Tihosi Ta Wumbirhi

18 Hi lembe la wunharhu la ku fuma ka Oxeya+ n’wana wa Elayi hosi ya Israyele, Hezekiya+ n’wana wa Akazi+ hosi ya Yuda a ve hosi. 2 A a ni 25 wa malembe nkama a nga va hosi naswona a fume 29 wa malembe aYerusalema. Vito la mamani wa yena a ku li Abi* n’wana wa Zakariya.+ 3 A tame a yendlela Yehovha minchumu yayinene,+ ku fana na Davhida vhovho wa yena.+ 4 Hi yena a nga susa tindhawu ta ku tlakuka+ leti a va gandzela ka tona, a tlhela a tshovelela ni mapilari lawa a va ma yendle swikwembu, a tsema ni mhandzi ya Axera.*+ A tlhele a fayetela ni xifaniso xa nyoka ya kobre lexi a xi yendliwe hi Moxe;+ hikusa anze ka nkama wolowo Vayisrayele a va gandzela xifaniso xolexo, lexi a va xi vitana Nehuxitani.* 5 A a tshemba Yehovha+ Xikwembu xa Israyele; a ku nga na hosi ya ku fana na yena ka tihosi hinkwatu ta Yuda, hambi leti nga fuma na yena a nge se va hosi, ni leti nga fuma na yena se a file. 6 A tshembeke ka Yehovha+ naswona a nga mu tshikanga. A yingise minawu leyi Yehovha a nga nyika Moxe. 7 Yehovha a a li na yena naswona hinkwaku lomu a a ya kona a a yendla minchumu hi wutlharhi. A djikele hosi ya Asiriya a yala ku yi tirhela.+ 8 A tlhele a hlula Vafilista+ anze Gaza ni ka tindhawu leti nga kusuhi, ku sukela ka yindlo leyi lava a va vonelela doropa a va li ka yona anze ka madoropa lawa ma nga ni mimuru ya ku tiya.

9 Hi lembe la wu 4 la ku fuma ka Hosi Hezekiya, ku nga lembe la wu 7 la ku fuma ka Oxeya+ n’wana wa Elayi hosi ya Israyele, Xalmanezeri hosi ya Asiriya a tile a fika a rhendzela doropa la Samariya.+ 10 Vaasiriya va game va li teka+ doropa leli loko se ku hele malembe manharhu; leswo swi yendleke hi lembe la wu 6 la ku fuma ka Hezekiya, ku nga lembe la wu 9 la ku fuma ka Oxeya hosi ya Israyele. 11 Se hosi ya Asiriya yi teka Vayisrayele yi va yisa wukaraweni+ aAsiriya, yi fika yi va veka aAla ni ka nambu wa Gozani lowu nga aAbori ni le ka madoropa ya Vameda.+ 12 Leswi swi yendleke hi mhaka ya leswi a va nga mu yingisi Yehovha Xikwembu xa vona, kambe a va tshamela ku tshika ntwananu wa yena ni hinkwaswu leswi Moxe mutirheli wa Yehovha a nga va byela swona.+ A va yingisanga nchumu.

13 Hi lembe la wu 14 la ku fuma ka Hosi Hezekiya, Senakeribi hosi ya Asiriya+ a tile a ta hlasela madoropa hinkwawu ya Yuda lawa ma nga ni mimuru ya ku tiya a gama a ma hlula.+ 14 Hezekiya hosi ya Yuda a rhuma vanhu va ya Lakixi ka hosi ya Asiriya va fika va ku: “Ni djohile. U nga ni dumeli, suka lani ka ndhawu ya mina, ni ta ku nyika hinkwaswu leswi u swi lavaka.” Se hosi ya Asiriya yi byela Hezekiya hosi ya Yuda swaku a yi nyika 10.260 wa makilu* ya prata ni 1.026 wa makilu* ya woru. 15 Kutani Hezekiya a mu nyika prata hinkwalu leli a li li ka yindlo ya Yehovha ni leli a li li ka yindlo ya wuhosi.+ 16 Hi nkama wolowo Hezekiya hosi ya Yuda a tlhela a susa* swipfalu swa tempele+ ya Yehovha ni timhandzi ta kona leswi yena a a swi namarhete woru,+ a swi nyika hosi ya Asiriya.

17 Hosi ya Asiriya yi gama yi rhuma Tartani,* Rabisarisi* na Rabuxaki,* swaku va suka Lakixi+ va ya Yerusalema+ ka Hosi Hezekiya na va ni masonchwa ya manyingi. Va ye Yerusalema va fika va nyima kusuhi ni ndlela ya mati leyi a yi sukela ka ndhawu ya ku hlayisa mati leyi kumekaka henhla; ndhawu leyi a yi li ka ndlela leyi yaka ka masimu ya lweyi a a hlampsa mpahla.+ 18 Nkama va nga fika va vitana hosi, ku hume Eliyakimi+ n’wana wa Hilikiya lweyi a a hlayisa ndjangu wa hosi, na Xebina+ lweyi a a li sekretariyu* na Yowa n’wana wa Azafi lweyi a a tsala leswi a swi yendleka, va ya tlhangana na vona.

19 Rabuxaki a va byela a ku: “Ni kombela mi ya byela Hezekiya mi ku: ‘Hosi leyikulu, hosi ya Asiriya yi li: “Kasi wo tshemba yini?+ 20 U li: ‘Na swi tiva ku lwa nyimpi,’ kambe a wu tivi nchumu. Kasi i ntxini u xi tshembaka u zaka u tiyela ku ni djikela?+ 21 U tshemba ku tiya hi lihlanga la ku tshoveka, ku nga tiko la Gibita,+ la ku loko munhu a tiya hi lona la mu tlhava li gama li nghena ka voko la yena? Faru hosi ya Gibita a fana ni lihlanga lolelo ka hinkwavu lava va mu tshembaka. 22 Loko mi ku: ‘Hi tshemba Yehovha Xikwembu xa hina,’+ mo tihembela a nga ta mi pfuna, kasi a hi Hezekiya lweyi a nga susa+ tindhawu ta ku tlakuka leti a ku gandzeliwa ka tona ni maaltari, a tlhela a byela vanhu va Yuda ni va Yerusalema a ku: ‘Mi fanele mi gandzela ka altari leyi, leyi nga Yerusalema’?”’+ 23 Se a hi voneni swaku ku ta ganya mani ka wena ni hosi ya mina, ku nga hosi ya Asiriya. Ni ta ku nyika 2.000 wa makavhalu ni ta vona swaku kumbe u ta va kuma kwini vanhu lava va nga ta ma fambisa.+ 24 U nga swi kota ku hlula hambi ko va murhangeli mun’we wa masonchwa lweyi a nga mutirhi wamutsongo wa hosi ya mina, kuve wa ha tshemba tiko la Gibita swaku li ku nyika tinyolo* ta nyimpi ni lava va fambisaka makavhalu ke? 25 Kasi a hi Yehovha lweyi a nga ni pfumelela swaku ni hlasela ndhawu leyi ni yi helisa? Yehovha a ni byelile a ku: ‘Famba u ya hlasela tiko leli u li helisa.’”

26 Kutani Eliyakimi n’wana wa Hilikiya na Xebina+ na Yowa va byela Rabuxaki+ va ku: “Hi kombela u vulavula na hina hi lirimi la Xiaramu,*+ hikusa ha swi twa; u nga vulavuli na hina hi lirimi la Vayuda hikusa lava va nga henhla ka muru va swi twa.”+ 27 Kambe Rabuxaki a va hlamula a ku: “Kasi a hosi ya mina yi yo ni rhuma ku ta vulavula ni hosi ya n’wina na n’wina ntsena? Phela yi ni rhume swaku ni ta vulavula ni vanhu lava va nga henhla ka muru, lava vona na n’wina mi nga ta dla chaka* la n’wina mi tlhela mi phuza ni mixixito ya n’wina.”

28 Se Rabuxaki a sekeleka, a huwelela hi lirimi la Vayuda a ku: “Twanani leswi hosi leyikulu, ku nga hosi ya Asiriya yi swi hlayaka.+ 29 Yona yi li: ‘Mi nga xengiwi hi Hezekiya, hikusa a nga ta swi kota ku mi ponisa ka mina.+ 30 Naswona mi nga pfumeli loko Hezekiya a mi byela swaku mi tshemba Yehovha, hi ku hlaya swaku: “Yehovha a ta hi ponisa, hosi ya Asiriya a yi nge li hluli doropa leli.”+ 31 Mi nga mu yingisi Hezekiya hikusa hosi ya Asiriya yi li: “Yendlani ku rhula na mina mi tinyikela ka mina, se hinkwenu mi ta dla mihandzu ya minsinya ya n’wina ya mawuvha ni mihandzu ya minsinya ya n’wina ya makuwa, mi tlhela mi phuza ni mati ka swihlovo swa n’wina, 32 anze ni ta ni mi yisa ka tiko leli fanaka ni tiko la n’wina,+ ni ta mi yisa ka tiko leli nga ni trigu ni vhinyu la nyuwani, tiko leli nga ni pawu ni masimu ya mawuvha, ni tiko la minsinya ya mawolivhera ni leli nga ni wulombe. Se mi ta hanya a mi nga ta fa. Mi nga mu yingisi Hezekiya, hikusa o mi xenga loko a ku: ‘Yehovha a ta hi ponisa.’ 33 Indjhe swikwembu swa matiko man’wani swi swi kotile ku ponisa matiko ya swona ka hosi ya Asiriya? 34 Swi kwini swikwembu swa Amati+ na Arpadi? Swi kwini swikwembu swa Sefaravhayimi,+ swa Ena ni swa Ivha? Swi swi kotile ku ponisa doropa la Samariya ka mina?+ 35 Xi kona xikwembu ka swikwembu hinkwaswu swa matiko lawa, lexi nga kota ku ponisa vanhu va xona ka mina? Se n’wina mi pimisa swaku Yehovha a ta ponisa Yerusalema ka voko la mina ke?”’”+

36 Kambe vanhu va miyela va ku whii, hikusa hosi a yi va byelile yi ku: “Mi nga mu hlamuli.”+ 37 Se Eliyakimi n’wana wa Hilikiya lweyi a a hlayisa ndjangu wa hosi, na Xebina lweyi a a li sekretariyu na Yowa n’wana wa Azafi lweyi a a tsala hinkwaswu leswi a swi yendleka, va ya ka Hezekiya na va handzule mpahla ya vona, va fika va mu byela hinkwaswu leswi Rabuxaki a nga swi hlaya.