta Kristen long wanpela hap. Baibel i tok: “Long olgeta hap bilong Judia na Galili na Samaria ol manmeri bilong sios [“kongrigesen,” NW], ol i stap gut.” (Aposel 9:31) I gat planti lain Kristen long dispela bikpela hap, tasol Baibel i tok olgeta dispela lain long Judia, Galili, na Samaria i olsem wanpela “kongrigesen.” Taim yumi tingim bikpela lain i kisim baptais long Pentikos bilong yia 33 C.E. na bihain liklik long en, ating i no gat wanpela lain tasol i bung oltaim long hap bilong Jerusalem, i mas i gat sampela lain moa. (Aposel 2:​41, 46, 47; 4:4; 6:​1, 7) Herot Agripa Namba 1 i bosim Judia i go inap long em i dai long 44 C.E., na 1 Tesalonaika 2:14 (NW) i kamapim klia olsem long yia 50 C.E. i gat sampela kongrigesen long Judia. Olsem na taim yumi ritim olsem Herot i “bagarapim sampela man bilong sios,” ating dispela i makim sampela kongrigesen i bung long Jerusalem na i no makim wanpela kongrigesen tasol.​—Aposel 12:1.

13. Wanem namba foa rot bilong Baibel long yusim tok “kongrigesen” inap planti taim?

¹³ Namba foa mining bilong tok “kongrigesen” em Baibel i save yusim planti taim i makim ol Kristen long wanpela kongrigesen, olsem kongrigesen i save bung long haus bilong wanpela man. Pol i toktok long “ol sios [“kongrigesen,” NW] i stap long provins Galesia.” Long dispela bikpela provins bilong Rom i no gat wanpela kongrigesen tasol. Inap tupela taim Pol i toktok long “ol kongrigesen” long Galesia, em ol kongrigesen i stap long Antiok, Derbe, Listra, na Aikoniam. Ol i makim ol hetman, o ol wasman, long lukautim ol dispela kongrigesen. (1 Korin 16:1; Galesia 1:2; Aposel 14:​19-​23) Na olsem Baibel i tok, olgeta em “ol sios [“kongrigesen,” NW] bilong God.”​—1 Korin 11:16; 2 Tesalonaika 1:4.

14. Pasin bilong sampela skripsa long yusim tok “kongrigesen” i givim wanem save long yumi?

¹⁴ Ating sampela lain i bung long ol miting Kristen ol i liklik, ol inap bung long haus bilong wanpela man. Tasol dispela tok “kongrigesen” i stret long ol dispela kain lain tu. Yumi save long ol kongrigesen i bung long haus bilong Akwila na Prisila, Nimfa, na Filemon. (Rom 16:​3-5; Kolosi 4:15; Filemon 2) Dispela i strongim bel bilong ol liklik kongrigesen long nau, ating ol i save bung long haus bilong wanpela man. Jehova i orait long ol kain liklik kongrigesen long taim bilong ol aposel na em i orait long ol long nau tu​—na em i stiaim na helpim ol dispela kongrigesen long rot bilong spirit bilong em.

Ol Kongrigesen i Litimapim Nem Bilong Jehova

15. Olsem wanem wok bilong holi spirit i kamap ples klia long sampela kongrigesen bilong bipo?

¹⁵ Olsem yumi tok pinis, bilong truim tok bilong Song 22:​22, Jisas i litimapim nem bilong God namel long kongrigesen. (Hibru 2:12) Ol gutpela disaipel bilong em i mas mekim wankain. Long taim bilong ol aposel, taim ol Kristen tru i kisim holi spirit bilong kamap pikinini bilong God na ol brata bilong Krais, holi spirit i kirapim sampela disaipel long mekim sampela gutpela wok moa. Ol i kisim ol presen bilong wokim ol mirakel, olsem strong bilong autim gutpela savetingting, strong bilong oraitim ol sik o mekim tok profet, o save bilong mekim kain kain tok ples ol i no save long en.​—1 Korin 12:​4-​11.

16. Wanem wanpela wok bilong ol presen bilong holi spirit?

¹⁶ Pol i toktok long pasin bilong mekim tok ples, olsem: “Mi mas singim song long spirit bilong mi na long tingting bilong mi wantaim.” (1 Korin 14:15) Em i save olsem em i bikpela samting long ol narapela i mas kliagut long ol tok bilong em bambai tok i ken skulim ol. Pol i laik litimapim nem bilong Jehova insait long kongrigesen. Em i tokim ol narapela husat i gat ol presen bilong holi spirit, olsem: “Yupela i mas wok strong long kisim ol dispela kain presen i save strongim sios,” em i tok long kongrigesen we ol i kamapim ol dispela presen. (1 Korin 14:​4, 5, 12, 23) Tru tumas, Pol i tingim tru olgeta wan wan kongrigesen, em i save olsem insait long olgeta kongrigesen ol Kristen i gat rot long litimapim nem bilong God.

17. Yumi ken bilip olsem Jehova i save mekim wanem long olgeta wan wan kongrigesen long nau?

¹⁷ Jehova i wok yet long yusim na helpim kongrigesen bilong em. Em i wok long blesim ol Kristen God i bin makim em ol i stap nau long graun. Dispela i kamap ples klia long planti kaikai bilong spirit em lain bilong God i save kisim. (Luk 12:42) Em i wok long blesim lain brata i stap long olgeta hap. Na em i wok long blesim olgeta wan wan kongrigesen we yumi save litimapim nem bilong God long rot bilong pasin bilong yumi na ol tok yumi save mekim bilong strongim ol narapela long ol samting bilong spirit. Long kongrigesen yumi kisim skul na save bambai yumi ken litimapim nem bilong God long ol narapela taim tu, em long taim yumi no stap wantaim kongrigesen bilong yumi.

18, 19. Ol gutpela Kristen long olgeta wan wan kongrigesen i laik mekim wanem?

¹⁸ Tingim: Aposel Pol i bin tokim ol Kristen long kongrigesen long Filipai, Masedonia, olsem: “Oltaim mi save prea olsem, . . . ol stretpela pasin Jisas Krais i save kamapim, ol bai i pulap tru long yupela. Na ol manmeri bai i lukim na ol bai i givim biknem long God na litimapim nem bilong en.” Dispela i makim olsem ol bai toktok wantaim ol man i no insait long kongrigesen, long bilip bilong ol long Jisas na long gutpela samting ol i bilip na wet long en. (Filipai 1:​9-​11; 3:​8-​11) Olsem na Pol i tokim ol wanbilip Kristen olsem: “Oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.”​—Hibru 13:15.

¹⁹ Olsem wanem? Yu save amamas long litimapim nem bilong God ‘namel long kongrigesen,’ olsem Jisas i bin mekim, na yusim maus bilong yu long givim biknem long Jehova long ai bilong ol man husat i no save yet long God na i no litimapim yet nem bilong em? (Hibru 2:12; Rom 15:​9-​11) Tingting bilong yumi long wok kongrigesen bilong yumi i mekim bilong bihainim laik bilong God, i makim wanem kain bekim yumi wan wan i givim long dispela askim. Long stadi i kamap bihain long dispela, bai yumi skelim pasin bilong Jehova long stiaim na yusim olgeta wan wan kongrigesen, na kongrigesen i gat wanem wok long laip bilong yumi long nau.

[Futnot]

Yu Inap Tingim?

• Olsem wanem ‘kongrigesen bilong God,’ em ol Kristen God i bin makim, i bin kamap?

• Wanem narapela tripela rot bilong Baibel long yusim tok “kongrigesen”?

• Devit, Jisas, na ol Kristen long taim bilong ol aposel i laik mekim wanem insait long kongrigesen? Dispela i mas mekim wanem long yumi?

[Piksa long pes 21]

Jisas i as bilong wanem kongrigesen?

[Piksa long pes 23]

Ol lain Kristen i bung wantaim olsem ‘ol kongrigesen bilong God’

[Piksa long pes 24]

Olsem ol Kristen long Benin i mekim, yumi ken litimapim nem bilong Jehova namel long kongrigesen