“Fambani Mi Ya Djondzisa Vanhu . . . Leswaku Va Va Vadjondzisiwa”

1-6. Nyikela xikombiso lexi kombisaka swaku Timboni ta Yehovha ti tinyimisele ku chumayela ka swiyimu hinkwaswu.

REBECCA, lweyi a nga Mboni ya Yehovha lweyi a tshamaka aGana, a a rhandza ku chumayela loko a li xikolweni. Minkama hinkwayu a a tshama ni mabuku ya hina ka paxta, se hi nkama wa intervhalu a a lavetela tindlela ta ku chumayela lava a a djondza na vona. Rebecca a sungule swidjondzo swa swinyingi swa Bibele.

² A África, aMadagascar kusuhi ni lwandle, nuna na nsati lava nga vapfuli va ndlela, siku ni siku a va famba 25 wa makilometru na ku hisa leswaku va ya chumayela vanhu lava nga kule va tlhela va djondza na vona Bibele.

³ Vamakwerhu va Paraguai ni va matiko man’wani lama fikaka 15, va tirhe xikan’we swaku va yaka boti leli yenelaka 12 wa vanhu, leswaku va kota ku chumayela vanhu lava tshamaka kusuhi ni minambu ya Paraguai ni Paraná. Hi ku tirhisa boti lolelo vamakwerhu lava a va chumayela ka tindhawu leti a swi nga ta koteka kuva ti fikeleliwa.

⁴ Timboni ta Yehovha ta Alasca a ti talisa ku tirhisa nkama wa ku hisa swaku ti chumayela. Loko ku nga titimeli hintamu naswona hi nkama lowu maboti ma tisaka vanhu lava taka hi ka matiko man’wani, Timboni ta Yehovha a ti veketela mabuku hi tirimi ta ku hambanahambana kusuhi ni lomu maboti ma fikelaka kona. Naswona ka ndhawu leyi, xin’wani lexi a xi pfuna i kuva ku tirhisiwa vhiyawu swaku ku ya chumayeliwa vanhu lava tshamaka ka tindhawu ta kule. Leswo swi yendle swaku mahungu ya ku tsakisa ma fikelela vanhu lava vitaniwaka Malewuti, Matapaxka, Matsimshian ni Matlingit.

⁵ Larry, lweyi a tshamaka Texas, aEstados Unidos, a a tolovela ku chumayela lani a a tshama kona lani ku hlayisiwaka vanhu va ku guga. Hambileswi a fambaka hi xikarinyani hi mhaka ya leswi a nga limala, Larry a a tshama na a khomekile. A a chumayela vanhu mahungu ya ku tsakisa ya Mfumu, a tlhela a va byela hi ntshembo lowu a nga na wona wa ku siku lin’wani Mfumu wa Xikwembu wu ta yendla swaku a tlhela a kota ku famba. — Esa. 35:5, 6.

⁶ Ntlawa wun’wani wa Timboni ta Yehovha lowu a wu ya ka asembleya a Mianmar, wu hete masiku manharhu na wu yendza hi boti. Leswi Vamakwerhu lava a va swi lava hintamu ku chumayela vanhu, va teke mabuku swaku va nyika lava a va yendza na vona ka boti. Hinkwaku lomu boti a li nyima kona vamakwerhu lava a va xika va ya chumayela vanhu handle va tlhela va va nyika mabuku. Se, loko va vuya a va fika va kuma swaku ku khwele vanhu van’wani ka boti, se na vona va va chumayela.

 7. Vanhu va Yehovha va yendla yini swaku va chumayela vanhu mahungu ya ku tsakisa naswona hi xini xikongomelo xa vona?

⁷ Swikombiso leswi hinkwaswu swi kombisa swaku Timboni ta Yehovha amisaveni hinkwayu ti nyikela “wufakazi leli tiyeke hi Mfumu wa Xikwembu”. (Min. 28:23) Ti famba hi munti ni munti, ti bula ni vanhu ndleleni, ti tsala makarta ti tlhela ti vulavula ni vanhu hi ku tirhisa telefoni. Ti tinyimisele ku chumayela vanhu hi Mfumu wa Xikwembu lomu swibombeni kumbe hi nkama wa intervhalu antirhweni. Machumayelelo ma nga ha hambana kambe xikongomelo i xin’we, ku nga ku chumayela mahungu ya ku tsakisa hinkwaku lomu ku nga ni vanhu. — Mat. 10:11.

8, 9. a) Hi mhaka muni ku kula ka ntirho wa ku chumayela swi hlamalisa hintamu? b) Hi xini xivutiso lexi hi nga tivutisaka xona, naswona hi fanele hi yendla yini swaku hi kuma nhlamulu?

⁸ Se wena ke, u mun’we wa lava chumayelaka mahungu ya ku tsakisa ka matiko lawa ma tlulaka 235? Loko u li mun’we wa vona na wena u seketela ntirho lowu wa ku chumayela mahungu ya ku tsakisa! Leswi se swi nga yendliwa ka ntirho wa ku chumayela swa hlamalisa. Hambileswi ti kumanaka ni swikarhatu swa swinyingi swa ku patsa ni ku tsimbisiwa ku chumayela ni ku xanisiwa, Timboni ta Yehovha ti tama ti yendla hinkwaswu ti nga swi kotaka swaku ti chumayela mahungu ya ku tsakisa ka vanhu va matiko hinkwawu.

⁹ Leswo swi yendla swaku hi tivutisa leswi: Hi mhaka muni ku nga na nchumu lexi kotaka ku nyimisa ntirho lowu hambiloko hi kanetiwa hi Sathana? Leswaku hi hlamula xivutiso lexi, a hi voneni leswi nga yendleka ka nkama wa vapostolo. Phela ntirho lowu yendliwaka hi Timboni ta Yehovha wu sungule ka nkama wa vapostolo.

10. Hi wini ntirho lowu Yesu a a wu yendla, naswona i mpsini leswi a a swi tiva hi wona?

¹⁰ Yesu Kreste lweyi a nga sungula bandla la Wukreste a tinyiketele hintamu ka ku chumayela mahungu ya ku tsakisa. A yendle leswo wutomi la yena hinkwalu, siku lin’wani a te: “Ni fanele ni ya chumayela mahungu ya ku tsakisa ya Mfumu wa Xikwembu . . . hikusa hi swona ni nga rhumiwa swona.” (Luk. 4:43) Yesu a a swi tiva swaku a a sungula ntirho lowu a a nga ta swi kota ku wu heta yena a li yexe. Na a nga se fa a vule swaku mahungu ya ku tsakisa a ma ta chumayeliwa “amisaveni hinkwayu.” (Mar. 13:10) Kambe a swi ta yendlekisa ku yini leswo, naswona i vamani lava a va ta swi yendla?

11. Hi wini ntirho wa lisima lowu Yesu a nga wu nyika vadjondzisiwa va yena, naswona i mpsini leswi a swi ta va pfuna?

¹¹ Loko se a file a tlhela a pfuxiwa, Yesu a humelele ka vadjondzisiwa va yena a va nyika ntirho wa lisima, a ku: “Fambani mi ya djondzisa vanhu va matiko hinkwawu leswaku va va vadjondzisiwa va mina, mi va tsakamisa hi vito la Papayi ni la N’wana ni la moya wa ku kwetsima, mi va djondzisa ku yingisa hinkwaswu leswi ni nga mi byela swona. Vonani! Ni na n’wina masiku hinkwawu anze ku helisiwa misava.” (Mat. 28:19, 20) Leswi Yesu a nge te: “Ni na n’wina” a swi kombisa swaku a a ta pfuna vadjondzisiwa va yena ku yendla ntirho lowu wa ku chumayela ni ku djondzisa vanhu, naswona a va swi lava ku pfuniwa hi Yesu hikusa a vule swaku a va ta “nyenyiwa hi matiko hinkwawu”. (Mat. 24:9) Ku ni xin’wani lexi a xi ta pfuna vadjondzisiwa lava hikusa na a nga se tlhelela tilweni Yesu a vule swaku a va ta tiyisiwa hi moya wa ku kwetsima naswona a va ta va timboni ta yena “anze magamu ya misava.” — Min. 1:8.

12. Hi swini swivutiso swa lisima, naswona hi mhaka muni hi fanele hi kuma tinhlamulu ta swona?

¹² Ku ni swivutiso leswi swa lisima: Indjhe vapostolo va Yesu ni vadjondzisiwa van’wani va khale va wu nyike lisima ntirho lowu? Indjhe ntlawa lowu wa vavanuna ni vavasati va Vakreste va chumayelile hi Mfumu wa Xikwembu hambileswi a va kanetiwa hintamu? Indjhe va pfuniwile hi Yehovha, Yesu, tintsumi ni moya wa ku kwetsima leswaku va yendla ntirho lowu? Swivutiso leswi ni swin’wani swa hlamuliwa ka buku la Mintirho. Hi mhaka muni swi li swa lisima kuva hi ti tiva tinhlamulu ta kona? Hi lani Yesu a nga tshembisa hi kona a ntirho lowu a wu ta yendliwa anze “magamu ya misava.” Se ntirho lowu wu nyikiwe Vakreste hinkwavu va ntiyiso ku patsa na hina hi hanyaka ka nkama lowu wa wugamu. Hi mhaka leyo, i swa lisima hintamu kuva hi twisisa leswi nga tsaliwa ka buku la Mintirho.

13, 14. a) I mani a nga tsala buku la Mintirho, naswona a swi kume kwini leswi a nga swi tsala? b) Buku la Mintirho li vulavula hi yini?

¹³ I mani a nga tsala buku la Mintirho? A swi tsaliwanga ka buku la Mintirho swaku i mani lweyi a nga li tsala. Kambe marito lama nga ku sunguleni ma kombisa swaku a buku la Mintirho ni buku la Luka ma tsaliwe hi munhu mun’we. (Luk. 1:1-4; Min. 1:1, 2) Hi mhaka leyo, ku sukela khale ku vuliwa swaku Luka “dotori lweyi a rhandziwaka” ni lweyi a swi kotaka kahle ku tlhamusela swilo, hi yena a nga tsala buku la Mintirho. (Kol. 4:14) Buku leli li vulavula hi swilo leswi nga yendleka ku ringana 28 wa malembe. Ku sukela nkama lowu Yesu a nga tlhela a ya tilweni hi lembe la 33 E.C., anze ka lembe la 61 E.C., na ka ha chota kutsongo swaku Pawulo a humesiwa djele aRoma. Leswi Luka a tipatsaka ka swin’wani leswi a vulavulaka hi swona, swi kombisa swaku na yena a a li kona. (Min. 16:8-10; 20:5; 27:1) Swi nga yendleka swilo leswi Luka lweyi i nga mukambisisi wa kahle a nga swi tsala, a swi kume ka Pawulo, Barnaba, Filipi ni van’wani lava ku vulavuliwaka hi vona.

¹⁴ Buku la Mintirho li vulavula hi yini? Na ka ha chota malembenyana swaku ku tsaliwa buku la Mintirho, ka buku la Luka, Luka a vulavule hi leswi Yesu a nga swi yendla ni leswi a nga swi vula. Kambe ka buku la Mintirho ku tsaliwe leswi valandzeli va Yesu va nga swi yendla va tlhela va swi vula. Hi mhaka leyo, buku la Mintirho li vulavula hi vanhu lava nga yendla mintirho ya ku hlamalisa hambileswi a va voniwa na va li vanhu va ku kala ‘va nga djondzanga hintamu naswona va li vanhu va ku toloveleka’. (Min. 4:13) Hi marito matsongo buku la Mintirho li hi tlhamusela leswi bandla la Wukreste li nga sungulisa xiswona ni leswi li nga kulisa xiswona. Buku leli, li kombisa leswi Vakreste va ku sungula a va chumayelisa xiswona ni leswi a va swi yendla. (Min. 4:31; 5:42) Li tlhela li vulavula hi leswi moya wa ku kwetsima wu nga va pfunisa xiswona swaku va chumayela mahungu ya ku tsakisa. (Min. 8:29, 39, 40; 13:1-3; 16:6; 18:24, 25) Buku la Mintirho li vulavula hi mhaka ya lisima leyi Bibele hinkwalu li vulavulaka hi yona, leyi patsaka ku kwetsimisiwa ka vito la Xikwembu hi ku tirhisa Mfumu wa xona lowu Yesu Kreste a nga Hosi ka wona. Naswona li tlhela li kombisa swaku ntirho wa ku chumayela mahungu ya ku tsakisa wu fambe kahle hambileswi Vakreste a va xanisiwa hintamu. — Min. 8:12; 19:8; 28:30, 31.

15. Ku djondza buku la Mintirho swi ta hi pfunisa ku yini?

¹⁵ Swa tsakisa ku kambisisa leswi nga tsaliwa ka buku la Mintirho naswona swi tiyisa lipfumelo! Ku pimisa hi xikombiso xa Vakreste va ku sungula lava a va nga chavi nchumu naswona a va tirha hi matimba, swi ta khumba timbilu ta hina. Swi hi yendla hi lava ku tekelela lipfumelo la vona. Swi tlhela swi hi pfuna ku lunghekela ku yendla ntirho lowu hi nga nyikiwa wona wa ku ‘famba hi djondzisa vanhu’. Buku leli li yendleliwe ku ku pfuna ku swi twisisa kahle leswi nga tsaliwa ka buku la Mintirho.

16. Hi swini swilo swinharhu leswi buku leli li nga hi pfunaka hi swona?

¹⁶ Buku leli li yendleliwe yini? Li yendleliwe ku hi pfuna hi swilo swinharhu. 1) Ku hi tiyisekisa swaku Yehovha a tirhisa moya wa ku kwetsima swaku a hi pfuna ka ntirho wa ku chumayela ni ku djondzisa vanhu, 2) ku hi pfuna swaku hi tama hi hiseka hi ku kambisisa swikombiso swa vadjondzisiwa va Yesu va ku sungula, ni 3) ku hi pfuna swaku hi hlonipha nhlengeletanu ya Yehovha ni lava rhangelaka ntirho wa ku chumayela ni ku vonelela mabandla.

17, 18. Buku leli li tshamise ku yini, naswona i mpsini swin’wani swi nga ku pfunaka nkama lowu u djondzaka Bibele?

¹⁷ Buku leli li tshamise ku yini? U ta vona swaku buku leli li ni 8 wa swiyenge, naswona xiyenge hi xin’we xi vulavula hi tindzimana ta buku la Mintirho. A buku leli a li tlhamuseli ndzimana hi yin’we hi yin’we ya buku la Mintirho, kambe li hi pfuna ku djondza xanchumu ka leswi nga yendleka ni ku hi pfuna ku vona swaku hi nga swi tirhisisa ku yini ka wutomi la hina. A ku sunguleni ka ndzima ku ni marito lama kombisaka pontu ya lisima ya ndzima naswona ku kombisiwa xiyenge xa buku la Mintirho lexi nga ta djondziwa.

¹⁸ Ku ni swilo swin’wani ka buku leli leswi nga ta ku pfuna ka djondzo ya wena ya Bibele. Nkama lowu u pimisaka hi leswi u nga swi djondza ka Bibele, mafoto ma ta ku pfuna ku vona swilo swa ku tsakisa leswi nga tsaliwa ka buku la Mintirho. Tindzima ta tinyingi ti ni makwadru lawa ma vulavulaka hi timhaka ta lisima. Makwadru man’wani ma vulavula hi wutomi la vanhu lava nga ka Bibele lava hi nga tekelelaka lipfumelo la vona. Se makwadru man’wani ma vulavula hi tindhawu, leswi nga yendleka, mahanyelo kumbe vanhu van’wani lava ku vulavuliwaka hi vona ka buku la Mintirho.

19. I mpsini leswi minkama yin’wani swi lavaka hi tivutisa swona?

¹⁹ Buku leli li nga ku pfuna kuva u tikambisisa. Ku nga na mhaka swaku u ni nkama muni na u chumayela mahungu ya ku tsakisa, i swinene ku nyima u tivutisa swaku i mpsini u swi rhangisaka ka wutomi la wena naswona u wu vonisa ku yini ntirho wa ku chumayela. (2 Ko. 13:5) Tivutisi: ‘Ni wu vona na wu li wa xihantla ntirho wa ku chumayela? (1 Ko. 7:29-31) Ni chumayela mahungu ya ku tsakisa hi ku hiseka naswona na tiyiseka hi leswi ni swi chumayelaka? (1 Tes. 1:5, 6) Ni yendla hinkwaswu ni nga swi kotaka ka ntirho wa chumayela ni wa ku djondzisa vanhu?’ — Kol. 3:23.

20, 21. Hi mhaka muni ntirho wa hina wu li wa xihantla naswona hi fanele hi tinyimisela ku yendla yini?

²⁰ Hi nga tshukeni hi khohlwa swaku ntirho wa hina wa lisima hintamu i ku chumayela ni ku djondzisa vanhu. Loko masiku ma ya ma famba ntirho lowu wu ya wu va wa xihantla hintamu, hikusa misava leyi yi kusuhi hintamu ni ku helisiwa. Swoswi i nkama wa kuva hi pfunisa ka ntirho lowu nga ta yendla swaku vanhu va vanyingi va ponisiwa. A hi swi tivi swaku ka ha ni vanhu vangaki va timbilu tatinene lava nga ta yingisa leswi hi va chumayelaka swona. (Min. 13:48) Kambe hi ni ntirho wa ku va pfuna na nkama wa ha pfumela. — 1 Tm. 4:16.

²¹ I swa lisima kuva hi tekelela xikombiso xa vachumayeli va ku hiseka va nkama wa vapostolo. Hi navela swaku buku leli li ku pfuna ku tama u chumayela hi ku hiseka na u nga chavi nchumu. Li tlhela li tiyisa ku tinyimisela ka wena leswaku u tama u nyikela “wufakazi leli tiyeke hi Mfumu wa Xikwembu”. — Min. 28:23.