Mintirho Ya Vapostolo
16 Kutani Pawulo a fika Derbi; se nkama a nga suka kolanu a ye Lixtra.+ Kona a ku ni mudjondzisiwa lweyi a vitaniwaka Timotiya;+ mamani wa yena a a li Muyuda lweyi a a li mupfumeli; kambe papayi wa yena a a li Mugriki. 2 Vamakwavu ka bandla la Lixtra ni la Ikoniya a va vulavula kahle hi Timotiya. 3 Se Pawulo a vule swaku a a navela ku famba na yena, kutani a mu teka a mu tsema nsuvu* hi mhaka ya Vayuda lava a va tshama ka tindhawu toleto,+ hikusa hinkwavu a va swi tiva swaku papayi wa yena a a li Mugriki. 4 Ka madoropa lawa a va hundza hi ka wona, a va nyika mabandla ya kolanu minawu leyi nga bohiwa Yerusalema hi vapostolo ni madoda swaku yi landzeliwa.+ 5 Kutani mabandla a ma tiyisiwa lipfumelo naswona a ma ya ma tala siku ni siku.
6 Va tlhele va hundza hi le Frijiya ni le ka tiko la Galatiya,+ hikusa moya wa ku kwetsima wu va tsimbisile ku chumayela rito ka provhinsiya la Aziya. 7 Na va li aMisiya, va yendle minzamu ya ku ya Bitiniya+ kambe Yesu a va tsimbisile hi ku tirhisa moya wa ku kwetsima.* 8 Se va suka* Misiya va ya Trowasi. 9 Ka wusiku lolelo, Pawulo a vone* wanuna wa le Makedoniya hi ndlela ya singita na a nyimile a mu kombela a ku: “Tani Makedoniya u ta hi pfuna.” 10 Nkama Pawulo a nga gama ku vona* leswo, hi ye aMakedoniya; hi swi twisisile swaku Xikwembu xi lava hi ya va chumayela mahungu ya ku tsakisa.
11 Se hi suke Trowasi hi boti hi famba hi ya fika Samotraka, kutani hi mundzuku ka kona hi ye Neyapolisi. 12 Nkama hi nga suka kona, hi ye aFilipiya,+ ku nga doropa leli a li fumiwa hi Varoma naswona i doropa la lisima hintamu la Makedoniya. Hi fike hi tshama masikunyana ka doropa lolelo. 13 Hi siku la Savata hi hume doropeni hi ya tlhelweni ka nambu, lomu a hi pimisa swaku ku ni ndhawu ya ku khongela ka yona; hi fike hi tshama, hi gama hi sungula ku vulavula ni vavasati lava a va hlengeletanile kolanu. 14 Se wansati mun’wani lweyi a vitaniwaka Lidiya, muxavisi wa mpahla ya ku durha* wa doropa la Tiyatira,+ lweyi a a gandzela Xikwembu, a a yingisela; kutani Yehovha* a pfula mbilu ya yena hi ku helela swaku a kholwa leswi Pawulo a a swi vula. 15 Nkama Lidiya ni ndjangu wa yena va nga tsakamisiwa,+ a te: “Loko mi vona swaku ni munhu wa ku tshembeka ka Yehovha,* a hi fambeni kaya ka mina.” Kutani a hi sindzisa swaku hi famba na yena.
16 Siku lin’wani, loko hi ya lomu a ku khongeliwa kona, hi tlhangane ni mutirhi mun’wani wa xisati lweyi a a ni dimoni,+ a a va ganyisa hintamu lava va nga mu thola, hi ku vhumbata hi swa nkama lowu taka. 17 Se ntombhi leyi, a yi ku kho yi hi landzelela na yi huwelela yi ku: “Vavanuna lava i vatirheli va Xikwembu Xa Ku Tlakuka Hintamu+ naswona va mi djondzisa ndlela ya ku ponisiwa.” 18 A yi tshamela ku yendla leswo masiku ya manyingi se Pawulo a za a karhala a gama a ndzuluka a byela dimoni lolelo a ku: “Hi vito la Yesu Kreste ni li ka wena: Huma ka ntombhi leyi.” Se li huma hi nkama wolowo.+
19 Nkama lava va nga thola ntombhi leyi va nga vona swaku va heleliwe hi negosiyu* leyi a va yi tshemba,+ va khome Pawulo na Silasi va va kokovisela ka xitshungu* va va yisa wuhosini.+ 20 Va va yise ka tihosi ta doropa va fika va ku: “Vavanuna lava, va vanga mpfilumpfilu ka doropa la hina.+ I Vayuda 21 naswona va djondzisa vanhu swihena leswi hina Varoma hi yalisiwaka ku swi yamukela kumbe ku hanya hi swona.” 22 Se vanhu va djikela Pawulo na Silasi; kutani tihosi ta doropa ti rhumela leswaku va handzuleliwa timpahla ta vona va tlhela va biwa hi tinhonga.+ 23 Na se va va fumbutelile, va va pete djele, va gama va byela muvoneleli leswaku a va vonelela swaku va nga baleki.+ 24 Leswi a nga kuma nawu wolowo, a va peta ka djele la le xikarhi a tlhela a va boha minenge ka swigodo.
25 Kambe xikarhi ka wusiku, Pawulo na Silasi a va li ku khongeleni ni le ku dzuniseni ka Xikwembu hi tinsimu+ funtshi swib’ochwa leswin’wani a swi va twa. 26 Se misava yi suketana yi tsekatseka hintamu, na lona djele li sungula ku tsekatseka. Kutani swipfalu hinkwaswu swi pfuleka hi nkama wolowo naswona machini lawa a va bohiwe hi wona ma tlhantlheka.+ 27 Nkama muvoneleli wa djele a nga pfuka wurhongweni a vona swipfalu swa djele na swi pfulekile, a tlomula xipada xa yena a lava ku tidlaya hikusa a a pimisa swaku swib’ochwa swi balekile.+ 28 Kambe Pawulo a huwelela a ku: “U nga tidlayi, hi kona hinkwerhu!” 29 Se nkama a nga kombela swaku va mu tisela swa ku vona hi swona, a tsutsume a ya nghena ndzeni ka djele lomu Pawulo na Silasi a va li kona, a fika a khizama na a chava a tlhela a rhurhumela. 30 A va humese handle a ku: “Ni fanele ni yendla yini swaku ni ponisiwa?” 31 Va mu hlamula va ku: “Pfumela ka Hosi Yesu kutani u ta ponisiwa, wena ni ndjangu wa wena.”+ 32 Se va mu chumayela rito la Yehovha* yena ni ndjangu wa yena. 33 Kutani muvoneleli a famba na vona wusiku lolelo ka ndhawu leyi a nga fika a va hlampsa swilondza swa vona. Se yena ni ndjangu wa yena va vhela va tsakamisiwa.+ 34 A game a famba na vona kaya ka yena, a fika a va lunghiselela swakudla a swi veka mezeni; yena ni ndjangu wa yena a va tsakile swinene hileswi va nga pfumela ka Xikwembu.
35 Nkama li nga xa, tihosi ta doropa ti rhume vavoneleli swaku va ya ku: “Humesani vavanuna lavo.” 36 Se muvoneleli wa djele a byela Pawulo marito ya vona a ku: “Tihosi ta doropa ti rhume vanhu swaku va ta mi humesa. Se humani mi tifambela hi ku rhula.” 37 Kambe Pawulo a ku: “Hambileswi hi nga Varoma, va hi bile phambheni ka vanhu na hi nga na nandzu*+ va tlhela va hi peta djele. Kambe swoswi va lava ku hi humesa na hi nga voniwi hi munhu. A hi nge swi pfumeli leswo! A va ti vona hi voxe va ta hi humesa.” 38 Nkama vavoneleli va nga byela tihosi ta doropa marito lawa, ti sungule ku chava hikusa a ti nga swi tivi swaku vavanuna lava i Varoma.+ 39 Se ti va yela ti ya kombela ku rivaleliwa naswona loko se ti va humesile, ti va kombela swaku va huma doropeni. 40 Nkama Pawulo na Silasi va nga huma djele, va ye kaya ka Lidiya. Va fike va vona vadjondzisiwa kutani va va tiyisa+ va gama va famba.