Matewu

12 Hi nkarhi wolowo Yesu a tsemakanya masimu ya koroni hi Savata. Vadyondzisiwa vakwe va khomiwa hi ndlala kutani va sungula ku tshova koroni va dya.+ 2 Loko va vona leswi, Vafarisi va ku eka yena: “Languta! Vadyondzisiwa va wena va endla swilo leswi nawu wu nga pfumeliki leswaku swi endliwa hi Savata.”+ 3 Hiloko a ku eka vona: “Xana a mi hlayanga leswi Davhida a swi endleke loko a khomiwe hi ndlala ni vavanuna lava a a ri na vona?+ 4 Ndlela leyi a ngheneke ha yona endlwini ya Xikwembu kutani a dya swinkwa swa magandzelo,*+ hambileswi yena kumbe vanhu lava a a ri na vona a va nga pfumeleriwanga ku swi dya hikuva a swi fanele swi dyiwa hi vaprista ntsena.+ 5 Kumbe, xana a mi hlayanga eNawini leswaku hi Tisavata vaprista va tirha etempeleni hi Savata kambe va nga vi na nandzu?+ 6 Kambe ndza mi byela leswaku laha mi nga kona ku ni munhu wa nkoka swinene ku tlula tempele.+ 7 Hambiswiritano, loko a mi yi twisise kahle nhlamuselo ya tsalwa leri nge, ‘Ndzi lava tintswalo,+ ku nga ri gandzelo,’+ a mi ta va mi nga va gwevanga lava nga riki na nandzu. 8 Hikuva N’wana wa munhu i Hosi ya Savata.”+

9 Loko a suka endhawini yoleyo u ye esinagogeni* ya vona, 10 naswona kwalaho a ku ri ni wanuna loyi a a lamale voko!+ Leswi a va lava xo n’wi hehla ha xona, va vutisa Yesu va ku: “Xana swa pfumeleriwa ku hanyisa munhu hi Savata?”+ 11 A va hlamula a ku: “I mani eka n’wina loyi loko nyimpfu yakwe leyi nga yoxe yo wela emugodini hi Savata, a nga ta ka a nga yi humesi?+ 12 Xana munhu a hi wa nkoka swinene ku tlula nyimpfu? Kutani swa pfumeleriwa ku endla nchumu lowunene hi Savata.” 13 Yesu a byela wanuna yoloye a ku: “Ololoxa* voko ra wena.” Hiloko a ri ololoxa, kutani ri hola ri fana ni lerin’wana. 14 Kambe Vafarisi va huma kutani va boha kungu ro n’wi dlaya. 15 Loko Yesu a swi xiyile leswaku va lava ku n’wi dlaya, a suka kwalaho. Vo tala va n’wi landzela,+ kutani a va hanyisa hinkwavo, 16 kambe a va lerisa leswaku va nga byeli vanhu leswaku hi yena mani,+ 17 leswaku ku ta endleka leswi vuriweke hi muprofeta Esaya, loyi a nga te:

18 “Vonani! Nandza+ wa mina loyi ndzi n’wi hlawuleke, loyi ndzi n’wi rhandzaka, loyi ndzi n’wi amukeleke!+ Ndzi ta veka moya wa mina ehenhla ka yena+ naswona u ta endla leswaku matiko ma byi tiva kahle vululami. 19 A nge holovi+ na munhu hambi ku ri ku huwelela naswona ku hava loyi a nga ta twa rito ra yena etindleleni. 20 A nge ri tshovi rihlanga leri govekeke naswona a nge ri timi rivoni leri ketimelaka,+ ku fikela loko a endla leswaku ku va ni vululami. 21 Matiko ma ta tshemba vito rakwe.”+

22 Hiloko va n’wi tisela wanuna loyi a nga ni dimona naswona a nga bofu tlhelo mbheveve, kutani a n’wi hanyisa, wanuna loyi a sungula ku vulavula a tlhela a vona. 23 Mintshungu hinkwayo yi hlamala kutani yi sungula ku vutisana yi ku: “Xana loyi a hi N’wana wa Davhida?” 24 Loko Vafarisi va twa sweswo, va ku: “Muyisa loyi u hlongola madimona hi Belzebule,* hosi ya madimona.”+ 25 Leswi a a tiva leswi a va swi anakanya, a ku eka vona: “Mfumo wun’wana ni wun’wana lowu avaneke wu ta wa naswona muti wunʼwana ni wunʼwana kumbe ndyangu lowu avaneke a wu nge tiyi. 26 Hilaha ku fanaka, loko Sathana a hlongola Sathana, swi vula leswaku u avanile; xana mfumo wa yena wu nga tiya ke? 27 Ku tlula kwalaho, loko ndzi hlongola madimona hi Belzebule, xana vana va n’wina va ma hlongola hi mani? Hi yona mhaka leyi va nga ta mi avanyisa. 28 Kambe loko ku ri leswaku ndzi hlongola madimona hi moya wa Xikwembu, Mfumo wa Xikwembu se wu mi hundzile.+ 29 Kumbe, xana munhu a nga yi hlaserisa ku yini yindlu ya wanuna wa matimba kutani a teka nhundzu yakwe, loko a nga rhanganga hi ku n’wi boha? Endzhaku ka sweswo hi kona a nga tekaka leswi nga endlwini yakwe. 30 Loyi a nga yimiki na mina u lwa na mina naswona loyi a nga hlengeletiki na mina wa hangalasa.+

31 “Hikwalaho ka sweswo, ndzi ri eka n’wina, vanhu va ta rivaleriwa swidyoho ni swisandzu swa vona, kambe loyi a sandzaka moya wa Xikwembu a nge rivaleriwi.+ 32 Hi xikombiso, loyi a solaka N’wana wa munhu, u ta rivaleriwa;+ kambe loyi a solaka moya lowo kwetsima, a nge rivaleriwi, hambi sweswi kumbe enkarhini lowu taka.+

33 “Endlani murhi wu va lowunene ni mihandzu ya wona yi va leyinene kumbe mi endla murhi wu va lowu boleke ni mihandzu ya wona yi va leyi boleke, hikuva murhi wu tiviwa hi mihandzu ya wona.+ 34 Vana va timhiri,*+ xana mi ta vulavurisa ku yini swilo leswinene mi ri vaendli va leswo biha? Hikuva nomu wu vulavula leswi mbilu yi taleke swona.+ 35 Munhu lonene u humesa tinyiko letinene exumeni xakwe lexinene, kasi munhu loyi a endlaka leswo biha u humesa swilo swo biha exumeni xakwe lexi nga riki xinene.+ 36 Ndzi mi byela ntiyiso, swilo hinkwaswo leswi nga pfuniki nchumu leswi vanhu va swi vulaka va ta tihlamulela+ mayelana na swona hi Siku ra Vuavanyisi; 37 hikuva mi ta vuriwa lava lulameke hikwalaho ka marito ya n’wina naswona marito ya n’wina hi wona ma nga ta endla leswaku mi va ni nandzu.”

38 Hiloko vatsari ni Vafarisi van’wana va n’wi hlamula va ku: “Mudyondzisi, hi lava ku ku vona u endla singita.”+ 39 A va hlamula a ku: “N’wina xitukulwana xo homboloka ni lexi nga tshembekiki eka Xikwembu mi tshamela ku lava singita, kambe a ku na singita leri mi nga ta ri vona handle ka singita ra muprofeta Yonasi.+ 40 Tanihi leswi Yonasi a a ri ekhwirini ra nhlampfi leyikulu masiku manharhu ni vusiku bya kona,+ ni N’wana wa munhu u ta va ehansi ka misava masiku manharhu ni vusiku bya kona.+ 41 Vavanuna va le Ninivha va ta pfuxiwa swin’we ni xitukulwana lexi hi nkarhi wa ku avanyisiwa naswona va ta xi gweva, hikuva va hundzukile eka leswi Yonasi a swi chumayeleke.+ Kambe vonani, laha ku ni munhu wa nkoka ku tlula Yonasi.+ 42 Hosi ya xisati ya le dzongeni yi ta pfuxiwa swin’we ni xitukulwana lexi loko ku avanyisiwa naswona yi ta xi gweva, hikuva yi tile yi huma hi le kule swinene ku ta twa vutlhari bya Solomoni.+ Kambe vonani, laha ku ni munhu wa nkoka ku tlula Solomoni.+

43 “Loko moya lowu nga basangiki wu huma eka munhu, wu ya emananga wu famba wu lava ndhawu yo wisela eka yona, kambe wu nga yi kumi.+ 44 Kutani wu ku, ‘Ndzi ta tlhelela endlwini ya mina leyi ndzi humeke eka yona,’ naswona loko wu fika wu kuma yi nga ri na nchumu kambe yi kukuriwile yi basa yi tlhela yi sasekisiwa. 45 Hiloko wu famba wu ya landza mimoya yin’wana ya nkombo leyi hombolokeke ngopfu ku tlula wona, loko yi nghenile endzeni, yi namba yi tshama kona; kutani xiyimo xa munhu yoloye xi nyanya ku biha ku tlula eku sunguleni.+ Swi ta va tano hi xitukulwana lexi xo homboloka.”

46 Loko a ha vulavula ni mintshungu, mana wakwe ni vamakwavo+ a va yime ehandle va lava ku vulavula na yena.+ 47 Hiloko un’wana a ku eka yena: “Mana wa wena ni vamakwenu va yime hala handle, va lava ku vulavula na wena.” 48 A n’wi hlamula a ku: “I mani mana wa mina, naswona i vamani vamakwerhu?” 49 Hiloko a tlakusa voko a kombetela vadyondzisiwa vakwe, a ku: “Vonani! Mana wa mina ni vamakwerhu hi lava!+ 50 Hikuva loyi a endlaka ku rhandza ka Tata wa mina la nge tilweni, hi yena a nga makwerhu wa xinuna ni wa xisati ni manana eka mina.”+