Ol Tok Bilong Ol Ensel Em i Bilong Taim Bilong Yumi
“God i salim ensel bilong en [na soim dispela long Jon long ol piksa].”—REVELESEN 1:1.
1. Revelesen i kamapim long ples klia wanem samting bilong bihain?
REVELESEN—Dispela hap bilong Baibel i kamapim long ples klia ol tok bipo i stap hait. Em i stori long ol samting aposel Jon i lukim olsem piksa na i makim sampela samting i mas kamap long bihain i go inap long nupela taim i kamap na olgeta manmeri long graun i stap amamas oltaim. Olsem na long kirap bilong ol tok bilong Revelesen, aposel Jon i raitim tok olsem: “Man i save ritim dispela tok bilong God em i tok long samting i laik kamap bihain, na ol arapela man i save harim dispela tok, na ol man i save bihainim dispela tok bilong God mi bin raitim, dispela olgeta man ol i ken amamas.”—Revelesen 1:3.
2, 3. Bilong wanem ol man i no i stap amamas long nau? Jehova i laik mekim wanem?
2 Long nau ol manmeri i no i stap amamas. Moses i kamapim as bilong dispela samting long wanpela singsing em i bin raitim 3,460 yia bipo, em i tok: “Ol yet i mekim pasin nogut; ol i no pikinini bilong [God]; em asua bilong ol yet. Ol i lusim stretpela pasin na mekim rong.” (Diuteronomi 32:5, NW ) Dispela tok i sutim stret ol manmeri bilong nau—ol i lusim pinis stretpela pasin na mekim kain kain pasin nogut! Long tok i go pas wanpela ripot (World Military and Social Expenditures 1987-88) i tok, ‘Rasia wantaim Amerika i resis long bungim planti samting bilong pait na dispela samting i bagarapim sindaun bilong ol manmeri bilong olgeta lain. Dispela tupela lain wantaim i save tromoi bikpela mani tru long olgeta de, inap olsem 1.5 bilion kina, bilong baim ol samting bilong ami. Tasol long hap bilong Amerika planti pikinini i save dai taim ol i bebi yet, na i wankain long Rasia tu. Ol kantri i stap rabis i save lusim bikpela mani tru long baim ol samting bilong pait, winim tru mani ol i lusim long wokim ol haus sik samting bilong lukautim lain bilong ol. Long ol dispela kantri planti milion man i hangre, na planti pikinini i dai long taim ol i no winim yet 5-pela krismas.’
3 I gat sampela samting moa i bagarapim sindaun bilong ol man long nau, em olsem: Ol i lusim ol stretpela lo na ol famili i bruk, na pasin raskol i go bikpela na ol man i pret nogut tru, na ol i no sori moa long ol narapela man na ol i bikhet na sakim lo. Tasol yumi ken amamas, long wanem Jehova i laik “bagarapim ol man i bin bagarapim graun!” (Revelesen 11:18) Hap bilong Revelesen long Baibel i stori gut long 16 piksa i makim rot bilong Jehova bai mekim dispela samting.
Ol Ensel na Ol Piksa
4 Revelesen i helpim yumi bai yumi inap save gut long insait bilong namba wan tok profet long Baibel i stap long Jenesis 3:15. Revelesen i stori long ol samting bai kamap long pasin birua i stap namel long Seten na ‘meri’ o oganaisesen bilong God, na i stap namel long ‘lain’ bilong tupela. Revelesen i stori long kot Jehova i mekim long ol birua bilong em na long ol man i laikim tumas em na daun long wok king bilong em. Wanpela ensel i soim ol dispela samting long Jon long ol piksa na Jon i raitim ol dispela tok long Revelesen. Sampela ensel moa i mekim wok insait long ol dispela piksa na givim ol tok long Jon. Long Revelesen 1:5 Jon i tokaut long nambawan bikpela ensel em “Jisas Krais.” Em i “man bilong autim stret olgeta tok bilong God. Em i namba wan man i kirap bek long matmat, na em i bikpela bilong olgeta king i stap long graun.” Ol dispela piksa i makim Jisas em i olsem wanpela “Laion,” na “Pikinini Sipsip,” na “Maikel,” na sampela taim ol dispela piksa i makim Jisas em i wanpela strongpela ensel.—Revelesen 5:5, 13; 9:1, 11; 10:1; 12:7; 18:1.
5. Namba wan piksa long Revelesen i stori long wanem samting? Bilong wanem yumi mas harim gut ol tok bilong dispela piksa?
5 Namba wan piksa long Revelesen 1:10–3:22 i stori long Jisas taim em i kisim pinis biknem long heven, na i kolim ol tok Jisas i givim long “ol ensel” o wasman bilong 7-pela kongrigesen long hap bilong Esia. Dispela 7-pela kongrigesen i makim lain o kongrigesen olgeta bilong ol Witnes Bilong Jehova nau long “de bilong Bikpela,” em ol i stap long olgeta hap bilong graun. Olsem na ol dispela tok em bilong yumi long nau! Yumi mas givim bel long “harim gut dispela tok Holi Spirit i autim long ol [kongrigesen],” long wanem ol dispela toksave na strongpela tok em bilong strongim bel bilong yumi, na bai yumi ken i stap gut long God na God i ken orait long yumi—long wanem yumi mekim gutpela pasin, na ‘laikim tru ol man, na bilip, na mekim olgeta wok bilong helpim ol man, na sanap strong long olgeta hevi.’—Revelesen 1:10; 2:7, 10, 19.
6. Yumi mas mekim wanem na bai ol tok Jisas i salim long ol 7-pela kongrigesen long Esia em inap helpim yumi?
6 Ating yumi bin mekim bikpela hatwok long wok bilong God wankain olsem kongrigesen bilong Efesas long bipo, na yumi no laik tru long pasin bilong ol man i lusim lotu i tru na ol i kamapim lain o lotu bilong ol yet. Tasol sapos nau yumi no givim bel tru olsem yumi bin mekim taim yumi bilip nupela, orait yumi mas tanim bel na givim bel olgeta gen! Ol Kristen long Smena i gat planti samting bilong spirit na yumi mas bihainim pasin bilong ol na wok strong long kisim prais na yumi no ken pret. Yumi mas redi long “holim bilip, i go inap long taim [yumi] dai.” Sapos bipo yumi bin lotuim god giaman o mekim pasin pamuk o bihainim sampela lain bilong lotu, orait nau yumi mas bihainim pasin bilong ol brata long Pegamam, em Seten i bin traim ol, na yumi mas tanim bel. Jisas i tok ol brata long Taiataira tu i mas was gut long ol dispela pasin i laik pulim ol. Na ol i mas was gut, nogut ol i kisim kain pasin olsem bilong Jesebel. Yumi tu mas was gut! Sapos sampela long lain bilong yumi i olsem i dai pinis long ol samting bilong spirit, olsem ol Kristen long Sadis bipo, orait kwiktaim ol i mas kirap na lukim slip, nogut taim i pinis. Long pes bilong ol Filadelfia Jisas i putim dua i op i stap, na long yumi tu dua i op bilong yumi ken mekim wok. Gutpela sapos yumi inap sanap strong long dispela traim i laik kamap na bai yumi winim traim olsem ol dispela brata bilong yumi long Filadelfia long bipo! Sapos yumi givim hap bel tasol olsem ol Leodisia long bipo yumi mas save, long ol samting bilong spirit yumi stap olsem skin nating na yumi mas tanim bel. Jisas i sanap long dua na paitim i stap. Yumi olgeta i mas amamas long em na bai yumi inap kisim kaikai bilong spirit oltaim wantaim em insait long ol 55,000 kongrigesen bilong yumi long olgeta hap bilong graun!—Revelesen 1:11; 2:7, 10, 11, 17, 29; 3:6, 13, 22.
Sia King Bilong God, na Wanpela Buk, na Wanpela Askim
7 Long namba tu piksa Jon i lukim gutpela sia king bilong Jehova long heven. God bilong yumi em i gat biknem tru na Jon i lukim em i stap olsem long bikpela lait na fopela ensel bilong was ol i sanap klostu, na bikpela lain ensel, na ol Kristen i winim pinis traim na i kirap bek, ol tu i stap. Ol i mekim singsing bilong litimapim nem bilong Jehova, na dispela singsing i kirapim tru bel bilong yumi, ol i tok: “[Jehova], yu God bilong mipela. Yu inap tru long olgeta man i ken amamas long yu, na litimapim nem bilong yu, na i stap aninit long strong bilong yu. Long wanem yu bin wokim olgeta samting. Long laik bilong yu yet yu wokim na i kamap, na nau dispela olgeta samting i stap.” Jehova i givim wanpela buk long Man em inap long opim, em Laion i kamap long lain Juda, em dispela Pikinini Sipsip ol i bin kilim em i dai na em i kamap Man bilong baim bek yumi. Olgeta samting God i bin wokim i litimapim nem bilong Em wantaim Pikinini Sipsip.—Revelesen 4:11; 5:2-5, 11-14.
8. Yumi lukim wanem samting long namba tri piksa long Revelesen? Dispela i makim wanem samting long taim bilong yumi?
8 Nau yumi ken stori long namba tri piksa! Pikinini Sipsip i kirap long brukim 7-pela tep i pasim dispela buk. Orait, yumi lukim wanem samting? Pastaim yumi lukim Jisas, nau tasol em i kamap king na em i sindaun long waitpela hos long heven na wokabaut i go. Dispela waitpela hos i makim stretpela pait. Bihain long en i gat wanpela retpela hos na dispela i makim pait i kamap long olgeta hap bilong graun. Na bihain i gat blakpela hos i makim hangre, na wanpela yelopela hos i bihainim em i kam, em i makim ol kain kain sik, na man i sindaun long en nem bilong em Dai! Hades (olsem matmat) i bihainim em na i daunim planti milion man. Olgeta dispela samting i kirapim “pen” i painim ol man long yia 1914-1918. Ol manmeri bilong dispela taim, em ol i stap yet na i go lapun nau, ol inap tingim ol dispela samting i bin kamap. (Matyu 24:3-8) Ol dispela hos i raun yet long graun! Na taim Jisas i brukim namba 5 na namba 6 tep i pasim buk, nau olgeta samting i kamap bilong kirapim ‘bikpela De bilong belhat bilong Jehova wantaim Pikinini Sipsip.’ Na askim i kamap, olsem: “Husat inap long sanap na winim dispela?”—Revelesen 6:1-17.
Ol Man Ol “Inap long Sanap”
9 Namba foa piksa i makim ol man ol inap winim taim bilong belhat bilong God na olsem wanem ol inap winim. Sampela ensel i holimpas 4-pela win bambai ol i no ken bagarapim graun na God inap putim mak long ol 144,000 Isrel bilong spirit pastaim. “Dispela olgeta i pinis,” orait Jon i lukim wanpela gutpela samting tru long dispela piksa, em wanpela bikpela lain. Jon i stori olsem: “Mi lukim planti tumas manmeri ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man, na bilong olgeta graun, na bilong olgeta kain skin, na bilong olgeta tok ples. Ol i sanap long pes bilong sia king [bilong God] na long ai bilong Pikinini Sipsip. Ol i bin putim longpela waitpela klos, na ol i holim lip bilong kokonas long han bilong ol. Ol i singaut strong olsem, ‘God bilong yumi em i sindaun long sia king, na Pikinini Sipsip, tupela i kisim bek yumi, na nau yumi stap gut!’ ” (Revelesen 7:1-10) Yu insait long dispela lain long namba foa piksa?
10. (a) Sapos yumi skelim ripot bilong Memorial bilong yia 1935 na yia 1987, dispela i givim wanem save long yumi long truim bilong ol samting bilong namba foa piksa? (b) I gat wanem askim yumi olgeta wan wan i mas tingim? Bilong wanem yumi mas tingim?
10 Long yia 1935 long taim bilong tingim i dai bilong Jisas, olsem Memorial, long olgeta hap bilong graun inap olsem 32,795 i kam bung na inap 27,006 i kisim bret na dring wain bilong makim olsem ol i hap lain bilong 144,000 i stap yet long graun na ol i bilong kisim laip long heven. Long dispela yia 1935 inap sampela mun bihain ol i kisim save long dispela bikpela lain ol i husat. Dispela samting i kamap ples klia tru. Ol dispela man bilong pasin daun ol i wet long kisim laip i stap oltaim long paradais long graun na ol tu i mas bilip long ofa bilong Jisas; ol i dediket long Jehova na kisim baptais na wok strong long mekim wok bilong Em na ol i bilip olsem bai ol inap abrusim bagarap long taim bilong “bikpela hevi” na i stap laip yet. Long yia 1987 inap olsem 8,965,221 ol i bung long taim bilong Memorial na 8,808 ol i kisim bret na dring wain. Dispela i makim olsem planti milion long nau ol i bilong bikpela lain o ol i laik insait long dispela lain. Taim ‘bikpela De bilong belhat bilong Jehova wantaim Pikinini Sipsip i kamap, bai yu “inap long sanap” long dispela lain? Sapos yu wok strong bambai yu inap sanap olsem, bai yu inap abrusim bagarap.—Revelesen 6:15-17; 7:14-17.
Ol Biugel i Tokaut Long Strafe Bilong God
11 Jisas i brukim pinis namba seven tep i pasim buk! Nau ol samting bilong namba faiv piksa bilong Revelesen i kamap ples klia. Sevenpela ensel i sanap long pes bilong God. Ol i kisim 7-pela biugel. Ol i winim ol dispela biugel na tokaut long ol samting lain bilong Jehova i bin tokaut long en kirap long yia 1922 na bihain long dispela yia. Ol i brukim ol manmeri i go “tripela hap” na namba wan ensel i go inap namba foa ensel i tokaut long ol samting i mas painim wanpela hap, em ol man i stap long ol hap ol i kolim “Kristen.” Ol dispela “biugel” i makim olsem belhat bilong God i mas painim ol misin ol i kolim “Kristen,” em ol i hap bilong “graun” (em pasin Seten i bin kamapim long graun na i olsem i bilong i stap oltaim) na ol i hap bilong “solwara” (em ol lain man i kirap nabaut olsem si long solwara), na belhat bilong God i mas painim ‘olgeta wara na hul wara’ bilong ol dispela misin (em ol bilip na tingting bilong ol) na belhat bilong God i mas painim tu ‘san na mun na ol sta’ tudak bilong ol dispela misin (em ol pris pasto i no gat lait bilong spirit). Nau wanpela “taragau,” olsem wanpela ensel, i flai i go namel long skai, na em i tok, “Sori, sori, sori tumas long ol manmeri i stap long graun!” Long wanem, taim tripela narapela ensel i winim biugel bilong ol, bai bikpela hevi i kamap long ol manmeri.—Revelesen 8:1-13.
12. Husat i opim bikpela hul? Olsem wanem wanpela lain “grasop” i bin givim pen long ol pris pasto long nau?
12 Olsem na namba faiv ensel i winim biugel bilong em na lukim! “Wanpela sta”—em Bikpela bilong yumi, Jisas—em i opim bikpela hul na smok i kamap long hul na planti binatang olsem grasop ol i lusim dispela smok i go. Dispela i makim olsem: Pastaim, hap lain witnes bilong Jehova em ol i bilong kisim laip long heven, olsem lain remnan, ol i no mekim wok na i olsem ol i stap kalabus, tasol long yia 1919 Jisas i lusim ol na ol i go mekim wok. Ol dispela witnes i kisim strong long God na ol i bagarapim ‘gaden’ bilong ol pris pasto. Inap “5-pela mun” ol i kamapim long ples klia ol tok giaman na pasin giaman bilong ol pris pasto. Ol grasop tru i save stap laip inap 5-pela mun, olsem na dispela i makim olsem lain “grasop” bilong nau (olsem lain remnan) bai ol i stap laip inap long taim Jehova tupela Krais inapim pinis wok bilong skelim ol lain man long kot; “ol i no dai pinis yet” na bai dispela samting i kamap. Ol dispela “grasop” i wok strong na ol i bin tilim planti tausen milion buk na nius bilong Baibel long ol man, em ol dispela buk na nius i tokaut long strafe bilong God bai painim ol man. Ol dispela tok i givim pen long ol man olsem nil long tel bilong skopion i sutim ol. Jon i tok: “Bikpela hevi bilong pastaim em i pinis. Harim! Tupela hevi i stap yet, na bai i kamap bihain.”—Revelesen 9:1-12; Matyu 24:34; 25:31-33.
13. (a) Fopela ensel i lusim kalabus klostu long Wara Yufretis ol i makim husat? Ol i gat wanem wok ol i mas mekim? (b) Ol dispela planti soldia i sindaun long ol hos ol i makim husat? Olsem wanem strong bilong ol “i stap long maus na long tel bilong ol”?
13 Nau namba sikis ensel i winim biugel na namba tu “hevi” i kamap. Fopela ensel i lusim kalabus klostu long Wara Yufretis. Dispela i makim stret lain remnan ol i lusim kalabus long Babilon long yia 1919. Ol i mas brukim ol manmeri i kamap tripela lain na ol i mas “kilim i dai wanpela lain”—ol i mas toksave long ol pris pasto bilong ol misin “Kristen” ol i olsem i dai pinis long ai bilong God. Tasol i mas i gat sampela man bilong helpim ol long mekim dispela wok bilong autim tok, olsem na Jehova i bringim bikpela lain wanwok bilong ol i kam. Lain remnan na dispela bikpela lain i kam helpim ol long autim tok ol i olsem ol soldia i sindaun long hos na ol i ran i go wantaim. Ol i planti tru “olsem 200 milion.” Strong bilong ol “i stap long maus” bilong ol, long wanem ol i go long haus bilong ol man na autim tok long kot bilong Jehova; na strong i stap “long tel” bilong ol, long wanem bihain ol i lusim sampela buk o nius bilong Baibel long ol man, em ol buk na nius i tokaut long de bilong Jehova long bekim pe nogut em i klostu pinis.—Revelesen 9:13-21; Aposel 20:20, 21.
14. (a) Husat dispela “strongpela ensel” long namba sikis piksa? Em i mekim wanem? Em i tok wanem? (b) Liklik buk i “swit olsem hani” na ‘i pait long bel’ na dispela i makim wanem samting?
14 Nau namba sikis piksa i kamap. Yumi lukim wanpela “strongpela ensel,” em Bikpela bilong yumi, Jisas, em i mekim wanpela bikpela wok. Em i holim wanpela liklik buk long han bilong em. Ol klaut i pairap na toktok i kamap, na nau dispela ensel i mekim tok tru antap long nem bilong Bikpela Man bilong wokim yumi, em i tok: “Taim i laik pinis nau. Bai God i no wet moa. Nogat. Bihain namba seven ensel i winim biugel, na krai bilong en i kamap, long dispela taim dispela samting God i laik mekim na i no inap ol man i lukim, em bai God i mekim tru.” Wanpela maus long heven i tokim Jon long i go kisim dispela liklik buk na kaikai. Long maus bilong Jon em i “swit olsem hani,” olsem tok bilong Kingdom na ol blesing bilong “nupela skai na nupela graun” i swit long lain remnan na ol poroman bilong ol long nau. Tasol ol i mas tokaut tu long de bilong God bilong bekim pe nogut “long planti lain manmeri bilong planti ples, na bilong planti tok ples, na long planti king tu,” na dispela wok i olsem i pait long bel bilong sampela. Tasol yumi ken strongim bel! Yumi mas bilip tru olsem Jehova bai strongim yumi na yumi no ken pret long tokim ol man long de bilong Em bilong bekim pe nogut.—Revelesen 10:1-11; 21:1, 4; 1 Jon 5:4; Aisaia 40:29-31; 61:1, 2.
Namba Seven Biugel na Namba Tri Hevi
15 Stori bilong Jon i makim olsem long yia 1918 ol birua i traim “kilim” i dai ol witnes bilong God, tasol long yia 1919 “God i salim win bilong laip” i go insait long ol na kirapim ol long autim tok long olgeta hap bilong graun. Jon i stori pinis long dispela na nau em i tok: “Namba tu bikpela hevi em i pinis. Harim! Liklik taim tasol na namba tri hevi bai i kamap.” Em bai kamap olsem wanem? Baibel i tok moa, olsem: “Na namba seven ensel i winim biugel bilong en.” Olsem na namba tri hevi em i mas kamap long taim laspela biugel i krai. Na harim! “Sampela maus long heven ol i singaut strong olsem, ‘Bikpela bilong yumi [Jehova] wantaim Krais tupela i kamap king bilong olgeta graun! Na em bai i stap king oltaim oltaim!’ ” Dispela kingdom i kamap em Kingdom bilong God i stap long han bilong Krais Jisas. Na Krais Jisas wantaim ol 144,000 wanwok bilong em ol i mekim tru dispela samting God i laik mekim na i no inap ol man i lukim, long wanem ol i stretim bek nem bilong Jehova em i King bilong oltaim na em i God I Gat Olgeta Strong. Tasol olsem wanem? Tok bilong dispela Kingdom em i wanpela hevi? Long ol man nogut em i wanpela hevi tru! Long wanem dispela tok i makim rot bilong God long “bagarapim ol man i bin bagarapim graun.”—Revelesen 11:1-19.
16. Namba seven piksa i kamapim wanem ol bikpela bikpela samting?
16 Wantu na namba seven piksa i kamap! Lukim gutpela “meri” bilong God, em oganaisesen bilong em long heven. Em i gat bel na pen bilong karim pikinini i kamap long em, em dispela pikinini ol i bin wet longtaim long em. Nau long namba wan taim long Revelesen wanpela bikpela snek i kamap, em i retpela, em “dispela snek bilong bipo yet, na ol i kolim em Seten.” “Em i man bilong giamanim olgeta manmeri bilong graun.” Dispela bikpela snek i wetim meri i karim pikinini pinis, bai em i ken kaikai dispela pikinini. Snek i “birua long meri” na nau dispela pasin birua i kamap tru! Meri i karim “pikinini man” na kwiktaim ol i kisim pikinini i go long sia king bilong God.—Revelesen 12:1-6, 9; Jenesis 3:15; Danyel 2:44; 7:13, 14.
17. (a) Maikel em i husat? Kirap long yia 1914 na bihain long en, em i mekim wanem na em i truim nem bilong em? (b) ‘Bikpela hevi i laik kamap long graun,’ em Revelesen 12:12 i stori long en, olsem wanem dispela i no wankain olsem ‘tripela hevi’?
17 Dispela pikinini man i makim Kingdom, em i kamap long heven long yia 1914. King bilong en, em Krais Jisas, em i gat narapela nem bilong em, Maikel, na insait bilong dispela nem em “Husat I Kain Olsem God?” Kwiktaim Krais Jisas i kirap truim nem bilong em na bekim dispela askim—em i pait wantaim Seten na rausim dispela snek bilong bipo yet i go daun long graun, na em i rausim ol ensel bilong en tu i go daun wantaim em. Kirap long yia 1914 na bihain long dispela taim “bikpela hevi” i bin kamap long graun na long solwara, long wanem “Seten i go daun pinis long yupela, na em i gat bikpela belhat tru. Em i save, em i gat sotpela taim tasol.” Nau ol man i stap nogut na yumi save dispela bikpela hevi i painim ol pinis. Seten yet i as bilong dispela bikpela hevi, olsem na em i no wankain olsem ol dispela ‘tripela hevi’ i painim ol man nogut taim Jehova i skelim ol long kot.—Revelesen 12:7-12.
18. (a) Paslain na bihain long Namba Tu Pait, Seten i wok long kamapim wanem hevi long ol gutpela wokboi bilong Jehova? (b) Tasol Seten i strong yet long mekim wanem? Ol narapela piksa bai kamapim wanem samting?
18 Seten i laik kirapim bikpela hevi tu long ol wokboi bilong Jehova long graun em ol i stap gut long Jehova. Paslain long Namba Tu Pait na bihain long en, Seten i kirapim ol man long mekim nogut tru long “ol arapela pikinini” bilong “meri” o oganaisesen bilong God, em hap lain bilong ol 144,000 ol i stap mekim wok yet hia long graun. Seten i laik pinisim wok bilong ol. I olsem em i trautim wara long maus na bai wara i kisim ol na ol i lus. Tasol Jehova i helpim ol. Em i kirapim “graun”—olsem ol samting Seten yet i bin kamapim long graun—na “graun” i opim maus na daunim dispela wara. Tasol Seten i belhat yet na em i strong yet long kirapim pait long ol Witnes Bilong Jehova. (Revelesen 12:13-17) Bihain bai wanem samting i kamap? I gat 9-pela piksa moa, na ol bai tokim yumi long ol samting i laik kamap!—Habakak 2:3.
SAMPELA ASKIM BILONG KAMAPIM GEN OL BIKPELA TOK
□ Jehova i givim wanem wok long ol ensel long hap bilong Revelesen long Baibel?
□ Ol tok Jisas i givim long 7-pela kongrigesen i mas mekim wanem long yumi?
□ Sevenpela ensel i winim biugel na wanem samting i bin kamap?
□ Ol planti binatang olsem grasop i makim husat? Bikpela lain soldia i sindaun long hos ol i makim husat?
□ Taim Kingdom bilong God i kamap pinis long heven, olsem wanem dispela i samting bilong “namba tri hevi”?
4. Ol ensel i gat wanem wok insait long ol tok piksa bilong Revelesen? Ol dispela piksa i makim nambawan bikpela ensel em i olsem wanem samting?
7. Long namba tu piksa ol i mekim wanem singsing? Dispela i mekim wanem long yu?
9. Namba foa piksa i kamapim wanem gutpela samting tru?
11. Namba faiv piksa i tokaut long wanem ol strafe bilong God? Olsem wanem dispela i samting bilong taim bilong yumi?
15. (a) Taim ol i tokaut long namba tri hevi na namba seven ensel i winim biugel, wanem samting i kamap? (b) Olsem wanem tok bilong dispela Kingdom em i wanpela hevi?
[Blok long pes 16]
SAPTA NA VES BILONG OL PIKSA:
□ NAMBA 1 PIKSA 1:10–3:22
□ NAMBA 2 PIKSA 4:1–5:14
□ NAMBA 3 PIKSA 6:1-17
□ NAMBA 4 PIKSA 7:1-17
□ NAMBA 5 PIKSA 8:1–9:21
□ NAMBA 6 PIKSA 10:1–11:19
□ NAMBA 7 PIKSA 12:1-17
□ NAMBA 8 PIKSA 13:1-18
□ NAMBA 9 PIKSA 14:1-20
□ NAMBA 10 PIKSA 15:1–16:21
□ NAMBA 11 PIKSA 17:1-18
□ NAMBA 12 PIKSA 18:1–19:10
□ NAMBA 13 PIKSA 19:11-21
□ NAMBA 14 PIKSA 20:1-10
□ NAMBA 15 PIKSA 20:11–21:8
□ NAMBA 16 PIKSA 21:9–22:5
[Blok/Ol Piksa long pes 17-20]
SAMPELA BIKPELA TOK BILONG OL 16 PIKSA LONG REVELESEN
1 Jisas i sanap namel long 7-pela lam o kongrigesen na em i salim gutpela tok i go long ol long rot bilong 7-pela sta, em ol wasman ol i bilong lain 144,000
2 Pikinini Sipsip i winim pinis pait na em i sanap long pes bilong sia king bilong Jehova long heven na em i kisim wanpela buk i gat ol tok bilong kot long en
3 Krais Jisas i sindaun long hos na wokabaut i go bilong winim pait, na ol narapela hos i gat man i sindaun long en ol i bihainim em i kam na givim hevi long ol man, na de bilong belhat bilong God i kam klostu
4 Ol ensel i holimpas bikpela hevi tru inap long taim wok bilong bungim 144,000 na bikpela lain em inap pinis
5 Ol ensel i winim biugel na autim ol tok bilong kot, na ol Witnes Bilong Jehova i go olsem bikpela lain grasop na kamapim long ples klia rong bilong ol lotu giaman
6 Namba seven biugel i krai na ‘ol Witnes’ bilong God i kisim bek strong bambai ol i ken wok strong long tokaut long Kingdom bilong God na Krais en i kam
7 Kingdom i kamap long yia 1914 na bihain Krais i rausim Seten na ol ensel nogut i kam daun long graun
8 Tupela wel abus i kamap, na namba tu wel abus i givim win bilong laip long piksa bilong namba wan wel abus, em Yunaitet Nesen
9 Long taim bilong kamautim kaikai ol manmeri i “pret long [God] na litimapim nem bilong em” ol i kisim laip i stap oltaim, na ol narapela i bagarap
10 Ol i kapsaitim 7-pela dis i gat belhat bilong God long en na bihain ol i kilim i dai olgeta man em “win” nogut bilong Seten i bosim ol
11 “Wel abus” politik i rausim bikpela pamukmeri i sindaun antap long en, em olgeta lotu giaman, na bagarapim olgeta
12 Bikpela Babilon i bagarap pinis na nau ol i redim ol samting bilong marit bilong Pikinini Sipsip na “meri” bilong em, em lain 144,000
13 Bikpela pamukmeri i bagarap pinis na nau Jisas i kisim ol ami bilong heven i go bagarapim ol narapela lain bilong Seten long graun
14 Seten i kalabus long hul i no gat as na nau Krais wantaim “meri” bilong em, lain 144,000, ol inap bosim graun long 1,000 yia
15 Ol manmeri bilong “nupela graun” bai ol i kisim planti blesing long Jehova aninit long “nupela skai,” em Krais Jisas wantaim “meri” bilong em
16 Ol samting God i mekim bilong oraitim ol man na givim laip long ol, ol dispela samting i kam long ol long rot bilong Nupela Jerusalem