Yeremiya
21 Yehovha u vulavule na Yeremiya, loko Hosi Sedekiyasi+ a rhume Paxahuru+ n’wana wa Malikiya leswaku a ya eka yena swin’we na Sofaniya+ n’wana wa muprista Maseya, va ta n’wi kombela va ku: 2 “Hi kombela u hi vutisela eka Yehovha hikuva Hosi Nebukadnetsara* wa le Babilona u lava ku lwa na hina.+ Kumbexana Yehovha u ta hi endlela wun’wana wa mitirho yakwe yo hlamarisa leswaku a hi tshika.”+
3 Yeremiya a va hlamula a ku: “Mi fanele mi byela Sedekiyasi mi ku, 4 ‘Yehovha Xikwembu xa Israyele u ri: “Matlhari lawa mi ma khomeke lawa mi lwaka ni hosi ya Babilona+ ha wona ni Vakalidiya lava nga le handle ka khumbi lava mi rhendzeleke, ndzi ta endla leswaku ma mi hlasela. Ndzi ta ma hlengeleta exikarhi ka muti lowu. 5 Mina ndzi ta lwa na n’wina+ hi voko leri tshambulutiweke leri nga ni matimba, hi ku hlundzuka lokukulu ni vukarhi.+ 6 Ndzi ta ba vaaki va muti lowu, vanhu ni swiharhi. Va ta dlayiwa hi ntungu* lowukulu.”’+
7 “‘“Endzhaku ka sweswo,” ku vula Yehovha, “ndzi ta nyiketa Hosi Sedekiyasi wa le Yuda ni malandza yakwe ni vanhu va muti lowu lava poneke ntungu, banga ni ndlala, eka Hosi Nebukadnetsara* wa le Babilona, eka valala va vona ni le ka lava lavaka ku va dlaya.+ Yi ta va dlaya hi banga. A yi nge va tweli vusiwana kumbe ku va komba tintswalo.”’+
8 “U fanele u byela vanhu lava u ku, ‘Yehovha u ri: “Ndzi veka ndlela ya vutomi ni ndlela ya rifu emahlweni ka n’wina. 9 Lava nga ta sala emutini lowu va ta dlayiwa hi banga, hi ndlala ni hi ntungu. Kambe un’wana ni un’wana loyi a tinyiketaka eka Vakalidiya lava mi rhendzeleke u ta ya emahlweni a hanya naswona u ta ponisa vutomi byakwe.”’+
10 “‘“Muti lowu wu ta weriwa hi khombo ku nga ri leswinene, hikwalaho ka leswi ndzi wu fularheleke,”+ ku vula Yehovha. “Wu ta nyiketiwa eka hosi ya le Babilona+ kutani yona yi ta wu hisa hi ndzilo.”+
11 “‘Eka n’wina vandyangu wa hosi ya Yuda: Yingisani leswi Yehovha a swi vulaka. 12 Wena yindlu ya Davhida, Yehovha u ri:
“Kombisani vululami mixo wun’wana ni wun’wana,
Mi ponisa loyi a kanganyisiwaka hi mukanganyisi,+
Leswaku vukarhi bya mina byi nga pfurhi ku fana ni ndzilo+
Byi hisa ku nga ri na loyi a byi timelaka
Hikwalaho ka swiendlo swa n’wina swo biha.”’+
13 ‘Ndzi lwa na wena, wena muaki wa le nkoveni,
Wena ribye ra tiko leri nga rivala,’ ku vula Yehovha.
‘Loko ku ri n’wina lava nge: “I mani loyi a nga ta rhelela a lwa na hina?
I mani loyi a nga ta hlasela laha hi tshamaka kona?”
‘Ndzi ta hisa khwati ra yena hi ndzilo,
Wu ta hisa swilo hinkwaswo leswi nga ematlhelo ka yena.’”+