Mahungu Ya Ku Tsakisa Ya Ku Tsaliwa Hi Luka

18 Kutani Yesu a va byela xifaniso lexi kombisaka lisima la ku khongela nkama ni nkama naswona va nga godoli,+ 2 a ku: “Ka doropa lin’wani a ku ni muyavanyisi lweyi a a nga xi hloniphi Xikwembu naswona a a nga va hloniphi vanhu. 3 Ka doropa lolelo, a ku ni wansati wa ku feliwa hi nuna lweyi a a tshamela ku ya ka muyavanyisi a ku: ‘Ni tshembisi swaku mhaka ya mina ni lweyi a nga ni mangalela yi ta thethiwa kahle.’ 4 Swi teke nkama wa ku leha na a yala ku pfuna wansati lweyi, kambe hi ku famba ka nkama a tibyele leswi: ‘Hambileswi ni kalaka ni nga xi hloniphi Xikwembu kumbe vanhu, 5 kambe, hi mhaka leswi wansati lweyi a tshamelaka ku ni karhata, ni ta yi thetha kahle mhaka ya yena, leswaku a nga ha ti a ta ni tlhanyisa nhloko.’”+ 6 Se Hosi yi ku: “Mi swi vonile leswi muyavanyisi a nga swi vula hambileswi a kalaka a nga tshembekanga? 7 Se ina ka, Xikwembu a xi nge va lehiseli mbilu lava xi nga va langa, ku nga lava khongelaka ka xona wusiku ni nhlikanhi,+ xi tlhela xi yendla swaku va yavanyisiwa kahle ke?+ 8 Na mi byela: Xi ta yendla swaku va hantla va yavanyisiwa kahle. Kambe loko N’wana wa munhu a fika, indjhe a ta li kuma lipfumelo la ku fana ni lolelo lani misaveni?”

9 A tlhele a va byela xifaniso lava a va tivona na va lulamile naswona a va va vonela hansi van’wani, a ku: 10 “A ku ni vavanuna vambirhi lava nga ya tempeleni va ya khongela, mun’we a a li Mufarisi kasi mun’wani a a li muhakelisi wa rhesa.* 11 Se Mufarisi a nyima, a sungula ku khongela hi ndzeni ka mbilu a ku: ‘Xikwembu xa mina, na ku khensa hileswi ni kalaka ni nga fani ni vanhu van’wani, lava va nga vayivi, lava yendlaka swa ku kala swi nga lulamanga, va ku mbuyeta, hambi ni muhakelisi lweyi wa rhesa a ni fani na yena. 12 Ni titsona swakudla kambirhi hi vhiki; ni nyikela swa wukhume la swilo hinkwaswu leswi ni swi kumaka.’+ 13 Kambe muhakelisi wa rhesa a a nyimile hi le kule, hambi ku txuvuka matilweni a a nga swi naveli, naswona a a tiba xifuva a ku: ‘Xikwembu xa mina, ni tweli wusiwana hikusa ni mudjohi.’+ 14 Na mi byela: Wanuna lweyi a muke na a li wa ku lulama swinene ka Xikwembu ku tlula Mufarisi.+ Hikusa lweyi a titlakusaka a ta danisiwa, kambe lweyi a tivekaka hansi a ta tlakusiwa.”+

15 Kutani vanhu va mu tisela swivanani leswaku a swi tlhateka mavoko a tlhela a swi katekisa, kambe nkama vadjondzisiwa va nga swi vona va sungule ku kawuka vapsali va swona.+ 16 Kambe Yesu a vitana swivanani a ku: “Swi tshikeni swivanani leswo swi ta ka mina; mi nga swi siveli hikusa Mfumu wa Xikwembu i wa lava fanaka na swona.+ 17 Ni mi byela ntiyiso: Lweyi a kalaka a nga wu yamukeli Mfumu wa Xikwembu ku fana ni xin’wanani a nge ngheni ka wona.”+

18 Se murhangeli mun’wani a mu vutisa a ku: “Mudjondzisi Wamunene, ni fanele ni yendla yini swaku ni kuma wutomi la ku kala li nga heli?”+ 19 Yesu a mu hlamula a ku: “Hi mhaka muni u ni vitana wamunene? A ku na munhu wamunene loko ku nga li Xikwembu.+ 20 Wa yi tiva minawu leyi nge: ‘U nga tshuki u mbuyeta,+ u nga tshuki u dlaya,+ u nga tshuki u yiva,+ u nga tshuki u fakaza swa mavunhwa,+ hlonipha papayi wa wena ni mamani wa wena.’”+ 21 Se a ku: “Minawu leyi hinkwayu na yi yingisa ku sukela wutsongwanini.” 22 Nkama Yesu a nga swi twa, a ku: “U choteliwa hi nchumu xin’we: Xavisa minchumu hinkwayu leyi u nga na yona, u teka male ya kona u yi nyika swisiwana, kutani u ta va ni tshomba matilweni, u gama u ta, u ta ni landzela.”+ 23 Nkama a nga twa leswo, a karhateke ngopfu, hikusa a a ganye hintamu.+

24 Yesu a mu txuvuka kutani a ku: “Swi ta va karhatela ndjhani lava nga ni male ku nghena ka Mfumu wa Xikwembu!+ 25 Swi vevuka hintamu swaku kamela yi hundza ka mbhovo wa nayethi ku tlula ku va munhu wa ku ganya a nghena ka Mfumu wa Xikwembu.”+ 26 Lava nga twa leswo va ku: “Indjhe a kona lweyi a nga ta ponisiwa?”+ 27 A va hlamula a ku: “Leswi tsandzaka vanhu, swa koteka ka Xikwembu.”+ 28 Kambe Pedru a ku: “Phela hi tshike minchumu ya hina hi ku landzela.”+ 29 Yesu a ku: “Ni mi byela ntiyiso: A ku na munhu lweyi a nga tshika yindlo, kumbe nsati, kumbe vamakwavu, kumbe vapsali, kumbe vana hi mhaka ya Mfumu wa Xikwembu+ 30 lweyi swoswi a nga ta kala a nga kumi swa ku tala, se ka nkama lowu taka a ta kuma wutomi la ku kala li nga heli.”+

31 Se a teka lava 12 a ya na vona tlhelweni, a fika a ku: “Phela hi ya Yerusalema, naswona swilo hinkwaswu leswi vaprofeta va nga swi tsala hi N’wana wa munhu swi ta hetiseka.+ 32 Hi xikombiso, a ta nyikeliwa ka vanhu va matiko+ naswona va ta tlanga hi yena,+ va mu rhuketela va tlhela va mu pshitela marhi.+ 33 Loko se va mu bile, va ta mu dlaya,+ kambe a ta pfuxiwa hi siku la wunharhu.”+ 34 Kambe a va wu kumanga ntsutsu wa mhaka; a va twisisanga nchumu hikusa mhaka leyi a yi li xihundla.

35 Nkama Yesu a nga fika kusuhi ni le Yeriko, a ku ni wanuna lweyi a nga fa matihlo naswona a a tshame kusuhi ni ndlela a kombela zimola.+ 36 Se loko a twa vanhu na va hundza, a vutisa swaku ku humelela yini. 37 Va mu byela va ku: “Ku hundza Yesu wa le Nazareta!” 38 Kutani a huwelela a ku: “Yesu, N’wana wa Davhida, ni tweli wusiwana!” 39 Se lava a va li phambheni va sungula ku mu kawuka va mu byela swaku a miyela, kambe a tama a huwelela hintamu swinene a ku: “N’wana wa Davhida, ni tweli wusiwana!” 40 Kutani Yesu a nyima, a va rhuma swaku va mu tisela wanuna lweyi. Nkama a nga fika, Yesu a mu vutisa a ku: 41 “U lava ni ku yendlela yini?” Yena a ku: “Hosi, yendla swaku ni tlhela ni vona.” 42 Se Yesu a ku: “Tlhela u vona; lipfumelo la wena li ku hanyisile.”+ 43 Kutani hi xihantla a sungula ku vona, se a sungula ku mu landzela,+ na a dzunisa Xikwembu. Nkama vanhu va nga vona leswi nga yendleka, na vona va dzunisa Xikwembu.+