Vaheberu
2 Hi mhaka leyo, hi fanele hi swi nyika lisima leswi hi nga swi twa,+ leswaku hi nga tshuki hi huma ndleleni.+ 2 Hikusa loko leswi nga vuliwa hi tintsumi+ swi tshembeka naswona lweyi a tlulaka nawu a tlhela a nga yingisi a khatisiwa hi ku lulama,+ 3 se hina ke, hi nga ponisa ku yini loko hi nyenya ku ponisiwa kakukulu?+ Hikusa Hosi+ ya hina hi yona yi nga sungula yi vulavula hi kona naswona lava nga yi twa va vule swaku i ntiyiso. 4 Xikwembu na xona xi nyikele wumboni hi ku tirhisa masingita, swilo swa ku hlamalisa, mintirho ya matimba ya ku hambanahambana+ ni moya wa ku kwetsima lowu xi nga wu yavela hi ku ya hi ku rhandza ka xona.+
5 Hikusa misava leyi taka leyi hi vulavulaka hi yona a xi yi vekanga hansi ka tintsumi.+ 6 Kambe mboni yin’wani yi vulile ka ndhawu yin’wani yi ku: “O va yini munhu swaku u pimisa hi yena, kumbe n’wana wa munhu swaku u mu hlayisa?+ 7 U mu yendle a va hansinyana ka tintsumi; u mu nyike ku dzuneka ni ku hlonipheka ni matimba ya ku fuma swilo leswi nga yendliwa hi mavoko ya wena. 8 Hinkwaswu u swi veke hansi ka minkondzo ya yena.”+ Ku va Xikwembu xi veke swilo hinkwaswu hansi ka yena+ swi vula swaku a xi siyanga ni nchumu ni xin’we na xi nga li hansi ka yena.+ Kambe swoswi a hi se swi vona swilo hinkwaswu na swi li hansi ka yena.+ 9 Kambe Yesu lweyi a a li hansinyana ka tintsumi swa nkamanyana,+ ha mu vona na a tlhatekiwe harhi* ya ku phatima yi tlhela yi hlonipheka hileswi a nga fa,+ leswaku hi timpsalu tatikulu ta Xikwembu a ta nampsa lifu hi mhaka ya vanhu hinkwavu.+
10 Hikusa a swi fanela swaku Xikwembu, lexi swilo hinkwaswu swi nga yendleliwa xona naswona swi nga yendliwa hi xona, xi yendla leswaku Murhangeli Wamukulu wa ku ponisiwa+ ka vona a va wa ku hetiseka* hi ku xaniseka,+ hi ku lava ku tisa vana va vanyingi ku kwetsimeni.*+ 11 Hikusa lweyi a kwetsimisaka ni lava kwetsimisiwaka+ va huma ka papayi mun’we;+ kutani a nga dani ku va vitana vamakwavu,+ 12 hilani a vulaka hi kona a ku: “Ni ta vula vito la wena ka vamakwerhu; ni ta ku dzunisa hi lisimu xikarhi ka nhlengeletanu.”+ 13 A tlhela a ku: “Ni ta tshemba yena.”+ Naswona a li: “Yingisani! Hi mina lweyi, xikan’we ni vana lava Yehovha a nga ni nyika vona.”+
14 Se leswi “vana vavatsongo” va nga vanhu lava nga ni ngati ni nyama, na yena a ve munhu lweyi a nga ni ngati ni nyama,+ leswaku hi ku fa ka yena a ta helisa lweyi a nga ni matimba ya ku vanga lifu,+ ku nga Davulosi,+ 15 ni leswaku a ta chunsa hinkwavu lava a va li wukaraweni wutomi la vona hinkwalu hi mhaka ya ku chava lifu.+ 16 Hikusa hikakunene, a hi tintsumi leti a ti pfunaka, kambe a pfuna vana* va Abrahamu.+ 17 Kutani a boheke ku fana ni “vamakwavu” hi tindlela hinkwatu,+ leswaku a ta va muprista wamukulu, wa timpsalu ni wa ku tshembeka ka swilo leswi khumbaka Xikwembu, leswaku a ta nyikela gandzelo+ leli yendlaka swaku vanhu va rivaleliwa swidjoho.+ 18 Leswi na yena a nga xaniseka nkama a nga ringiwa,+ wa swi kota ku pfuna lava ringiwaka.+