Yeremiya
20 Kutani Paxahuru n’wana wa muprista Imere, loyi nakambe a a ri mulanguteri lonkulu loyi a rhangelaka endlwini ya Yehovha, a a yingiserile loko Yeremiya a profeta swilo leswi. 2 Hiloko Paxahuru a ba muprofeta Yeremiya a n’wi nghenisa etingoleni*+ leti a ti ri eGedeni ya le Henhla ya Benjamini, leyi a yi ri endlwini ya Yehovha. 3 Kambe hi siku leri landzelaka loko Paxahuru a tshunxa Yeremiya etingoleni, Yeremiya u n’wi byele leswi:
“Yehovha a nga ku thyanga vito ra Paxahuru, kambe u ku thye leri nge, Ku Chava Matlhelo Hinkwawo.+ 4 Hikuva Yehovha u ri, ‘Ndzi ta endla leswaku wena ni vanghana va wena hinkwavo mi chava, va ta dlayiwa hi banga ra valala va vona emahlweni ka wena;+ kutani tiko hinkwaro ra Yuda ndzi ta ri nyiketa evokweni ra hosi ya le Babilona, yi ta va yisa evuhlongeni eBabilona yi fika yi va dlaya hi banga.+ 5 Rifuwo hinkwaro ra muti lowu, xuma xa wona hinkwaxo, swilo swa wona hinkwaswo swa nkoka ni xuma hinkwaxo xa tihosi ta Yuda ndzi ta swi nyika valala va tona.+ Va ta swi phanga, va swi teka, va swi yisa eBabilona.+ 6 Loko ku ri wena Paxahuru ni vanhu hinkwavo lava tshamaka endlwini ya wena, mi ta ya evuhlongeni. U ta ya eBabilona u ya fela kona naswona u ta lahliwa kona ni vanghana va wena hinkwavo, hikuva u va profetele mavunwa.’”+
7 Yehovha, u ndzi khorwisile naswona ndzi khorwile.
U tikombise u ri ni matimba ku ndzi tlula naswona u ndzi hlurile.+
Ndzi hundzuke xihlekiso siku hinkwaro;
Un’wana ni un’wana wa ndzi hlekula.+
8 Hikuva nkarhi wun’wana ni wun’wana loko ndzi vulavula, ndzi fanele ndzi huwelela ndzi ku,
“Madzolonga ni ku lovisiwa!”
Hikuva rito ra Yehovha ri ndzi vangele ku rhukaniwa ni ku sandziwa siku hinkwaro.+
9 Hiloko ndzi ku: “A ndzi nge he vulavuli hi yena,
A ndzi nge he tlheli ndzi vulavula hi vito ra yena.”+
Kambe embilwini ya mina rito ra yena a ri fana ni ndzilo lowu pfurhaka lowu pfaleriweke emarhambyini ya mina,
A ndzi karhele ku tshama hi rona;
A ndzi nga ha swi koti ku miyela.+
“N’wi soleni; a hi n’wi soleni!”
Munhu un’wana ni un’wana loyi a endlaka onge wa ndzi tsakela a a lava ku ndzi endla swo biha:+
“Kumbexana u ta endla xihoxo xa vuphukuphuku,
Kutani hi nga n’wi hlula hi tirihisela eka yena.”
11 Kambe Yehovha a a ri na mina ku fana ni nhenha leyi nga chaviki nchumu.+
Hi yona mhaka leyi lava ndzi xanisaka va nga ta khunguvanyeka naswona a va nge ndzi hluli.+
Va ta khomisiwa tingana swinene, hikuva a va nge humeleli.
Ku tsongahatiwa ka vona hilaha ku nga heriki a ku nge rivariwi.+
12 Kambe wena Yehovha wa mavuthu, u kambela loyi a lulameke;
U vona mianakanyo leyi dzikeke* ni mbilu.+
Ndzi pfumelele ndzi vona loko u tirihisela eka vona,+
Hikuva ndzi ku byele mhaka ya mina leyi lavaka ku tengiwa.+
13 Yimbelelelani Yehovha! Dzunisani Yehovha!
Hikuva u ponise xisiwana evokweni ra lava endlaka swilo swo biha.
14 A ku rhukaniwe siku leri ndzi velekiweke ha rona!
Onge siku leri manana a ndzi velekeke ha rona ri nga ka ri nga katekisiwi!+
15 A ku rhukaniwe munhu loyi a tiseke mahungu lamanene eka tatana, a ku:
“U velekeriwe n’wana wa jaha!”
A n’wi endla a tsaka ngopfu.
16 Onge munhu yoloye a nga fana ni miti leyi Yehovha a yi heriseke a tlhela a nga tisoli.
Onge a nga twa xirilo nimixo kasi ninhlikanhi a twa mpfumawulo wa nyimpi.