Mitirho

21 Loko hi hambane na vona hi khandziye xikepe hi kongoma eKosi, hi xa mundzuku xa kona hi ye eRhoda, ku suka kwalaho hi ya ePatara. 2 Loko hi kume xikepe lexi yaka eFenikiya, hi xi khandziyile hi famba. 3 Loko hi vona xihlala xa Kipra, hi xi siye endzhaku etlhelweni ra ximatsi hi kongoma eSiriya, hi fika hi yima eTiri, laha xikepe xi nga fika xi chicha mindzhwalo leyi a xi yi rhwarile. 4 Hi lavalave vadyondzisiwa hi va kuma kutani hi tshama kwalaho masiku ya nkombo. Kambe hi ku pfuniwa hi moya va byele Pawulo hi ku phindhaphindha leswaku a nga yi eYerusalema.+ 5 Loko nkarhi wa leswaku hi famba wu fika, hi khome ndlela, kambe hinkwavo ku katsa ni vavasati ni vana va hi heleketile kukondza hi ya fika ehandle ka muti. Hi fike hi khinsama eribuweni ra lwandle hi khongela 6 kutani hi lelana. Hiloko hi khandziya xikepe kambe vona va tlhelela emakaya.

7 Hi suke eTiri hi xikepe hi ya ePitolemayi, hi fika hi xeweta vamakwerhu hi tlhela hi tshama na vona siku rin’we. 8 Hi siku leri landzelaka hi sukile hi ya eKhezariya, hi ya nghena endlwini ya Filipi, muchumayeri wa mahungu lamanene, loyi a a ri un’wana wa vavanuna va nkombo+ hi fika hi tshama na yena. 9 Wanuna loyi a a ri ni vana va mune va vanhwanyana lava a va nga tekiwanga* naswona a va profeta.+ 10 Kambe endzhaku ka loko hi tshame masiku yo hlayanyana, ku fike muprofeta loyi a vuriwaka Agabo+ a huma hi le Yudiya. 11 A fika eka hina a teka bandhi ra Pawulo, a tiboha milenge ni mavoko a ku: “Moya lowo kwetsima wu ri, ‘Munhu loyi bandhi leri ri nga ra yena, Vayuda va ta n’wi boha hi ndlela leyi eYerusalema+ naswona u ta nyiketiwa eka vanhu va matiko.’”+ 12 Loko hi twa sweswo, hina ni lava a va ri kwalaho hi sungula ku n’wi kombela leswaku a nga yi eYerusalema. 13 Hiloko Pawulo a hlamula a ku: “Mi endla yini loko mi rila hi ndlela leyi ni ku ringeta ku ndzi heta matimba? Swi tiveni leswaku a ndzi tiyimiselanga ku khomiwa ntsena kambe ni ku tlhela ndzi fa eYerusalema hikwalaho ka vito ra Hosi Yesu.”+ 14 Loko hi vona leswaku a nga pfumeli, hi n’wi tshikile kutani hi ku: “A ku endleke ku rhandza ka Yehovha.”*

15 Endzhaku ka sweswo, hi lunghiselele riendzo kutani hi khoma ndlela yo ya eYerusalema. 16 Vadyondzisiwa van’wana vo huma eKhezariya na vona va fambe na hina, va hi yisa eka Mnasoni wa le Kipra, un’wana wa vadyondzisiwa vo sungula loyi a hi ta rhurheriwa endlwini ya yena. 17 Loko hi fika eYerusalema, vamakwerhu va hi amukele hi ntsako. 18 Kambe hi siku leri landzelaka Pawulo u fambe na hina eka Yakobo+ naswona vakulukumba hinkwavo a va ri kona. 19 U va xewetile a tlhela a va hlamusela hi vuxokoxoko swilo leswi Xikwembu xi nga swi endla exikarhi ka matiko hikwalaho ka ntirho wakwe wo chumayela.

20 Endzhaku ko twa sweswo, va sungula ku dzunisa Xikwembu, kambe va ku eka yena: “Makwerhu, wa swi vona leswaku ku ni magidigidi ya vapfumeri lava nga Vayuda naswona hinkwavo va wu rhandza ngopfu Nawu.+ 21 Kambe va twe mavarivari ya leswaku u dyondzisa Vayuda hinkwavo exikarhi ka matiko leswaku va tshika Nawu wa Muxe, u va byela leswaku va nga va yimbisi vana va vona kumbe ku landzela ndhavuko.+ 22 Xana ku fanele ku endliwa yini hi swona? Hikuva handle ko kanakana va ta swi twa leswaku u fikile. 23 Hikwalaho endla leswi hi ku byelaka swona: Hi ni vavanuna va mune lava tiboheke hi ku hlambanya. 24 Famba ni vavanuna lava kutani u tibasisa hi ku landza mukhuva wa kona swin’we na vona u tlhela u va hakelela leswaku va ta byevula tinhloko ta vona. Kutani un’wana ni un’wana u ta swi tiva leswaku mavarivari lawa va byeriweke wona mayelana na wena i mavunwa, kambe mahanyelo ya wena i manene naswona u hlayisa Nawu.+ 25 Loko ku ri vapfumeri lava humaka exikarhi ka matiko, hi va rhumele papila ra xiboho lexi hi xi endleke xa leswaku va fanele va papalata swilo leswi nyikeriweke eka swikwembu+ swin’we ni ngati+ ni leswi dlayiweke hi ku tlimbiwa nkolo*+ ni ku tikhoma ko biha hi swa masangu.”*+

26 Hi siku leri landzelaka Pawulo a famba ni vavanuna volavo va ya tibasisa hi ku landza mukhuva wa kona,+ kutani a ya etempeleni a ya va tivisa leswaku masiku ya ku tibasisa ma ta hela rini ni leswaku un’wana ni un’wana wa vona u fanele a endleriwa gandzelo.

27 Kuteloko masiku ya nkombo ma ri kusuhi ni ku hela, loko Vayuda lava humaka eAsiya va n’wi vona etempeleni, va sungula ku kucetela ntshungu hinkwawo kutani va n’wi khoma, 28 va huwelela va ku: “Vavanuna va Israyele, pfunani! Loyi i munhu la dyondzisaka vanhu hinkwavo etindhawini hinkwato ku delela varikwerhu, Nawu wa hina ni ndhawu leyi. Kasi xo biha no tlurisa u tise ni Magriki etempeleni naswona u thyakise ndhawu leyi yo kwetsima.”+ 29 Hikuva a va vone Trofimo+ wa Muefesa a ri na yena emutini xisweswo a va ehleketa leswaku Pawulo u nghene na yena etempeleni. 30 Hiloko ku va ni hasahasa emutini hinkwawo, vanhu va ta hi ku tsutsuma va fika va khoma Pawulo va n’wi kokakoka va n’wi humesela ehandle ka tempele kutani ku pfariwa minyangwa hi xihatla. 31 Loko va ri karhi va ringeta ku n’wi dlaya, swi fika eka ndhuna ya vuthu leswaku emutini hinkwawo wa Yerusalema ku ni hasahasa; 32 yi namba yi teka masocha ni tindhuna ta wona va tsutsumela kwale. Loko vanhu va vona ndhuna ya nyimpi ni masocha, va tshika ku bukutela Pawulo.

33 Hiloko ndhuna ya nyimpi yi fika yi n’wi khoma, yi lerisa leswaku a bohiwa hi tinketana timbirhi;+ kutani yi n’wi vutisa leswaku hi yena mani naswona u endle yini. 34 Kambe van’wana exikarhi ka ntshungu va sungula ku huwelela va vula swin’wana van’wana va vula swin’wana. Leswi ndhuna a yi nga koti ku twisisa mhaka ya kona hikwalaho ka hasahasa, yi lerisa leswaku Pawulo a yisiwa egoveleni ra masocha. 35 Kambe loko a fika eswitepisini, masocha ma boheke ku n’wi tlakula hikuva ntshungu a wu lava ku n’wi vavisa, 36 hikuva ntshungu wa vanhu a wu n’wi landzelela wu ri karhi wu huwelela wu ku: “A dlayiwe!”

37 Loko a ri kusuhi ni ku yisiwa egoveleni ra masocha, Pawulo a byela ndhuna ya nyimpi a ku: “Xana ndza pfumeleriwa ku vula swo karhi eka wena?” Ndhuna yi ku: “Kasi wa swi kota ku vulavula Xigriki? 38 Xana a hi wena Muegipta loyi a nga tshama a kucetela vanhu leswaku va pfukela mfumo, a tlhela a rhangela vavanuna va 4 000 lava a va hlome hi mabanga va ya emananga?” 39 Hiloko Pawulo a ku: “Kahlekahle ndzi Muyuda+ wa le Tarso+ le Kilikiya, muakatiko wa muti lowu dumeke swinene. Kutani ndza ku kombela, ndzi pfumelele ndzi vulavula ni vanhu lava.” 40 Endzhaku ko n’wi pfumelela, Pawulo a yima eswitepisini kutani a yimisa voko ku komba leswaku u lava ku vulavula. Loko vanhu va miyela a sungula ku vulavula hi Xiheveru+ a ku: