‘Yupela i Harim Pinis Stori Bilong Jop Long Karim Hevi’

‘Yupela i harim pinis stori bilong Jop, em i bin strongim bel na karim olgeta hevi i kamap long em. Na bihain Bikpela i mekim gutpela pasin long em. Yes, Bikpela i save sori na marimari long yumi.’​—JEMS 5:11.

1, 2. Wanem traim i bin painim tupela marit long Polan?

HARALD ABT i bin stap wanpela Witnes Bilong Jehova klostu wanpela yia, taim ami bilong Hitler i kirap bosim taun Danzig (nau Gdańsk) long hap not bilong Polan. Long dispela taim i stap bilong ol Kristen tru i gat hatwok bilong en, na bagarap inap painim ol. Lain polis bilong Hitler, em Gestapo, i traim long fosim Harald long sainim wanpela pepa i tok em i lusim bilip bilong em, tasol em i no laik mekim olsem. Harald i kalabus inap sampela wik, na bihain ol i salim em i go long banis kalabus bilong Sachsenhausen we ol i paitim em planti taim na tok olsem ol bai kilim em i dai. Wanpela ofisa i soim bikpela paip bilong ples bilong kukim ol man ol i bin kilim i dai, na i tokim Harald olsem: “Insait long 14 de smok bilong bodi bilong yu bai kamaut long dispela paip na i go long Jehova bilong yu sapos yu holimpas bilip bilong yu.”

² Taim polis i holim Harald, meri bilong em, Elsa, i givim susu yet long bebi gel bilong ol i gat 10-pela mun. Tasol lain Gestapo i no abrusim Elsa. I no longtaim na ol i kisim bebi long em, na salim em long kem bilong kilim i dai ol man long Auschwitz. Tasol inap planti yia em inap abrusim bagarap, wankain olsem Harald. Long Wastaua bilong Julai 1, 1981, yu ken kisim sampela save moa long olsem wanem tupela i bin karim ol hevi. Harald i tok: “Mi bin stap inap 14 yia long kalabus na long ol kalabus nogut bilong ol Natsi, long wanem, mi bilip long God. Sampela i bin askim mi: ‘Meri bilong yu i bin helpim yu long karim ol dispela hevi?’ Yes, em i bin helpim mi tru! Kirap long taim hevi i kamap, mi save olsem em i no inap lusim bilip bilong em, na dispela i bin strongim mi. Mi save em i no laik harim olsem mi bin kamap fri long rot bilong lusim bilip bilong mi, nogat. Em i ting i gutpela moa sapos mi dai. . . . Elsa i bin karim planti bikpela hevi insait long ol yia em i stap long banis kalabus bilong ol Jeman.”

3, 4. (a) Pasin bilong husat inap strongim ol Kristen long karim hevi? (b) Bilong wanem Baibel i kirapim yumi long skelim stori bilong Jop?

³ Em i hatwok tru long karim pen na hevi, olsem planti Witnes i save long en. Long dispela as, Baibel i tokim olgeta Kristen olsem: “Yupela i mas tingim ol profet bipo ol i bin autim tok long nem bilong Bikpela. Ol birua i bin mekim nogut long ol, tasol ol i bin strongim bel na karim dispela hevi. Yupela i mas kisim dispela pasin bilong ol, na bihainim.” (Jems 5:10) Kirap long bipo i kam inap long nau, ol man i bin birua nating long planti wokboi bilong God. Pasin bilong ol dispela “manmeri bilong bipo” inap strongim yumi long wok yet long ran long resis Kristen na no ken les.​—Hibru 11:​32-38; 12:1.

⁴ Long Baibel, Jop em i gutpela piksa tru long pasin bilong sanap strong. Jems i tok: “Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi, na oltaim em i save marimari long yumi.” (Jems 5:11) Ol samting i bin painim Jop i helpim yumi long save long gutpela samting i painim ol man i stap gut long God, em ol man Jehova i save blesim ol. Na bikpela samting moa, em i kamapim klia ol tok i tru i helpim yumi long taim bilong hevi. Buk Jop i helpim yumi long bekim ol dispela askim: Taim traim i painim yumi, bilong wanem yumi mas kliagut long ol bikpela tok i insait long ol samting i painim yumi? Wanem ol pasin na tingting inap helpim yumi long sanap strong? Olsem wanem yumi ken strongim ol arapela Kristen husat i karim bikpela hevi?

Kliagut Long Olgeta Bikpela Tok

 5. Yumi mas tingim wanem bikpela tok taim ol hevi na traim i painim yumi?

⁵ Bilong holimpas stretpela tingting long pasin bilong lotuim Jehova taim hevi i painim yumi, yumi mas kliagut long olgeta bikpela tok i insait long dispela samting. Sapos yumi no kliagut long dispela, ol hevi bilong yumi yet inap mekim na yumi no tingting strong long pasin bilong lotuim God. Bikpela tok long pasin bilong stap gut long God i nambawan bikpela samting. Papa bilong yumi long heven i mekim wanpela tok yumi olgeta i ken bihainim: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) Em i wanpela gutpela samting tru yumi ken mekim! Maski yumi gat ol pasin kranki na yumi no strong, yumi inap mekim Man Bilong Wokim yumi i belgut tru. Yumi mekim olsem taim pasin bilong yumi long laikim Jehova i helpim yumi long sakim ol hevi na traim i painim yumi. Pasin laikim bilong ol Kristen inap mekim na i no gat wanpela samting i daunim yumi. Dispela pasin laikim i no inap pinis.​—1 Korin 13:​7, 8.

 6. Satan i sutim wanem kain tok long Jehova? Em i save mekim wan wan taim tasol o olsem wanem?

⁶ Buk Jop i kamapim klia olsem Satan em i man bilong sutim tok long Jehova. Na tu, dispela buk i kamapim klia pasin nogut bilong dispela birua na laik bilong em long bagarapim pasin bilong yumi long stap klostu long God. Olsem stori bilong Jop i soim, Satan i sutim tok long olgeta wokboi bilong Jehova, olsem ol i tingim tasol ol samting ol inap kisim long God, na tu, Satan i laik soim olsem pasin bilong ol long laikim God inap pinis. Em i bin sutim tok long God inap planti tausen yia. Taim Satan i raus long heven, wanpela maus long heven i tok em i “kotim ol brata bilong yumi” na em i save mekim ol dispela kain tok “long ai bilong God bilong yumi long san na long nait.” (KTH 12:10) Taim yumi sanap strong, yumi ken soim olsem ol tok em i sutim i no tru.

 7. Sapos skin bilong yumi i no strong, yumi mas mekim wanem na bai yumi ken sanap strong?

⁷ Yumi mas tingim olsem Satan bai mekim wok long olgeta kain hevi i painim yumi bilong pulim yumi i go longwe long Jehova. Long wanem taim em i bin traim Jisas? Long taim Jisas i no bin kaikai inap planti de na em i hangre. (Luk 4:​1-3) Tasol Jisas i pas gut wantaim Jehova, olsem na em inap sakim strong ol traim bilong Satan. Sapos skin bilong yumi i no strong​—ating yumi sik o lapun​—em i bikpela samting tru long yumi strong long ol samting bilong spirit! Maski ‘bodi bilong yumi i laik bagarap’ yumi no givap, long wanem, strong bilong ‘bel bilong yumi i save kamap nupela gen long olgeta de.’​—2 Korin 4:16.

 8. (a) Olsem wanem bel hevi inap daunim yumi? (b) Jisas i gat wanem kain tingting?

⁸ Na tu, bel hevi inap bagarapim yumi long ol samting bilong spirit. Yumi inap tok, ‘Bilong wanem Jehova i larim dispela samting i kamap?’ Taim wanpela i mekim pasin nogut long yumi, yumi inap tok, ‘Olsem wanem brata inap mekim kain pasin olsem long mi?’ Ol kain tingting olsem inap mekim na yumi no tingim ol bikpela tok i insait long samting i painim yumi, na yumi tingting long yumi yet tasol. Jop i bel kros long tripela pren i kamapim tingting kranki na i luk olsem dispela i bagarapim bel bilong Jop wankain olsem bikpela sik i bagarapim skin bilong em. (Jop 16:20; 19:2) Aposel Pol tu i tok olsem pasin bilong kros longpela taim inap “opim dua [o, givim sans] long Satan.” (Efesus 4:​26, 27) Ol Kristen i no ken bel kros long narapela o tingting tumas long pasin i no stret i bin kamap. Mobeta ol i bihainim pasin bilong Jisas na “putim [ol] yet long han bilong God, em dispela Jas i save skelim stret olgeta samting.” (1 Pita 2:​21-23) Taim yumi gat “wankain tingting” olsem Jisas, dispela em i wanpela bikpela samting i helpim yumi long sakim Satan.​—1 Pita 4:1.

 9. God i tok wanem long yumi long ol hevi yumi karim na ol traim i painim yumi?

⁹ Na nambawan bikpela samting, yumi no ken ting ol hevi bilong yumi i makim olsem God i no orait long yumi. Kain tingting kranki olsem i bin bagarapim bel bilong Jop taim ol giaman pren bilong em ol i sutim strongpela tok long em. (Jop 19:​21, 22) Baibel i mekim dispela tok long yumi: “Sin i no inap pulim God, na God i no save pulim man long mekim sin.” (Jems 1:13) Nogat. Jehova i promis long helpim yumi long karim olgeta kain hevi i save kamap na long wokim rot long yumi ken abrusim ol traim i save painim yumi. (Song 55:22; 1 Korin 10:13) Sapos yumi go klostu long God long taim bilong hevi, yumi ken holimpas stretpela tingting na sakim Satan.​—Jems 4:​7, 8.

Ol Samting Bilong Helpim Yumi Long Sanap Strong

10, 11. (a) Wanem samting i helpim Jop long sanap strong? (b) Maus bilong bel bilong Jop i no kotim em, olsem wanem dispela i helpim em?

¹⁰ Jop i stap nogut tru, ol man i kam lukim em ol i sutim tok long em, na em yet i no kliagut long as na ol hevi i painim em, tasol Jop i stap gut long God. Pasin bilong em long sanap strong inap lainim yumi long wanem samting? Yumi save, nambawan as na Jop i winim traim em pasin bilong em long stap gut long Jehova. ‘Em i save lotu na aninit long God, na em i no save mekim wanpela pasin nogut.’ (Jop 1:1) Em pasin em i save bihainim oltaim. Jop i no laik givim baksait long Jehova, maski em i no save long as na ol hevi i painim em. Jop i ting em i mas mekim wok bilong God long gutpela taim na long taim nogut.​—Jop 1:21; 2:10.

¹¹ Maus bilong bel bilong Jop i no kotim em na dispela samting tu i mekim gut bel bilong em. Taim i luk olsem em bai i dai, Jop i save olsem em i bin wok strong long helpim ol narapela, em i bin bihainim ol stretpela lo bilong Jehova, na sakim olgeta kain pasin bilong lotu giaman, na dispela i mekim gut bel bilong em.​—Jop 31:​4-11, 26-28.

12. Jop i mekim wanem taim Elihu i givim tok long em?

¹² Tru, Jop i mas kisim helpim bilong stretim tingting bilong em long sampela samting. Na long pasin daun em i orait long kisim dispela helpim​—em narapela samting i helpim em long sanap strong. Jop i putim gut yau long tok kaunsel bilong Elihu, na em i bihainim tok bilong Jehova long stretim em. Em i tok: “Mi bin mekim planti kranki toktok long ol samting mi no klia olgeta long as bilong en. . . . Mi sem tru long mi yet na long olgeta tok mi bin mekim. Na mi sindaun long das na long sit bilong paia, bilong soim yu olsem mi tanim bel pinis.” (Jop 42:​3, 6) Maski sik bilong Jop i stap yet, em i amamas long em i stretim tingting bilong em na dispela i mekim em i go klostu moa long God. Jop i tok: “Bikpela, mi save nau, yu tasol inap mekim olgeta samting.” (Jop 42:2) Jehova i kamapim klia bikpela namba bilong Em, na dispela i helpim Jop long kliagut moa olsem Man Bilong Wokim em i winim em tru.

13. Pasin marimari i helpim Jop olsem wanem?

¹³ Jop i gutpela piksa tru long pasin bilong marimari long narapela. Ol pren bilong em i bagarapim tru bel bilong em, tasol Jehova i tokim Jop long beten askim God long helpim ol, na Jop i mekim olsem. Bihain long dispela, Jehova i oraitim sik bilong Jop. (Jop 42:​8, 10) Tru tumas, pasin bilong bel nogut i no helpim yumi long sanap strong, tasol pasin laikim na pasin marimari i helpim yumi long mekim olsem. Taim yumi lusim pasin bilong bel nogut, dispela i strongim yumi long ol samting bilong spirit, na Jehova i save blesim dispela kain pasin.​—Mak 11:25.

Ol Man i Gat Savetingting i Helpim Yumi Long Sanap Strong

14, 15. (a) Wanem ol pasin inap helpim man i givim tok kaunsel long helpim tru ol narapela? (b) I gat wanem as na Elihu inap helpim tru Jop?

¹⁴ Narapela samting yumi ken lainim long stori bilong Jop em olsem: Yumi inap kisim gutpela helpim long ol man i gat savetingting. Ol i olsem ol brata “i save sambai long helpim yumi long taim bilong hevi.” (Sindaun 17:17) Tasol olsem stori bilong Jop i kamapim, sampela man bilong givim tok kaunsel inap bagarapim bel na i no mekim yumi stap belgut. Man i mekim gut wok bilong givim tok kaunsel i mas pilim hevi bilong narapela na i rispektim em, olsem Elihu i bin mekim. Ating ol elda na ol narapela strongpela Kristen i mas stretim tingting bilong ol brata em hevi i daunim ol, na bilong mekim dispela wok ol inap kisim gutpela save long Buk Jop.​—Galesia 6:1; Hibru 12:​12, 13.

¹⁵ I gat planti gutpela samting yumi ken lainim long pasin bilong Elihu long givim tok kaunsel. Pastaim em i stap isi na putim gut yau long tok kranki bilong tripela pren bilong Jop. (Jop 32:11; Sindaun 18:13) Elihu i toktok long Jop olsem wanpela pren na i kolim stret nem bilong Jop. (Jop 33:1) Dispela tripela pren i ting ol i winim Jop, tasol Elihu i no gat dispela kain tingting. Em i tok: “[God] i bin kisim graun na wokim mi, wankain olsem em i bin wokim yu.” Em i no laik bagarapim moa bel bilong Jop long rot bilong mekim tok kranki. (Jop 33:​6, 7; Sindaun 12:18) Elihu i no sutim tok long pasin Jop i bin mekim long bipo, nogat, em i tok amamas long Jop i no gat asua. (Jop 33:32) Na bikpela samting moa, Elihu i kisim tingting bilong God long ol samting, na em i helpim Jop long tingim olsem Jehova i no inap tru long mekim pasin i no stret. (Jop 34:​10-12) Em i strongim Jop long bilip na wet long Jehova, na maski long traim long soim olsem em yet i stretpela man. (Jop 35:2; 37:​14, 23) Ol elda Kristen na ol narapela inap kisim gutpela skul long dispela.

16. Olsem wanem tripela pren bilong Jop i kamap olsem ol wokman bilong Satan?

¹⁶ Gutpela tok bilong Elihu i narapela kain tru long tok kranki bilong Elifas, Bildat, na Sofar. Jehova i tokim ol: “Yupela i no bin autim tok tru long pasin bilong mi.” (Jop 42:7) Maski ol i tok ol i laik helpim Jop, ol i helpim wok nogut bilong Satan na ol i no pren tru bilong Jop. Stat long taim hevi i painim Jop, ol tripela pren i tok em asua bilong Jop yet na ol hevi i painim em. (Jop 4:​7, 8; 8:6; 20:​22, 29) Elifas i tok God i no bilip long ol wokboi bilong em, na em i no save wari long yumi bihainim stretpela pasin o nogat. (Jop 15:15; 22:​2, 3) Elifas i sutim tok long Jop long sampela pasin kranki Jop i no bin mekim. (Jop 22:​5, 9) Tasol Elihu i helpim Jop long kisim stretpela tingting long pasin bilong em long pas gut wantaim God, em samting gutpela man bilong givim tok kaunsel i laik mekim.

17. Yumi mas tingim wanem samting taim traim i painim yumi?

¹⁷ I gat narapela samting tu long pasin bilong sanap strong em yumi ken lainim long Buk Jop. Gutpela God bilong yumi i save long ol samting i painim yumi na em i amamas na em inap long helpim yumi long kain kain rot. Yumi bin stori pinis long Elsa Abt. Tingting gut long tok em i mekim: “Paslain long lain Gestapo i holim mi, mi bin ritim pas bilong wanpela sista i tok olsem taim bikpela traim i painim yumi, spirit bilong Jehova i save mekim yumi stap bel isi. Mi bin tingting olsem ating dispela i no tru olgeta. Tasol taim ol traim i painim mi yet, mi save olsem tok bilong em i tru. Dispela samting i save kamap tru. I hatwok long stori long dispela sapos yu yet i no bin pilim. Tasol dispela samting i painim mi. Jehova i save helpim yumi.” Elsa i no toktok long samting Jehova inap mekim o em i bin mekim inap planti tausen yia i go pinis long taim bilong Jop. Nogat. Elsa i toktok long taim bilong yumi. Yes, “Jehova i save helpim yumi!”

Man i Sanap Strong i Ken Amamas

18. Jop i sanap strong na dispela i helpim em olsem wanem?

¹⁸ I no gat planti bilong yumi bai bungim wankain bikpela hevi olsem i bin painim Jop. Tasol maski pasin bilong dispela graun i kamapim wanem kain traim long yumi, i gat as tru na yumi ken holimpas pasin bilong stap gut long God, olsem Jop i bin mekim. Na tu, pasin bilong sanap strong i mekim i stap bilong Jop i kamap gutpela moa. Em i mekim na em i kamap gutpela man moa, em i no sot long wanpela gutpela pasin. (Jems 1:​2-4) Em i pas gut moa wantaim God. Jop i tok: “Bikpela, bipo mi bin harim tok bilong ol man tasol na mi kisim save long yu. Tasol nau mi lukim yu stret long ai bilong mi yet.” (Jop 42:5) Satan i no inap mekim na Jop i lusim God, olsem na tok bilong Satan i giaman. Planti handet yia bihain, Jehova i tok yet olsem wokboi bilong em Jop i stap gutpela piksa long pasin bilong bihainim stretpela pasin. (Esekiel 14:14) Stori bilong em long pasin bilong stap gut long God na sanap strong i save kirapim lain bilong God long nau tu.

19. Bilong wanem yu ting pasin bilong sanap strong i gutpela samting?

¹⁹ Taim Jems i raitim pas long ol Kristen long taim bilong ol aposel long pasin bilong sanap strong, em i tok long amamas dispela pasin i save kamapim. Na em i stori long Jop bilong kirapim ol long tingim olsem Jehova i save mekim gut tru long ol wokboi i stap gut long em. (Jems 5:11) Jop 42:12 i tok: “Stat long dispela taim Bikpela i mekim gut moa yet long Jop. Na las hap bilong laip bilong en i winim tru ol yia em i bin i stap bipo.” God i dabolim ol samting Jop i bin lusim, na em i stap amamas na longpela taim tru. (Jop 42:​16, 17) Na olsem tasol, olgeta kain pen, hevi, o bel hevi yumi karim nau long pinis bilong pasin nogut bilong dispela graun, ol bai pinis long nupela taim God bai kamapim na bai yumi no tingim ol moa. (Aisaia 65:17; KTH 21:4) Yumi bin harim stori bilong Jop long sanap strong, na yumi laik tru​—wantaim helpim Jehova i save givim​—long bihainim pasin bilong Jop. Baibel i tok promis: “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en. God i tok pinis long givim dispela prais long olgeta man i save laikim em tru.”​—Jems 1:12.

Bai Yu Bekim Olsem Wanem?

• Olsem wanem yumi ken mekim Jehova i belgut tru?

• Bilong wanem yumi no ken ting ol hevi bilong yumi i makim olsem God i no orait long yumi?

• Wanem ol samting i bin helpim Jop long sanap strong?

• Olsem wanem yumi ken bihainim pasin bilong Elihu long strongim ol wanbilip?

[Piksa long pes 28]

Man i mekim gut wok bilong givim tok kaunsel i pilim hevi bilong narapela na i rispektim em

[Ol Piksa long pes 29]

Elsa na Harald Abt