Mitirho

2 Loko siku ra Nkhuvo wa Pentekosta+ ri ri karhi ri ya emahlweni, vadyondzisiwa a va hlengeletane ndhawu yin’we. 2 Hiloko ku twala mpfumawulo lowu humaka etilweni, a wu fana ni moya lowu hungaka hi matimba wu tata yindlu hinkwayo leyi a va tshame eka yona.+ 3 Hiloko ku vonaka tindzimi leti fanaka ni ndzilo eka vona, kutani ti avana, ririmi ha rin’we ri tshama ehenhla ka un’wana ni un’wana wa vona, 4 kutani hinkwavo va tala moya lowo kwetsima,+ va sungula ku vulavula hi tindzimi to hambanahambana, hilaha moya a wu va pfumelela hakona.+

5 Hi nkarhi wolowo Vayuda lava tinyiketeleke lava a va huma ematikweni yo hambanahambana a va ri eYerusalema.+ 6 Kutani loko ku twala mpfumawulo wolowo, ntshungu wu hlengeletana wu pfilunganyekile hikuva un’wana ni un’wana a a va twa va vulavula ririmi rakwe. 7 Hakunene a va hlamale ngopfu lerova va ku: “Xana vanhu lava hinkwavo lava vulavulaka a hi Vagaleliya+ ke? 8 Kutani swi tisa ku yini leswaku hinkwerhu hi twa tindzimi ta hina? 9 Vaparta, Vameda,+ Vaelami,+ vaaki va le Mesopotamiya, Yudiya, Kapadokiya, Ponto ni le xifundzheni xa Asiya,+ 10 Frigiya, Pamfiliya, Egipta ni le swifundzheni swa Libiya ekusuhi ni le Kirena, vaendzi vo huma eRhoma, Vayuda swin’we ni vaproselita,*+ 11 Vakreta ni Vaarabiya, hi va twa va vulavula hi tindzimi ta hina hi mitirho ya matimba ya Xikwembu.” 12 Ina, hinkwavo a va hlamarile va tlhela va pfilunganyeka, va vutisana va ku: “Xana swilo leswi swi vula yini?” 13 Kambe, van’wana a va va hleka va ku: “Va twa vhinyo yo tsokombela.”*

14 Kambe Petro a suka a yima ni lava va 11+ a tlakusa rito a vulavula na vona a ku: “Vavanuna va le Yudiya na n’wina vaaki va Yerusalema, ndzi yingiseni mi twa leswi ndzi swi vulaka. 15 Ku vula ntiyiso, vanhu lava a va dakwanga, hilaha mi ehleketaka hakona hikuva ka ha ri awara ya vunharhu ya siku.* 16 Ku ri na sweswo, leswi hi leswi vuriweke hi muprofeta Yuwele a ku: 17 ‘“Emasikwini yo hetelela,” ku vula Xikwembu “ndzi ta chululela moya wa mina eka vanhu hinkwavo, vana va n’wina va majaha ni va vanhwanyana va ta profeta, majaha ya n’wina ma ta vona swivono naswona vakhalabye va n’wina va ta lorha milorho+ 18 naswona emasikwini wolawo ndzi ta chululela moya wa mina ni le ka malandza ya mina ya xinuna ni ya xisati, kutani ma ta profeta.+ 19 Ndzi ta endla swihlamariso etilweni ni masingita emisaveni, ngati ni ndzilo ni mapapa ya musi. 20 Dyambu ri ta hundzuriwa ri va munyama, n’weti wu ta tshwuka ku fana ni ngati ku nga si fika siku lerikulu ni leri vangamaka ra Yehovha.* 21 Kutani un’wana ni un’wana loyi a vitanaka vito ra Yehovha* u ta ponisiwa.”’+

22 “Vavanuna va Israyele, twanani marito lawa: Yesu wa Munazareta, a ku ri munhu loyi Xikwembu xi n’wi kombiseke eka n’wina hi ku tirhisa mitirho ya matimba ni masingita ni swikombiso leswi Xikwembu xi swi endleke hi ku tirhisa yena exikarhi ka n’wina,+ hilaha mi swi tivaka hakona. 23 Wanuna loyi, loyi a nyiketiweke leswaku ku endleka leswi se a swi bohiwile naswona Xikwembu se a xi swi tiva,+ mi n’wi belele emhandzini mi tirhisa vanhu lava nga tiviki nawu ivi mi n’wi dlaya.+ 24 Kambe Xikwembu xi n’wi pfuxile+ xi n’wi tshunxa eka matimba* ya rifu, hikuva a swi nga ta koteka leswaku ri tshama ri ri ni matimba ehenhla ka yena.+ 25 Phela Davhida u vula leswi ha yena: ‘Ndzi tshama ndzi ehleketa hi Yehovha,* hikuva u le vokweni ra mina ra xinene leswaku ndzi nga tshuki ndzi tsekatsekisiwa. 26 Hikwalaho ka sweswo mbilu ya mina ya khana ni ririmi ra mina ri tsakile swinene. Ndzi ta tshama ndzi ri ni ntshembo; 27 hikuva a wu nge ndzi tshiki eSirheni* naswona a wu nge pfumeli leswaku miri wa nandza wa wena la tshembekaka wu bola.+ 28 U ndzi tivise tindlela ta vutomi; u ta endla leswaku ndzi tsaka swinene emahlweni ka wena.’+

29 “Vavanuna, vamakwerhu, ndzi vulavula na n’wina ndzi nga chavi nchumu hi Davhida kokwa wa hina, leswaku u file a tlhela a lahliwa+ naswona sirha rakwe ra ha ri kona ninamuntlha. 30 Hikuva a a ri muprofeta naswona a a swi tiva leswaku Xikwembu xi n’wi hlambanyerile leswaku vuhosi byakwe xi ta byi nyika un’wana wa vana* va yena,+ 31 u swi vone swi nga si humelela kutani a vulavula hi ku pfuxiwa ka Kreste, leswaku a nga tshikiwanga eSirheni* naswona miri wakwe a wu bolanga.+ 32 Yena Yesu loyi Xikwembu xi n’wi pfuxile naswona hinkwerhu ka hina hi timbhoni ta swona.+ 33 Hikwalaho, leswi a tlakusiweke a vekiwa evokweni ra xinene ra Xikwembu+ ni ku tlhela a kuma moya lowo kwetsima lowu humaka eka Tatana+ hilaha a n’wi tshembiseke hakona, u chulule leswi mi swi vonaka ni ku swi twa. 34 Hikuva Davhida a nga tlhandlukelanga etilweni, kambe yena hi byakwe u ri, ‘Yehovha* a ku eka Hosi ya mina: “Tshama evokweni ra mina ra xinene 35 ku fikela loko ndzi veka valala va wena va va vunavelo bya mikondzo ya wena.”’+ 36 Hikwalaho Vaisrayele hinkwavo a va swi tive leswaku Yesu loyi mi n’wi dlayeke emhandzini,+ Xikwembu xi n’wi endle Hosi+ ni Kreste.”

37 Loko va twa sweswo swi va tlhava timbilu kutani va byela Petro ni vaapostola lavan’wana hinkwavo va ku: “Vavanuna, vamakwerhu, xana hi fanele hi endla yini?” 38 Petro a va hlamula a ku: “Hundzukani,+ un’wana ni un’wana wa n’wina a a khuvuriwe+ hi vito ra Yesu Kreste leswaku mi rivaleriwa swidyoho+ swa n’wina, kutani mi ta kuma nyiko ya mahala ya moya lowo kwetsima. 39 Hikuva xitshembiso+ xi endleriwe n’wina ni vana va n’wina ni hinkwavo lava nga ekule swinene, hinkwavo lava Yehovha* Xikwembu xa hina a nga ta va vitana leswaku a va nyika moya lowo kwetsima.”+ 40 Naswona u ye emahlweni a va byela swilo swo tala ni ku nyikela vumbhoni lebyi heleleke, a ya emahlweni a va khutaza a ku: “Hambanani ni vanhu vo homboloka lava mi hanyaka na vona.”+ 41 Hikwalaho lava amukeleke marito yakwe hi mbilu hinkwayo va khuvuriwile,+ kutani hi siku rero ku engeteleka vanhu va kwalomu ka 3 000.+ 42 Kutani va ya emahlweni va tinyiketela eka leswi vaapostola a va swi dyondzisa, va hlangana* swin’we, va dya swin’we+ ni ku khongela swin’we.+

43 Vaapostola va endle masingita yo tala ni swikombiso hiloko vanhu hinkwavo va swi vona kutani va sungula ku chava Xikwembu.+ 44 Hinkwavo lava veke vapfumeri a va ri swin’we naswona va avelane hinkwaswo leswi a va ri na swona, 45 a va xavisa swilo swa vona+ ivi va avelana mali ya kona hi ku ya hi leswi munhu a swi pfumalaka.+ 46 Siku ni siku a va tshama va ri etempeleni hi xikongomelo xin’we, a va dya emakaya yo hambanahambana va avelana swakudya va tsakile swinene hi mbilu yo basa, 47 va dzunisa Xikwembu naswona va tsakeriwa hi vanhu hinkwavo. Hi nkarhi lowu fanaka Yehovha* a ya emahlweni a va tisela vanhu lava a va ponisa siku ni siku.+