Jehova i Save Blesim Ol Man Husat i Fogivim Ol Narapela

 1. Jehova i tok wanem long ol man husat i bel hevi na tanim bel long ol sin ol i bin mekim?

JEHOVA em i Krieta bilong yumi, Man Bilong Givim Lo, na Jas, na tu, em i gutpela Papa bilong yumi long heven. (Sng. 100:3; Ais. 33:22) Taim yumi bel hevi tru long sin yumi mekim long God na yumi tanim bel tru, em i gat namba long fogivim yumi na em i laik fogivim yumi. (Sng. 86:5) Long rot bilong profet Aisaia, Jehova i mekim dispela naispela tok i mekim isi bel bilong yumi, em i tok: “Maski ol sin bilong yupela i olsem retpela kala, ol bai kamap waitpela olsem sno.”​—Ais. 1:18.

 2. Sapos yumi laik stap bel isi wantaim ol narapela, yumi mas mekim wanem?

² Yumi no gutpela olgeta, olsem na yumi bai mekim ol tok na ol pasin em ol narapela i no amamas long en. (Jems 3:2) Tasol dispela i no makim olsem yumi no inap long pas gut wantaim ol, nogat. Yumi inap pas gut wantaim ol sapos yumi lain long fogivim ol. (Prov. 17:9; 19:11; Mat. 18:21, 22) Taim yumi popaia long toktok o pasin yumi mekim long narapela narapela, Jehova i laik bai yumi mas fogivim narapela narapela. (Kol. 3:13) I gat gutpela risen na yumi mas mekim olsem. Jehova yet i save redi long fogivim yumi “olgeta.”​—Ais. 55:7.

 3. Yumi bai stori long wanem ol samting long dispela atikol?

³ Long dispela atikol, yumi bai stori long olsem wanem ol man i no gutpela olgeta i ken bihainim pasin bilong Jehova long fogivim ol narapela. Wanem ol sin em ol narapela i mekim na yumi mas tokim ol elda long dispela samting? Wai na Jehova i kirapim yumi long fogivim ol narapela? Na yumi inap kisim wanem skul long sampela wanbilip bilong yumi em ol i karim bikpela hevi tru taim ol narapela i rongim ol?

 4. (a) Taim wanpela wokman bilong Jehova i mekim bikpela sin, em i mas mekim wanem? (b) Wanem wok bilong ol elda taim ol i bung wantaim Kristen i mekim bikpela sin?

⁴ Sapos yumi save olsem wanpela Kristen i bin mekim bikpela sin, orait yumi mas tokim ol elda long dispela samting. Lista bilong sampela bikpela sin i stap long 1 Korin 6:9, 10. Taim ol man i mekim ol bikpela sin, dispela i makim olsem ol i mekim ol pasin i nogut tru we i brukim lo bilong God. Sapos wanpela Kristen i mekim bikpela sin, orait em i mas beten long God Jehova na askim God long fogivim em, na em i mas toktok wantaim ol elda long kongrigesen long dispela samting. (Sng. 32:5; Jems 5:14) Ol elda i gat wanem wok long mekim? Jehova wanpela tasol i gat namba long fogivim olgeta sin bilong yumi na em inap mekim olsem long rot bilong pe bilong baim bek man.b Tasol Jehova i trastim ol elda na em i givim ol wok bilong skelim gut ol tok bilong Baibel bilong save sapos Kristen husat i mekim bikpela sin i ken stap yet insait long kongrigesen o nogat. (1 Kor. 5:12) I gat sampela samting ol elda i mas mekim, na wanpela bilong ol dispela samting em long painimaut bekim bilong ol dispela askim: Dispela Kristen i min long mekim dispela sin? Em i bin wokim wanpela plen paslain long em i mekim dispela sin? Em i bin mekim dispela sin planti taim insait long longpela haptaim tru? Bikpela samting moa, em i soim olsem em i bel hevi tru long sin em i mekim na em i tanim bel? I gat evidens i soim olsem Jehova i fogivim em?​—Apo. 3:19.

 5. Wanem gutpela samting i kamap long wok bilong ol elda?

⁵ Taim ol elda i bung wantaim Kristen husat i mekim bikpela rong, nambawan bikpela tingting bilong ol em long mekim wankain disisen em Jehova i mekim pinis long heven. (Mat. 18:18) Olsem wanem dispela arensmen i helpim kongrigesen? Dispela arensmen i makim olsem taim Kristen i mekim bikpela rong na em i no tanim bel, orait em bai raus long kongrigesen. Long dispela rot, em i no inap bagarapim bilip bilong ol sipsip bilong Jehova em ol i dia tumas insait long kongrigesen. (1 Kor. 5:6, 7, 11-13; Tai. 3:10, 11) Na tu, dispela arensmen inap helpim Kristen i mekim bikpela rong long tanim bel na bai Jehova i ken fogivim em. (Luk 5:32) Ol elda i ken beten long Jehova bilong helpim Kristen husat i tanim bel tru na bai em i ken kamap strong gen long bilip.​—Jems 5:15.

 6. Sapos wanpela Kristen i raus long kongrigesen, yu ting Jehova inap fogivim em? Stori long dispela.

⁶ Olsem wanem sapos ol elda i bung na toktok wantaim wanpela Kristen i mekim bikpela rong, tasol em i no tanim bel? Long kain taim olsem, dispela Kristen bai raus long kongrigesen. Sapos em i brukim lo bilong gavman, ol elda i no inap banisim em long ol hevi em bai karim long rong em i bin mekim. Jehova i larim ol gavman i mekim wok bilong jasim na panisim olgeta man husat i brukim lo bilong gavman—maski em i tanim bel o nogat. (Rom 13:4) Tasol bihain sapos em i stretim tingting bilong em na em i tanim bel tru na senisim pasin bilong em, orait Jehova bai redi long fogivim em. (Luk 15:17-24) Yes, Jehova bai fogivim em maski em i mekim bikpela rong tru.​—2 Sto. 33:9, 12, 13; 1 Tim. 1:15.   

 7. Taim yumi fogivim man i rongim yumi, dispela i makim wanem samting?

⁷ Yumi amamas long save olsem yumi no gat wok long mekim disisen long Jehova bai fogivim man i mekim rong o nogat! Tasol i gat wanpela disisen em yumi mas mekim. Em wanem disisen? Sampela taim, wanpela inap rongim yumi—ating em bikpela rong—tasol bihain em i tok sori na em i askim yumi long fogivim em. Long ol narapela taim, ating man i rongim yumi i no mekim olsem. Maski i olsem, yumi ken mekim disisen long fogivim em. Taim yumi fogivim em, dispela i makim olsem yumi no holim yet pasin bilong kros na bel nogut long em. Tasol tru tru, sampela haptaim i mas lus na yumi mas wok hat tru long mekim olsem, moa yet sapos em i mekim pasin we i bagarapim tru bel bilong yumi. Wastaua bilong Septemba 15, 1994 i tok: “Yu mas save tu, taim yu lusim rong bilong man, i no olsem yu orait long dispela rong. Nogat. Taim Kristen i lusim rong bilong man, i olsem em i putim dispela hevi long han bilong Jehova na wet long em. Jehova em i stretpela Jas bilong heven na graun, na em bai stretim ol rong long taim stret.” Wai na Jehova i kirapim yumi long fogivim ol narapela na larim pasin bilong mekim stretpela kot long han bilong em?   

 8. Taim yumi fogivim narapela, hau yumi soim olsem yumi pilim tru pasin marimari bilong Jehova?

⁸ Taim yumi fogivim narapela, yumi soim olsem yumi pilim tru pasin marimari bilong God. Long wanpela tok piksa, Jisas i tok Jehova i olsem wanpela king husat i lusim bikpela dinau bilong wanpela wokboi husat i no inap bekim dispela dinau. Tasol dispela wokboi em king i fogivim em, em i no mekim pasin marimari long wanwok bilong em husat i gat liklik dinau tasol long em. (Mat. 18:23-35) Jisas i laik skulim yumi long wanem samting? Sapos yumi pilim tru bikpela pasin marimari Jehova i mekim long yumi, dispela bai kirapim yumi long fogivim ol narapela. (Sng. 103:9) Wastaua i bin mekim dispela tok planti yia i go pinis, em i tok: “Maski yumi fogivim ol narapela inap planti taim, yumi no inap tru long kamap long wankain mak long pasin bilong God long fogivim yumi na bikpela pasin marimari em i mekim long yumi long rot bilong Krais.”

 9. Jehova i save mekim pasin marimari long husat? (Matyu 6:14, 15)

⁹ Jehova bai fogivim ol man husat i fogivim ol narapela. Jehova i save marimari long ol man husat i marimari long ol arapela. (Mat. 5:7; Jems 2:13) Jisas i kamapim klia dispela samting taim em i skulim ol disaipel bilong em long beten. (Ritim Matyu 6:14, 15.) Paslain long Jisas i kam long graun, Jehova i bin kamapim dispela wankain poin taim em i toktok wantaim wokman bilong em Jop. Dispela bilipman i bin bel hevi tru long hatpela tok em 3-pela man nem bilong ol Elifas, Bildat, na Sofar i bin mekim long em. Jehova i tokim Jop long mekim beten bilong ol. Bihain long Jop i mekim olsem, Jehova i blesim em.​—Jop 42:8-10.

10. Wai na pasin bilong bel nogut inap nogutim yumi? (Efesus 4:31, 32)

¹⁰ Pasin bilong bel nogut bai nogutim yumi. Jehova i laik bai yumi stap bel isi na amamas, olsem na em i tokim yumi long rausim pasin bilong bel nogut bikos dispela pasin i olsem wanpela hevipela samting yumi karim. (Ritim Efesus 4:31, 32.) Jehova i tok yumi “no ken belhat, na [yumi] mas lusim pasin bilong belhat nogut tru.” (Sng. 37:8) Em savetingting long bihainim dispela edvais. Taim yumi bel nogut long narapela, dispela inap nogutim helt bilong yumi na tingting bilong yumi. (Prov. 14:30) Sapos yumi bel nogut long man i rongim yumi, yumi putim hevi long yumi yet. I olsem yumi dring posin na yumi laik bai posin i nogutim em, tasol tru tru yumi nogutim yumi yet na i no dispela man. Olsem na taim yumi fogivim ol narapela, yumi helpim yumi yet. (Prov. 11:17) Bel na tingting bilong yumi bai stap isi, na yumi bai amamas yet long mekim wok bilong Jehova.

11. Baibel i tok wanem long pasin bilong bekim rong? (Rom 12:19-21)

¹¹ Bekim rong em wok bilong Jehova. Jehova i no givim yumi namba long bekim rong em wanpela i bin mekim long yumi. (Ritim Rom 12:19-21.) Yumi gat sin na sampela taim tingting bilong yumi i kranki, so yumi no inap long skelim gut ol samting long stretpela pasin olsem God i save mekim. (Hib. 4:13) Na sampela taim, yumi inap larim filings bilong yumi i stopim yumi long skelim gut ol samting. Jehova i kirapim Jems long raitim dispela tok: “Belhat bilong man i no save kamapim stretpela pasin bilong God.” (Jems 1:20) Yumi ken save tru olsem Jehova bai mekim samting i stret na i no gat wanpela samting bai pasim em long mekim stretpela kot.

12. Olsem wanem yumi inap soim olsem yumi trastim stretpela pasin bilong Jehova?

¹² Taim yumi fogivim narapela, yumi soim olsem yumi trastim stretpela pasin bilong Jehova. Taim yumi larim ol samting long han bilong Jehova, yumi soim olsem yumi bilip tru olsem Jehova bai pinisim olgeta pen na hevi em sin i bin kamapim. Long nupela taim God i tok promis long kamapim, “[yumi] no inap tingim gen ol samting” i save mekim yumi pilim pen na krai, “na long bel, [yumi] no inap tingim na pilim gen ol dispela samting.” (Ais. 65:17) Tasol taim wanpela i rongim yumi na yumi bel hevi nogut tru, yu ting yumi inap long rausim pasin bilong belhat na bel nogut i stap insait long bel bilong yumi? Skelim olsem wanem sampela i bin mekim olsem.

13-14. Yu kisim wanem skul long pasin bilong fogivim narapela long ekspiriens bilong Tony na José?

¹³ Planti bratasista Kristen bilong yumi i mekim disisen long fogivim ol narapela maski ol i bin bel hevi tru long pasin ol i mekim long ol. Ol i kisim wanem ol blesing taim ol i mekim olsem?   

¹⁴ Tonyc em wanpela brata i stap long Filipins. Planti yia paslain long em i kisim tok i tru, em i painimaut olsem wanpela man, nem bilong em José, i bin kilim i dai bikpela brata bilong em. Long dispela taim, Tony em man bilong belhat nogut tru na pait, na em i laik bekim rong em José i bin mekim. Polis i arestim José na em i kalabus long rong em i bin mekim. Bihain, ol i rilisim José na em i lusim kalabus, na Tony i tok promis olsem em bai painim José na kilim em i dai. Na em i baim wanpela gan bilong mekim olsem. Tasol bihain Tony i kirap stadi long Baibel wantaim ol Witnes Bilong Jehova. Em i tok: “Taim mi wok long stadi, mi kisim save olsem mi mas senisim ol pasin bilong mi, na mi mas lusim tu pasin bilong belhat.” Tony i baptais na bihain long sampela haptaim ol i makim em long mekim wok elda insait long kongrigesen. Em i kirap nogut tru taim em i save olsem José tu i bin kisim baptais olsem wanpela wokman bilong Jehova! Taim tupela i bung, ol i hagim narapela narapela, na Tony i tokim José olsem em i fogivim em. Tony i tok em i fogivim José na dispela i mekim em i stap amamas tru na i hatwok long em i stori long dispela amamas em i pilim. Yes, Jehova i blesim Tony long pasin bilong em long redi long fogivim narapela.

15-16. Yu kisim wanem skul long pasin bilong fogivim narapela long ekspiriens bilong Peter na Sue?

¹⁵ Long 1985, Peter na Sue i go long wanpela miting long Haus Kingdom na wanpela bikpela pairap i kamap. Wanpela man i putim bom insait long Haus Kingdom. Sue i bin kisim ol bikpela bagarap long bodi na dispela i mekim na em i no inap lukluk gut na harim gut ol saun. Na tu, em i no inap smelim ol samting.d Planti taim Peter na Sue i save askim ol yet olsem, ‘Wanem kain man inap mekim kain pasin nogut tru olsem?’ Planti yia bihain, polis i arestim dispela man i putim bom insait long Haus Kingdom—em i no wanpela wokman bilong Jehova—na ol i makim em long stap kalabus long laip olgeta bilong em. Ol i askim Peter na Sue sapos ol i fogivim dispela man, na tupela i tok: “Jehova i skulim mipela olsem pasin bilong belhat na bel nogut i ken bagarapim helt bilong mipela na bel na tingting bilong mipela. So bihain long dispela hevi i kamap, mipela i askim Jehova long helpim mipela long lusim pasin bilong belhat na bel nogut na bai mipela i ken stap bel isi.”

¹⁶ Yu ting em isi long tupela long fogivim dispela man? Sampela taim ol i pilim hatwok long fogivim em. Tupela i tok moa olsem: “Long ol taim we Sue i pilim pen long ol bagarap em i kisim long bodi bilong em, mipela i save belhat gen. Tasol mipela i no save tingim tingim dispela samting, so belhat i save pinis hariap. Mipela i ken tok tru long bel olsem sapos dispela man husat i putim bom long Haus Kingdom i kamap wanpela brata bilong yumi, mipela bai welkamim em. Dispela ekspiriens i skulim mipela olsem ol stiatok bilong Baibel inap helpim yumi long stap fri tru; ol i helpim yumi long stap fri long planti rot em yumi no inap long tingim! Na tu, mipela i kisim bel isi long save olsem klostu nau Jehova bai pinisim olgeta pen na hevi yumi karim.”

17. Yu kisim wanem skul long pasin bilong fogivim narapela long ekspiriens bilong Myra?

¹⁷ Myra i kisim tok i tru taim em i marit pinis na em i gat 2-pela liklik pikinini. Man bilong em i no laikim tok i tru. Bihain, man bilong em i mekim pasin adaltri na em i lusim famili bilong ol. Myra i tok: “Taim man bilong mi i lusim mi na 2-pela pikinini bilong mipela, mi pilim ol samting em planti i save pilim taim wanpela ol i laikim tru i lusim ol—mi kirap nogut, mi hatwok long bilipim, mi krai sori, mi rigret, mi sutim tok long mi yet, na mi belhat.” Maski tupela i brukim marit pinis, em i bel hevi yet olsem man bilong em i lusim em. Myra i tok: “Ol dispela samting mi pilim i bagarapim bel bilong mi inap planti mun, na mi luksave olsem ol dispela filings i bagarapim pasin pren bilong mi wantaim Jehova na wantaim ol narapela.” Myra i tok em i lusim pasin bilong belhat na em i no bel nogut moa long man em bipo em i bin marit long en. Myra i hop olsem wanpela taim dispela man bai go klostu long Jehova. Nau Myra i putim tingting long ol samting bai kamap bihain. Olsem wanpela wanpis mama, em i mekim bikpela long 2-pela pikinini bilong em na bai ol i ken kamap ol wokman bilong Jehova. Long nau Myra i amamas long em i mekim wok bilong Jehova wantaim ol pikinini bilong em na ol famili bilong ol pikinini bilong em.

18. Wai na yumi ken bilip tru long Jehova olsem Nambawan Jas?

¹⁸ Yumi kisim bel isi long save olsem yumi no gat wok long jasim ol man long ol pasin ol i bin mekim! Jehova em i Nambawan Jas, olsem na em bai mekim dispela bikpela wok. (Rom 14:10-12) Yumi ken bilip tru olsem oltaim em bai mekim wok jas i stret wantaim ol stretpela lo bilong em long wanem samting i stret na wanem samting i no stret. (Stt. 18:25; 1 Kin. 8:32) Em bai no inap tru long mekim pasin i no stret!

19. Jehova em i stretpela jas, olsem na wok jas bilong em bai mekim wanem?

¹⁹ Yumi luk fowed long dispela taim we Jehova bai pinisim tru olgeta pen na hevi em sin i kamapim. Long dispela taim, Jehova bai oraitim olgeta bagarap long bodi bilong yumi, na tu, em bai rausim ol tingting i mekim yumi bel hevi na yumi bai stap bel isi tru. (Sng. 72:12-14; Rev. 21:3, 4) Yumi bai no inap tru long tingim gen ol dispela samting. Taim yumi wok long wetim dispela gutpela taim long kamap, yumi tenkyu tru olsem Jehova i givim yumi save long yumi ken bihainim pasin bilong em long fogivim ol narapela.