Stap Gut Long Jehova

Ol Kristen tru i tingting strong long ol i no inap larim wanpela samting o wanpela man i pasim ol long lotuim Jehova. Mipela i save yu tu i pilim olsem. Jehova i tingim tru pasin bilong yu long i stap gut long em. (Ritim 1 Stori 28:9.) Wanem ol samting inap traim pasin bilong yu long i stap gut long em? Na olsem wanem yu inap karim ol dispela hevi?

1. Olsem wanem ol narapela inap traim pasin bilong yumi long i stap gut long Jehova?

Sampela manmeri bai traim long pasim yumi long lotuim Jehova. Husat bai mekim olsem? Sampela i bin lusim tok i tru ol i mekim ol tok giaman long oganaisesen bilong God bilong bagarapim bilip bilong yumi. Dispela lain em ol apostet. Na tu, sampela bikman bilong ol lotu i mekim ol tok giaman long yumi bikos ol i laik bai ol man husat i no was gut i lusim tok i tru. Sapos yumi tok pait wantaim ol apostet, o ritim ol buk o ol tok bilong ol long Intenet, o go long websait bilong ol, o lukim ol vidio bilong ol, dispela inap bagarapim bilip bilong yumi. Jisas i tok long ol man i traim long pasim ol narapela long stap gut long Jehova, olsem: “Larim ol. Ol i aipas na ol i laik soim rot. Olsem na sapos wanpela aipas i soim rot long narapela aipas, orait tupela wantaim bai pundaun long hul.”​—Matyu 15:14.

2. Wanem ol disisen yumi wokim inap traim pasin bilong yumi long i stap gut long Jehova?

Pasin bilong yumi long laikim Jehova bai kirapim yumi long sakim ol samting we i insait long lotu giaman. Wok mani bilong yumi o ol oganaisesen yumi insait long en o ol narapela samting yumi mekim i no ken insait long wok bilong lotu giaman. Jehova i givim tok lukaut long yumi olsem: “Ol manmeri bilong mi, yupela i mas lusim [Bikpela Babilon] na kam ausait.”​—Revelesen 18:2, 4.

KISIM SAMPELA SAVE MOA

3. Was gut long ol giaman tisa

Sapos yumi harim sampela tok i no gutpela ol i mekim long oganaisesen bilong Jehova, yumi mas mekim wanem? Ritim Provep 14:15, na stori long dispela askim:

• Wai na yumi mas was gut na yumi no bilipim olgeta stori yumi harim?

Ritim 2 Jon 9-11, na stori long ol dispela askim:

• Yumi mas mekim wanem kain pasin long ol apostet?

• Maski yumi no toktok stret wantaim ol apostet, tasol long wanem ol rot yumi inap putim yau long ol tok bilong ol?

• Yu ting Jehova bai pilim olsem wanem sapos yumi putim yau long ol tok giaman ol man i mekim long em o long oganaisesen bilong em?

4. Stap gut long God taim wanpela brata o sista i mekim sin

Sapos yumi kisim save olsem wanpela insait long kongrigesen i mekim wanpela bikpela sin, yumi gat wok long mekim wanem? Skelim wanpela stiatok i stap long Lo Bilong God em i givim long ol Israel bilong bipo. Ritim Wok Pris 5:1.

Olsem dispela ves i kamapim, sapos yumi kisim save long wanpela i mekim wanpela bikpela sin, yumi mas tokim ol elda long samting yumi save long en. Tasol paslain long mekim olsem, em gutpela pasin long tokim dispela man o meri long em yet i ken go lukim ol elda na autim sin bilong em. Sapos em i no mekim olsem, orait pasin bilong yumi long i stap gut long Jehova i mas kirapim yumi long tokim ol elda long ol samting yumi save long en. Taim yumi mekim olsem, olsem wanem dispela i soim gutpela pasin laikim bilong yumi long . . .

• Jehova God?

• dispela man o meri i mekim sin?

• ol narapela insait long kongrigesen?

5. Stap longwe long Bikpela Babilon

VIDIO: Lusim Bikpela Babilon! (5:06)

Ritim Luk 4:8 na Revelesen 18:4, 5, na stori long ol dispela askim:

• Nem bilong mi i stap insait yet long wanpela lotu giaman?

• Mi insait long wanpela oganaisesen i wok wantaim wanpela lotu giaman?

• Long sampela kain rot, wok mani mi mekim i sapotim wok bilong lotu giaman?

• Long laip bilong mi i gat sampela samting mi mas mekim bilong i stap longwe long lotu giaman?

• Sapos mi bekim yes long wanpela bilong ol dispela askim, wanem ol senis mi mas mekim?

Long olgeta samting, yu mas wokim disisen we maus bilong bel bilong yu bai i no gat tok na i soim olsem yu stap gut long Jehova.

OL BIKPELA POIN

Bilong i stap gut long Jehova, yumi no ken bung wantaim ol man i traim long giamanim yumi.

Riviu

• Wai na yumi no ken putim yau long ol tok bilong ol apostet?

• Yumi mas mekim wanem sapos yumi save olsem wanpela brata i mekim bikpela sin?

• Olsem wanem yumi ken bihainim tok lukaut long lusim lotu giaman?

MEKIM WOK PAINIMAUT

Kisim save long wanem samting yu ken mekim taim ol narapela i mekim ol tok giaman long ol Witnes Bilong Jehova.

“Yu Save Long Olgeta Samting i Kamap?” (Wastaua, Ogas 2018)

Olsem wanem yu ken luksave long ol oganaisesen o ol wok we i sapotim Bikpela Babilon?

“Stap Bisi Yet Long Laspela Haptaim ‘Long Taim Bilong Las De’” (Wastaua, Oktoba 2019, paragraf 16-18)

Sampela apostet i mekim wanem bilong traim long mekim bilip bilong yumi i go slek?

Lukaut Long Ol Tok Giaman (9:32)

Long stori “Mi bin wok long painim God kirap long taim mi liklik yet,” ritim stori bilong wanpela pris bilong lotu Shinto i lusim lotu giaman.

“Baibel i Save Senisim i Stap Bilong Man” (Wastaua, Julai 1, 2011)